الاثنين، مايو ٢١

هي المخ وانا العضلات

طول عمري نفسي اتكلم عنها واحكي لحد قد ايه بحبها طبعا لأن هي اللي فتحت عيني لقيتها الريسه والزعيمه والثورجيه والمحامي بتاعي واختي واخويا كمان وسعات بتبقى المفتريه البلطجيه بس ده زي شغل العيال بلطجة اطفال يعني
اصل هي اكبر مني بسنه واحده وكنا طول عمرنا كأننا توأم وماليش اخ اكبر
ولأنها شخصيه قياديه بطبعها وانا اصلا وانا صغير كنت جبان جدا وبمشي وراها على طول فكانت هي الزعيم وانا بنفذ على طول وطبعا كنا لما بننضرب كنا بننضرب سوا
لما كان بابا يبعتنا نجيب حاجه من الشارع لازم ننزل مع بعض وطبعا كنا بنمشي بطريقه رائعه نقعد نتنطط ونتمرجح في طريقه غريبه وهي مشيه مش عارف اوصفهالكوا ازاي المهم مره كنا ماشيين وعدينا جنب اتنين مخطوبين ماشيين على مهلم طبعا واحنا روحنا ورجعنا وهما لسه في اول الشارع روحنا ضاحكين عليهم قوي وقولنالهم هو انتوا لسه هنا راحوا ضحكوا قوي مش عارف ليه
ولما كنا نجيب حاجه حلوه ونقعد نخطط ان احنا نشترك وتجيب حاجه معينه بس غاليه شويه ونقعد نحوش لحد منجمع تمنها ونروح سوا نجيبها احساس فظيع بالإنتصار وكانت هي اطول مني بشويه وكانت تحط ايدها على كتفي واحنا ماشيين وانا اقولها هو انا امتى هاطول واحط ايدي على كتفك واحنا ماشيين وكانت تقولي ان هي هتفضل اطول مني لكن سبحان العاطي الوهاب انا بقيت دلوقتي اطول منها بحوالي 20 سم
بس للأسف ماسكه عليا صورهكان خالي صورهالنا عند مصوراتي صاحبه وكنت لابس بدله لبني وهي لبسوها طرحة عروسه وكنا شكلنا مسخره العريس قصير جدا والعروسه عماله تضحك عليه
الغريب اني لما كبرت وبابا خلاها تبطل تنزل معايا نشتري من الشارع عشان انا كبرت ومش محتاجها
تعبت جدا لأني كنت بحب جدا هزارنا في الشارع وكلامنا وفضفضتنا لبعض
لأ واللي يغيظك انهم عايزيني اخد عبده معايا وده واد كسلي طول عمره وانا متعود اني امشي مع دماغ بتفهم مش دماغ نسوسه
طول عمري وهبه هي اللي بتتخانق في البيت عشان تجيبلي حقي وابويا يتغاظ منها ويقولها هو انتي المحاميه بتاعته
بس هي ايه ولا يهمها برده ترجع تتكلم تاني مش عارف افتكر ايه ولا ايه
هي اللي خلتني اعرف انجليزي كويس لنها بتحبه جدا وهي اللي كانت بتخليهم يدوني دروس عند المدرسين اللي هي عارفاهم كويسين وكانت بتساعدني فيه وطبعا انا دلوقتي كل ما اتزنق في كلمه اسألها اصلها اتخرجت من اداب انجليزي وعملت دبلومه في الترجمه كمان اصلها شاطره وغاويه مذاكره انا بقى ما صدقت خلصت الكليه ومش عايز اعتبها تاني
وعشان تكمل افضالها عليا بتشتغل دلوقتي في المصريه للإتصالات وبتجيبلي اي نمره انا عايزها وببلاش من غير ما اتصل بالدليل ويا سلام لو حد عاكسني بالتليفون بعرف اسم عائلته كلها وعنوانه ايوه انا بقيت راجل صاحب اتصالات
وحتى في موضوع الجواز هي اكتر واحده بتشجعني وبتساعدني
يا رب اسعدها واكرمها وحقق لها كل احلامها
وختاما تحياتي اليك يا اختي وتاج راسي

هناك ٨ تعليقات:

يعقــــوب .... يقول...

ربنا يخليلك اختك...بصراحة كلامك جميل و شعورك طيب....و محدش بيقدر اد ايه الاخت ده بتكون فعلا زي الام و كل حاجة في الدنيا

Reema يقول...

the post is sooo great and touching man. rabena y5aleelak heba. may all ur dreams come true isa.
i have one little brother ( 11 yrs old). he's the cutest thing in my life. i hope one day he would write such a beautiful thing about me!
take care

Ehab يقول...

شكرا يا يعقوب وكان نفسي اكتبلك حاجه على مدونتك الجميله بس لقيتك شطبت وناوي تروح مش عارف ليه
اوعى تعمل كده وافتكر انت ليه ابتديت اصلا
وخساره تسيبنا انا صحيح لسه جديد عليك بس كان نفسي نبقى اصحاب
سلاااااااااااااااااااااااااام

Ehab يقول...

tanks reema so much for your sweet words and i'm sure that your brother is lucky as much as I'm for having you as a sister
and i'd love you to know that now you have tow brothers not only one
and I still hope that you are not taller than me because I'm not going to be taller than I'm now
with love
سلااااااااااااااااااااااااااام

SomeOne يقول...

أنا كمان أختي أغلى حد عندي
ربنا يخليهالي
ويخليكو لبعض
:)

Doba يقول...

جميلة قوى المشاعر الطيبة اللى بينك وبين هبة ربنا يخليكو لبعض دايما وحاولو تنهضو بالواد الغلبان التانى اللى دماغه على قده وارحمو ابوكو شوية بقى

انا يا عم مش هعاكسك لتجيب قرارى وانا مش ناقصة - تحياتى وقبلاتى لأختك العزيزة - وسلامى لك يا أخى العزيز

هبة برده

Ehab يقول...

يا سلام يا شادي انا بقيت مبسوط قوي لما بشوف صورتك عندي اصل انا شايف انك طالع فيها زي الملك فاروق
حاجه كده عليا الهيبه
شكرا ليك وربنا يباركلك في اختك ويسعدها ويسعدك
__________________________________
يا هبهوب احنا بنحاول بس المصيبه انه بقى صعب تغيير دماغه لأنها بقت تخينه قوي ومسيري في مره هابعتلك صورته عشان تعرفي المشكله اللي انا فيها
وبعدين احلى حاجه ان الواحد يكون عنده اختين بنفس الأسم
عقبال ما افرح بيكوا انتوا الأتنين
وسلااااااااااااااااااااااااااام

3abdo me7tas يقول...

ربنا يخلهالك يا رب
آمين