الاثنين، أكتوبر 29

النهارده فرحي يا جدعان




الشنكوتي عملها ولبس الدبله يا رجاله

اخيرا وبعد انتظار سنتين
بعد ما كنت مرت علينا لحظات حسيت اني بحارب طواحين الهواء زي الراجل اللي بيقولوا عنه ده
الحمد لله من عند ربنا كده المشاكل انكشحت شويه والدنيا سلكت كده فجأه وهوب لقيت نفسي بلبس الدبل يوم الجمعه 26اكتوبر اللي فات الحمد لله

انا قبل ما اجكي عن جو الفرح واللي حصل فيه حبيت بس اقول للناس واوضح للكل ان الموضوع مجاش بالساهل كده
لأن مفيش حاجه حلوه في الدنيا بتيجي سهله علشان بس الناس اللي عمالين يتكلموا عن الظروف والمشاكل ومش عارف ايه ويقولك خلاص مفيش فايده وزمن الحب والتضحيات انتهى
وتلاقي كل واحد منهم عمال يكلمك عن ان هو عمل الصح لما انهى علاقة الحب بتاعته علشان ميعطلهاش ويوقف عمرها على ظروفه
وهي برده تعمل فيها شهيده وهوب تسيبه وتقوله انا بعفيك من المسؤليه وبعفيك من التزامك ناحيتي لو هسببلك مشاكل

حرام عليكم هو انتم بتحسبوا ان الحياه كلها ورد وياسمين
الدنيا مليانه مشاكل هتقابلكم في حياتكم ولازم تتعودوا تتحدوها وتتغلبوا عليها
ولا انت وهي لما كنتم بتقولوا لبعض انا مستعد اواجه الموت علشانك يا سحر تقله وانا كمان يا وائل كنتم فاكرين الموت بتاع الكارتون يعني والتحدي الأكبر هو علبة الكانز اللي هتفتحهالها بنفسك يا سبع البرمبه
الدنيا مليانه مشاكل حقيقيه هتواجهكوا و-ملحوظه سحر ووائل دول بتوع مسرحية ريا وسكينه اللي هم ابو هني احمد بدير يعني- عموما حبيت بس اقول لكل واحد حبيبته تقله انا بعفيك من كيت وكيت وتقوله انا حاسه اني بقيت حمل عليك يقوم يهبدها قلمين وتهزيئه حلوه كده علشان تصدق وتقتنع انه مش هيفرط فيها بالساهل
وطبعا كل قطه حلوه البيه يقولها انا مش عايز اتعبك في الأنتظار اكتر من كده وانتي شايفه ظروفي عامله ازاي تقوم تخبطه بكعب الجزمه على دماغه وتقوله ده بعينك علشان يقدر هي متمسكه بيه قد ايه

الحاجه المهمه دلوقتي هي فرحي انا سيبكم من الناس المسحوكه دي
الحمد لله الفرح كان تحفه هو اصلا الموضوع اتفقنا انه عائلي في اضيق الحدود لظروف عائليه عندنا وعندهم بالصدفه الله يرحم امواتنا جميعا المهم
عبده اخويا قالي متزعلش هاعملك زفه تهبل اطمن
وكان ما قال صدقا لقيته جايب عربيتين شكلهم تحفه وركنهم قدام البيت قبلها بليله وجايب شنط واكياس سوده كبيره قوي سألته ايه ده يا ابني
قالي دول شوية صواريخ وشوية مفرقعات وعلبتين طلق صوت وورق ملون وحاجات كده لزوم الزفه
طبعا انا اتسرعت من المنظر اسطوانات طويله قوي كده ملونه وعلب تخينه مرسوم عليها انفجارات غريبه
وطبعا الأيس اللي بيتبخ من انابيب كده وبهدل الناس في الأفراح
وفي يوم الخطوبه نفسه لقيت شلته المكونه من اصناف عجيبه من الشباب معظمهم ابطال في الرياضه ماشاء الله اللي بتاع مصارعه روماني واللي جودو واللي رفع اثقال وناس كده شكلها مرعب عاملين زي الحيطه ايه دول ياد دول الجاردات اصحابي
كمان جايبلي بودي جاردات في الفرح
ما علينا اهو برده ينفعونا في الزنقه
رحنا الفرح وطبع القياده المذهله اللي قطعت خلفي خلاص كانت روعه
وصلنا واخدنا العروسه من الكوافير وطلعنا على البيت عندهم
بمجرد ما خرجنا من العربيه انطلقت الأنفجارات وورق ملون طاير في كل حته وصواريخ ومسدسات الصوت عامله زي الرز كل واحد ماسك مسدس وعمال يضرب بيه في الهواء
وقفت معاهم شويه وطبعا رقصت لما اكتفيت وبعدين طلعنا لبسنا الدبل في البيت فوق
واستأذنت حمايا العزيز اني اخرج انا وهم وخطيبتي بعد الفرح ووافق الحمد لله
واخدونا على مركب في النيل لوحدنا بس كانت تحفه
مش هاحكيلكم على المركب علشان دي كانت حاجه مجنونه خالص

سلام بقى وعقبالكم جميعا

هناك 44 تعليقًا:

إنـســـانـة يقول...

الله اكبر
يا الف نهار ابيض يا الف نهار مبروك

لولولولولولىىىىىىىى

بارك الله لكما وبارك عليكما وجمع بينكما فى خير

الحمد لله لحقت اول زغروطة تدوينية

:D

ألف ألف مبروك وربنا يتمملكوا بخير يارب اللهم آمين

عصفور المدينة يقول...

مبارك يا باشا وربنا يتمم بخير

ولــــــــــو يقول...

الف الف مبروك
وكمان واجهت الصعاب وعبرت المحيطات وحاربت الاشرار وف النهايه لبست دبل
لا فعلا تستاهل الف مبروك
عقبال الفرح ومايكونش فيه ظروف
طبعا هايبقى خيالي
مادام كده الظروف منعتكوا يبقى ربنا يستر على البلد يوم الزفاف
الف الف مبروك كمان مره

Queen eraser يقول...

مبروك شوية عليك يا شنكوتى..
ألف مليون مبروك.كل اللى انت قلته ده ف حد >اته أنجاااااااااااز ضخم زى مانتا شايف.
بقالى كتير مسمعتش خبر حلو.ربنا يتمم بخير ان شاء الله.

قلوب حائرة يقول...

ايهااااااااااااااااب مبروك ياباشا والله كان الواد بلال اخويا الي خطب ربنا يسعد قلوبكم ببعض وتكون لها نعم الزوج وتكون ليك نعمة الزوجة وفعلا صدقت يابني قطيعة محدش بياكلها بالساهل وبعدين فين البيبسي والجاتوه الدايت علشان الرجيم ربنا ييسرلك امرك ويتم بخير ياايهاب يارب وعقبال الزفاف يامان

Doba يقول...

يا عريس يا صغنن علقة تفوت ولا حد يموت

الف مبروك يا صديقى العزيز وربنا يجمعكم على خير

انت يا واد يا ايهاب
البنت دودى من شبرا زيى يعنى لو زعلتها مجرد زعل هاجى انا والعصابة ونخطفك ونقطعك تقطيع اه داحنا زينة شباب شبرا ومراتك وراها رجالة يا بيه

الف مبروك يا احلى عروسين وسلملى على عبده واشكرهولى عالحركات اللى عملها

لولولولولولولولى
هبة

Miss Egyptiana "Trapped Soul" يقول...

يا الف نهار ابيض
يا الف الف مبروك

الشنكوتى الكبير خطب
يا رب يتمم بخير ويجعلك الفرح والهنا ان شاء الله رب العالمين

Mirage يقول...

يارااااااجل

الف الف الف مبروك

اتمنالك الخير دايما صدقنى

وقوللى على اسم عروستك بقى عشان اكتبلك كلمتين حلوين على أساميكوا

ربنا يتمملك بخير وتدخل على خير إن شاء الله

Soooo يقول...

لولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولولوييييييييييييييييييييييييييييييييييي

ابو الشناكيت اتجوز يا مينززززززززززز

ربنا يباركلك فيها يارب ويباركلها فيك ويجمعكم على خير ويوفقكم يارب ويسعدكم دنيا واخره
ويبعد عنكم شر العين وشر المدونين

انا عارف انها جايه متأخر يابو الشناكيت بس ظروف والله هي اللي منعتني اتعامل مع النت خالص .. مش النت وبس .. دي مع الحياه عموما والله ياريس

ملحوظة:
مش كنت جبتلك موبيل ثري جي اوفر يا ابو الشناكيت .. واهو كنت تصور بيه شغل الصواريخ وضرب النار والمركب اللي في النيل .. وبالمره تصور صحاب اخوك البودي جاردات دول عشان نخوف بيهم الناس شويه



سلاموووووووووووووووز

sally يقول...

اول زيارة ليا للمودنه و الحمد لله انها في حدث سعيد زي ده
الف الف الف الف الف الف الف الف الف الف مليون مبروك
و ان شاء الله ايامك كلها تكون فرح و سعاده

الشنكوتي الكبير يقول...

انسانه
ربنا يخليكي
وعقبال ما ازغرطلك كده في فرجك وارقصلك كمان
ربنا يكرمك يارب نورتيني

سلاااااااااام


--------------------

عصفور المدينه

الله يبارك فيك
عقبالك يا عصفور لما ترسى على غصن تحبه
سلااااااااااااام


--------------------

ولــو

الله يبارك فيك يا صديقي عقبالك
وبعدين هو احنا عملنا حاجه
ده حاجه كده يعني بسيطه
ههههههههه

وبعدين يعني هو انت مش مصدق ان الموضوع كان فيه مشاكل وحروب وصعوبات
كنت تعالى شوفني وانا بصارع التنين وبهاجم اشباح الماضي بسيف من نار
في ارض الظلام
ما علينا علشان متقولش عني اني بفشر مثلا
سلاااااااام

--------------


Queen eraser

ربنا يسعدك يا كوين
عقبال فرحك يارب
وطبعا محدش يقدر يتكلم عن جمال افراح اسكندريه يا ستي
ربنا يسعدك
سلااااااااااااام



-----------------

قلوب حائره

اولا يا ستي ما هو انا برده اخوكي زي بلال مفيش فرق
وبعدين عقبالك انتي والواد احمد يارب
ثم جاتوه بس ده انتي تأمري وعيوني ليكي هاتي احمد وتعالي اعزمكوا على صينية بسبوسه بحالها
سلااااااااااااااام


------------------

دوبه
هبه ام يوسف

ربنا يخليكي يا هبه
بس يا بنت دي خطوبه مش .....حاجه تانيه عريس صغير قال
بس سيبك انتي انا بحب بنات شبرا صحيح وشباب شبرا اصحابي
يعني مش بتهدد يا ابله
وخدي بالك اديكي شفتي عينه من اصحابي يعني ممكن نقفل شبرا بس متهونش عليا برده شبرا حبيبتي

سلاااااااااااااااام
عقبال يوسف

--------------------
Miss Egyptiana "Trapped Soul"
الميس ايجيبتيانا هنا
ربنا يخليكي وعقبالك يا سكره
نورتيني ياريتك حضرتي الفرح بنفسك يمكن كنتي تجيلك فكرة قصه جديده كده تحفه من اللي دوختيني بيهم

عقبالك يا سكره
سلاااااااااااااااااااااام

----------------



ميراج


الله يبارك فيك يا مان ايه رأيك في المفاجأه دي
بس متخافش انا زي ما انا يعني ظبط انت المسائل وانا هاجي على طول
عقبالك يا واد
اما اسم عروستي هو انا لسه مقلتش عليه
اسمها غاده
سلااااااااااااااام


---------------------

sooooooo

ربنا يكرمك يا سو يا صديقي العسل
مش عارف انت هتتجوز امتى انت كمان وتسيبك من الموبايل الثري جي
اعذرني يا مان لقيت ان الموبايل مش حلو قوي زي حبي لعروستي

عموما عقبالك تلاقي اللي تنسيك الثري جي والفور اتش كمان

ربنا يسعدك يا صديقي

سلااااااااااااااام


---------------------

sally

سالي طبعا نورتيني بأول زياره
وعقبال ما اجي عندك الاقي عندك احلى مناسبه برده
نورتيني وسعيد بزيارتك
سلااااااااااااااااااااااام

simple girl.. ..simple dream يقول...

مبروك يا شنكوتى
وبالمناسبة
بدلتك كانت شيك قوى

مبروك تانى وعقبال الفرح

Esmat يقول...

ألف ألف مبروك
وعقبال ما ربنا يتمم بخير
وتحية كبيرة لنصفك التانى
دعوات لك بدوام السعادة
معا إنشاء الله

shahy يقول...

الف مبروك يا ايهاب وعقبال الفرح
وان شاء الله يبقى على اوسع شوية علشان نيجي نهني ونبارك

ربنا يجمعكم على خير
وسلامي لغادة وقلها الف الف مبروك

سلام

Nani يقول...

السلام عليكم
لولولييييييش
احلى زغروطة للعريسين
الف الف مبروك بالرفاء والبنين ان شاء الله
لولوليييييييش
:)

الشنكوتي الكبير يقول...

simple girl.. ..simple dream
ربنا يخليكي يا سكره
عقبال ما افرح بيكي يا جميله
واشوف فستانك يا قمر

سلاااااااااااااااااااام

------------------

عصمت

ربنا يكرمك
وتسلم وانشاء الله التحيه هتوصل لنصفي التاني

عقبالكم جميعا

------------------

يا شاهي ربنا يخليكي
عقبال اولادك وعقبال افراحهم

واكيد انشاء الله هاعزمكوا انتي والأسره كلها في الفرح

ربنا يسعدك
سلااااااااااااام

---------------

ناني

فعلا دي احلى زغروطه
تسلمي
سلاااااااااااااااام

مريم يقول...

مبروك يا جميل
عقبال الدخلة يا معلم

ربنا يسعدك يارب

NeRmeeN يقول...

الف الف مبروووووك يا شنكوتى
بجد فرحتلك اوى :)
تحياتى

الشنكوتي الكبير يقول...

مريم

يا اسكندرانيه يا سكره ربنا يخليكي وعقبال فرحك
نورتيني

سلااااااااااااااام

----------------
نرمين

ربنا يسعدك يا نرمين
عقبال فرحك وشكرا على التهنئه

تحياتي
سلاااااااااااااااااااااام

غير معرف يقول...

يا ولد يا ايهاب في جديد يا بني تعالي شوفه متتعبش حسي " قلوب حائرة

Tamer Nabil يقول...

الف الف مبروك

ربنا يتمم ليك على خير

وانا مبسوط لكلامك لانة كلام صحيح ومية مية.

ربنا يوفقك ويكرمك

تحياتى

Soooo يقول...

ياسلام يابو الشناكيت
يعني انت عايز تقنعني ان الثري جي .. مش قد كده
!!!!!
علمك علمك علمك .. انا لي واحد صاحبي جايب موبيل ثري جي .. وفي نفس ذات التوقيت المحلي .. شغال مهندس بترول
يعني الموضوع كأنه يكاد يكون فل يعني


ربنا يهنيك يا هوبا .. ويكرمك يارب ويرزقك الرزق الحلا الطيب
ويهدي سركم يارب


سلاموووووز

dr.Roufy يقول...

ألف..ألف مبرووووووووووك
ربنا يسعد كل أيامك يارب
وعقبال..الفرح الكبيييييييير

مبروك
:)

Lemonada يقول...

الللللللللللللفففففففففففففف مبروك
والله مكسوفة من نفسي
كدة متأخرة
متاسفة خالص
بس بجد من جوة جوة قلبي الفففففففف مبروك ودلوقتي تستاهل لقب الشنكوتي الكبير :)
يا رب كدة نشوف العيال بيتناطاطو حاواليكم
بس كدة تقول انك اسكندارني ولسة عارفة انك العروسة اسكندرانية
يا عم دي تحطها جوة حباب عينيك
ولو سمعت انك زعلتها يا ويلك انت ماتعرفش ليمو تعمل اي :)
الف الف الف مبروك
وخمسة وخميسة في عين الي مايصلي
على فكرة بخصوص الفرح وعلى الضيق عارف حاجة الفرحة الحقيقة الي في القلب
ياما كان في خطب وافراح اتعملت بفلوس هبل بس ماكملش الفرح اسبوع
يا رب كدة يحيمكم
كلامك زي دايما كلو حكم بخصوص التضحية
مش حقول اكثر من كدة
بجد فرحانة الف مبروككككككككك

sa7arkash يقول...

يا سيدى الف الف الف مليون مبروك وعقبال الفرحة الكبيرة

ومرحبا بك فى عالم السعداء والموعودين

وحسرة عليها يا حسرة عليها

جت رجليها ما جت رجليها

دةبمناسبة سحر ووائل

ومتشكرة أوى على زيارتك السابقةومالقيتش مناسبة احلى من كد آجى وابارك لك فيه

الف مبروك

سلام

bastokka طهقانة يقول...

نحن السابقون و انتم اللاحقون
معلش يا شنكوتي الجواز علينا حق
بس اوعى بعد الجواز تعمل مدونة قرفان و قرفانة و تنافسنا
هههه
بالتوفيق ان شاء الله

اوروفوار

فى القلب يقول...

ألف مليييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييار
مبررررررررررررررررررررررررررروووووك
يا شنكوتى
و الله و الله و الله
أنا من كتر تأثرى بكلامك و أحساسى بفرحتك
حسيت أنى عايزه أبكى لولا أنى فى سيبر كافيه
لأن النت مهنج فى البيت
معلش على تعبك بس ما أحلى الفرح بعد التعب و التصميم الجميل
و ربنا يخليلك أخوك و كل حبيباك

كاميليا يقول...

شنكوتى

مش كان ممكن تزورنى من غير ما ارد الزيارة مهما كانت الظروف

بس اجمل حاجه انى اول مرة ادخل مدونتك الاقى الخبر الرائع ده

وكأنى حضرت الفرح بالظبط

الف مبروك وربنا يتم عليك بالف خير ويسعد قلبك ويريح بالك ويحقق كل أمالك يارب

كاميليا

Ghada يقول...

بحبااااااااااااااااااااااك ومبروك انت عليا يا احلى خطيب واحلى زوج ان شاء الله انا كمان يا هوبا كنت مبسوطة اوى فى فرحنا لانى حسيت ان الحاجة الجميلة اوى مش بتيجى غير بعد معاناة واحب اطمنك انا عمرى ناهاتنازل عنك مهما كانت الظروف تقول اية بقى لزقة يعنى ادبست يا حلو وبجد مبسوطة انك كنت مبسوط من الفرح ومتحكيش على اللى حصل فى المركب ان الله حليم ستار
بس المهم انى اتأكدت انى اخدت اعظم فارس ممكن اى اميرة تتمناة فى الاحلام بس انت بالنسبةليا بقيت احلى حقيقة فى عمرى انا بعشق ملامحك

الشنكوتي الكبير يقول...

Tamer Nabil

الله يبارك فيك ويكرمك
شكرا على التهنئه الجميله دي
ربنا يبارك فيك
نورتني
سلااااااااااااام

----------------

soooo

يا صاحبي يا كبير
الله يبارك فيك وعقبال ما افرح فيك
وتسيبك من الثري جي

عموما لو على صاحبك بتاع البترول ده تلاقيه بكره هيتجوز ويبيع الثري جي صدقني

الله يحفظك
نورتني
سلاااااااااااااااام

----------------

dr.Roufy

الله يبارك فيكي
عقبال الجميع
نورتيني يا سكره
وتشكري على التهنئه
سلاااااااااااااااااااااااااام
--------------


lemonada

يا سكره ربنا يخليكي
وعقبالك يارب

تشكري على الكلام اللي زي السكر ده
وبعدين ملحوظه عايز اوضحها

انا بعشق اسكندريه بس انا مش اسكندراني
وبعشق شبرا مع اني مش شبراوي
بس قالولي مادمت هتتجوز من شبرا يبقى هاخد لقب شبراوي
عقبالك

سلاااااااااااااااااااام


----------------------

sa7arkash

سحوره يا سكره
ربنا يسعدك وعقبالك

بس خدي بالك لحسن حصب الله ميعرفش ابوه

وابقي سلميلي على سي عبد العال
نورتيني

سلاااااااااااااااااااام
والله كويس ان حد فهم مين رشا ووائل

سلاام
------------------
طهقانه

ربنا يكرمك
وبعدين هو انا اقدر اتحدى الأبطال الجامدين قوي طهقان وطهقانه

ربنا يسعدك دايما

واتمنى مكونش ولا انا ولا انتي قرفانين ابدا

سلااااااااااااااااام

--------------

في القلب
يا اختي الجميله
كأنك كنتي معايا في الفرح
تسلمي يا سكره عقبال اولادك كلهم

تجوزيهم وتفرحي بيهم

سلاااااااااااااااام

--------------------

كاميليا

يا ستي نورتيني وشرفتيني
وعقبال عندك
اجي اباركلك انتي كمان
ربنا يسعدك
وشكرا على التهنئه الجميله
سلاااااااااااااااااام

الشنكوتي الكبير يقول...

غاده
تاني بقولك
ربنا يحفظك ليا
ويقدرني اكون زوج صالح

تحياتي يا من ملكت قلبي وعقلي

بس حاسبي يا بنت لحسن حد يحسدنا بقى
سلاااااااااااااااام

أيامنا الحلوة يقول...

لولولولولولولوووووووووووووووي الف الف مبروك بجد والله انا فرحت لكم كتير بس خدو بالكم من الحسد ياحلوين ربنا يتم عليكم بخير ياااااااااارب

بقولك ايه امانة عليك ياراجل لتدعي للناس اللي بتعاني زي ما انت عانيت لحد ما وصلت للي انت فيه دلوقتي ربنا يحفظكم يارب ويتم عليكم فرحتكم بخير

تحياتي

يا مراكبي يقول...

ألف ألف مبروك

أخيرا فيه حد جايب لنا خبر يفرح

ربنا يبارك ويتمم لك على خير

عاليا حليم يقول...

يا ألف نهار مبروك
و الله ما بعرف أزغرد
ربنا يعدكوا و يشكح عنكوا المشاكل دايما أنشاء الله

فين بأه الجاتوه ؟ :)

Yahia يقول...

مبروك بس معلش متأخره أسبوعين. شد حالك بقى وعايز اسمع منك ازاي واجهة الصعاب والمشاكل يا سيد الرجاله بس بشرط لما تندم تقول .... بصراحة

مبروك وتحياتي

Dalia يقول...

الف الف مبروك يا ايهاب
ربنا يتمم بخير

همسات يقول...

مبرووووووووووووووك
مبروووووووووووووووووووك
مبرووووووووووووك

Pakinam Nasser يقول...

مبروك

Mo3Az يقول...

يا نهار ابيض

يعنى اغيب شوية عن المدونة ارجع الاقيك عملتها من ورايا :)

الف الف مبروك يا جميل

وربنا يسعدك ويسعد ايامك ويعمل لك كل اللى بتتمناه

بارك الله لكما وبارك عليكما وجمع بينكما فى خير

مبروك حبيبى
جاية متأخر معلش

(F)

امرأة من عبير الورد يقول...

لما الفرح يدق الباب
قلبي بيجاوب ... مقبول
و بفتح بنفسي الباب وأحضني واقول
بقالي حبيب يملي حياتي
و يسكن قلبي اللي كان فاضي
ويملاه عبير الحب وأحلي ورود

مبروك يا شنكوتي فرحت فييييييييييييييك جدن

safa7_karmooz يقول...

مبرووووووووووووووووووووووووووووك

الف الف مبرووووووووووووووووك

عشان كده مختفى ;)

زُمُرده يقول...

السلام عليكم
الف الف مبرووووووووووووك
هنخلص من عازب ويزيدوا المعذبين واحد
يلا الف مبروووك
وعقبال ما نشوف عيالك
نصايحك لكل اتنين عجبتني موووت
ياريت الناس تبطل تستسهل التضحيه ببعض
وتعيش دور الشهيد
عموما ده انت لسه في اول المشوار وربنا يعينك ويسهلهالك
انت وكل اللي عايزين بعض بجد
اول آآآميييين

koukawy يقول...

كنا عايزين نشوف صورة العروسه
علي العموم مبروك

M@@@@H يقول...

وهو الفرح يكمل من غير الأصحاب .. داحنا منحبش نخدم غير في الأوقات دي .. يانهار ابيض .. صاحبي .. خطب .. وبيتجوز كمان ؟؟؟؟ ده ليلتو مش فايته
وطبعا حباية الصراحة اللي بناخدها قبل اي فرح .. ولو العروسة سالتني انا حقول كل حاجة .. اكدب يعني ؟؟؟

الف مبروك يا شنكوتي .. وعقبال بقية الشعب