الاثنين، يناير 4

اتعلمت ايه

اتعلمت ايه
سؤال سالته لنفسي وانا شايف الناس عماله تتكلم عن السنه الجديده واللي هيحصل فيها واللي حصل في اللي قبليها
ولقيت اني لازم افكر ايه اللي اتعلمته انا من السنه اللي فاتت علشان استفيد منه في السنه الجديده
انا هقول كل اللي اتعلمته لنفسي كده عشوائي وبعدين ابقى احلله بعدين على مهلي:

*متسمعش كلام حد بيجيب في سيرة بنت زميلتك مهما كان الحد ده صاحبك لأن دي اعراض ناس وممكن اختك او زوجتك او امك او حتى بنتك تتعرض للموقف نفسه بعدين.

*متعملش فيها عنتر جبنه على رئيسك بحجة انك مش بتاع نفاق فتفضل تعمل كل الطرق اللي تثبت بيها لزمايلك انك مبترقصش لرئيسك لدرجة انك تخليه يكرهك ويحطك في خانة البلطجيه في الوقت اللي زمايلك النصابين بقوا حبايبه ورجالته.

*مهما كان الشخص اللي بيحاربك قوي عنك او ليه نفوذ عنك او عنده حاجه يذلك بيها ومتصور انه يقدر يمنع عنك ويمنحك كما يشاء اعرف ان ربنا اقوى من الكل وإرادة ربنا هي فوق كل شيء لا يمنعها اي كائن علشان كده كل اللي عليك انك تصبر وتدعي ربنا مش بقول تبقى متواكل ومتعملش اي خطوه ايجابيه لكن وانت بتعمل خطواتك اعملها ودايما عندك يقين ان ربنا هو اللي بيمنع ويمنح .

*اتعملت برده ان مش معنى ان الف واحد قالك عن التجربه دي انها مش حلوه زي ما انت بتحلم او انها متعبه او انها مالهاش لازمه فتقوم انت متراجع او تحط في دماغك رايهم ده لا ادخل تجربك وعيشها استمتع بحلوها واتحمل مرها, هم اكيد برده عدى عليهم اوقات حلوه فيها بس المراره لما بتيجي كل واحد بيصرخ ويقول انا زعلان يا جماعه وتعبان انما لما بيبقى عايش يومين حلوين ولا بنعرف عنه حاجه وحياته بتبقى اسرار.

*اللي عايز يعيش مبسوط وبيته يبقى مستقر عليه بالأحترام والصراحه والتنازل حبه والتعاون
وقبل كل شيء الكلمه الحلوه.

*اتعلمت ان الصاحب الحقيقي مش مهم يكون ساكن جنبك او معاك حتى في بلد واحده ممكن مليون ميل بينكم وبرده يفضل حاسس بيك وقلقان عليك وبيفكر دايما ازاي يحل مشاكلك ويسمع اخبارك .

*اتعلمت برده ان الصاحب بيبان فعلا وقت الشده وان في ناس هي اتربت على كده انهم يبقوا رجاله مش البيئه بتاعة الشغل ولا الشارع ولا المدرسه ولا اي مكان هيعمل رجاله الرجاله بتعملهم امهاتهم .

*اتعلمت ان الراجل بيفضل ينكر دايما اهمية راي الست مع ان هو من اول لما بيتولد بيدور على امه ورأيها ولحد ما بيموت بيدور على راي مراته واخته وبنته كمان ده لما بيكون عنده عقل يعني وعارف قيمة المشوره .

*اتعملت ان ممكن بنت تكون جدعه وعندها اخلاق وكرامه وضمير اكتر من رجاله كتير حواليها.

*اتعلمت ان في ناس بطبعهم بيتولدوا وعندهم قدرة على القياده صح وفي ناس قدرتهم على انهم يكونوا مساعدين للقائد وفي ناس قدرتهم انهم يكونوا تابعين بس وفي ناس معندهاش قدره لا تقود ولا تساعد ولا حتى تحترم النظام وتبقى اتباع محترمين هم بس فالحين يعملوا مشاكل ويعترضوا وخلاص.

*اتعلمت ان اللي اتربى في بيت اهله وشافهم طول عمره مبيعرفوش يدبروا امورهم ماليا او ادبيا او عندهم اي مشاكل في ثقافتهم بياخد جزء مش صغير من مشاكلهم دي في حياته لما يستقل عنهم دايما بيبقى مصاب بنفس العاهه بتاعتهم سواء إسراف او بخل او غباء او تكبر او تجبر ربنا يحفظنا.

*اتعلمت ان في ناس تحبهم وتصاحبهم لكنك عارف انهم مش ملايكه او انهم مش كاملين الأوصاف لكن انت لو هتدور في كل صديق انه يبقى نسخه من احمد فاخر او نسخه من احمد حسن او من صديقي الجديد محمد حسن هتقعد طول عمرك تدور علشان تلاقي واحد او اتنين تاني زي الناس دي
واختم بقى بسر السعاده اللي النبي – صلى الله عليه وسلم – قاله في الحديث الشريف " من أصبح منكم آمنا في سربه ، معافى في جسده ، عنده قوت يومه ، فكأنما حيزت له الدنيا "
سعيد بكل واحد اتعرفت بيه هنا في التدوين وبناس كتير اتعرفت بيها السنه دي الحمد لله على النعمه
بحبكم كلكم جدا جدا يا اخواتي بجد

هناك 9 تعليقات:

ساره يقول...

متسمعش كلام حد بيجيب في سيرة بنت زميلتك مهما كان الحد ده صاحبك لأن دي اعراض ناس وممكن اختك او زوجتك او امك او حتى بنتك تتعرض للموقف نفسه بعدين

تعرف ان ربي ان شاء الله دائما بيحفظك ويحفظ ذريتك ويستركم فوق الارض وتحت الارض ويوم الاعرض ... فعلا كل شئ ولا الاعراض يارب يحفظنا ويسترنا

الله يسعدك يا ايهاب امين

اقصوصه يقول...

تعلمت اشياء جدا مهمه هذا العالم

وكل عام وانت بخير

وتعيش وتتعلم :)

أم .. بوبه يقول...

كل سنة وانتوا طيبين وإخوات حلوين وعلى الخير والحب متجمعين

بنوتة من وسط البلد يقول...

كل سنة وانت طيب يا شنكوتى
وعجبتنى اوى الدرس بتاع رئيسك فى الوقت الى انت فيه غبي بيكون النصابين هما الى رجالته

اياكش تتحرق فوفا اكتر ماهى محروقة يا راجل وحسبي الله ونعم الوكيل :)

لما رجعت قلت لازم اسلم واسال على اصحابي الى وحشونى .. سلامات وتحيات

GHARAM يقول...

اتفق معك في كل كلمة كتبتها وكأنما تكتب مافي داخلي تماما


تحياتي

Wanda يقول...

صح الكلام
تعرف انت محضوض اتعلمت جه فى سنة واحدة بس مش سنين و سنين
:-)
ربنا يوفقك

سمكه واحده يقول...

الله
اللي تعلمته حلو اوي
وعجبني وياريت كلنا نتعلمه
بس اهو عرفناه ونحاول نطبقه
جزاك الله كل خير
وكل سنه وانت بخير

قيس بن الملووووح يقول...

نحن في حاجه الي رايك في مشاكل القراء علي مدونة"دقات قلب فوق الخمسين"

مياسي يقول...

الصحيح تعاليم مهمه

استمعت بها جدا واستفدت كمان

شكرا يا شنكوتي كيفك وكيف أحوالك؟ ان شالله تمام؟