السبت، مايو 26

خلاص يا بابا والله مش حعان حرام كده


مش عارف اقولها ازاي بس انا بصراحه تعبان من الموضوع ده قوي ومخنوق وعايز ابعبع شويه يا جماعه

انا مش عايز اكل مع بابا تاني في الشغل

طبعا هتسألوني ازاي

اصل انا سبت شغلي القديم ورحت اشتغلت مع ابويا في نفس الشركه اللي هو شغال فيها وكنت بشتغل قي مكتب فيه 3 شباب فقريين جدا وكانت ايام دماغ طول الوقت نهرج ونهزر ونحكي لبعض على مشاكلنا وخطط المستقبل وهووب ابويا كان طبعا بيحاول ينقلني مكان احسن ويا سلام لو يكون في نفس الإداره بتاعته عشان نبقى جنب بعض طبعا انا لما بقيت بشتغل معاه في نفس الشركه بس بيني وبين مكتبه حوالي 200 متر وبشوفه قليل كنت زهقان من انه كل شويه يسأل عني وعايز يعرف كل خطوه بعملها طول اليوم المهم ان انا دلوقتي بقيت جنبه بالظبط يعني هو في الدور الأول وانا في الدور التاني على طول وطبعا ما ادراكم بإن ابوك يبقى جنبك بالظبط كده طول الوقت عايزني عنده وعايزني افطر واتغدى ويمكن كمان اتعشى هنده ماهو احنا بنقعد في الشركه 12 ساعه متواصله ويا سلام لو عايز اغيب يوم يفضل يسألني ليه وعشان ايه اكتر من المدير بتاعي وطبعا مينفعش اقوله معلش حضرتك اصل عمتي ماتت ورايح ادفنها ويا سلام لو شافني خارج من المكتب على طول يروح صايدني من قفايا انت رايح فين وليه وهو ده شغلك وانت ليه بتروح هناك ومتتأخرش كتير هناك وطبعا نظام الصداقه ده شيء تاني ممنوع عليه اني اصاحب اي حد يكون هو شايفه دمه تقيل او شخصيه مش محترمه وساعات بيكون رأيه مبني على اعتقاد شخصي غير صحيح لكن هو انا اقدر اعترض ده غير الناس اللي بتتبرع مشكوره بإنها تبلغه عن اماكن تواجدي طول اليوم عشان يطمنوه عليه المهم بقى ان انا ساعات بحب اروح اقعد او اكل مع اصحابي اللي كانو زمايلي في المكتب القديم فبعيدا عن انه عايزني انسى بقى الناس القدام واتلفت لمكاني الجديد فأنا مينفعش اكل مرتين يعني لو كنت فطرت معاهم ببقى مش جعان لكن لو اتجرأت وقلت لأ مش عايز اكل انا مش جعان تبقى مصيبه واكيد انا مبوز عشان اسد نفسه وانا جاحد وناكر للجميل يا عم انا بقولك مش جعان هو بالعافيه المهم انا تعبت خلاص وبقيت على طول بطني بتوجعني من كتر الوجبات المذدوجه

وطبعا هاتقولولي خلاص متاكلش مع زمايلك وخلاص لكن انا بحب اكل معاهم الأكل برضه مع اللمه الحلوه واصحابك ليه طعم تاني بس تقول ايه

لكن طبعا لسه فيه جزء تاني لسه لازم احكيه الأول عن ابويا وطبيعته قبل ما اكمل

وللحديث بقيه......سلام


ايوه يا بابا جاي اهوه عشان ناكل

عن اذنكم عشان رايح اتغدى للمره التالته

الخميس، مايو 24

مص صدر زميلتك عشان تبقى امك..........والله حاجه تكسف

يعني يا ريت حد بس يأكدلي او ينفي يعني هو فعلا ده حصل ولا مجرد اشاعه
هو صحيح ان فيه حد بيفهم يقول الكلام ده
يعني ايه عايزين يخلوا الخلوه بين الموظفين شرعي يعني هو الحل انهم يرضعوا بعض ممكن حد يقولي العك ده معناه ايه
يعني انا اجيب واحد شحط واقوله ان مينفعش تقعد مع زميلتك لوحدكوا عشان الشبهه بمعنى انه حرام انك تلمسها او تشوفها لوحدكوا عشان الشيطان
اقوم انا اقوله قوم حط صدر زميلتك في بقك وخدلك مصتين عشان بعد كده تقولها يا ماما
يعني راجل بكامل فحولته وشهوته يعمل ايه بلاش كده...نفرض ان
انا مثلا لو واحده زميلتي وقالولي بس الفكره ممكن يجرى حاجات كتير قوي ادخل بعدها السجن بتهمة اغتصاب انثى
ده جنان يا جدعان موضوع الرضاعه ده بيحصل لعيل معندوش اي حاجه تتأثر بشكل جسم الست يعني من الآخر صدر الست بالنسبه ليه هو مجرد شكل من اشكال معلبات التغذيه
اما الشحط الكبير فلو بس زرار البلوزه بتاعتها اتوارب شويه ممكن عينه تنط تمزع بقيت البلوزه
على العموم بالشكل ده ممكن نقنع كل بنت محترمه انها تستقيل من شغلها
وانا عن نفسي بعد ما اطمن ان كل بنت او ست بتمثل لي حاجه في حياتي سابت الشغل خلاص واطمن عليهم
هاكون اول واحد يشجع
واول واحد يشفط اول مصه
اصلهم بيقولوا ان لبن السرسوب مفيد قوي
وسامحوني على كلامي بس اصلها بقت حاجه تنرفز

الأربعاء، مايو 23

نافذه على العالم وجولة الكاميرا وحاجات كتير بالشكل ده

حد فيكوا يفتكر برنامج نافذه على العالم
كان برنامج مدته حوالي خمس دقائق ولكن كان الواحد بيقعد يتفرج كانهم حلم جميل البرنامج بيعرض لقطات من اغرب الحاجات في العالم يعني فقرات من كل بلاد الله وكانوا يجيبوا حاجات تضحك قوي عروض سيرك حيوانات غريبه ناس بتعمل حاجات مجنونه ودايما كانوا يجيبوا عروض ازياء بس مجانيني خالص هدوم مش للبس بس تضحك جدا
الغريب اني معرفش البرنامج ده اختفى ليه
برنامج جولة الكاميرا
وبرده كان بيجيب حاجات من كل الدنيا مناظر طبيعيه وعجائب الشعوب وكانت المذيعه ست شيك قوي وحلوه بس مش عارف اسمها ايه وكان ليها اسلوب كده تحب تقعد تسمع صوتها وهي بتحكي
وطبعا برده تم الغاء البرنامج مش عارف ليه

وطبعا كان فيه برنامج مواقف وطرائف وكان زمان بيجيب حاجات حلوة قوي لكن فجأه حبوا يطوروه عشان ينافس برامج الفضائيا الجنبيه اللي بتلعب على نفس الفكره لكن للأسف بقى سخيف قوي ومكرر وتحس انه فقد شخصيته المميزه
حاجات كتير كانت حلوه لكن اختفت من حياتنا مش عارف ليه
يا ريت كل واحد يفكر معايا في حاجه كان بيحبها في صغره لكن بطلوها بدون سبب
وسلااااااااااااااااااااااااااااااااااااااااااااااااااام
______________________

خايف بكره يلاقوا المدونات شيئ جميل يقوموا يلغوها

الثلاثاء، مايو 22

آخر حاجة لأحمد فؤاد نجم وبقينا زي الفراخ


آخر حاجة لأحمد فؤاد نجم

طاطي راسك طاطي طــــاطي

انت ف وطن ديمقراطـــــــي

انت بتنـــعــــم بالحــــــــــرية

بس بشرط تكون مطاطــــــي

لما تكون شغــال بذمــــــــــة

خايف على مصــلحة الأمــة

شغلك يطلع من غير لازمــة

علشان مبيعلاش غير واطي

طاطي راسك طاطي طاطـــي

انت ف وطن ديمـــــقراطي

لما حاميها يكون حراميــها

وبلاده ورا ضهره رامـيـها

طالع نازل واكل فيـــــــــها

مسنود بالبدلة الظباطــــي

طاطي راسك طاطي طاطـــي

انت ف وطن ديمـــــقراطي

لما شــقاك يصــبح مش ليك

فقرك سد السكة علــــــــــيك

تتلفّت تلــــقى حـــوالـــــــيك

إما حرامي و إما عقــــاطي

طاطي راسك طاطي طاطــــي

انت ف وطن ديمقراطـــــــي

لماتلاقي بـــــلاد الـدنـيـــــــا

فيها البني آدم حــــاجة تانية

وانت في الطبقات الـــــــدنيا

قرد مسلسل أو وطواطــــي

طاطي راسك طاطي طاطـــي

انت ف وطن ديمقراطــــــي !

لما الجهلة يبــــــقوا أمــامــك

أو فوقك ماسكــين ف زمامك

ويسوقك ع الهــلكة إمامك

تشرب م السم السقـــــراطي

طاطي راسك طاطــــي طاطي

انت ف وطن ديمقـــــــراطي

لمــــا الكلـــمة تكون بتدينـك

لما تخبي ف قلـــــــبك دينــك

لما الذل أشوفه ف عيـــــــنك

هات إحباطك على إحباطــــي

طاطي راسك طاطي طاطـــي

انت ف وطن ديمقراطــــــي

انت ف وطن ديمقراطـــــــي


وديه قصيده ل اخمد فؤاد نجم بعتهالي صديق عمري واخي احمد فاخر

يارب تكون خلصت الصور بتاعتي يا احمد

الاثنين، مايو 21

هي المخ وانا العضلات

طول عمري نفسي اتكلم عنها واحكي لحد قد ايه بحبها طبعا لأن هي اللي فتحت عيني لقيتها الريسه والزعيمه والثورجيه والمحامي بتاعي واختي واخويا كمان وسعات بتبقى المفتريه البلطجيه بس ده زي شغل العيال بلطجة اطفال يعني
اصل هي اكبر مني بسنه واحده وكنا طول عمرنا كأننا توأم وماليش اخ اكبر
ولأنها شخصيه قياديه بطبعها وانا اصلا وانا صغير كنت جبان جدا وبمشي وراها على طول فكانت هي الزعيم وانا بنفذ على طول وطبعا كنا لما بننضرب كنا بننضرب سوا
لما كان بابا يبعتنا نجيب حاجه من الشارع لازم ننزل مع بعض وطبعا كنا بنمشي بطريقه رائعه نقعد نتنطط ونتمرجح في طريقه غريبه وهي مشيه مش عارف اوصفهالكوا ازاي المهم مره كنا ماشيين وعدينا جنب اتنين مخطوبين ماشيين على مهلم طبعا واحنا روحنا ورجعنا وهما لسه في اول الشارع روحنا ضاحكين عليهم قوي وقولنالهم هو انتوا لسه هنا راحوا ضحكوا قوي مش عارف ليه
ولما كنا نجيب حاجه حلوه ونقعد نخطط ان احنا نشترك وتجيب حاجه معينه بس غاليه شويه ونقعد نحوش لحد منجمع تمنها ونروح سوا نجيبها احساس فظيع بالإنتصار وكانت هي اطول مني بشويه وكانت تحط ايدها على كتفي واحنا ماشيين وانا اقولها هو انا امتى هاطول واحط ايدي على كتفك واحنا ماشيين وكانت تقولي ان هي هتفضل اطول مني لكن سبحان العاطي الوهاب انا بقيت دلوقتي اطول منها بحوالي 20 سم
بس للأسف ماسكه عليا صورهكان خالي صورهالنا عند مصوراتي صاحبه وكنت لابس بدله لبني وهي لبسوها طرحة عروسه وكنا شكلنا مسخره العريس قصير جدا والعروسه عماله تضحك عليه
الغريب اني لما كبرت وبابا خلاها تبطل تنزل معايا نشتري من الشارع عشان انا كبرت ومش محتاجها
تعبت جدا لأني كنت بحب جدا هزارنا في الشارع وكلامنا وفضفضتنا لبعض
لأ واللي يغيظك انهم عايزيني اخد عبده معايا وده واد كسلي طول عمره وانا متعود اني امشي مع دماغ بتفهم مش دماغ نسوسه
طول عمري وهبه هي اللي بتتخانق في البيت عشان تجيبلي حقي وابويا يتغاظ منها ويقولها هو انتي المحاميه بتاعته
بس هي ايه ولا يهمها برده ترجع تتكلم تاني مش عارف افتكر ايه ولا ايه
هي اللي خلتني اعرف انجليزي كويس لنها بتحبه جدا وهي اللي كانت بتخليهم يدوني دروس عند المدرسين اللي هي عارفاهم كويسين وكانت بتساعدني فيه وطبعا انا دلوقتي كل ما اتزنق في كلمه اسألها اصلها اتخرجت من اداب انجليزي وعملت دبلومه في الترجمه كمان اصلها شاطره وغاويه مذاكره انا بقى ما صدقت خلصت الكليه ومش عايز اعتبها تاني
وعشان تكمل افضالها عليا بتشتغل دلوقتي في المصريه للإتصالات وبتجيبلي اي نمره انا عايزها وببلاش من غير ما اتصل بالدليل ويا سلام لو حد عاكسني بالتليفون بعرف اسم عائلته كلها وعنوانه ايوه انا بقيت راجل صاحب اتصالات
وحتى في موضوع الجواز هي اكتر واحده بتشجعني وبتساعدني
يا رب اسعدها واكرمها وحقق لها كل احلامها
وختاما تحياتي اليك يا اختي وتاج راسي

الأحد، مايو 20

انا مش بهزر مع حد انا جد جدا جدا

مين منكم ممكن يقولي ازاي يعرف ان الشخص اللي قدامه وبيكلمه ده هيتحول لشخص تاني خالص فجأه كده وعلى سبب غريب جدا
يعني مثلا واحد تتعرف بيه وتبقى مبسوط قوي وتقول يا سلام على الشخصيات المحترمه ده انا محظوظ اني بتعرف على ناس كويسه كده
لكن هوووب تلاقي الواحد من دول بيعاملك فجأه كانك حشره عنكشيه متخلشه ومحدش يقولي يعني ايه المهم انك ممكن في الأول تقول ياه ده تلاقي في مشكله كبيره عنده ومضايقاه يعني لازم تتحمل صاحبك في ازمته امال صاحبك ازاي بس الغريب انك تكتشف ان الحكايه انه خلاص قرر يعتبرك مش على مستوى صداقته او معرفته
انا ممكن اكون يعني بحب اهزر كتير لكن ده مش معناه اني بحرج حد بكلام سخيف انا بس بحب اهرج لكن تلاقي واحد بيرد عليه بنرفزه انت ايه اللي بتقوله ده اعرف حدودك وكاني غلطت في سلطان الماهايا يعني المهم انا قررت اني احاول امسك نفسي في موضوع الهزار ده يعني استنى اشوف الأول مين عنده استعداد للهزار وبيحبه وهو اللي يبتدي وبعدين انا هاهزر معاه على طول
الغريب انهم بيقولوا ان الشعب المصري ابن نكته
وعجبي
سلاااااااااااااااااااااااااااااااااااااااااام
يا ريت لو حد يعرف ميعاد مقابلة المدونين المصريين يبقى يقولي مش كل مره تفرقعوني كده
عيب عليكوا ويا ريت يوصفلي العنوان لحسن انا زي ابو عمه مايله في الليله الكبيره لعمنا صلاح جاهين

السبت، مايو 19

اخيرا اسراء ربنا يخليها بعتتلي تاجات

طبعا شخصيه رائعه زيي كده هتكون ذات قيمه عظيمه في التاجات المهم لما نشوف هاقول ايه
تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارستها؟
الكمبيوتر وانت وقبلهم الأفلام الأجنبي ماما واختي بيقولوا اني مغيب -مش عارف جابوا الكلمه دي منين-والفرجه على اخويا الصغير في صالة الحديد
الجزء التاني لغة انجليزيه شوفوني وانا خواجه
last beverage?:
Tea
2- last phone call ?
calling an old girl friend
3-last instant message ?:
the same person
4- last cd played ?
انغام حبيبة قلبي
5-last time u cried
من حوالي كام شهر زميله عزيزه توفت
section 2 hv u ever
1-date some one twice?
ايوه بصوره او بأخرى
2- been cheated on ?
انا خنت واتخنت
3-kissed some one ®retted it ?
ايوه
4-lost some one special?
اديني بتحايل عشان ميحصلش
5- been depressd ?
بصوره لا تطاق حتى اهلي زهقوا من نكدي
6- been drunk & thruw up ?
كان نفسي اجرب بس خفت معرفش ابطل
list 3 favourit coulers
الأحمر والأبيض والأسود ومش عشان وطني لكن عشان بحب الأيس كريم(فانيليا وفراوله وشيكولاته)بس
section 4
this month hv u:
1-made anew friend ?
انا عمال اتعرف على شعب المدونات ونفسي كلهم يبقوا اصحابي كلهم بنات وشباب تجنن يارب يبقوا اصحابي
وخصوصا اسراء وبنت مصريه وبرايد وحسام
2-fallen out of love ?
انا بقالي اكتر من سنه وانا مدهول فيها
3-laughed untill u cried?
فاخر صاحبي عمال يبعتلي حاجات ابراهيم عيسى لما موتني من الضحك
4-met some one who changed ur life?
كل واحد بقابله بيغير فيه حته صغيره لكن هي واحده بس اللي غيرت الدنيا كلها لدرجة اني لسه مش عارف استعيد توازني
5-found out who ur true friends were?
انا عارفه من زمان احمد فاخر ومن بعدنا الطوفان
6- is there some thing u want to tell some one?
ايوه احب اقول لبابا انا معملتش حاجه هو كل حاجه تلزهقوهالي انا كنت بلعب على الكمبيوتر في حالي
7-u kissed any one on ur top friends:?
اه صحيح لسه بايس فاخر امبارح
8- how many ppl in ur top friends do u know in ur real life?
كلهم طبعا
9- how many kids do u want to hv?
اي حاجه يا عم بس اتجوز الحمد لله على النعمه
10-do u wanna change ur name?
لأ طبعا ده اسم هاي خالص
11-wt did u do 4 ur last birth day?
ولا حاجه هما اللي عملوا تورته في البيت وجالي هديه من حبي وتهنئه من فاخر
12-wt time u wake up to day?
الساعه 5.30 الصبح عشان الحق اتوبيس الشغل
13- wt were u doing at last mid night?
انا بنام من العشاء بعد ما بخلص لعب بلاي استيشن كوره
14-name some thing u cant wait 4 ?
يعملولي عقد في الشغل واتجوز بقى
15-last time u saw ur father?
لسه مفيش حالا اصله بيشتغل معايا في نفس الشركه
16-wt is one thing wish u change about ur life
ابقى غني ومشهور وابصلكوا من شباك عربيتي واطلع لساني
اه ونفسي العرب يتحدوا لو امكن يعني
17- wt r u listening now?
مفيش غير صوت الشفاط اللي جنبي وقرب يجنني من صوته العالي
18- hv u ever talk to some one behind their back?
للأسف بيحصل بس بحاول ابطل
19- wts the last piece of cloth u borrowed 4om some one ?
لا انا بطلت شحاته من زمان انا بأخذ هدوم بابا للأبد مش سلف
20-who getting in ur mind right now ?
يا ترى هاعرف اقابل النهارده
21-most visited web page ?
بحب عم جوجل قوي عشان نفسي مره اقوله دور عليه ويطلعني كده من اول صفحه
22-hv u been kissed 4om any one last weak ?
ايوه طبعا مش قولتلكوا بوست فاخر امبارح
يا لهوي ده التاجات متعبه قوي منك لله يا ساره
أحب شخص لقلبك فى الدنيا؟
غ - اختي - ماما - فاخر - عبده - وبابا عشان ميزعلش
انسان مستعد تضحي بحياتك – ركز فى كلمة حياتك - عشانه؟
غ
انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
كل جندي يهودي في فلسطين, أو أمريكي في أرض العراق
ما هو:اسم أجمل كتاب كتبه بشر قرأته ومحتفظ به حتى الان؟انت متعلق بيه وبتقرأه كل فترة؟
للأسف مبحبش اعيد قراءة الكتب
اهم جهاز منزلى انت متعلق بيه او بتستخدمه كتير؟
الكمبيوتر
شىء تحس بالراحة النفسية عندما تنظر اليه؟
طفله بتضحك
مكان تحس فيه بالحنين الى شىء لا تدرى ماهو و ذكريات جارفة الى لاشىء؟
المكتبه اللي كنت بشتغل فيها عشان كده لسه بعدي عليهم
اجمل مدينة زرتها داخل مصر؟
الصراحه مفيش أحلي من اسكندريه السكره
أجمل مكان طبيعي رأيته داخل مصر؟
شرم الشيخ وبحرها
شخصية كارتونية بتحبها؟
فيدو ديدو بتاع السفن بموت فيه (يا لذيذ يا رايق )
نوع هاتفك المحمول؟
6610I نوكيا
سرعة بروسيسور جهازك؟
800
حجم ذاكرة –هارد- جهازك؟
40GB
المساحة التى تشغلها المواد الاسلامية على جهازك؟
7GB
نفس المساحة السالف ذكرها فى قلبك-الاجابة لنفسك عشان الرياء يا اخواننا-؟
أتمني انها تكون كل قلبي مع اني مقصر جدا جدا
أهم هدف انت واضعه لحياتك دلوقتى؟
اكون قد المسؤليه في كل المواضيع اللي قدامي دلوقتي
مواصفات فتاة –أو فتى للبنات- الأحلام بالنسبة لك؟ تكون ملتزمه وبتسمع كلامي وتفهمه مش مجرد بترضيني وخلاص وطبعا لازم تكون (غ)
صف ما يأتى:
شعورك لما بتسمع كلمة مصر؟
ولا حاجه خالص
شعورك لما بتسمع كلام عن اليهود؟
بحس اني مقر في واجبي ضدهم
شعورك لما بتشوف ظابط شرطة؟
انا عارفه ان في منهم كويسين, لكن للأسف ذكرياتي معاهم زفت مع اني مبعملش اي حاجه بس مره واحد منهم مسكني على باب الجامعه عشان يستعرض قدام البنات اللي معديه وقاللي انت ازاي تعدي كده من جنبي وتخبط فيه انت مبتفهمش وبعد ما رعبني شويه مشاني من غير ما اعرف انا كان ممكن ارد عليه ازاي
اصلي كنت لسه مش فاهم حاجه
شعورك لما بتشوف الكناس العجوز فى الطريق؟
بيصعب عليا أوي
لون البطانية اللى بتتغطى بيها فى الشتاء؟
ماما بتطلع اللحاف طبعا ولونه غريب كده فيه حاجه من الكرنب
لون الجورب-الشراب- المفضل لديك؟
أي حاجه الصراحه , بس يبقي مش مخروم في الغساله
احساسك اذا داست قدمك فى الطريق على مخلفات اخراج حيوان- *** ولا مؤاخذة-؟
باخد بالي بس عادي انا بلبس جزمه سيفتي تفوت في الحديد
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
لو كان بشوش في وشي بحبه على طول ولو كشر بتخانق معاه

احساس يراودك فى اشارة مرور مغلقة بسبب مسئول كبير؟ عادي بقعد ادعي عليهم اني مش عارف اروح
------------------------------------

السبت، مايو 12


انا بحب دايما اجرب اقدم على شغل جديد حتى وانا بشتغل ومستقر بس بحب التجربه و اشوف الفرص اللي في بلدنا المهم قدمت على شغل في شركة تسويق بالتليفون الشركة امريكيه لكن مقرها في مصر المهم قدمت و اختبروني وقبلت وبدأت التدريب كمان لكن في المحاضرة الأولى بدأ الشاب المسؤل عن تدريبنا يحاول يخلينا نشارك في الحوار عشان نصحصح ونشغل دماغنا الغريب ان زي عادة كل الإجتماعات دية تلاقي الناس اتقسموا مجموعات لا تتغير مجموعة من العباقره اللي عمالين يتفلسفوا ويدونا افكارهم العظيمة اللي بتطلع كلها غباء في غباء ومجموعه عمالة متردده مش عارفين يقولوا حاجه و يفضل الواحد منهم يفكر ساعه قبل ما ياخد القرار ويتكلم وطبعا بتكون النقطه اللي بيتكلم فيها عدت من ساعه ومجموعه اخيره مالهاش دعوه بأي حاجه اللي قاعد يتفرج على البنات الحلوين اللي معانا واللي سرحان واللي اصلا مش فاهم حاجه و مكبر دماغه في الغالب لا يوجد انواع اخرى لكن المره دي لقيت شخصيه جديده

بنت خريجة صيدله -وجاية تشتغل في المبيعات ليه انا مش فاهم- لبسها معقول مفيش فيه حاجه خارجه عن الحدود وان كان برده شيك لغتها الإنجليزيه هايله وفيها لكنه لذيذه قوي - اصل انا بحب لكنة البنات قوي- واضح انها مثقفه المهم انها بدأت تناقش المحاضر اللي طبعه المصري غلب عليه و ادار الحديث بمنتهى الديكتاتوريه هي ترد بإجابات مستفذه على كل سؤال غبي يسألهولنا ولما يقول معلومه مفيده تفضل تفاصل معاه فيها شويه وزهق منها وكان ناقص ينط في كرشها لكن كان ماسك نفسه


الغريب ان مهما كانت البنت لذيذه ومتعلمة ومثقفه ولكنتها حلوة يفضل فيها طبع جداتنا وه الفصال في كل حاجه لما قربوا يجننوني

ارجو انها متزعلش من كلامي لو شافته

على فكره انا سيبت الشركه دي وفضلت في شغلي زي ما انا سلام

الخميس، مايو 10

مين المفتري

غريبه قوي تصرفاتنا كل واحد شايف ان هو بس اللي صح و ماشي بحد الله و ان الناس كلها ولاد كلب جزم و مبيختشوش لكن تلاقي ان الحقيقه غير كده اما شايف ان كلنا ولاد كلب جزم عشان متزعلوش انا هابتدي بنفسي انا لقيت ان انا لما بحب اكسب رضا حد عشان مصلحتي بعرف ازاي اظبطه و ادلعه و احوله من غريب عني لواحد صاحبي وممكن يقعد يصارحني بمشاكله و اكلم معاه او بمعنى اصح اسيبه هو اللي يتكلم عشان لما الواحد بيفتح قلبه لحد و ينفس عن مشاعره بيستريح وكنتيجه مباشره ارتياحه النفسي بيبقى متلازم مع الشخص اللي هو بيتكلم مععم فبيقرب ليه اكتر وبعدين ابتدي العب على خصائص شخصيته هو بيحب ايه يتكلم في الكوره ولا الستات ولا النكت و طبعا في النكت لازم اسيبه هو اللي يقول النكت وانا اضحك على خفة دمه وحاجات كتير تانيه مش عايز اقولها عشان انا ابتديت اكره نفسي وعايزكوا تتأكدوا ان انا طيب جدا جدا جدا جدا
طبعا هو فيه حد هيقول على نفسه انه مفتري

الثلاثاء، مايو 8

معاكسات وتحرش و إغتصاب ليه......

انهارده قرأت موضع عن المعاكسات في الشارع على بلوجر اسمه موجود في المفضلة تحت
هي كتبت قائمة بكل الأسباب اللي هي شايفه انها ادت الى ما يحدث في شوارعنا من معاكسات وتحرش و إعتداء و إغتصاب كمان بس انا شايف ان هي نسيت اهم حاجه نسيت السباب المباشره لو انتوا نزلتوا الشارع وتابعتوا المعاكسات او حتى قراتوا في الجرايد عن حوادث الإغتصاب هتلاقوا ان كل موقف كان فيه سبب رئيسي هو اللي سببده كله انا حاسس ان احنا من كتر التفكير في الاسباب الخلفيه و الأعماق النفسيه اصبحنا لا نرى الواقع المجرد وياريت محدش يفهم كلامي اللي هاقوله في المثله على اني متحيز او متجني على اي طرف مثلا نبص على معاكسه حصلت في الشارع ونبص بعين الناقد الدقيق هنلاقي بنت لابسه بدي يهبل يعرض لنا التشريح الدقيق لكل معالم نصفها العلوي ناهيك عن لونه الأحمر الفاقع مع جملة انجليزية معناها المفيد ان دي بنت ممكن تعمل معاها احلى شغل و ننتقل الآن الى البنطلون اللي نفسي اقابل الخنزير اللي فصلهولها و التيس اللي سابها تلبسه و الحمار اللي معندوش مانع ان مراته او اخته تنزل بيه كده قماش رائع الملمس من غير متلمسه تحس انك عارف ملمسه وطبعا من كتر ضيقه عليها تقدر تحدد لون و شكل الأندروير اللي هي لابساه المهم نيجي للولد شاب لذيذ قوي لابس بنطلون ساقط عند نصه متعرفش ازاي مبينزلش اكتر ويقع خالص ضارب في شعره جيل و شكله منكوش و معفن طبعا بعد الفرجه على الكليبات و افلام الكمبيوتر التثقيفيه الهايله و الرغي مع اصحابه عن إحتياجاته الجنسيه بيبقى عامل زي صباع الديناميت اللي عايز ينفجر في اي حاجه

انا عايز الناس تفكر معايا هم ليه بيعاكسوا وليه بيتعاكسوا البنات طبعا وعجبني قوي كلام العسيلي في OTV
لما قال لو عايز تعاكسها و هتموت خلاص قولها كلمه حلوه مش تشتمها
وللحديث بقيه المره الجايه عايز اسمع ردود

الأحد، مايو 6

من احمد فؤاد نجم الى حسني مبارك

من أحمد فؤاد نجم إلى حسني مبارك


سيدي الرئيس
في عيد ميلادك الكام وسبعين
كل سنة وأنت طيب
واحنا مش طيبين
كل سنة وأنت حاكم
واحنا محكومين
واحنا مظلومين
واحنا متهانين
ويا ترى يا حبيب الملايين
فاكرنا ولا احنا خلاص منسيين
فاكر المعتقلين
فاكر الجعانين
فاكر المشردين
فاكر اللي ماتو محروقين
فاكر الغرقانين
الله يكون في عونك - هاتفتكر مين وللا مين
في عيد ميلادك الكام وسبعين
بقول لك كلمتين
الأوله
شيلتنا طين
وهل تعلم أن النيل بقى رشاح
والجو أصبح بيئة والعيشة ولعة
والشرفا قلوبهم عالبلد والعة
وانت عاملهم مذبحة ولا بتاعة القلعة
والاقتصاد سداح
والسرقة بقت كفاح
ومصر متاحة بس للسياح
وعرض البلد بقى مستباح
والتانية
ورتنا الويل
دا الخطوة في عهدك بقت ميل
والضحك بقى نواح وعويل
والكوسة
عارف الكوسة
ممكن أقولك فيها موواويل
والجامعة بقت يا إما كباريه أو دار مسنين
والشباب معظمهم من غير خمرة سكرانين
والعلم عز على المتعلمين
والأساتذة بقم دجالين
والقادة بقم طبالين
واديني في الهايف يا حبيب الملايين
والتالتة
عارف اليابانيين
زمان في سنة اتنين وخمسين
كان عندنا تروماي وكان عندنا علم ومتعلمين
وثقافة ومثقفين
وأدبا وعلما وفنانين
وكانو اليابانيين
بالنووي لسة مضروبين
وللصدقة مستحقين
دلوقتي إحنا فين وهما فين
هما فوق واحنا في أسفل سافلين
والرابعة
أمن البلد بقى تنين
والمحاكم اتملت مظالم
والعدالة بقت كمالة
وكلمة الحق في الزبالة
وأصحابها في الزنازين
والخامسة
القطاع العام…. عام
والفساد…. ساد
وفي جتة بلدنا بيرعى
أفتكر لجنابك إيه وللا إيه
وكل ذكرى ليك بدمعة
آآآآآآآآه آآآآآآآآه
أنا كنت حالف ميت يمين
أكملهم لك تمنية وسبعين
بس هاكفيهم ورق منين
وكل سنة وأنت
واحنا طيبين

لو حد شايف نفسه فنان يقولي

لو حد فيكو شايف عنده شوية فن و محبوسين جواه ممكن مع بعض نطلعهم و ادينا هنستحمل بعض
على فكره الإيميل بتاعي هو
ehabonnet@hotmail.com

السبت، مايو 5

اكيد في حاجات ممكن نغيرها

ارجو ان تكونوا قد تعلمتم من خبرتي العميقة وفصاحتي المعهوده
اكيد اتعلمتوا ان مفيش حد فاهم كل حاجه لوحدة
لازم نسأل بعض

شاب شنكوتي


مين هو الشاب الشنكوتي ؟

ده سؤال لازم اي واحد ناصح هيفكر يسألني بعد تفكير عميق مين هو الشاب الشنكوتي......

وطبعا انا لازم ارد عليه بعد شوية تفكير عميق و حكمة منقطعة النظير -اصل انا في الحكمة ماليش حل- المهم ارد و اقول ان الشا ب الشنكوتي هو واحد زيكوا بس مش زيكو قوي هو ليه ظروفه و اهتماماته و حياتة لكن احنا هنعرف منه ايه اللي بيحصل حوالينا و جوانا يعني لما حد فيكو يكون مكسوف من حاجه عملها او مستغرب من موقف او عايز رأي حد من بره الموضوع يقوم يقولي ايه حكايته وانا ارد عليه بالرأي الشنكوتي المفيد بس محدش يزعل من كلامي يا حلوين انا اصلا مش متربي و صايع و ممكن اكون بلطجي و ليه اصحاب بتلعب كمال اجسام يعني ممكن اقطعكوا يا جزم