الخميس، أكتوبر 4

قال بيقولوا شعب طيب


من لا يرحم لا يرحم
رأيت في حياتي حاجات كتير بتحصل اكدتلي ان بلدنا خلاص مبقاش فيها حاجه اسمها رحمه
كلها مواقف شفتها بعيني
عربية البلديه او شرطة البلديه تمر في الشارع والباعه بيجروا كل واحد عمال يحاول يلحق يهرب قبل ما ياخدوا كل اللي حيلته المهم قفشوا بضاعة عيل صغير كان بيبيع هدوم وقماش في السوق اخدوا الفرشه كلها وحطوها في العربيه الواد مش عارف يعمل ايه عمال يجري وراهم ويعيط واحد منهم شاورله قاله خد ياد قرب هنا تعالى الواد جري بيحسبه هيحدفله البضاعه الراجل ضربه قلم على وشه وقع الواد في الأرض معرفش هو ضربه ليه يمكن علشان يحرم يعيط قدام رجال البلديه الشجعان
اب واقف عمال يزعق لأبنه علشان راحله المدرسه المدرسه قالتله انه مش بيعمل الواجب ضربه قلم على وشه عين الواد ازرقت من الضربه وفي البيت ربطه في السرير من غير اكل يوم كامل علشن الواد يعرف اهمية العلم
زوج راجع من الشغل تعبان لقى زوجته مش عامله اللي هو قال عليه وراحت لأمها من غير ما تقول راح ماسكها بالأقلام والشلاليت واللكميات كأنه في ماتش ملاكمه بس برده محسش انه شبع وفش غله راح جايب كوباية مياه معدنيه كبيره وفضل يضربها بيها في دماغها لحد ما الدم انفجر من رأسها ونزل على ايده ساعتها هدي شويه وسابها تقع على الكنبه علشان يستريح شويه
في الشارع شاب غلبان كده ماشي وفجأه امين شرطه وقف قدامه سأله فين ياد بطاقتك اتخض قاله حاضر هاطلعها اهي الأمين طبعا مستعجل قاله بسرعه يا ابن الم..... يا ..... الواد قاله طيب حضرتك بتشتم ليه هو انا عملت حاجه راح نازل على وشه بأقوى صفعه قدر يجمعها الواد عينه دمعت من الألم والذهول مش الم الصفعه لكن الم كرامته اللي نزفت كل دمها
مدرس في الفصل دخل لقى طالب بيكتب على السبوره قاله بتعمل ايه يا ابن ال.... وراح رافع ايده ورزعه قلم نسى الواد اسمه الواد صرخ وقال هاجيب ابويا راح برجله ضربه حتة شلوت كوم الواد على الأرض
شوية عيال في المدرسه ماسكين عيل غلبان كده ونازلين فيه تريقه وشتيمه ومعاكسات راح ماسك في واحد منهم اتلموا كلهم عليه ضربوه مع بعض وقطعوا هدومه وسابوه مرمي في الأرض بيبكي وراحوا يكملوا لعب
ام قاعده مع صاحبتها بترغي شويه الواد عمال يلعب فجأه لقيته راح بيلعب في الدولاب وقع نص الهدوم على الأرض حبت تعاقبه قامت جابت ملعقه وسخنتها على النار ومسكت ايده وحرقته بالملعقه علشان ميعملش كده تاني
أخ مش لاقي شغل وقاعد في البيت اخته بتنزل تشتغل كل يوم رجعت يوم متأخره طلب منها فلوس رفضت راح ماسكها من شعرها ونزل فيها ضرب لحد ما استسلمت واديته كل اللي معاها
سواق ميكروباص بيسابق واحد تاني علشان الدور الشارع ديق والعربيتين لازقين في بعض ست كبيره ماشيه على جنب الطريق بس مش على الرصيف شافها زمر لها علشان تغور بعيد بسرعه ملحقتش خبطها بقوه فظيعه علشان الفرامل مقدترش توقفه الست وقعت على جنب الطريق لا تنطق
في الشارع جنب بعض البائعين لقيتهم ماسكين واحد بيقولوا حرامي قلت يا ساتر جدعان فجأه لقيتهم بيضربوه كأه يهودي اقلام وشلاليت وضرب مبرح بصوره غير ادميه الواد هيموت في ايدهم مش عارف اقول ايه طيب افرض بعد ده كله طلع مش حرامي ولو حرامي يضربوه كده ويعذبوه كل ده الواد كان هيموت في ايدهم انقذه منهم ان الحكومه جت علشان تكمل عليه يمكن هو يستاهل مش عارف
خناقه في الشارع بين اتنين شباب فجأه اهل واحد منهم وجيرانه واصحابه اتدخلوا ومسكوا الواد الغريب يضربوه كل واحد كان بيضربه كأنه مش مسلم زيهم ولا حتى مصري زيهم كل واحد بيضرب بغل وعنف وكراهيه كأن الواد ده اغتصب نسائهم مع ان الموضوع خناقه على لعبة كوتشينه

النبي –ص- قال من لا يرحم لا يُرحم الناس بتستغرب اللي بيحصل في البلد من قلة بركه وشعور بلاقهر وكل اللي بيحصل ده السبب يا ناس مش ان الحكومه والسياسه وكل اللي بنقوله ده السبب ان احنا مبنرحمش بعض اللي بيقدر على حد بيطلع فيه كل الحقد والغضب والغل اللي جواه
انا من كتر ما شفت كرهت البلد كلها
وكنا زمان بيقولونا ان الشعب المصري شعب طيب قوي وغلبان الظاهر الحكايه دي خلاص راحت

هناك 40 تعليقًا:

آلام وآمال يقول...

والله انت قلت كلمتين في الاخر هما صح الصح
المشكلة لا في حكومة ولا في نظام
الخلل من عندنا احنا
يسلم فمك يا عم الشنكوتي يا كبير

بس بردو يعني كلمة لازم اقولهالك والكل بردو هيقولهالك
ان مش كل الشعب بالمنظر ده
اكيد في الكويس وفي اللي مش كويس

وربنا يصلح الاحول ويجعلو عاااامر

الشنكوتي الكبير يقول...

الام وامال

الله يخليك يا محمد معاك حق طبعا انا جايز غلطت وعممت النظره بس انت عارف لما بيحصل قدامك مناظر كتير وحشه قلبك بينقبض من المجتمع كله واكيد برده في ناس كتير بخير
ربنا يبارك فيك ونورتني
سلااااااااااااااااااااااااااام

Antony يقول...

إزيك يا عم الشنكوتي
أنا آسف علشان ساعات بغيب عليك ، بس غصب عني بسبب طبيعة شغلي اللي مش بيرحم
المهم ، أنا عاوز أقولك أن المشكلة مش حكاية ان الشعب بقي وحش ، بس الموضوع عبارة عن قلة تربية مش أكتر ولا أقل ، يعني صفحة الحوادث اللي أنت قلتها ديه كلها تدل علي ان مفيش وعي عند الناس ، وده بسبب حاجات غلط في التربية ، فمثلا الراجل اللي بيضرب ابنه بيعتقد ان هي ديه التربية علشان كان أبوه بيربيه كده ، والراجل اللي بيضرب مراته بيحس انه لما بيضربها ويمشي كلامه حتي لو عارف انه غلط ، هي ديه الرجولة ، واحساس الناس من جواها بالظلم والتعدي عليهم في كل شئ بيخليهم يعملوا كده ، ياراجل ده أنت لو قعدت ومش اتكلمت مع حد خالص يقولوا عليك متكبر وخبيث ، معلش ممكن تكون في حياتك مش شفت كتير علشان كده أنت متفاجئ ، بس للأسف هو ده الواقع ، أنت عارف مرة عمي كان في أمريكا وعند واحد صاحبه مقيم هناك ، وبعدين صاحبه ده متجوز ومخلف ولد واحد ، المهم أن الولد عمل حاجة غلط ، فمراته - المصرية طبعاً - قعدت تصرخ في وش الولد وتجري وراه علشان تضربه ، وصوت الولد بقي علي من الصريخ ، فواضح ان الجيران سمعوا صرخة الولد ، فاتصلوا بالبوليس علشان ييجي يشوف اللي حصل ، وفجأه لقوا جرس الباب بيضرب والبوليس داخل بيسأل علي الولد الموجود في البيت ، فلما عرف ليه الولد كان بيصرخ ، هدد أمه بأنهم لو سمعوا صوت الولد تاني أو عرفوا انها بتضربوا حيخدوه منها ومش حتشوفه تاني ، لأنه يعتبر مواطن أمريكي وله حقوقه علي البلد اللي هي أولي بأنها تتكفل بيه.......
فين أحنا من ده كله ، فين الرصيف اللي الحكومة بتعمله علشان نمشي عليه ، حتي التعليم الحكومي بدأ يتخصخص ، وبقيت تركب الأتوبيس يقولك الكومسري لو مش عاجبك أركب الميكروباس ، عدم إحساس الناس بالأمان بيخليهم عصبيين ومع عدم وجود وعي ولا تربية ، بيحصل كل اللي انت بتقول عليه ده ، واحنا سايبين كل ده ، ومجلس الشعب فالح يجتمع علشان يناقش مشاكل الحجاب ولبس الستات والفيديو كليب ، لا ياعم أحنا عايزين الناس تلبس اللي يعجبها ، بس انتوا اهتموا بالحاجات اللي ليها لازمة عند الناس ، زي ما تلاقي الأب مش مهنم بتربية أبناءه قد ماهو مهتم بيلبسوا ايه ، وبنته محجبة ولا لأ ، ومش مهم تكون بتصلي المهم تكون محجبة وبتلبس كويس ، بأه ده كلام صح ...... انا رأيي ان التربية والتعليم الصح أهم من كل حاجة في الدنيا ، ولو اقدر اقولك انهم أهم من الأكل والشرب
آسف علشان طولت عليك ، مع السلامة

Queen eraser يقول...

شنكوتى..

فكرتنى بفقرة النكت والله بتعات مرة واحد مش عارف إيه و تخلص يقوم يبتدى مرة تانية واحده نفس النظام و هكذا..
كنت على وشك أن أضحك بس ربنا سترها معايا ف اخر لحظة.
أنا لسه ما فوقتش من مصايب الزفتات البنات ف الشوارع ألاقى عندك هم تقيل كده؟
الناس بقت قاسية و مفيس احساس خالص.كل حاجة حلوة ماتت جواهم.مش فاضل غير حب القرش و الجشع و المجاملة و الكسل و اللبش.كله بقى متوحش و بقينا ف غابة و ده مش غريب.. ده بينذر بنهاية العالم يا شنكوتى.
فى ناس رحيمة و ف قلبهم خير بس مش همه دول الأغلبية.تقريبا انقرضوا خلاص.
ربنا يرحمنا برحمته قبل ما الواحد يتمنى انه يموت و يهرب من القرف ده

coffee break يقول...

مقال ممتاز يا شنكوتى بس دة مش سبب وضعى لتعليق لأن حاجات كتير بتعجبنى و بيكتفى بالإعجاب بينى و بين نفسى
لكن حبيت أعلق بس على جملة انت قلتها و لفتت انتباهى "ومسكوا الواد الغريب يضربوه كل واحد كان بيضربه كأنه مش مسلم زيهم ولا حتى مصري زيهم" أعتقد إن خانك التعبير هنا لأن البنى آدم بنى آدم حتى لو لا مصرى و لا مسلم و مش لازم يبقى زيى عشان أحس بيه.
إحنا فى الحقيقة شعب مفترى على الضعيف و لا عندنا طيبة و لا جدعنة، دى حاجة فى المسلسلات بس. يمكن السبب ان كل مقهور عايز حد يقهره بنفس مبدأ الموظف اللى رئيسه مديله شلوط، يروح يضرب مراته تسيبه تنزل عض فى العيال و هكذا..تحياتى

ولــــــــــو يقول...

كلامك برغم قسوته الا انه اقل من اللي بيحصل فعلا
كلامك ده انا شفته النهارده بالحرف والمللي
اكتر من 30 واحد ملمومين على واحد وشغالين فيه
ضرب وقله ادب
حاجه تحزن
للاسف الرحمه اتنفت من جوانا
اكبر امتهان للانسان من وجهه نظري انه ينضرب على وشه
ربنا يهدينا لبعض
الدنيا مش ناقصه
تحياتي

الشنكوتي الكبير يقول...

antony
يا واد غايب بقالك كتير اخبارك ايه
عموما ربنا يوفقك في شغلك طبعا انت جبت نقطه مهمه قوي يا صديقي التربيه الناس اتربت غلط الراجل اتربى يشوف ابوه بيضرب امه ويفش فيها غله يقوم هو يكبر يضرب مراته ويضرب اخته علشان يتمرن فيها الأول على الضرب وتلاقي الموظف مديره خانقه يقوم يفش غله في الناس اللي قدامه والظابط شادينه من الوزاره وعليه مسؤليه وبيتعامل مع اشكال حقيره يقوم يطلع ده على الناس البسيطه الغلبانه وكتير من ده حوالينا وفكرة انك تقعد في حالك متكلمش حد فيتهموك بالتكبر والخبث دي اكبر مشكله في حياتنا ساعات تضطر تقعد مع الناس والنتيجه تنجر رجلك لأنك تغلط في ناس غايبه ويجيبوا سيرتهم تسكت متشاركش تبقى انت خبيث وعايز تفتن عليهم تسيبهم وتبعد تبقى متكبر ومش عايز تصاحبهم
لو في بلدنا يا صديقي الشرطه بتنقذ الطفل من قسوة ابويه كانوا من باب اولى ينقذوا الغلابه اللي بتنضرب في الأقسام وفي الشوارع من غير ذنب غير انهم وقعوا تحت ايد ناس متعرفش الرحمه ولا العدل
انا شفت كتير يا صديقي من قسوة وسوء خلق الناس في مجتمعنا المصيبه يا اخي ان اللي بيقولك انه بيحاول يعم لاالصح برضه بيكون قاسي يعني تلاقيهم ماسكين الحرامي بيضربوه بطريقة بشعه لا اظن ان الدين امرنا بهذا ولا حتى القانون الأعرج بتاعنا ده ويقولك اصله غلط ولازم يتأدب مش عارف اقولك ايه وموضوع الأهل اللي بيمسكوا في الهايفه وينسوا المصايب الكبيره دول عايزين مواضيع تتكلم عنهم حاجه بقت تقرف المشكله يا صديقي ان اللبس برده مهم انهم ياخدوا بالهم منه لكن مش هو الحاجه الوحيده المهمه لكن تلاقي برده ناس لا بتهتم بلبس بناتها ولا بتربيتها يعني كله في البتنجان
وختاما معلش طولت عليك متبقاش تغيب تاني
سلااااااااااااااااااااام

الشنكوتي الكبير يقول...

queen ereaser
انتي يا بنت يا استيكه يا اسكندراني
يا بنت عماله شايله هم الدنيا وهم البنات عديمة التربيه ليه بس ركزي في مذاكرتك كده واكتبيلنا القطايف بتاعتك انا صحيح معلقتش عليها لسه بس هابقى اعلق عليهم كلهم حلوين قوي وفكره جديده اللي عاجبني فيكي يا بنت انتي اني كل شويه بتطوري من نفسك بقفزات جامده قوي يعني عديتي خلاص ده احنا هنستخبى منك بعد كده يا استاذه
نورتينا
سلاااااااااااااااااااااااام

الشنكوتي الكبير يقول...

coffee break
يا عزيزي طيب ايه رأيك انا فرحان ان التعبير خاني علشان اتشرف بمعرفتك عموما انا شايف ان معاك حق في اني خاني التعبير انا مقصدتش انه لازم يكون مسلم علشان ارحمه يكفي انه بشر زيه زيي ولو مش بشر حتى الرحمه للكل حتى الحيوان انا كنت عايز بس اتكلم عن اننا محصلناش الغجر اللي بيعتبروهم ادنى الشعوب لأنهم بينهم وبين بعض مبياكلوش بعض يعني كان بس قصدي اننا يا اخي ده زيه زيك ليه تفتري عليه كده انصحه عاقبه علشان ميرجعلهاش تاني لكن بالعدل مش بالقسوه دي
تحياتي وشكرا على تعليقك
سلاااااااااااااااام

الشنكوتي الكبير يقول...

ولــــــــو
يا عزيزي انا بشوفه كتير لكن انا بس حبيت اذكر كام مشهد شفتهم بعيني علشان محدش يقولي انت بتبالغ او الناس بتبالغ ومشهد التجمع اللي بيضرب نفر لوحده ده بشوفه كتير وتلاقيهم عمالين بالشلاليت والعصيان كأنهم مسكوا واحد يهودي بيهد المسجد الأقصى الغريب ان الناس اللي بتعمل كده في الغالب بتكون شخصيه جبانه جدا لو لوحده عمره ما يعمل كده
ربنا يهدي
سلاااااااااااااااااااام

Mirage يقول...

يابنى ايه وجه القلب ده بس

انا مقدرتش اكمل قراية بعد الواد اللى دمع لما امين الشرطة ضربه بالالم على وشه

حرام عليك والله

جبتلى اكتئاب

Soooo يقول...

بص يا عم شنكوتي
كلامك عالعين والراس .. ولكن
ولنا هنا وقفه عند لكن دي
ولكن المشكله ان الاعلام مش بيسلط ضوء غير عالمصايب .. وعينينا ومخنا مش بيخزن غير المشاكل
طب بذمتك انت كده .. ما وقفتش مره عشان تعدي الشارع لقيت ست كبيره عايزة تعدي قمت ماسك ومعدي بيها الشارع .. او حتى ماتكونش انت عايز تعدي الشارع بس تعديها وخلاص
بذمتك .. ما وقفتش مره في الاتوبيس او المترو لراجل عجوز او لست شايله ابنها عشان تقعدها
بذمتك ماحصلش انك لقيت شوية عيال من بتوع المدارس بيتخانقو مع بعض قمت داخل حايش مابينهم
الامثله كتيره يا ابو الشناكيت .. بس المشكله اننا مش بنخزن غير اللحظات المؤلمه
ونصيحه منني .. لو عايز تخزن اللحظات دي .. هاتلك موبيل ثري جي

قلوب حائرة يقول...

ايهاب مش عارفة اقول غير دي ان دلت على شي فبتدل على ضعف ايمان مش رسولنا الكريم بيقول " ليس منا من لم يوقر كبيرنا ويعطف على صغيرنا " لو كل واحد ايمانه بالله على قدر معين ويعرف ان مافيش اثقل من حسن الخلق يوم القيامة هتتعدل قوي الدنيا من حوالينا وهتبقى ميت فل من الاخر اي بلوة بتحصل نتيجة لضعف ايمان

الشنكوتي الكبير يقول...

sooo
يا عزيزي سووو اكيد الصوره مش وحشه قوي كده بس دي حاجات موجوده للأسف وخنقتني جدا فحبيت انفث شويه اما عن اللي بتقوله ممكن بيحصل طبعا بس لما بلاقي عيال بتتخانق مبتدخلش علشان قبل كده سابوا الخناق ومسكوا فيه انا
وقالولي مالكش دعوه
تحياتي يا زوق
الا هو الثري جي يعمل كام دلوقتي
سلااااااام

الشنكوتي الكبير يقول...

قلوب حائرة
يا عزيزتي هي الدنيا كالعاده بلاويها كلها من ضعف الأيمان ربنا يسترها معانا بقى
في السنين اللي جايه
تحياتي
سلاااااااااااااااااام

Soooo يقول...

والله يابو شنكوتي يا اخويا .. حوار انك تخش تفض في خناقة عيال دي برضه فيها مخاطر
خصوصا ان اللي يمشي ورا العيال مايخلاش من الـ .. من الملامه قصدي

ملحوظه:
الموبيل الثري جي ياسيدي ساعات بيكون اغلى من النوكيا الميت فل وعشره .. بس على حسب الشبكه اللي هتشغله وعلى حسب لون الجراب

تمر حنة يقول...

الله اكبر
ايه دا كلة دة
على فكرة الأحوال دى الواحد بيشوفها احيانا
بس بأسلوبك خلتها حاجة تانية
تحياتى
تمر حنة
اه
على فكرة نزلت بوست ... ابقى عدي كدة

فى القلب يقول...

عارف يا شنكوتى

أنا ديما شغلنى الموضوع ده العنف ألى بشوفه فى كل مكان بين كل خطوه و التانيه منتش حاسه بامان زى ميكون بيقينا بنغلى من جوه و البخار طالع من الضغط

انا برده يا شنكوتى حاسه بالقسوه الى بقت ماليه الشعب و الشهامه ألى راحت و الجيره و النخوه

ربنا يرحمنا يا شنكوتى البوست ده داس على الوجيعه

الشنكوتي الكبير يقول...

sooo
يا سوو يا اخويا انا اصلي بخاف من ...الملامه علشان كده مش بفض بين العيال
المهم الموبايل الثري جي ده ممكن اتفرج فيه على حلقات المسلسلات بتاعة رمضان اللي فاتتني ولا لأ
وتحياتي من بركة السبع
سلاااااااااااااااااااام

الشنكوتي الكبير يقول...

تمر حنه
انا شوفت البوست بتاعك تحفه يا سكر
وبجد انا بس كنت عايز ابين جزء من اللي عايشينه وبنخدع نفسنا ونتجاهله
الخير موجود لكن الشر موجود
سلااااااااااااااام

الشنكوتي الكبير يقول...

في القلب
يا صديقتي العزيزه الطيبه مش معنى اللي قلته ان الدنيا خلاص باظت لكن هي على وشك البوظان يعني فاضل حوالي اربعتاشر راجل شهم في مصر واتنين محترمين وفيه بيقولوا في مصر القديمه اتنين مجدع هذا وقد ورد في تقرير الأمم المتحده ان الشنكوتي اخوكي في الخدمه والجدعنه تحت الطلب
سلاااااااااااااااااااام

شيماء الجيزى يقول...

ياااااااااه يا ايهاب
ايه اللى بتقوله ده
بص انا روحت عند آلام وآمال
قعدت اعيط
وجيت هنا
كنت هكسر الجهاز كله
انا عارفه ان فى فعلا الكلام ده بيحصل
بس ارجوكم
يعنى حتى الامهات بقوا بالقسوة دى؟
ام مين دى اللى بتحب ابنها تحرقه فى ايده كده

كنا بنقول ان الام اللى بتحط شطه فى البق دى قويه

.................

ايهاب
شوية تنسيق لو سمحت
متسيبش السايب فى السايب كده
سلامات يا صديقى

Nani يقول...

السلام عليكم
كل سنة وانت طيب ومبروك كتاب هبة
انا بلطجية زي ما قلت لكن بالحق
والشعور الي انت كتبته ده بعيشو مليون مرة في اليوم وافضل اسال نفسي ليه ياربي ليه
دحنا حيباهي بينا الرسول عليه السلام يوم القيامة بس منظرنا حبيقى وحش قوي قدامه
وبعدين لو انا وانت سبنا بلادنا واوطانا ورحنا نعمر بلاد برة مين حياخد بالو من ارضنا
انا فكرت بالهجرة او الهرب من الوطن العربي كله لكن ارجع واقول

اهلي وان ضنوا علي كرامُ

Mo3Az يقول...

قال صلى الله عليه وسلم :
"ما كان الرفق فى شىء الا زانه وما نزع من شىء الا شانه "

فعلا موضوع مهم اوى وانت بصراحه عرضته بشكل متميز

جزاك الله خير

ممكن المواقف دى يكون كتير مننا شافها او شاف اكتر منها ولكن فى مواقف متفرقة

لكن لما انت جمعت عدة مواقف كدة ورا بعض يمكن الناس حست ان الصورة صعبه اوى ولكن دا الواقع

وانا معاك تمام ان حالنا مش هايتصلح الا لما نصلح نفسنا الاول

جزاك الله خير مرة اخرى

ومدونة متميزة وان شاء الله تلاقينى هنا على طول

Jade يقول...

أنا جيت عشان أقولك كل سنة و انت طيب يا شنكوتي يا كبير

يا مراكبي يقول...

أنا برضه لاحظت حاجات زي كده .. كلها بتدل على إن الناس خلاص بقت روحها في مناخيرها من الضغوط الرهيبة اللي عليها لدرحة إن ما حدش بقى مستحمل حد أبدا

ده إنعكاس لأحوال البلد على سلوك الناس يا عزيزي

ربنا يرحمنا جميعا

mesh2dra يقول...

السلام عليكم

مدرسي كان بيحكيلي
أن مرة أب كان بيراجع الامتحان مع ابنته
ولما لقى انها عاملة حاجة غلط ضربها قلم على وشها في وسط المدرسة
مدرسي حاول يتدخل عشان يهدي الموضوع ويراجع هو الامتحان مع البنت تجنبا لاى ضرب
ولما راجع معاها الورقة لقى السؤال اللي اخدت عليه قلم من باباها صح مش غلط
يعني اضربت ظلما وزورا

**
سيبك انت
مبقاش حد عنده مشاعر رحيمة اصلا
بقت مشاعر متجمدة

كل سنة وحضرتك طيب
**
سلاماتي

ولــــــــــو يقول...

صاحبي الشنكوتي
كل سنه وانت بألف خير
عيد سعيد
السنه الجايه تبقى احسن واحسن

Soooo يقول...

سوري يابو شنكوتي ماخدتش بالي والله
شوف بقى ياسيدي .. لو هتجيب عده ثري جي متوافقه مع الوصله بتاعة حلمي الكهربائي اللي عندنا في العماره
اضمنلك انك مش هتلحق ولا حلقه


وكل سنه وانت طيب يا صاحبي

سلاموووز

قلوب حائرة يقول...

ايه ياعمنا فينك ايه حالة البيات الشتوي دي يالا اصحى فوق كل سنة وانت طيب ويارب السنة الجاية يكون قلبك في سعادة مع من ملكته

الشنكوتي الكبير يقول...

شيماء الجيزي
يا بورسعيديه يا سكره عامله ايه
وبعدين يا ستي متزعليش اكتأب الأعياد راح وانشاء الله هاتكتب حاجه حلوه تنسيكي الزعل
نورتيني يا صديقتي
سلاااااااااااااااام


-----------------
ناني

يا عزيزتي هي دي بلدنا هنعمل ايه لكن بس انا حبيت ابص بصه سريعه على حالها يمكن نفهم اللي بيحصلنا ده سببه ايه
وبعدين موضوع الهجره ده لو لقيتي فرصه ابقي ابعتيلي وانا هابقى اساعد بلدي من بره واهو كله مصلحه وعمله صعبه
نورتي يا سكر
--------------------

معاز

اسمك على اسم واحد اعرفه محترم جدا ربنا يوفقك زيه المهم يا صديقي هي دايما اللوحه لما تقرب منها وتركز فيها تشوف عيوبها وغلطاتها
هو بس علشان انا ركزت في الحتت المبقعه قوي
تحياتي وتشرفني دائما
سلااااااااااااااام

-----------

الشنكوتي الكبير يقول...

jade
يا سكرتي المجنونه
وانتي بصحه وسعاده عامله ايه
نورتي المدونه
يا ترى ايه اخبارك
هاجي اشوف الجديد واعرف بنفسي
سلااام
----------
يا مراكبي
صديق العزي المراكبي الطيب
نورتني
واعتقد ان الناس فعلا من خنقتها بتطلع قرفها على بعض ربنا يهدينا جميعا
سلاام

-----------
مش قادره
يا مفتريه يا قادره بقى انا عامل البوست اوجع قلبكم بالبلاوي دي تقومي انتي اللي توجعي قلبي بحكايتك دي
عموما لسه هانشوف من البشر معدومي الرحمه ربنا يهدي الجميع نورتيني
سلااااااام

-----------------
ولو
وانت كمان يا غالي ربنا يوفقك
سنه سعيده

---------------
soooooooo
صديقي حبيب قلبي الغالي
انا برده قلت الواد حلمي ده شكله حرامي ومينفعنيش علشان كده رحت للواد عبده حتحته هو هيديني الوصله التمام
وفيها الهوت بيرد ده اللي بيقولوا عليه
مزز ليس لها حصر
وسلملي على الجواز والقناه التانيه
سلااااااااااااااام

---------------
قلوب حائره
ربنا يسعدك يا سكره انا هاصحى حالا انشاء الله
ربنا يوفقك مع زوجك ويباركلكم
وشكرا على الدعاء الجميل
سلاااااااااااااااااااااااااام

Najwan يقول...

ايه ياشنكوتى دا انت جبلتى اكتئاب
هو انا شوفت موقف من الى انت بتحكي فيهم دول
بتوع الناس الى بيعبوا في الشوراع بس يمكن المنظر الى شوفته كان اوحش بكير من الى انت حكيته لانهم بجد معدهمش رحمه
بس برده في ناس طيبين وهيفضل شعب طيب

Miss Egyptiana "Trapped Soul" يقول...

بوست فى الصميم يا عزيزى الشنكوتى
كلام صحيح وانا اوافق عليه

لذلك عندما اتكلم عن مصر والمصريين اليوم، اقول دوما يجب ان نبدأ بانفسنا... ولا نلوم الاخرين

ربنا بيسلط ابدان على ابدان... والى بيعمل شئ غلط بيرجعله

الناس خلاص خلقها بأه اضيق من خرم الابرة واصبحت القسوة واللامبالاه بالاخرين سمه العصر... اصبح الانسان كائن منقرض

وتسألونى لم اهرب الى عالمى ؟؟؟

اشكرك على البوست الاكثر من رائع
تحياتى وابقى اسأل يا استاذ... بلاش تقطع كده

ahimsa يقول...

yanhar 2zra2,enta f3lan shoft kol da??leih kol da ,el nas 7asalha a?el wa7ed mesh 3aref el 3eeb fe meen?f3lan ma3dsh fe ra7ma.
el 3onf beywaled el 3onf ya3ny el 7al mesh sahl.
el post beta3ak gamed.mo2ser bgd,ana gally 2kto2ab.
rabna yr7amna gmee3an.

الشنكوتي الكبير يقول...

نجوان
صديقتنا الجديده نجوان بتقول انه بعد كل ده شعب طيب
خلاص يا ستي الظاهر البلد دي لسه فيها ناس بتحبها يمكن علشان كده ربنا بيرحمنا
طول ما فيها ناس طيبين
نورتيني يا نجوان وعموما اكيد مفيش في الدنيا خير على طول ولا شر على طول
سلااااااااام

------------------

miss egyptiana trapped soul
يا بنتي اسمك طويل قوي وجعتي ايدي في الكتابه بس مش مشكله كفايه ان اميرة الحكايات السحريه اللي جننتني بروعة قصصها نورتني هنا وسألت عني
بالنسبه للبوست انتي جبتي المفيد الناس خلقها اصبح معدوم مش بس ضيق وكل واحد عايز يفش غله في حد تاني
ربنا يرحمنا برحمته
اما عن غيابي فسامحيني انا مقصر معاكي بجد لكن بعدي من فتره للتانيه اقرأ ومش بسيب كومنت
مش لأن القصص والبوستات مش عاجباني بس سا عات مش بلاقي كلام اقوله اضيف حاجه على البوست
نورتيني
سلااااااااااااااااااااام

--------------------

ahimsa
ولو اني مش فاهم معنى الأسم وانت معندكش مدونه اعرفك منها يبقى هاكتفي بشكرك على المرور والكومنت اللذيذ
واتمنى اتعرف بيك اكتر
تحياتي
سلااااااااااااااااام

Lemonada يقول...

وجعتلي قلبي
والمشكلة ان كلامك صح جدا
حتى اننا نسينا نفسنا

shahy يقول...

اف اف وكمان اف

حسبي الله ونعم الوكيل في كل اللي معندهمش رحمة

والا بلاش ندعي عليهم احنا ندعيلهم بالهداية وان ربنا ينزل الرحمة في قلوبهم

شكرا يا سيدي بس ابقى اكتب حاجة مش حزيني كدة المرة الجاية

سلام

koki يقول...

انت شكلك تعبان اوي

الشنكوتي الكبير يقول...

lemonada
ليموناده يا سكر
سلامة قلبك
بس هاعمل ايه
عموما نورتيني

----------------

شاهي

وحشتيني يا سوسه
كل سنه وانتي طيبه
فينك من زمان
عموما ربنا يهدي الجميع
--------------
KOKI
اه انا فعلا تعبان قوي
مين قالك
سلاااااااااااااااااام