الأربعاء، أبريل ١٤

اوعى تخاف

خايف
خايف ليه
مخنوق
من ايه
لما تكون حاسس بالخوف
جرب تسال نفسك فورا
خايف ليه
خلي اجباتك هي بداية خط السير
خللي اجباتك تفتح عقلك يدخله نور
خايف ليه
لما غبائك يملى دماغك
يقلب كل حياتك هم
لما تقوم مالنوم تتمنى ما تتطلع شمس
لما تقوم مرعوب من فكرة وحرقة دم
اصحى وفكر كده في الخطه
علشان تغلب بيها الخوف
علشان تكبر قدام نفسك
علشان ثقتك فيك تذداد
ايه هيخوف
خايف تتخن بطل تاكل
خايف تكذب قول الحق
خايف تتعب بطل زفت
خايف حبك يجري يسيبك
حسن نفسك تبت ايدك واحضنه واوعى تسيبه يسيبك
خايف تغرق جرب تسبح
مره هتغرق مره هتقدر
خايف افشل لازم تفشل
علشان فشلك راح يرسملك احلى خريطه علشان تنجح
خايف منهم لا متخافش هم كمان خايفين كده منك
اصل عدوك مهماً كان برده جبان
طول ما هو شايفك خايف منه هيفضل ياذي اصله جبان
جرب انت تواجهه وتصمد
راح يهرب منك بحصان
اوعى تخاف من حد يا صاحبي
خوفك من صنعك انت وبايديك
كل حياتنا قدر مكتوب
يبقى تخاف ليه من المحتوم
اللي يصيبك ده مكتوبك
واللي ما صابك مش بايديك
ولا بهروبك ولا بشجاعتك
كله نصيب ولازم هيصيب
يبقى تواجه كله بوشك
علشان لما الخبطه تجيلك تبقى في وشك مش في قفاك
اوعى تقوللي جنب الحيطه هدوء وامان
جنب الحيطه هتبقى جبان
جنب الحيطه في ريحه خنيقه وفيه دبان
واقف على فضلات منسيه
راح تصبح زي الدبان عايش على فضلات وزباله
عايش ولا كأنك انسان
اصرخ زعق اشتم حتى
متخليش صوتك مكتوم
لحسن يجي اليوم وتلاقي اسمك بقى اصبح مرحوم
وساعتها الناس هتقولك عاش او مات مفرقش كتير

هناك ٩ تعليقات:

كــركــبــة دمـــاغ ㋡ يقول...

حلوة اوي بجد

تسلم ايدك يا ايهاب والله

كلام زي الفل

واحلى حته عجبتني بصراجه دي

" خايف حبك يجري يسيبك
حسن نفسك تبت ايدك واحضنه واوعى تسيبه يسيبك "

يمكن عشان انا نفسي اقولها لشخص ما في الحياة

بس عموما كلها فـ الجون

ويارب نبطل خوف بقى عشان نتحرك لقدام بدل ما احنا واقفين في نفس الخظوة اذا ما كناش بنرجع لورا


تحياتي جداً

A.Fakher يقول...

إزيك ياهوبة
طبعاً أنا عارف كويس أن الكلام ده طالع من قلبك علشان حاجات كتير أوي ، وأكيد أنا معاك في كل اللي أنت قلته ، لازم يكون الواحد شجاع دايماً يواجه نفسه قبل مايواجه الآخرين ، علشان يكون ليه موقف في الحياة علشان يقدر يعيش في دنيتنا ديه .
لازم الواحد يبقي واثق في أن ربنا مابيجيبش حاجة وحشة أبداً ، ويستفيد من كل لحظة بتعدي عليه سواء كانت حلوة أو مرة ، ويمكن اللحظات المرة هي اللي بتعلم منها وبتضيف لينا أكتر .
بس للأسف فيه حاجات بتكون في حياة الإنسان بتأثر عليه وساعات بتخليه يفكر مليون مرة قبل ماياخد مواقف معينة ، وأهمها إرتباطه بعيلة أو إعتماد حد عليه ، الحكاية ديه ساعات بتخلي الإنسان ضعيف وجبان كمان ..
في النهاية ، كلنا نحب نكون أحرار بكل معاني الكلمة
ولكن ساعات تأتي الرياح بما لا تشتهي السفن .
تحياتي لصديقي

ahmed_k يقول...

فعلا لازم من قتل الخوف والبدء في إتخاذ موقف نجابه بيه كل انواع المخاوف التي قد تكون سببا في إفقادنا متع الحياه وبهجتها
بس أنا عندي عقدة خوف من الكلاب تقدر يا هوبه تقلي اعمل ايه فيها دي ؟؟؟
أصرخ فيهم يعني ولا أيه هههههه

mohamed يقول...

تصدق برضه مش هتفرق

مدونتك جميلو يا عم الشنكوتي

Ehab يقول...

كركبة دماغ

يا ستي تسلمي على كلامك
وان شاء الله تستجمعي شجاعتك وتقولي اللي عايزه تقوليه للي في بالك راحتك
ههه

تحياتي

سلاااااااااااااااام
اخوكي ايهاب


---------------------

فاخر

ابو حميد يا جميل وحشتني قوي يا اخي وعاجبني قوي متابعتك للمدونه دايما برغم اين مقصر فيها كتير

انت دوست على الجرح كالعاده بكلامك وعرفت اهم نقطه
ارتباطتنا باللي حوالينا


سلاااااااااااااام
اخوك ايهاب

=========================


Ahmed K

يا صعيدي يا زوق
فعلا يا احمد ربنا يوفقنا يارب
واسمع عنك خير يا حبي


سلااااااااااااااااااام
اخوك ايهاب

--------------------

Mohamed

محمد باشا شكلها اول زياره عندي
وانا سعيد بيك جدا منورني دايما
ربنا يوفقك ويسعد ايامك

سلااااااااااااام
اخوك ايهاب

دعاء العطار يقول...

خايف تتخن بطل تاكل
خايف تكذب قول الحق
خايف تتعب بطل زفت
خايف حبك يجري يسيبك
حسن نفسك تبت ايدك واحضنه واوعى تسيبه يسيبك
خايف تغرق جرب تسبح
مره هتغرق مره هتقدر

حلوه اوووووووووووووى

اوووووووووووووووووووووووووى

اوووووووووووووووووووووووووووووووى

بجد بجد تسلم ايدك

ميرا ( وومن ) يقول...

ومين مش بيخاف يا إيهاب

نفسي بجد أبطل خوف

الخوف بيربكني بيخليني أغلط بيحبسني

تسلم يا إيهاب ويسلم قلمك

Unknown يقول...

اييييييييه انت بتقول ايييييييه

ههههههه


بجد تحفة تحفة تحفة تحفة من هنا لبكرة


جيت ع الجرح بجد كأنك عارف ان مشكلتي الخوف .. ربنا يطمن قلوبنا جميعاً ويرزقنا الشجاعة والإقدام


تسلم إيدك يا أستاذ إيهاب

ربنا يكرمك ويعزك يارب

Doba يقول...

مش عارفة ليه بحس انك دايما بتبدع وانت بتكتب عند الناس التانيين

دايما بيبقى كلامك ارقى واعقل وبتجيب احلى المضامين

بس سيبك انت الدماغ النضيفة نضيفة برده

يارب منخافشى
بس من خاف سلم
هههههههههههه
هبة