الاثنين، يوليو 20

عزام ذيدان

عزام ذيدان
بعد غيبه كتيييير حبيت بس اجي ارغي بكلمتين عن موقف حصل معايا من ضمن مواقف كتير سخيفه عماله تحصل بقالها فتره كده
كنت راجع من شغلي على البيت ونازل من الميكروباص العزيز بعد ما اتخنقت من الحر وعرق الناس وحاجه صعبه خالص وانا نازل كان نازل معايا واحد معلم كده لابس عمه وجلابيه وضخم الجثه مش فاكر كنا بنتكلم على عيب ايه في العربيه وبنضحك انا معرفهوش بس الراجل بيكملني بود كده فرديت عليه عادي يعني المهم
سألني هو حضرتك يا استاذ بلدك ايه قلتله بني سويف لكن مولود هنا قالي على بلده هو كمان تقريبا حاجه في الصعيد بس مش فاكر هي ايه وقعدنا نتكلم وهو يرحب بيا وانا ارحب بيه تقولشي هنبقى نسايب
قاللي هو حضرتك بتشتغل مش كده قلتله ايوه طبعا قالي يا خساره
خساره ليه يا جحش ودي قلتها في سري طبعا
قالي انا اصلي كنت عايز نفرين يشتغلوا معايا في اكتوبر
طيب وهو انا نفر برده يا حاج
لا يا استاذ مش انفار عمال انا عايز واحد يمسك الحسابات الصبح وواحد يسجل الأيرادات ويحصلها اخر النهار
بس لازم يبقوا متعلمين وناس محترمين انا كان معايا نفرين زي الفل بس الجيش خدهم الأتنين مره واحده ومحتاس دلوقتي وانا قرايتي وكتابتي على قدي خالص
قلتله خلاص ممكن اسألك عن حد عايز شغل انا اعرف ناس كتير في منطقتي بيدوروا على شغل
اتفقنا على كده واداني رقم تليفونه واخد رقمي علشان يكلمني ويسالني عملت ايه
وبالليل في نفس اليوم لقيته بيتصل بيا
الو ايوه يا استاذ ايهاب في حد عندك جاهز من الناس اللي هيشتغلوا
جاهز ايه يا احاج هو بنطلون بيتخيط احنا ميعادنا بكره هتصل بالناس دلوقتي اقولهم تعالوا صاحب الشغل طلبت معاه دلوقتي
" نسيت اقول انه تاجر فواكه في اكتوبر تقريبا بيبيع بالجمله للتجار والمحلات بالآجل وبعدين يحصل منهم فلوسه"
المهم قلتله لا مفيش حد جاهز دلوقتي
طيب ممكن حضرتك تجيلي دلوقتي ساعه واحده بس تسجلي الحساب ده وانا هدفعلك يوميه كامله
يومية ايه بس يا حاج الساعه دي على المسا عموما انا ممكن اعدي عليك وامري لله مش انت قريب هنا في المنيب
" المنيب دي منطقتي "
قاللي لا انا في منيل شيحه ودي حته بعدينا في اتجاه طريق الصعيد
قلتله ده مشوار بس مش مشكله هجيلك كمان ربع ساعه مسافة الطريق
وفعلا اخدت بعضي وركبت ورحت على المكان
قابلني على قهوه في اول المنطقه كده وقعد يكلمني ويعتذر علشان جابني في وقت متأخر وقعد يحكيلي عن الناس اللي كانوا شغالين معاه وازاي هو كان كريم معاهم وهم كانوا جدعان قوي
شربنا الشاي وقعد يحكيلي عن القهوه دي اللي قاعدين عليها بتاعة عمه الكبير وده ابن عمه اللي بيشتغل فيها خلص تعليمه وساب الوظيفه ومسك القهوه وتعليمه ايه بقى " سياسه واقتصاد!!!!!!
وادي اول الهجص بقى
قلت مش مشكله خليه يهجص تلاقي الواد معاه دبلوم تجاره وهو بس بيترسم عليا مش مهم يعني
قالي تعالي اوريك بيت عمي وبيتي وننتظر السواق اللي جايب الحموله على القهوه التانيه جوه
قلتله ماشي وفعلا قمنا وعدينا قدام بيتين كبار كده واحد بتاع عمه والتاني بتاعه
وعزم عليا تيجي تتعشى قلت له الله يخليك اتعشيت يا سيدنا بس خلصنا بقى انا شغلي الصبح بدري
قعد يرغي معايا بقى على التليفونات اللي باعتهاله ابن عمه من ايطاليا وانه عايز حد يفك له الشفره بتاعة عده N95 ومش عارف ده بيتعمل فين وقاللي تقدر تاخدها تعملها وتجيبها تاني
قلتله ربنا يسهل يا سيدي وقاللي انا جاني منها اتنين لو عجبتك هديك واحده منهم هديه
قلتله يا سيدي متشكر وبعدين قاللي انا مبقتش اقعد هنا كتير اخدت شقه كبيره في ساقية مكي وقاعد فيها وعندي هناك شقه بأجرها لو انت حبيت تاخدها هكرمك فيها هعملك عقد خمس سنين بإيجار 200 جنيه بس ومقدم 2000 جنيه بس
بصراحه بقى هنا بقى فقت خالص
موبايل هديه تمنه ضخم
وشقه اسطوره المكان اللي هو وصفه انا عارفه مفيش فيه شقه اقل من عشر اضعاف المبلغ اللي هو بيقول عليه
وشغل سهل بمرتب معقول
ايه النعيم ده كله بصراحه هو لسه مطلبش مني اي حاجه في المقابل لكن كنت اتأكدت بقى ان الراجل ده عايز حاجه مش مظبوطه بس ايه هي مش عارف
قاللي انت صليت العشا ولا لسه قلت له لسه قاللي الجامع لسه مفتوح تعالى علشان تصلي قلتله كويس ربنا يكرمك
وعلى باب الجامع قاللي ممكن اعمل دقيقه من تليفونك اكلم السواق اصل تليفوني عطلان زي ما قلتلك
قلتله وماله خد كلمه
وفعلا اتصل بالرقم وابتدأ يتكلم وانا واقف مستنيه يخلص
قاللي متدخل تصلي على بال ما اخلص التليفون
بصراحه ضحكت من هبل الفكره وقلتله وانت مش هتصلي يعني
قالي لا ما انا صليت قبل ما تيجي انت
فهمت الفوله وقلتله لا انت تلاقيك مكسل تصلي تعالى يا راجل نصلي سوا
حسيته وشه قلب واتغاظ
والبعيد عامل زي الحيطه بس الحمد لله احنا على باب الجامع قاللي انت قصدك ايه خلاص يا سيدي هدخل معاك الجامع واستناك كمان ودخل قعد قدامي رحت واقف ومخليه قبلتي قدام عيني والتليفون لسه معاه طبعا
صليت العشا وقعدت جنبه رحنا قايمين ولقيته بيقولي هو انت متوضيتش ليه قلتله اصلي كنت متوضي من المغرب الحمد لله قاللي يا سلام والشاي اللي شربناه متمضمضتش منه حتى انت شكلك مخوني يا استاذ ايهاب
ليه بس كده يا حاج لا سمح الله هو انا قلت حاجه
خد تليفونك اهو يا استاذ ايهاب انت شكلك مخوني بعد ما انا دخلتك بيوتنا وعرفتك بناسي وامنتك وهأمنك على فلوسي تقوم تشك فيا كده
ورسملي دور الشهيد الفدائي المجروح في كرامته
قلتله يا حاج عزام المثل بيقول حرص ولا تخون
وعادي يعني اني اتعامل بحرص في اول مقابله لينا مش حقي يعني ولا ايه
قلب سحنته كده وقالي لا يا استاذ ايهاب الواحد المفروض يعامل الناس زي ما بيعاملوه مش تخونهم كده
عملت عبيط طبعا وقلتله عموما انا اتأخرت العربيه شكلها هتتأخر ومضطر امشي بقى قاللي خلاص براحتك هي هتيجي على الساعه واحده بالليل قلتله لا كده هيبقى متأخر قوي انا ماشي
قاللي طيب والناس اللي هتجيبهم
قلتله بكره ان شاء الله هيكونوا معاك طبعا
طبعا انا كلمت الناس قلتلهم انسوا الشغلانه دي علشان باظت لأني متأكد انه لما ملقاش فيا فايده قالك انصب على الناس اللي هيبعتهم وهيبقوا واثقين فيه على حس اني انا اللي اعرفه وكده
تاني يوم الصبح كلمني يسالني هي الناس هتيجي قلتله لا بصراحه مش هيجوا خلاص كده فركش
قعد يزعق ويتخانق في التليفون الراجل الظاهر صعبان عليه النصبايه باظت
شتمني وشتمته وقفلنا السكه وخلصنا
حسبت الخلاصه لقيتني خرجت بكوباية شاي وكوباية ليمون وزجاجة سفن اب شربتهم على حسابه
وهو خد مني دقيقتين على الموبايل يعني انا برده كسبان بتاع جنيه وربع كده مثلا
بس اللي ضايقني قوي اني اعرف ان النصاب ده بيبقى ليه نظره في الناس ومبيختارش غير الطماع او المغفل
يا ترى هو شافني انهي في دول
هو ده اللي زعلني في الموضوع كله

سلااااام

هناك 22 تعليقًا:

زهرة الكاميليا يقول...

هههههههههههههه

والله أنت مش رح تجيبها لبرّ ..
شو هالبراءة ياللى عم تبرق بعويناتك؟

معلش أصل باخد دروس فى اللهجة السورية عشان أفهم جارتى.

المهم ..
كان بإمكانك تفادى كل هذا بكلمتين .. كلمتين وبس.

للأسف .. نحن فى زمان .. لا تمطر فيه السماء غير الماء !

فهمت؟

أوعى تعمل كدة تانى .. المرة دى ربنا سلّم .. المرة الجاية مش هيكون المعلم عزام وحده , ممكن - لا قدّر الله - يكون فى انتظارك هو وعصابته ويستولون على ما معك دون شاى أو ليمون.
بعيد الشر عنك.



مش تلعب مع العيال الوحشين.
خليك حلو.



تحياتى أخى العزيز

Lyssandra يقول...

ههههههههههههه
يانهار أبيض ؟؟

بص يا عم إيهاب
أنا لاحظت كام حاجه كده

أولها انك حد طيّب وشهم وخدوم
يمكن عشان كده حب ينصب عليك
النصاب مش بيختار الطماع أو المغفل بس
لأ ده بيدوّر أكتر علي الحد الشهم اللي ممكن يخدم ويمد إيده من غير ما يفكر إيه جاي في المقابل
واللي بيقدم الخير من غير ما يعرف بيقدمه لمين

عموما انت اتصرفت صح جداااااا
وعندك حق : حرص ولا تخوّن

بجد الحمد لله انك رجعت من عند الراجل ده سليم .. كويس انه مش اتهوّر عليك بعد ما بوظت له النصباية وشوهت صورته في عالم الاجرام :)

----

بحييك بجد علي تصرفك

خالص تحياتي
أختك
Lyssa

وومن يقول...

ههههههههههههههههههههههه انت دماغ والله والراجل ده فظيع يالهوي

فكرتني بواحد صحبتي اتسرقت بطريقة مشابهه في مول
بس هي بقي جه واد امور وروش كدة وفي ايدة موبايل خرافة وقالها بليز ممكن دقيقة من موبايلك موبايلي فاصل شحن

ثانية وموبايلها كان في ايدة واتصل بواحد وكلمة علي انه بيدور عليه وهبا في ثانية تاه في الزحمة

وجتلي مفحومة من العياط وتحكيلي وانا اضحك وهي تعيط انا اضحك وهي تعيط

عادي لسه يا ما هانشوف في الأيام السودة دي
حمد الله علي سلامتك

ساره يقول...

تعرف انا فيني طبع ما احب اعطي موبايلي لحد ... حتى اشوف نظرات اللي يطلبه مني الموبايل اني بخيله او ماعندي ذوق او ما احب اساعد الناس ... وانا ولا يهمني :)

لاني بختصار اقرف احد يمسك موبايلي مش لاني ما احب اساعد الناس .. يعني العاده اللي فيني نجتني كثير وانا ما ادري :)

كون بخير

ahmed_k يقول...

هههههههههه معلش يا هوبه
تعيش وتاخد غيرها
وأحمد ربنا إنها جات على أد كده

وحشنا يا هوبه متبقاش تتأخر تاني
مع خالص تحياتي

انا ودماغي يقول...

ههههههههههههههههههههههههه

معلش تعيش و تاخد غيرها

اكيد زمانه بيدعى عليك دلوقت

أنا بقى لو منك كنت بعتله صحابى و المكسب بالنص يا معلم

ياريت تبقى تشغل مخك شوية P:

funky girl يقول...

هههههههههههههههههههههه
دانت طلعت طيب اوي على فكرة
:)
بس الحمد لله جت سليمة

هندسة وصفية يقول...

لووووووووووووووووووول
و انت ايه الي يوديك اصلا من الاول؟؟

Doba يقول...

اخيرا كتبت حاجة لذيذة
بقالك قرن مكتئب كده وعايشلنا ف دور العووووو

كويس انك كنت مصحصح دماغك وعرفت الفوله من أولها وانك لحقت اصحابك

زى م كاميليا مقالت

متلعبشى مع الاولاد الوحشين

يلا باى
هبة

شقاوة مراهقة يقول...

ههههههههههههههههههههههه

لذيذه بجد ..

انت طيب اوي وعــ نياتك خالص .. بس صاحي فـ نفس الوقت .. ودي حاجه كويسه ..

بس الحمد لله عدت عــ خير ..

ابقى خد بالك من نفسك بقى ..

وخليك مفتح دايما ..

تحياتي حضرتك ..

promise is promise يقول...

يا استاذ ايهاب احمد ربنا انها جت على قد كده كان زمانك بتقول على الموبيل عوضى على الله او لا قدر الله كان حصل اكتر من كده

تانى مره ما تروحش مع حد مكان ما تعرفوش

فاكر زمان كانوا بيقولوا لنا واحنا صغيرين اياك حد يقولك تعال اوديك عند بابا وتروح معاه او حد يديك حاجه وتاخدها
من الواضح انك لازم تراجع قاموس النصايح دى يمكن تفيدك

دمت بكل خير وتقبل مرورى
والسلام ختام

كيــــــــــــارا يقول...

يالهوي مش عارفه ليه كنت حاسه انه نصاب

بس هو ليه اختارك انت دا السؤال ؟

معلش ياايهاب نصيب خلي بالك من نفسك بعد كدا

*البت المشمشية *حلوة بس شقية * يقول...

هههههههههههه
انامش قادرة امسك نفسى منالضحك يا هوبا

سبهللة يقول...

جامد ابوست دة
بس انت عجبتنى طلعت ناصح
انا لو مكانك كنت اتظبط

mimi يقول...

المهم انك طلعتلك بفرق حساب جنيه وربع

بس برافو عليك

ياتري لو كان اتنصب عليك

كنت هتكتب ايه؟؟؟

dodoo يقول...

هههههههههههههههههه

اهو انا مشكلتى السوده بقى ان انا بثق فى اى حد بسرعه

وبقدم حسن النيه مع اى حد بس بعد كده لانى اخدت ع دماغى كتير بقيت حريصه ومشيت بالحكمه دى

" فكر قليلاً قبل ان تثق كثيراً "

وعلى فكره مش لازم يكون شاف فيك انك طماع او مغفل

هو ممكن يكون عمل كده لانك كنت بتكلمه تلقائيه وفتحتوا مع بعض كلام وكنتوا بتهزروا فقال لما اطلعلى بنصبايه

عااااامة ادينا بنتعلم وانت الحمد لله طلعت منها على خير

تحياتى

اقصوصه يقول...

نفدت بجلدك هالمره

وعدت على خيييير :)

GeHaD-----(male) يقول...

يانهار ابيض دا انا ركبي سابت وانا بقرا الموقف دا ربنا يكون في عونك ياعم ايهاب
بس انت بجد طلعت راجل

GHARAM يقول...

الراجل ده نصاب عبيط،هو فاكرك لسه طفل والا أيه؟؟؟
والا يمكن هو نصب على ناس كتير بالطريقه دي ووقعوا في الفخ

insomniac يقول...

اخص!
انت لا طماع و لا مغفل، هو اللى عشان طماع افتكر طيبتك هبل!

و لا يهمك، انا اعرف ناس سذج عن حق كانو ممكن يصدقوا تحت بند "ليه يعني حد يضحك عليا، للدرجة دي فيه ناس وحشة"
:)

ahmed_k يقول...

كل سنه وأنت طيب يا هوبه
وبعوده عليك رمضان بكل الخير والصحه والسعاده
ورمضان الجاي تكون في بيت العدل

مرجانة يقول...

ازيك يا شنكوتي
كل سنة وانت طيب
ربنا يحفظك من اولاد الحرام والذيم في قلوبهم مرض
انه عصر يتوه فيه الطيب والشرير ويختلط الصالح بالطالح والحابل بالنابل
تحياتي