الاثنين، أكتوبر 29

النهارده فرحي يا جدعان




الشنكوتي عملها ولبس الدبله يا رجاله

اخيرا وبعد انتظار سنتين
بعد ما كنت مرت علينا لحظات حسيت اني بحارب طواحين الهواء زي الراجل اللي بيقولوا عنه ده
الحمد لله من عند ربنا كده المشاكل انكشحت شويه والدنيا سلكت كده فجأه وهوب لقيت نفسي بلبس الدبل يوم الجمعه 26اكتوبر اللي فات الحمد لله

انا قبل ما اجكي عن جو الفرح واللي حصل فيه حبيت بس اقول للناس واوضح للكل ان الموضوع مجاش بالساهل كده
لأن مفيش حاجه حلوه في الدنيا بتيجي سهله علشان بس الناس اللي عمالين يتكلموا عن الظروف والمشاكل ومش عارف ايه ويقولك خلاص مفيش فايده وزمن الحب والتضحيات انتهى
وتلاقي كل واحد منهم عمال يكلمك عن ان هو عمل الصح لما انهى علاقة الحب بتاعته علشان ميعطلهاش ويوقف عمرها على ظروفه
وهي برده تعمل فيها شهيده وهوب تسيبه وتقوله انا بعفيك من المسؤليه وبعفيك من التزامك ناحيتي لو هسببلك مشاكل

حرام عليكم هو انتم بتحسبوا ان الحياه كلها ورد وياسمين
الدنيا مليانه مشاكل هتقابلكم في حياتكم ولازم تتعودوا تتحدوها وتتغلبوا عليها
ولا انت وهي لما كنتم بتقولوا لبعض انا مستعد اواجه الموت علشانك يا سحر تقله وانا كمان يا وائل كنتم فاكرين الموت بتاع الكارتون يعني والتحدي الأكبر هو علبة الكانز اللي هتفتحهالها بنفسك يا سبع البرمبه
الدنيا مليانه مشاكل حقيقيه هتواجهكوا و-ملحوظه سحر ووائل دول بتوع مسرحية ريا وسكينه اللي هم ابو هني احمد بدير يعني- عموما حبيت بس اقول لكل واحد حبيبته تقله انا بعفيك من كيت وكيت وتقوله انا حاسه اني بقيت حمل عليك يقوم يهبدها قلمين وتهزيئه حلوه كده علشان تصدق وتقتنع انه مش هيفرط فيها بالساهل
وطبعا كل قطه حلوه البيه يقولها انا مش عايز اتعبك في الأنتظار اكتر من كده وانتي شايفه ظروفي عامله ازاي تقوم تخبطه بكعب الجزمه على دماغه وتقوله ده بعينك علشان يقدر هي متمسكه بيه قد ايه

الحاجه المهمه دلوقتي هي فرحي انا سيبكم من الناس المسحوكه دي
الحمد لله الفرح كان تحفه هو اصلا الموضوع اتفقنا انه عائلي في اضيق الحدود لظروف عائليه عندنا وعندهم بالصدفه الله يرحم امواتنا جميعا المهم
عبده اخويا قالي متزعلش هاعملك زفه تهبل اطمن
وكان ما قال صدقا لقيته جايب عربيتين شكلهم تحفه وركنهم قدام البيت قبلها بليله وجايب شنط واكياس سوده كبيره قوي سألته ايه ده يا ابني
قالي دول شوية صواريخ وشوية مفرقعات وعلبتين طلق صوت وورق ملون وحاجات كده لزوم الزفه
طبعا انا اتسرعت من المنظر اسطوانات طويله قوي كده ملونه وعلب تخينه مرسوم عليها انفجارات غريبه
وطبعا الأيس اللي بيتبخ من انابيب كده وبهدل الناس في الأفراح
وفي يوم الخطوبه نفسه لقيت شلته المكونه من اصناف عجيبه من الشباب معظمهم ابطال في الرياضه ماشاء الله اللي بتاع مصارعه روماني واللي جودو واللي رفع اثقال وناس كده شكلها مرعب عاملين زي الحيطه ايه دول ياد دول الجاردات اصحابي
كمان جايبلي بودي جاردات في الفرح
ما علينا اهو برده ينفعونا في الزنقه
رحنا الفرح وطبع القياده المذهله اللي قطعت خلفي خلاص كانت روعه
وصلنا واخدنا العروسه من الكوافير وطلعنا على البيت عندهم
بمجرد ما خرجنا من العربيه انطلقت الأنفجارات وورق ملون طاير في كل حته وصواريخ ومسدسات الصوت عامله زي الرز كل واحد ماسك مسدس وعمال يضرب بيه في الهواء
وقفت معاهم شويه وطبعا رقصت لما اكتفيت وبعدين طلعنا لبسنا الدبل في البيت فوق
واستأذنت حمايا العزيز اني اخرج انا وهم وخطيبتي بعد الفرح ووافق الحمد لله
واخدونا على مركب في النيل لوحدنا بس كانت تحفه
مش هاحكيلكم على المركب علشان دي كانت حاجه مجنونه خالص

سلام بقى وعقبالكم جميعا

الأحد، أكتوبر 21

كل الناس دي بتكتب عن ايه

في عندي كلام كتير

مش عارف اتكلم عن ايه بالظبط كل ما ادخل عند الناس الاقي كل واحد شايف حاجه غلط بيحكي عنها او شايف حاجه صح بره بلدنا
طبعا وعايزنا نعمل زيها

وفي ناس بتتكلم عن الدين والخلاق وبتحرب وتزعق علشان الناس تحس وحالها ينصلح

وفي ناس ناسيه الدين والأخلاق خالص وعايشينها كده هبلاوي الجبلاوي يعني زي ما تيجي تيجي
مش مهم اي حاجه المهم يكونوا مبسوطين

وفي ناس بتتحدى الدين والأخلاق والقيم وكل الرموز الجميله حوالينا علشان محدش يحاسبهم او جايز علشان الكل يبقى زي بعضه الدنيا تبقى كلها عك في عك

وفي ناس بتتفرج بس مش بتشارك براي يعني ممكن يكتب تعليق صغير يشجع بيه مره او يعترض مره بس مبيحاولش يبين رايه او يعرض قضيه في باله

وفي ناس زي العسل عايشه بدماغ فله تقريبا محششين يعني ميهمهمش من الليله كلها الا انه يطلع بمصلحه حلوه يظبط مع بنت لذيذه يديها ميعاد او يكلمها ويتعرف عليها يمكن العمليه تصيب وتطلع مزه في الجون مثلا

وفي ناس تانيه جايه تفرغ شحنة الكبت والمشاعر المدفونه الو المقتوله جواها وتلاقيهم يا اخي بيكتبوا شوية اشعار تجنن مش عارف بيجيبوا الكلام منين وفي الغالب بيكونوا حساساين ومش بيشاركوا في اي قضيه او راي

وفي ناس غاويه تسخين وخلاص يعني يدخل مدونه واحد مجاهد وبيدافع عن فكره معينه يشجعه ويهتف معاه وبعدين يخلع من دماغه وهوب يروح مدونه تانيه يلاقيها رقص وفرفشه ومزه بتكتب عن رغباتها الدفينه يبقى ناقص يطبلها علشان ترقص شويه

ويا سلام بقى لو وقعت في واحد من بتوع الحركات اياها يعني مثلا ليه فكر سياسي او فكر ديني او فكر سياسي ديني متفهمش هو عايز ايه بالظبط وتلاقي القضايا عنده سخنه ويقولك ده اتحبس من فتره ولسه خارج انا طبعا مبعيبش على اصحاب الأراء الحره بس فيه البعض بيستغل العمليه دي وينط يحط نفسه مع الأبطال مع انه اصلا ابن ..... كافر والعياذ بالله وتلاقي منهم اللي يطلعنا كلنا كفره ولاد .....

وفي ناس بقى تحس ان فيه قلم جامد قوي اترزعوه على غفله فجايين وهم حالفين يخربوا الدنيا خالص يتكلموا في كل حاجه وبكل صراحه ويمكن وقاحه بس المهم ميسيبوش قضيه ولا موضوع مهما كان شائك الا ويتكلموا عنه ويناقشوه بصراحه جدا وفي ناس منهم بصراحه بتجيب حاجات جامده قوي خاصة لما الصراحه بتاخد حقها تلاقي نفسك عرفت بلاوي منهم

وفيه ناس تانيه الموضوع بالنسبه ليهم مجرد مذكرات يفضي اللي جواه فيا ويريح دماغه مالهوش دعوه بحد ولا بيبص على كلام حد تاني خالص ودول مالهومش احتكاك بحد كتير حتى التعليقات مبيردوش عليها

وفيه ناس تانيه تلاقيها عامله علاقات ومعارف واصحاب يجي سبعتلاف واحد ويبقى مش عارف هو بيجيب وقت يروجح للناس دي كلها امتى بس وتلاقيه متابع في كل مدونه وصورته ملطوعه عند كل الناس وتدخل عنده تلاقي يجي سبعتلاف لينك للمدونات اللي عاجباه ودول منهم ناس فعلا دماغها حلوه قوي بس هاموت واعرف بيجيبوا الوقت منين

وفي ناس بتتكلم زي ما تكون بتحسب ان ده حمام بيتهم المصون تلاقي الفاظ هايله متتقالش في خناقة عربجيه وتلاقي شتيمه وقلة ادب مع عدم مراعاة ان ممكن بنات تدخل او اطفال ساعات وانا عارف ان البنات بقت عارفه كل حاجه وعصر السهوكه انتهى لكن الحياء حلو برده وميصحش اني استغل اني مختفي واتحول لكل قلة الأدب دي

وفي ناس بقى عجبوني قوي واحده لقيتها حاطه كومنت عندي حسبتها بتهزر لكن لما فتحت المدونه بتاعتها لقيتها فاكره نفسها في احدى بيوت الدعاره على رأي هنيدي صور اباحيه والفاظ سافله واللي يجننك مش البنت انما الناس اللي بتعلق عندها واحد بيشتم وواحد بيبدي استعداده للقاء العاطفي الحار وواحد عامل ناصح قوي قال ايه بيبدي اعجابه بصراحتها وصدقها خلاني كنت هاموت من الضحك عليه يا ابني دي شكلها رقاصه ومهتجيبش معاها حركات الأعجاب بعقلها دي

وطبعا المثال المناقض ليها هو البنت اللي بتكتب بجرأه مجنونه وبتدخل مواضيع شائكه جدا ومع ذلك تلاقي انها مش صايعه ولا هي اصلا تربية كابريهات بس الدنيا علمتها والقرأه والتلفزيون وكلنا دلوقتي عارفين كل حاجه لكن هي مبتتدعيش انا بريئه ومش فاهمه بتقول وتناقش وتتخانق بس هي لسانها طويل شويه

وفي ناس عاملها معارض يعني حاطط صور عجبته وناس مصاحبهم واي حاجه عايز يعرضها يعني

يا لهوي ده لسه في ناس كتير

اه كنت هانسى اصحابي الأعزاء الساده المثليين الله يهديهم حاجه تموت من الضحك لما الاقي واحد منهم بيجادل الناس ويتهم العلماء بالجهل والتخلف ويحول كل الحرام حلال ويستشهد على الأيات بالعكس كله عك في عك كده ومنهم ناس عارفه انهم بيغلطوا لكن زي اي حد فينا مش قادر يبطل نفسه يكون كويس ويقولك بصلي وبصوم لكن دي حاجه صعب اتخلى عنها ودول اتمنى ربنا يهديهم وينجيهم على القل هم على اول الطريق للصلح ما داموا عارفين ان فيه غلط ومش بينكروه ولو ان اللي يغيظك ان في منهم ناس دماغهم في المواضيع العاديه حلوه قوي لكن تيجي لحد الموضوع ده والعك يشتغل

وفي اللي بحتقرهم صراحه العلمانين اللي بيشتموا العلماء والرسول وكل ما هو متعلق بالدين يا اخي انت كفرت وقررت تروح النار بتغلط ليه في الناس دي الا اذا كنت متغاظ منهم زي الشييطان لما ربنا وعده بدخول النار قالك لازم الكل يروح في داهيه زيي

وعلى ذلك احب اقول لكل واحد ياريت كل واحد يفكر هو مين في دول ويقولي لو شاف اشكار تانيه ويقيمني انا نفسي ممكن اكون مين في دول

اصلي اكتشفت اني من كل خطأ شفته وقعت في جزء منه برده
ماعدا المثليه والإلحاد

تحياتي
سلاااااااااااااااااااااااااام

الخميس، أكتوبر 4

قال بيقولوا شعب طيب


من لا يرحم لا يرحم
رأيت في حياتي حاجات كتير بتحصل اكدتلي ان بلدنا خلاص مبقاش فيها حاجه اسمها رحمه
كلها مواقف شفتها بعيني
عربية البلديه او شرطة البلديه تمر في الشارع والباعه بيجروا كل واحد عمال يحاول يلحق يهرب قبل ما ياخدوا كل اللي حيلته المهم قفشوا بضاعة عيل صغير كان بيبيع هدوم وقماش في السوق اخدوا الفرشه كلها وحطوها في العربيه الواد مش عارف يعمل ايه عمال يجري وراهم ويعيط واحد منهم شاورله قاله خد ياد قرب هنا تعالى الواد جري بيحسبه هيحدفله البضاعه الراجل ضربه قلم على وشه وقع الواد في الأرض معرفش هو ضربه ليه يمكن علشان يحرم يعيط قدام رجال البلديه الشجعان
اب واقف عمال يزعق لأبنه علشان راحله المدرسه المدرسه قالتله انه مش بيعمل الواجب ضربه قلم على وشه عين الواد ازرقت من الضربه وفي البيت ربطه في السرير من غير اكل يوم كامل علشن الواد يعرف اهمية العلم
زوج راجع من الشغل تعبان لقى زوجته مش عامله اللي هو قال عليه وراحت لأمها من غير ما تقول راح ماسكها بالأقلام والشلاليت واللكميات كأنه في ماتش ملاكمه بس برده محسش انه شبع وفش غله راح جايب كوباية مياه معدنيه كبيره وفضل يضربها بيها في دماغها لحد ما الدم انفجر من رأسها ونزل على ايده ساعتها هدي شويه وسابها تقع على الكنبه علشان يستريح شويه
في الشارع شاب غلبان كده ماشي وفجأه امين شرطه وقف قدامه سأله فين ياد بطاقتك اتخض قاله حاضر هاطلعها اهي الأمين طبعا مستعجل قاله بسرعه يا ابن الم..... يا ..... الواد قاله طيب حضرتك بتشتم ليه هو انا عملت حاجه راح نازل على وشه بأقوى صفعه قدر يجمعها الواد عينه دمعت من الألم والذهول مش الم الصفعه لكن الم كرامته اللي نزفت كل دمها
مدرس في الفصل دخل لقى طالب بيكتب على السبوره قاله بتعمل ايه يا ابن ال.... وراح رافع ايده ورزعه قلم نسى الواد اسمه الواد صرخ وقال هاجيب ابويا راح برجله ضربه حتة شلوت كوم الواد على الأرض
شوية عيال في المدرسه ماسكين عيل غلبان كده ونازلين فيه تريقه وشتيمه ومعاكسات راح ماسك في واحد منهم اتلموا كلهم عليه ضربوه مع بعض وقطعوا هدومه وسابوه مرمي في الأرض بيبكي وراحوا يكملوا لعب
ام قاعده مع صاحبتها بترغي شويه الواد عمال يلعب فجأه لقيته راح بيلعب في الدولاب وقع نص الهدوم على الأرض حبت تعاقبه قامت جابت ملعقه وسخنتها على النار ومسكت ايده وحرقته بالملعقه علشان ميعملش كده تاني
أخ مش لاقي شغل وقاعد في البيت اخته بتنزل تشتغل كل يوم رجعت يوم متأخره طلب منها فلوس رفضت راح ماسكها من شعرها ونزل فيها ضرب لحد ما استسلمت واديته كل اللي معاها
سواق ميكروباص بيسابق واحد تاني علشان الدور الشارع ديق والعربيتين لازقين في بعض ست كبيره ماشيه على جنب الطريق بس مش على الرصيف شافها زمر لها علشان تغور بعيد بسرعه ملحقتش خبطها بقوه فظيعه علشان الفرامل مقدترش توقفه الست وقعت على جنب الطريق لا تنطق
في الشارع جنب بعض البائعين لقيتهم ماسكين واحد بيقولوا حرامي قلت يا ساتر جدعان فجأه لقيتهم بيضربوه كأه يهودي اقلام وشلاليت وضرب مبرح بصوره غير ادميه الواد هيموت في ايدهم مش عارف اقول ايه طيب افرض بعد ده كله طلع مش حرامي ولو حرامي يضربوه كده ويعذبوه كل ده الواد كان هيموت في ايدهم انقذه منهم ان الحكومه جت علشان تكمل عليه يمكن هو يستاهل مش عارف
خناقه في الشارع بين اتنين شباب فجأه اهل واحد منهم وجيرانه واصحابه اتدخلوا ومسكوا الواد الغريب يضربوه كل واحد كان بيضربه كأنه مش مسلم زيهم ولا حتى مصري زيهم كل واحد بيضرب بغل وعنف وكراهيه كأن الواد ده اغتصب نسائهم مع ان الموضوع خناقه على لعبة كوتشينه

النبي –ص- قال من لا يرحم لا يُرحم الناس بتستغرب اللي بيحصل في البلد من قلة بركه وشعور بلاقهر وكل اللي بيحصل ده السبب يا ناس مش ان الحكومه والسياسه وكل اللي بنقوله ده السبب ان احنا مبنرحمش بعض اللي بيقدر على حد بيطلع فيه كل الحقد والغضب والغل اللي جواه
انا من كتر ما شفت كرهت البلد كلها
وكنا زمان بيقولونا ان الشعب المصري شعب طيب قوي وغلبان الظاهر الحكايه دي خلاص راحت