الاثنين، يوليو 20

عزام ذيدان

عزام ذيدان
بعد غيبه كتيييير حبيت بس اجي ارغي بكلمتين عن موقف حصل معايا من ضمن مواقف كتير سخيفه عماله تحصل بقالها فتره كده
كنت راجع من شغلي على البيت ونازل من الميكروباص العزيز بعد ما اتخنقت من الحر وعرق الناس وحاجه صعبه خالص وانا نازل كان نازل معايا واحد معلم كده لابس عمه وجلابيه وضخم الجثه مش فاكر كنا بنتكلم على عيب ايه في العربيه وبنضحك انا معرفهوش بس الراجل بيكملني بود كده فرديت عليه عادي يعني المهم
سألني هو حضرتك يا استاذ بلدك ايه قلتله بني سويف لكن مولود هنا قالي على بلده هو كمان تقريبا حاجه في الصعيد بس مش فاكر هي ايه وقعدنا نتكلم وهو يرحب بيا وانا ارحب بيه تقولشي هنبقى نسايب
قاللي هو حضرتك بتشتغل مش كده قلتله ايوه طبعا قالي يا خساره
خساره ليه يا جحش ودي قلتها في سري طبعا
قالي انا اصلي كنت عايز نفرين يشتغلوا معايا في اكتوبر
طيب وهو انا نفر برده يا حاج
لا يا استاذ مش انفار عمال انا عايز واحد يمسك الحسابات الصبح وواحد يسجل الأيرادات ويحصلها اخر النهار
بس لازم يبقوا متعلمين وناس محترمين انا كان معايا نفرين زي الفل بس الجيش خدهم الأتنين مره واحده ومحتاس دلوقتي وانا قرايتي وكتابتي على قدي خالص
قلتله خلاص ممكن اسألك عن حد عايز شغل انا اعرف ناس كتير في منطقتي بيدوروا على شغل
اتفقنا على كده واداني رقم تليفونه واخد رقمي علشان يكلمني ويسالني عملت ايه
وبالليل في نفس اليوم لقيته بيتصل بيا
الو ايوه يا استاذ ايهاب في حد عندك جاهز من الناس اللي هيشتغلوا
جاهز ايه يا احاج هو بنطلون بيتخيط احنا ميعادنا بكره هتصل بالناس دلوقتي اقولهم تعالوا صاحب الشغل طلبت معاه دلوقتي
" نسيت اقول انه تاجر فواكه في اكتوبر تقريبا بيبيع بالجمله للتجار والمحلات بالآجل وبعدين يحصل منهم فلوسه"
المهم قلتله لا مفيش حد جاهز دلوقتي
طيب ممكن حضرتك تجيلي دلوقتي ساعه واحده بس تسجلي الحساب ده وانا هدفعلك يوميه كامله
يومية ايه بس يا حاج الساعه دي على المسا عموما انا ممكن اعدي عليك وامري لله مش انت قريب هنا في المنيب
" المنيب دي منطقتي "
قاللي لا انا في منيل شيحه ودي حته بعدينا في اتجاه طريق الصعيد
قلتله ده مشوار بس مش مشكله هجيلك كمان ربع ساعه مسافة الطريق
وفعلا اخدت بعضي وركبت ورحت على المكان
قابلني على قهوه في اول المنطقه كده وقعد يكلمني ويعتذر علشان جابني في وقت متأخر وقعد يحكيلي عن الناس اللي كانوا شغالين معاه وازاي هو كان كريم معاهم وهم كانوا جدعان قوي
شربنا الشاي وقعد يحكيلي عن القهوه دي اللي قاعدين عليها بتاعة عمه الكبير وده ابن عمه اللي بيشتغل فيها خلص تعليمه وساب الوظيفه ومسك القهوه وتعليمه ايه بقى " سياسه واقتصاد!!!!!!
وادي اول الهجص بقى
قلت مش مشكله خليه يهجص تلاقي الواد معاه دبلوم تجاره وهو بس بيترسم عليا مش مهم يعني
قالي تعالي اوريك بيت عمي وبيتي وننتظر السواق اللي جايب الحموله على القهوه التانيه جوه
قلتله ماشي وفعلا قمنا وعدينا قدام بيتين كبار كده واحد بتاع عمه والتاني بتاعه
وعزم عليا تيجي تتعشى قلت له الله يخليك اتعشيت يا سيدنا بس خلصنا بقى انا شغلي الصبح بدري
قعد يرغي معايا بقى على التليفونات اللي باعتهاله ابن عمه من ايطاليا وانه عايز حد يفك له الشفره بتاعة عده N95 ومش عارف ده بيتعمل فين وقاللي تقدر تاخدها تعملها وتجيبها تاني
قلتله ربنا يسهل يا سيدي وقاللي انا جاني منها اتنين لو عجبتك هديك واحده منهم هديه
قلتله يا سيدي متشكر وبعدين قاللي انا مبقتش اقعد هنا كتير اخدت شقه كبيره في ساقية مكي وقاعد فيها وعندي هناك شقه بأجرها لو انت حبيت تاخدها هكرمك فيها هعملك عقد خمس سنين بإيجار 200 جنيه بس ومقدم 2000 جنيه بس
بصراحه بقى هنا بقى فقت خالص
موبايل هديه تمنه ضخم
وشقه اسطوره المكان اللي هو وصفه انا عارفه مفيش فيه شقه اقل من عشر اضعاف المبلغ اللي هو بيقول عليه
وشغل سهل بمرتب معقول
ايه النعيم ده كله بصراحه هو لسه مطلبش مني اي حاجه في المقابل لكن كنت اتأكدت بقى ان الراجل ده عايز حاجه مش مظبوطه بس ايه هي مش عارف
قاللي انت صليت العشا ولا لسه قلت له لسه قاللي الجامع لسه مفتوح تعالى علشان تصلي قلتله كويس ربنا يكرمك
وعلى باب الجامع قاللي ممكن اعمل دقيقه من تليفونك اكلم السواق اصل تليفوني عطلان زي ما قلتلك
قلتله وماله خد كلمه
وفعلا اتصل بالرقم وابتدأ يتكلم وانا واقف مستنيه يخلص
قاللي متدخل تصلي على بال ما اخلص التليفون
بصراحه ضحكت من هبل الفكره وقلتله وانت مش هتصلي يعني
قالي لا ما انا صليت قبل ما تيجي انت
فهمت الفوله وقلتله لا انت تلاقيك مكسل تصلي تعالى يا راجل نصلي سوا
حسيته وشه قلب واتغاظ
والبعيد عامل زي الحيطه بس الحمد لله احنا على باب الجامع قاللي انت قصدك ايه خلاص يا سيدي هدخل معاك الجامع واستناك كمان ودخل قعد قدامي رحت واقف ومخليه قبلتي قدام عيني والتليفون لسه معاه طبعا
صليت العشا وقعدت جنبه رحنا قايمين ولقيته بيقولي هو انت متوضيتش ليه قلتله اصلي كنت متوضي من المغرب الحمد لله قاللي يا سلام والشاي اللي شربناه متمضمضتش منه حتى انت شكلك مخوني يا استاذ ايهاب
ليه بس كده يا حاج لا سمح الله هو انا قلت حاجه
خد تليفونك اهو يا استاذ ايهاب انت شكلك مخوني بعد ما انا دخلتك بيوتنا وعرفتك بناسي وامنتك وهأمنك على فلوسي تقوم تشك فيا كده
ورسملي دور الشهيد الفدائي المجروح في كرامته
قلتله يا حاج عزام المثل بيقول حرص ولا تخون
وعادي يعني اني اتعامل بحرص في اول مقابله لينا مش حقي يعني ولا ايه
قلب سحنته كده وقالي لا يا استاذ ايهاب الواحد المفروض يعامل الناس زي ما بيعاملوه مش تخونهم كده
عملت عبيط طبعا وقلتله عموما انا اتأخرت العربيه شكلها هتتأخر ومضطر امشي بقى قاللي خلاص براحتك هي هتيجي على الساعه واحده بالليل قلتله لا كده هيبقى متأخر قوي انا ماشي
قاللي طيب والناس اللي هتجيبهم
قلتله بكره ان شاء الله هيكونوا معاك طبعا
طبعا انا كلمت الناس قلتلهم انسوا الشغلانه دي علشان باظت لأني متأكد انه لما ملقاش فيا فايده قالك انصب على الناس اللي هيبعتهم وهيبقوا واثقين فيه على حس اني انا اللي اعرفه وكده
تاني يوم الصبح كلمني يسالني هي الناس هتيجي قلتله لا بصراحه مش هيجوا خلاص كده فركش
قعد يزعق ويتخانق في التليفون الراجل الظاهر صعبان عليه النصبايه باظت
شتمني وشتمته وقفلنا السكه وخلصنا
حسبت الخلاصه لقيتني خرجت بكوباية شاي وكوباية ليمون وزجاجة سفن اب شربتهم على حسابه
وهو خد مني دقيقتين على الموبايل يعني انا برده كسبان بتاع جنيه وربع كده مثلا
بس اللي ضايقني قوي اني اعرف ان النصاب ده بيبقى ليه نظره في الناس ومبيختارش غير الطماع او المغفل
يا ترى هو شافني انهي في دول
هو ده اللي زعلني في الموضوع كله

سلااااام