خد موقف واستحمل بقى

انك تاخد موقف في حياتك من شخص معين او من موضوع او من اتجاه سياسي او من فكره معينه

اكيد شيء صعب 

لأنك ببساطه بتخرج من القوقعه المريحه بتاعة "ماليش دعوه" وتدخل في معارك دفاعا عن موقفك

وفي حالة انك تاخد موقف من شخص معين وخصوصا لو يهمك امره فأنت مضطر انك تقف قدامه وتواجهه واحتمال كبير تخسره علشان تدافع عن موقفك

علشان كده بنتردد كتير قوي قبل اعلان موقفنا وقبل ما ناخد موقف وساعات بنضحي براينا وموقفنا علشان منخسرش الشخص ده بس للأسف ده مش حل لأنك من جواك بتفضل شايله حته مش حلوه جواك ومش قادر تقوله عليها فممكن تتخانق معاه علشان حاجه تانيه هايفه وفي الحقيقه انت بتتخانق علشان حاجه اكبر جواك

مش عارف هل الصح نعلن موقفنا ونقبل احتمال خسارة حد بنحبه 

ولا نستحمل وبرده الكبت يخلينا نكره بعض بالتدريج

راجع اكتب جايز اقدر

انا مش هرغي كتير في وحشتني المدونه ووحشني التدوين
علشان انا جاي ارغي في كلمتين زي زمان اروق دماغي بس

الحقيقه انا الحمد لله احسن كتيرمن زمان ومشاكل كتير اتحلت لكن الغريب ان مشاكل جديده ظهرت في حياتي
واضح ان حياة الأنسان لازم دايما يكون عندك مشاكل
بس بتتغير من وقت للتاني
الميزه بقى ان كل مشكله بتعدي عليها في حياتك بتتعلم حاجه منها
وبتتعلم خبره جديده
احسن حاجه بتتعلمها بقى ان اي مشكله مهما كانت ليها حل في الأخر وان ربنا قادر يخرجك من اي ازمه مهما كانت
بس اهم حاجه الصبر الصبر الصبر
وبعد كده بقى استخدم عقلك وقلبك واصحابك واهلك علشان يساعدوك
كفايه كده المره دي
اشوفكم بعدين