السبت، ديسمبر 11

ارجوكم الدعاء

عرفت منذ ايام بإصابة والدة المدونه ساره في حادث ويبدو ان اصابتها شديده ارجو من الجميع الدعاء لها بالشفاء

الى اختي ساره ربنا يطمنكم عليها وتقوم لكم بالسلامه ويتم شفائها على خير


الثلاثاء، أكتوبر 26

شهر فات

شهر فات
وايه حصل من شهر فات
ايه حصل !!!!!
كان يوم ميلادها من شهر فات
من شهر فات صرخت حبيبتي من الألم
وخلال ساعات سمعت صوت انسان جديد
مبقتش انا وانتي وخلاص
نور اتخلق في حياتنا والفرح اترسم على ضحكتك
انا مش مصدق يا بشر
وبقيت انا اب لقمر
اما الغريب اني زمان لو كنت اشوف والدين جداد
اضحك عليهم وابتسم
شوف ابني شكله ايه
شوف بنتي ريالتها عسل
وده يقولك عن ذكاوة حضرته قال ايه عشان بيقول كلام اهبل عبيط
وبيقول كمان امبو يا بشر
دلوقتي انا الدور عليا كمان اقول
اضحك وافرح وانبسط لو تبتسم
ولو ةشاور للسما انا فوق اطير لحد السما
وانده ابويا وامي واخواتي كمان
عشان يشوفوا ويفرحوا بنتي بتعوج بؤها
من شهر الحمد لله ربنا رزقني ببنوتي الجميله الأستاذه " هنا" ابنتي العزيزه احساس لحد دلوقتي مش فاهمه انك تشوف كائن صغير عبيط كده ودمه خفيف كده موضوع جديد عليا وعلى امها طبعا وبالتالي احنا محتاسين شويه وما بين نصائح الأهل والبحث على النت في مواقع التربيه والطفوله وخبرات اللي خلفوا قبلينا بنحاول نمشي معاها الف باء اطفال طبعا انا كأب اعتقد ان دوري دلوقتي محدود قوي في مساعده بسيطه لغاده اني اشيلها شويه صغيرين او اجيبلهم حاجه عايزينها لكن المسؤليه معظمها تقريبا على غاده
برغم اني طول عمري عارف خلقها ضيق انما سبحان الله الأم برده تختلف عن اي حد تاني سهر وعياط طول الليل زن لأسباب غير معروفه ومع ذلك غاده صابره على ده كله عادي ربنا يقويها بقى
انا بحمد ربنا على نعمته وبشكر كل اصدقائي واخواتي اللي كانوا دايما بيسألوا عني وعن جميلتي هنا

السبت، أغسطس 14

الله اكرم


كل عام وانتم بخير

ربنا يتقبل منا ومنكم صيام الشهر الكريم ويقدرنا جميعا نجمع اكبر قدر من الخيرات والحسنات في الشهر الجميل اللي ربنا امرنا بالصيام فيه وجعل السنه بمقام فريضه والفريضه بمقام 27 فريضه

استغربت قوي من كم المسلسلات اللي هتتعرض في رمضان ونوعها هو اللي خلاني استغرب اكتر مشاهد عري ورقص وسفالات اكتر من الطبيعي وكأنهم بيتحدوا ربنا في الشهر الكريم وكأن الناس دي واخده عهد على نفسها تكون ضد الدين وضد التدين

ومع ذلك بيدعوا الفضيله

لما واحده مخرجه افلام متستاهلش اقول اسمها عندي تغلط في عمرو خالد وتقول صوته بينرفزني وتدعي تقول ربنا ما يكتب عليا الحجاب ابدا نرد عليها بأيه

اولا عمرو خالد بيتحارب من زمان من اللي زيها لأنهم خايفين دعوته تحول الناس كلها للدين فيتبقى شياطين الأنس ويتكشفوا قدام كل الناس علشان كده بيكرهوه
زمان الكفار برده حاربوا النبي وقالوا عنه كتير برغم ان لو هم مقتنعين انه شاعر او مجنون زي ما قالوا كانوا مش هيشغلوا دماغهم بيه اصلا لكن كلمة الحق بتوجعهم هم خايفين على عيشتهم اللي معتمده على الفساد

عموما انا بس بدعي الناس على قد ما تقدروا في رمضان تقاطعوا المسلسلات والبرامج اللي فيها عري وسفاله افتكروا يا جماعه لما تيجوا يوم القيامه ونبقى مستنين حسنات ورحمات رمضان ومستنين نطلع من عتقاء النار تفتكروا المسلسلات دي هتنفعنا


ربنا اجعلني وكل احبائي من عتقائك من النار


كل سنه وانتم طيبين

الاثنين، يوليو 19

حكايات

اول حكايه عن طفل كان كل يوم بيحلم انه هيهرب من بيت اهله ويجري بعيد بعيد لحد ما يقابل بيت في ناس طيبين يحبوه ويهتموا بيه ويدوله الحمايه والحنان اللي بيحلم بيهم وانه هيعيش معاهم في حلم جميل ويكون طوع ليهم ويكون سندهم لما يكبروا وبعدين لما يكبر يروح يقابل اهله دولو ويقولهم انه محتاجهمش وهم اللي يحتاجوه فيعطف عليهم لكن يفضل مع اهله اللي ربوه
ودي اخرة فرجة العيال الزبله الصغيره على الأفلام العربي هيتنططوا على اهاليهم
تاني حكايه عن زوجه عايشه مع زوج فقير قوي قوي وكمان مفتري عليها قوي وبيضربها كل يوم ضرب موت الجيران كلهم زهقزا من التدخل كل يوم وبقوا يسمعوها بتنضرب ويقولك دول زي كل يوم سيبك منهم الزوجه برغم الجهل وبرغم الفقر وبرغم عدم جمالها بتحلم شوف العجب طلعت عندها قلب وهقل بوبتحلم
عارفين بتخلم بأيه
بتحلم انها هتهرب مع واحد قريبها من البلد بيحبها وانها هتطلب الطلاق وهتتجوز الواد اللي بيحبها ده وهتعيش مستريحه ومتهنيه
بتحلم انها هتبهدله وانه هيتلطم من بعدها وانها كل الناس بتعاكسها وبيشاغلوها بتحلم انها ست
وليه صايعه اصلا وعايزه الحرق بقى عايزه تسيب جوزها وتروح تمشي مع واحد صايع زيها نسوان تقرف
ثالت حكايه
عن راجل عجوز عاش عمره كله بيحلم بأنه يكون عنده اسره كبيره وعيله ويجمع ولاده حواليه ويكون هو الراجل الكبير اللي في البيت الكلمه كلمته والشوره شورته بس يا خساره في حلمه كان دايما شايف ان هو بس اللي هيتكلم وهو بس اللي هيقول والكل يخاف ويعمله الف حساب الراجل كان بيحلم تكون كلمته سيف على رقبة الكل ويكون هو الكبير في كل حاجه الولاد كبروا وتعبوا من تحكماته البيت الكبير فضي عليه كل واحد راح لحياته كل واحد استق لببيته بعيد وبدأ حياة جديده والغريب ببقى ان كل واحد منهم لسه بيحلم يبقى هو كبير العيله اللي بدأها ويبقى هو اللي يحكم وينهي ويقول ومحدش يقول غيره محدش فيهم اتعلم انه بكره هيتساب لوحده زي ما هم سابو الجد العجوز عايش لوحده في البيت الكبير اللي بقى عامل زي الخرابه
رابع حكايه
عن الصاحب اللي راح سافر بعيد عني ومش عارف اطوله هناك لا انا قادر امد ايديا اوصله ولا قادر في ضيقته اغيته من كربه
وحيد في سجن من حيطان وسور السجن من نيران بلا حراس ولا سجان لكنه وحيد في ارض الجان شايف بعيونه في قصورهم
ملوك عايه بتتنعم وهو وحيد بيتألم لا عارف يدعك الخاتم ويتحرر ولا قادر يهد المعبد على دماغهم
ياريتني يا صاحبي اكون كالجان واهد بيوت وعدي ببان واجيلك فوق سحابة خير
واغيتك من اللي ظالمينك
سامحني يا صاحبي عالتقصير
لكنك عارف الدنيا لا انا ولا سحار لكني وعدي اقولهولك هتلاقاني في كل مكان
واقف مستني ترجعلي
يارب تكون عايش في امان واترجع تاني تحضني
ربنا يفك كرب كل مسلم ويجزي كل اللي ظلم

الخميس، يونيو 10

جيت اكحلها



مثل مشهور قوي جه يكحلها عماها

اصعب موقف تتحط فيه انك تكون بتعز شخص معين جدا وهو جدع معاك جدا وتقعد تدور على حاجه تعملها تنفعه وتبقى كويسه كده ويحس انك شايل جميله فبدل ما تعمل حاجه تفيده تعمل حاجه تضره وتتحول لأنسان ناكر للجميل ويبقى لسان حال الناس بص مش هو ده اللي انت واقف معاه اهو بيضرك فتبقى انت مش عارف تعمل ايه لأن الموقف شكله منيل فعلا

كتير ده بيحصل وانا نفسي حاليا مريت بموقف تمام كده

مديري في الشغل وبيعاملني كأني اخوه الصغير وانا بحترمه جدا لكفائته واخلاقه وشخصيته ده غير الجمايل اللي عملها معايا

حبيت اجرب حاجه جديده في الشغل علشان تبقى تطوير لشغلي ويبقى الناس عارفه ان اختياره ليا كان صح لكن المشكله اني دبسته في مشكله تانيه خالص كنت ناسيها بقيت لا انا عارف اوريله وشي علشان اعتذر ولا عارف اسكت واسيب الموضوع كده

النهايه طبيعي كان لازم نتقابل بحكم الشغل مقاليش حاجه خالص ولا حتى وبخني واتعامل عادي خالص قدام الناس

وتاني مره دخلتله وافتكر الموضوع سالني بأستغراب يا ابني حديعمل كده رديت بكلمه واحده وبدون ما ارغي كتير زي عادتي واشرح مبرراتي

هي كلمه واحده انا اسف

سكت ومعلقش وقالي خلاص روح شوف الشغل بقى

بس انا عارف انه مش هيزعل وهينسى بعد شويه الموقف لكن بفكر ان صحيح التسرع ممكن يكون نقمه رهيبه ويخسرنا ناس مهمين في حياتنا ويخلينا نغلط غلطات مش معقوله علشان كده حتى لو نيتك كويسه فكر الف مره قبل اي خطوه مبقولش نبقى سلبيين ونمشي جنب الحيط وبلاش افكار جديده لكن بقول نفكر ونسال ونتشاور الف مره قبل ما ننفذ بأندفاع

تحياتي لصديقي ورئيس م ياسر

وسلام كبير قوي لفاخر صاحبي اللي علمني ازاي اعترف بغلطي واعتذر مادمت غلطان


سلااااااااااااااااااااااااام

الخميس، مايو 13

حرف السعاده



اشرقت الشمس ككل يوم
يتأمل في هدوء الماره من حوله وهو جالس في الحافله
غريب اسم الحافله ربما اشتق من ان العدد المهول من الشخصيات التي تركب بجواره كل يوم
المهم ان يصل الى عمله هذا هو ما يقلقه وليس من يجلس بجواره
وصل الى عمله بشق الأنفس وبهدوء صعد الى مكتبه الضيق القى التحيه على زميله العجوز وجلس يقلب في اوراقه والبريد الواصل اليه
لازالت الهيئه تستخدم البريد العادي والدفاتر القديمه وكل شيء برائحة التراب والعفن جلس واخد يتخيل لو انه كان يعمل في شركه استثماريه ويملك جهاز حاسب له وحده ويتصفح النت مثل ابن خالته الذي عينه ابوه في شركة احد معارفهم
ارزاق قالها في سره وجلس الحمد لله اننا بنشتغل ولاقيين مرتب قالها عقله لنفسه لعلها تقنع وتخرس قليلا
جذب رزمة المراسلات والخطابات الوارده وبدأ يفتحها ليصنفها وفجأه وجد خطاب موجه اليه شخصيا ولكن على عنوان مكتبه
فتحه في لهفه من يا ترى يذكرني ويرسل الي ربما كانت شركه تقدمت للعمل بها ربما كانت رساله من خالي في الخليج يخبرني بأنه وجد لي عملا هناك يا ما انت كريم يارب
فتحها بقوه واخرج الخطاب ليجد ورقه بيضاء خاليه من اي كتابه الا حرف واحد فقط


(F)

سكت قليلا نعم هو يعرف المعنى
نعم هو يعرف الراسل
هو لا يحتاج الى اسامي ومقدمات وتحيات من هذا الراسل انه حرف واحد يحمل الف معنى
ذلك الحرف الجميل هو علامتها
نعم ورده Flower
لقد سافرت منذ زمن

من هي

اميرته الخياليه

اسند ظهره قليلا على الكرسي المهترئ وابتسم وشعر ببروده في قلبه ورعشه تجتاحه وسعاده تغمره كل هذا من حرف واحد
نعم حرف واحد منها معناه انها برغم كل ما حولها تذكره برغم كل حياتها تحفظ له مكانه في ذاكرتها هو لا يبحث عن شيء اكثر من ذلك ربما كانت تلك البقعه في ذاكرتها اوسع واقيم لديه من الاف الأمتار في اراضي الدنيا كلها
الأن فقط يعشق الخطابات الورقيه لأنه سيحتفظ بهذا الحرف الذي كتبته بيدها ولمست حروفه بقلمها

امسك قلمه وقرر الرد ولم يعرف بما يبدأ وماذا يحكي ولكنه في هدوء وحماسه عرف ما سيكتب
حرف بكلمه حرف منها وكلمة منه
وحشتــــــــــــــــــــــــــــيني

الأربعاء، أبريل 14

اوعى تخاف

خايف
خايف ليه
مخنوق
من ايه
لما تكون حاسس بالخوف
جرب تسال نفسك فورا
خايف ليه
خلي اجباتك هي بداية خط السير
خللي اجباتك تفتح عقلك يدخله نور
خايف ليه
لما غبائك يملى دماغك
يقلب كل حياتك هم
لما تقوم مالنوم تتمنى ما تتطلع شمس
لما تقوم مرعوب من فكرة وحرقة دم
اصحى وفكر كده في الخطه
علشان تغلب بيها الخوف
علشان تكبر قدام نفسك
علشان ثقتك فيك تذداد
ايه هيخوف
خايف تتخن بطل تاكل
خايف تكذب قول الحق
خايف تتعب بطل زفت
خايف حبك يجري يسيبك
حسن نفسك تبت ايدك واحضنه واوعى تسيبه يسيبك
خايف تغرق جرب تسبح
مره هتغرق مره هتقدر
خايف افشل لازم تفشل
علشان فشلك راح يرسملك احلى خريطه علشان تنجح
خايف منهم لا متخافش هم كمان خايفين كده منك
اصل عدوك مهماً كان برده جبان
طول ما هو شايفك خايف منه هيفضل ياذي اصله جبان
جرب انت تواجهه وتصمد
راح يهرب منك بحصان
اوعى تخاف من حد يا صاحبي
خوفك من صنعك انت وبايديك
كل حياتنا قدر مكتوب
يبقى تخاف ليه من المحتوم
اللي يصيبك ده مكتوبك
واللي ما صابك مش بايديك
ولا بهروبك ولا بشجاعتك
كله نصيب ولازم هيصيب
يبقى تواجه كله بوشك
علشان لما الخبطه تجيلك تبقى في وشك مش في قفاك
اوعى تقوللي جنب الحيطه هدوء وامان
جنب الحيطه هتبقى جبان
جنب الحيطه في ريحه خنيقه وفيه دبان
واقف على فضلات منسيه
راح تصبح زي الدبان عايش على فضلات وزباله
عايش ولا كأنك انسان
اصرخ زعق اشتم حتى
متخليش صوتك مكتوم
لحسن يجي اليوم وتلاقي اسمك بقى اصبح مرحوم
وساعتها الناس هتقولك عاش او مات مفرقش كتير

السبت، أبريل 3

ارض الخليج العظيمه تييييييييت

تحديــــــــــــــــــــث

ساره

اكتر حاجه ممكن توجعني اني اقول كلام في غضبي ويجرح حد بيعز عليا جدا جدا وبحترمه جدا جدا وانا اعتقد اني قلتلك قبل كده اني عندي اعتراضات كتير على الخليج وتقريبا مره اتكلمنا على خناقه بين سعوديين ومصريين وكان فيها اهانات متبادله وكده وانا عشان الزهايمر بتاعي مش فاكر اصلا احنا كنا توصلنا لأيه في نهاية الحوار وده الطبيعي بتاعي يعني لكن اللي اقدر اقوله يا ساره اولا انتي شخصيا من ارقى واطيب الناس اللي اتعاملت معاهم في المدونات

ثانيا بشهادة زميلي اللي فلوس ابوه راحت عليه قاللي ان فيه برده منهم كفيلين - معرفش ده جمعها ولا بتجمعوها ازاي - المهم فيه منهم مثقفين ومتعلمين بتكون المعامله معاهم جميله ومحترمه جدا لكن للأسف قليلين

وانا اعتقد اني راعيت ضميري في الموضوع ومحكتش حاجه خرافيه او مشفتهاش بعيني وبشهادة الاف الناس اللي عاشت هناك وياريت تقري رد فاخر صاحبي بعد الكومنت بتاعك وشوفي هو بيتكلم بعقلانيه ازاي برغم انه محروق منهم جدا طولت انا في التحديث وبعتذر ان كان كلامي اساء ليكي او زعلك مني لكن صدقيني اللي بيحصل صعب اعرفه ومقولش تييييت وبقول تيييت علشان محبش اني اقول لفظ وحش على اخواتي في الدين

تحياتي ليكي وتحيات غاده زوجتي

ارض الخليج العظيمه تييييييييت
من يومين كنت بتكلم عن السفر للخليج ومشاكله وللأسف" يوحنا" رئيسي في الشغل اتدخل في الحوار, تقولولي للأسف ليه مش فيه وحده وطنيه وحركات هقولكم ايوه فيه وانا بتكلم مع يوحنا في اي موضوع عادي بس المره دي الموضوع كان سخيف عارفين ليه لأنه سألني سؤال وجاوب بنفسه عليه
قاللي هو مش الأسلام حرم العبوديه عندكم ليه بقى العرب رجعوا العبوديه من تاني لكن بصوره مقننه ومحدش منكم اعترض وكمان بتوافقوا تسافروا الدول العربيه تشتغلوا هناك بصوره ابسط وصف ليها هو العبوديه.


يعني ايه كفيل ؟ يعني شخص يضمنك طول اقامتك هناك علشان لو عملت حاجه وحشه يبقى هو مسؤل عنها وده يعني كانك ناقص اهليه او لو فعلا عملت جريمه مش هيعاقبوك ويسلخوا راس اللي جابوك
الكفيل طبعا بما انه خيره عليك وعلى اللي جايبينك بفلوسه يا كلب فمن حقه طبعا ان يكون ليه عليك بعض الحقوق والفروض منها ان باسبورك يفضل معاه طول الوقت وانك متتحركش لأي مكان داخل البلد او خارجها الا باذنه لأنك لو خالفت اي من تعاليمه واوامره تبقى فاجر فاسق داعر عايز الحرق وتترحل على بلدكم يا معفن ومترجعش هنا تاني الا بعد خمس سنين ده لو رجعت يعني
طب عايز اشتري عربيه لازم الكفيل يوافق
عايز اعمل رخصه لازم الكفيل يوافق
عايز اروح احج لازم الكفيل يوافق
عايز اتجوز لازم الكفيل يوافق
عايز اخد نفسي لازم الكفيل يوافق
من الأخر انت بقيت ملكيه خاصه للكفيل برغم انه بيشغلك بمرتب وفيه عقد والمفروض ان الموضوع قانوني تماما لكن هو القانون كده انت بقيت من المماليك الف مبروك

وتخيل بقى ان المصيبه في ان معظم الشخصيات دي عندهم فلوس ومعندهمش اي تعليم والتزام حقيقي بالدين هي بس شوية مظاهر ويا سلا م بقى لما يحب ياكل حقك ابقى تف على وشي لو حد رجعلك حقك لينا زميل في الشغل الكفيل هبش كل تحويشة عمر والده في السعوديه وقاله يالا على بلدكم وهو راجل كبير وحاول يشتكيه لكن القاضي طلع قريب الكفيل السعودي الراجل راح يا عيني يشتكي للأمير والحق يتقال الأمير قالهم ازاي قرايب يحكموا في قضية بعض غيروا القاضي وفعلا القاضي الجديد حكمله برجوع فلوسه لكن هيهات يا معلم مين اللي ينفذ بقى ورحلوا الراجل من السعوديه واديه عمال يهاتي هنا من مصر لكن مين بقى كل سنه وانت طيب الكفيل اتكفل بيها
ومواقف كتير جدا بالطريقه دي والسبب اننا بنقبل علشان لقمة العيش اننا نتحمل ابشع الظروف علشان بلدنا مفيهاش غير الرقاصين والطبالين واللصوص ينهوبوها ,انا معنديش مانع ينهبوا براحتهم ويكسبوا ويزيطوا ويتجوزوا الرقاصات والمغنيات ويقتلوا بعض براحتهم بس يسيبوا الناس تاكل عيش يحفظوا كرامة الناس ميبقاش كل من هب ودب وطلع عنده شوية بنزين تحت الغنم بتاعته يبقى كفيل ويزل الناس براحته
وتسمع بقى العرب بيتريقوا على المصريين مثلا في اننا بنذل نفسنا للقرش واننا بنريل عليهم لما بيجوا مصر واننا بننصب عليهم علشان ناخد فلوسهم مع ان اعتقد ده بيتعمل معاهم في كل دول العالم اللي بيروحوها لأن واحد جاهل معاه فلوس وبيدور على شهواته وخلاص لازم كل ضعاف النفوس يطمعوا فيه
انا كتبت البوست ده علشان اسال كام سؤال لما احنا ربنا حرم علينا العبوديه دي بنرجعها ليه تاني بمسميات جديده
وليه كل واحد ربنا يفتحها عليه بعد شقاء وجوع بيبقى مستمتع قوي بأنه يذل ويفتري ويظلم كده
وعايز اعرف برده العرب دول واهل الخليج الكرام دول لما الدائره تلف بيهم والنفط يخلص ويقعدوا جنب غنماتهم من تاني هيبقى موقفهم ايه ومتوقعين معاملة الناس ليهم تبقى ازاي

كان معكم عز الدين ايبك من مصر وببعت سلامي لقطز صاحبي اللي دايق الويل من العرب التيييييييييييييت

الاثنين، مارس 22

شفتك فين قبل كده

يوم اخر في عملي استيقظ من النوم الممتع للبرد المنغص
اخرج للشارع متوجها الى عملي واظل اتخيل وجوه زملائي نفس الوجوه ونفس الأحداث يوميا لا جديد يحدث نفس الأحاديث ونفس الأفكار
لكن اليوم سيحدث شيء جديد اشاعه مؤكده بأنهم سيحضرون موظفه جديده ,نعم الشباب كلهم بيحكوا عن الموضوع ده من اسبوع يا ترى شكلها ايه يا ترى الأدارة استنضفت المره دي ولا بعتت لنا بوز اخص جديد هههههههه
المهم اهو فيه حاجه جديده نرغي عنها النهارده
الساعه عشره بالظبط دخلت عدت قدامي بسرعه ملحقتش ابص على شكلها واتأكد منها لسه هقول يا خساره اتلفتت تاني ورجعت تسالني شؤون الأفراد فين لو سمحت بابتسامه ساحره مني طبعا رديت "حضرتك اكيد الموظفه الجديده اهلا بيكي" بهدوء ردت "ايوه ممكن تقولي بس فين شؤون الأفراد" شاورتلها ناحية مكتبهم يا بختهم قلتها في سري طبعا بس غريبه قوي شكلها مش غريب عليا انا عارفها اكيد بس يا ترى منين رجعت بعد شويه مع الواد سامح بتاع الأفراد اداها مكتب قريب مني وعرفها بالناس وانا منهم طبعا حتى اسمها مش غريب عليا نرمين احمد بس يا ترى منين اولا اكيد مش من الكليه لأن اسمها بدايته ن وانا أ يبقى مستحيل تكون زميلتي في الكليه طيب من ايام ابتدائي مثلا لأن انا المدرسه الوحيده المشتركه في حياتي هي ابتدائي يبقى هي اكيد من ابتدائي سالتها عن مكان سكنها لقيتها من منطقه بعيييده عني خالص يبقى مش من مدرستي كمان امال اعرفك منين يا ست نرمين انتي يمكن صديقه لأختي وشفتها عندنا ممكن قعدت ارغي معاها واكلمها عن اخواتي كلهم يمكن تعرف حد فيهم عجبها الحوار اللي مفيهوش معاكسه وتلميحات وليقتها عماله تحكي عن اخواتها ودراستها لكن برده معرفتش انتي مين يا نرمين "طب انتي مبتشبهيش عليا يا نرمين "مفهمتش سؤالي وخافت يكون معاكسه حسيتها كشت مني كده طبعا لميت الموقف بسرعه وقلتلها انا اصلي كنت بتكلم مع واحد صاحبي من فتره عن ناس اول مره نقابلهم ونحس اننا نعرفهم قوي ويا ترى ده سببه ايه وعلاقة ده بموضوع تناسخ الأرواح اللي الهنود بيقولوا عنه انشغلت معايا في الحوار اللي عملته وقعدنا نرغي وعدى الموقف بس انا هتجنن انتي مين يا نرمين
قعدت اسالها عن اهلها والدها ومامتها اخواتها عيلتها دراستها كل حاجه عنها فصصت كل حاجه عنها وبرده مش لاقي حاجه اعرفها منها هي نفسها بعد اربع ساعات بنرغي سالتني ايه ده انت بقيت عارف عني كل حياتي انت مباحث يا ابني ولا ايه ضحكت انا ولمحتها بتضحك ضحكه حلوه قوي
وخلص اليوم بسرعه وانا بحلم ببكره ييجي علشان اكلمها اتشجعت وسألتها معاكي موبايل ولا ماشيه بكارت ميناتل قالتلي "معايا ايه انت عايز الرقم ولا ايه ؟ " اتكسفت واتلخبطت "يعني لو يضايقك خلاص مش مشكله يعني انا اسف و....01255ورصت الرقم في ثانيه وقالتلي ايه حفظته ولا لأ وضحكت بكسوف
وانا مروح عمال افكر طيب اكلمها ولا لأ طيب هقولها ايه ده لسه اول يوم اشوفها وبعدين هي هتسالني بتتصل ليه اقولها ايه ووقفت في محطة المترو محتار وبفكر وهوب
يا خبر ابيض نرمين اهي هي فعلا نرمين احمد عبد الفتاح لا مش هي بشحمها ولحمها انما بطاقتها الراجل بتاع المحطه حاطط بطاقتها جنبه على لوحة المفقودات الظاهر حد لقاها وسابها هنا علشان هي تشوفها وتاخدها وانا شفتها قبل كده وقريت الأسم علشان كده شكلها مش غريب عني واسمها مش غريب عني رفعت سماعة التليفون وطلبتها
الو مين بيتكلم ايوه يا نرمين احمد عبد الفتاح انا زميلك الجديد
وعايز ايه يا زميلي الجديد وعرفت عبد الفتاح كمان
عايز اسالك سؤال
اسال يا سيدي
انتي ضايع منك حاجه ....

الأحد، فبراير 28

ازاي تكون موجود

عايز اكون حاضر حاضر
مش حاضر غائب
يعني ايه
بعد ما اتفرجت على فيلم الف مبروك بتاع احمد حلمي واللي اتأخرت قوي في الفرجه عليه في النهايه قررت اني انا كمان نفسي اكون موجود وليا دور
طول عمري كانت سياستي هي الحياديه مادمت لا اقدر على التغيير
يعني في بيتنا مادمت مقدرش اواجه ابويا او اعترض على قراراته يبقى التزم الحياديه التامه وعمري ما ابديت رايي في اي موقف بيحصل والنتيجه ان ده بقى انطباع الكل عني اني مليش راي ومش متوقع يكون ليا راي على القل في المليون سنه اللي جايين
طب وناوي تعمل ايه دلوقتي يا فلحوس افندي بعد الهنا بسنه
لا مش بعد الهنا بسنه قوي يعني
اولا انا اخدت موقف قبل كده واكتر من موقف كمان
واكتشفت ان لو الواحد عايز حاجه وبجد مصمم عليها وقرر انه مستحيل ييتخلى عنها ومهما كان اللي بيواجهك لازم هتوصل وربنا هيوفقك ليها المهم متريحش وتقول لا انا تعبت او ده مستحيل والمهم برده ان الحاجه اللي بتحارب علشانها تكون تستاهل برده
عموما انا بدور على حاجه دلوقتي اعملها علشان احس ان ليا راي وموقف واني مش الحاضر الغائب بس انا مش عايز موقف بطلوي ولا كلام من ده ولا عايز موقف يحصل وانجح فيه ويعدي وخلاص على كده انا عايز اسلوب حياه
عايز يكون انطباع الناس عني من كل تعاملاتي هو ده
عايز يكون هو ده اسلوبي الدائم مش موقف في ساعة حماس وخلاص
وعلشان كده مش عايز اهيص مره واحده انا همشي خطوه خطوه وهتغير خطوه خطوه علشان مخبطش جامد في سور السجن واتعور
يمكن بالراحه اعرف اتشعبط على السور وانط بره
واوعدكم هبعتلكم من هناك جوابات كتييييييييييييير
سلااااام
اخوكم ايهاب

الاثنين، يناير 4

اتعلمت ايه

اتعلمت ايه
سؤال سالته لنفسي وانا شايف الناس عماله تتكلم عن السنه الجديده واللي هيحصل فيها واللي حصل في اللي قبليها
ولقيت اني لازم افكر ايه اللي اتعلمته انا من السنه اللي فاتت علشان استفيد منه في السنه الجديده
انا هقول كل اللي اتعلمته لنفسي كده عشوائي وبعدين ابقى احلله بعدين على مهلي:

*متسمعش كلام حد بيجيب في سيرة بنت زميلتك مهما كان الحد ده صاحبك لأن دي اعراض ناس وممكن اختك او زوجتك او امك او حتى بنتك تتعرض للموقف نفسه بعدين.

*متعملش فيها عنتر جبنه على رئيسك بحجة انك مش بتاع نفاق فتفضل تعمل كل الطرق اللي تثبت بيها لزمايلك انك مبترقصش لرئيسك لدرجة انك تخليه يكرهك ويحطك في خانة البلطجيه في الوقت اللي زمايلك النصابين بقوا حبايبه ورجالته.

*مهما كان الشخص اللي بيحاربك قوي عنك او ليه نفوذ عنك او عنده حاجه يذلك بيها ومتصور انه يقدر يمنع عنك ويمنحك كما يشاء اعرف ان ربنا اقوى من الكل وإرادة ربنا هي فوق كل شيء لا يمنعها اي كائن علشان كده كل اللي عليك انك تصبر وتدعي ربنا مش بقول تبقى متواكل ومتعملش اي خطوه ايجابيه لكن وانت بتعمل خطواتك اعملها ودايما عندك يقين ان ربنا هو اللي بيمنع ويمنح .

*اتعملت برده ان مش معنى ان الف واحد قالك عن التجربه دي انها مش حلوه زي ما انت بتحلم او انها متعبه او انها مالهاش لازمه فتقوم انت متراجع او تحط في دماغك رايهم ده لا ادخل تجربك وعيشها استمتع بحلوها واتحمل مرها, هم اكيد برده عدى عليهم اوقات حلوه فيها بس المراره لما بتيجي كل واحد بيصرخ ويقول انا زعلان يا جماعه وتعبان انما لما بيبقى عايش يومين حلوين ولا بنعرف عنه حاجه وحياته بتبقى اسرار.

*اللي عايز يعيش مبسوط وبيته يبقى مستقر عليه بالأحترام والصراحه والتنازل حبه والتعاون
وقبل كل شيء الكلمه الحلوه.

*اتعلمت ان الصاحب الحقيقي مش مهم يكون ساكن جنبك او معاك حتى في بلد واحده ممكن مليون ميل بينكم وبرده يفضل حاسس بيك وقلقان عليك وبيفكر دايما ازاي يحل مشاكلك ويسمع اخبارك .

*اتعلمت برده ان الصاحب بيبان فعلا وقت الشده وان في ناس هي اتربت على كده انهم يبقوا رجاله مش البيئه بتاعة الشغل ولا الشارع ولا المدرسه ولا اي مكان هيعمل رجاله الرجاله بتعملهم امهاتهم .

*اتعلمت ان الراجل بيفضل ينكر دايما اهمية راي الست مع ان هو من اول لما بيتولد بيدور على امه ورأيها ولحد ما بيموت بيدور على راي مراته واخته وبنته كمان ده لما بيكون عنده عقل يعني وعارف قيمة المشوره .

*اتعملت ان ممكن بنت تكون جدعه وعندها اخلاق وكرامه وضمير اكتر من رجاله كتير حواليها.

*اتعلمت ان في ناس بطبعهم بيتولدوا وعندهم قدرة على القياده صح وفي ناس قدرتهم على انهم يكونوا مساعدين للقائد وفي ناس قدرتهم انهم يكونوا تابعين بس وفي ناس معندهاش قدره لا تقود ولا تساعد ولا حتى تحترم النظام وتبقى اتباع محترمين هم بس فالحين يعملوا مشاكل ويعترضوا وخلاص.

*اتعلمت ان اللي اتربى في بيت اهله وشافهم طول عمره مبيعرفوش يدبروا امورهم ماليا او ادبيا او عندهم اي مشاكل في ثقافتهم بياخد جزء مش صغير من مشاكلهم دي في حياته لما يستقل عنهم دايما بيبقى مصاب بنفس العاهه بتاعتهم سواء إسراف او بخل او غباء او تكبر او تجبر ربنا يحفظنا.

*اتعلمت ان في ناس تحبهم وتصاحبهم لكنك عارف انهم مش ملايكه او انهم مش كاملين الأوصاف لكن انت لو هتدور في كل صديق انه يبقى نسخه من احمد فاخر او نسخه من احمد حسن او من صديقي الجديد محمد حسن هتقعد طول عمرك تدور علشان تلاقي واحد او اتنين تاني زي الناس دي
واختم بقى بسر السعاده اللي النبي – صلى الله عليه وسلم – قاله في الحديث الشريف " من أصبح منكم آمنا في سربه ، معافى في جسده ، عنده قوت يومه ، فكأنما حيزت له الدنيا "
سعيد بكل واحد اتعرفت بيه هنا في التدوين وبناس كتير اتعرفت بيها السنه دي الحمد لله على النعمه
بحبكم كلكم جدا جدا يا اخواتي بجد