الخميس، يونيو 4

حرب طرواده

ولو اني مكنتش قادر اكتب حاجه
ونفسيا مش مظبوط خالص لكن بناء على طلب سارة العزيزه قررت اني اكتب واتحملي بقى دمي التقيل وانا زعلان
حرب طرواده
قامت سنين وسنين
وماتوا بالملايين
علشان عيون واحده
فتنت امير اهبل
خطفها من جوزها
ورجع على بلده
والهبله سمعتله
وعلى بلده راحتله
وجوزها طبعا ثار
وبعد جيوش وتتار
شايلين معاهم النار
حالفين لينتقموا
وخطط كتير وحروب
اروح كتير بتروح
مالهمش ذنب في شيء
غير حظهم الأغبر
جابهم في سكة ناس
عايشين بانانيه
وفي النهايه بالحق
بيفوز اللي معاه الحق
وده كل شيء معقول
ونهايته شيء محتوم
فاهمينه وخلصنا
لكن تعالوا نشوف
ليه يبقى طبع الناس
الظلم بلا احساس
واحد يقف ويقول
انا قبل كل الناس
الكلمه لو اقولها
تصبح على رقابكم
كالسيف تشيبكم
ومهما ناس بتموت
ومهما ناس هتموت
مش هامه منهم شيء
كل المهم يا ناس
الكلمه يؤمرها
قرآن ننفذها
صعبان عليه نفرح
صعبان عليه نضحك
غروره صوره
مليون سنه هيعيش
يقتلنا بالكلمات
لكن انا هصبر
مفيش في ايدي سلاح
ولا حتى اقدر اصد
لكن مسيره في يوم
كما كل ظالم فات
هيجيله يوم وشوف
اخرة عذابنا ايه
لا هحاربه ولا اقاتله
ولا حتى هتحداه
انا بس هستناه
يقابلني يوم الدين
ويقولي ذنبنا ايه
تحياتي ليكم كلكم

هناك 18 تعليقًا:

Lyssandra يقول...

صحيح أنا قرأت القصه قريب
بسبب فاتنه تقوم حرب ضروس وتحترق طروادة بعد حصار سنوات

جيوش تقاتلبوحشية عشان رغبة ملك أناني

------

لكن إيه اللي دخل حكاية هيلين ( مش اسمها هيلين بردو ؟؟) في الكلام اللي في الاخر بقي ؟؟
مش فهمت دي

--------

مش بتيجي وحي الصوره ليه يا فندم ؟؟
في صورة جديده وان شاء الله هانزل واحده جديدة احتمال النهارده ان شاء الله

---------

تحياتي ودمت طيّب
سلاااااااام

Lyssa

ساره يقول...

ايهاب العزيز

حرب طرواده ياله من اختيار
حكيتها بطريقه جميله

اعذرني طلبت منك تنزل بوست وانت زعلان
والله ما كنت اعرف :(

بس اسمع مني وصدقنى
مافى شئ يضل على حاله
وانت فوضت امرك لله وتوكلت عليه
وربك ماراح يخليك
وانت فى النهايه بترتاح
لان ربي ان شاء الله راضي عنك

ابتهج اخي

اختك ساره

هندسة وصفية يقول...

ايهاب يا فنان
ليه انت كدة زعلان؟
بتحكي علي طروادة
و اخيل و هيلانة
و الي في ضميرك غير
ده زمانا و قضانا
قصدك تقول علظلم
و الغدر و الجبروت
حاكم بامره حاكم
و ناسي ملاك الموت
لكن مسيره لها
و عاصراط هيفوت
ساعتهابقي هيقول
الظلم مش طبعي
كانت نيتي عنب
حتي اسألوا هيلانة
لكن ربك عادل
عمره ماينسانا
هيسيبه يعيش دنيته
و لا يحشره معانا

:D:D:D
بحاول اقلدك في التعليقات بتاعتك بس طبعاً مش ممكن
عشان واد زي العسل مفيش منك اتنين

بحبك ياد
أحمد

ملكة بحجابى يقول...

سيبك من جمال النص وابداع الحرف الادبى ده
بس تعالى هنا قوللى مالك فيك ايه ؟
ليه حالتك النفسية مش مظبوطة كدة ؟؟؟


:)
تعالى رد عليا
أميرة

(ملكة بحجابى )

زقطـوطـة يقول...

بجد أنا بيعجبني شعرك العامي ده أوي
بحسه صادق و قوي لأني بحسه عفوي أوي
فكرتني بالقصة دي
من زمان أوي مش قرأتها
هدور عليها و أقراها بقى
بما إني فاضية : )
تحياتي : )

!!! عارفة ... مش عارف ليه يقول...

القصة حكيتها بإيجاز

والجميل هو المزج اللي حصل بين الحكاية

وبين انطباعك الشخصي


تحياتي
وليد

زقطـوطـة يقول...

wherak ????

micheal يقول...

ههههههههههههه..أنا شفت الفيلم بتاع براد بيت
بصراحة فيه حروب بتقوم علي لأسباب غريبة..زي حرب البسوس كده وحرب العراق الأخيرة اللي اخترعها العم بوش من دماغه
:)
تحياتي يا شنكوتي

Lyssandra يقول...

هلا يا إيهاب
في صور جديدة في وحي اصورة
وأنشأت مدونة جديده كلها كوابيس
:)
لو تحب تعدّي وتقول رأيك

دمت بخير أخي
Lyssa

مرجانة يقول...

حرب طروادة موجودة كل يوم وعلى مستويات عديدة
فالحروب و الثورات دائما يكون سببها طق عقل
وما اتفه اسبابها
فما سبب غلق خليج العقبة ثم نكسة 67 الا اهمال وفرعنة وفنجرة حنك
والجيش نصفه كان باليمن يحارب ثوار -ويؤسس مبدأ القومية العربية
وماهو سبب حرب العراق الا خلو الساحة من اي اسلحة دمار شامل من اجل احتلال العراق ومحاربة .....محاربة اسلحة الدمار الشامل
و سبب الاحتلال البريطاني هو قصة عربجي الحنتور مع الجندي البريطاني السكير على اجرة الركوب
الخ
الخ
الخ
تحياتي يا شنكوتي

مجرد مدونة يقول...

ربنا يفرج كربك
أنا بحبك في الله :)

الجواز و سنينه يقول...

فيه ايه يابنى
ايه اللى انت فيه ده و كمان ال غيبه
و بعدين اشمعنى طرواده
كله بيعدى و بنلاقى اننا ضيعنا عمرنا منكدين على نفسنا
فكرها علشان مافيش فايده من الزعل
بس ادعى ربنا انه يفرجها عليك
يارب تكون بخير و ما تتأخرش بقى و تعالى

ahmed_k يقول...

حبيبي الغالي إيهاب واحشني جدا
قبل ما أتكلم عن البوست لي بس بعض الملاحظات فأنت قلت
وبعد جيوش وتتار
ولكني أظن أنك تقصد
وبعت جيوش وتتار
وأنت قلت
اروح كتير بتروح
وأظن أنك تقصد أرواح كتير بتروح
وانت قلت
غروره صوره
وأظنك تقصد غروره صورله
وأنت قلت
هيجيله يوم وشوف
وأظنك تقصد هيجيله يوم ويشوف
بس كده
طبعا تصويباتي دي لأن كلماتك تعد عمل أدبي ومثله يجب أن يظهر في ابهى صوره
فلربما هي أخطاء كتابيه غير مقصوده
ولكنها قد تؤخذ على إنها أصل عملك الأدبي فمن حرصي أحببت لفت نظرك لها

أما بخصوص ما كتبت فتسلم أيدك عليه
فالظلم دوما لا يستمر وأيامه معدوده
ولكن الله إذا أخذ الظالمين أخذهم أخذ عزيز مقتدر
جميل إحساسك يا هوبه وطريقة تعبيرك عنه
تقبل مني خالص التحيه

المتبهـدلـون فـي الأرض يقول...

إيه ده هو حضرتك كنت في حرب طروادة .؟؟

إنت من الضباط الأشرار

dodoo يقول...

هى دى كتابتك وانت زعلاااان ؟

ده انت بتبدع بقى على كده وانت كمتضايق

عامة القصه جميله وبتجسد انانية البشر

فيه ناس كتير عشان توصل للى هى عايزاه ممكن تدوس على اى حد واى حاجه عشان هدفها ده

عندهم الغايه تبرر الوسيله


بجد ربنا يحمينا منهم ويبعدنا عنهم

تقبل مرورى

أبو خالد يقول...

أبني الحبيب إيهاب
ارجو الله أن تكون بخير حال
فأنت مبدع بالسليقة بارك الله في عمرك
و دع الحزن جانبا

زهرة الكاميليا يقول...

لكل قصة عندك معني مختلف ..
دوما تحمل مغزي عميق حد الألم

كم أنت رائع
كاتباً وإنسان

هل تتذكرنى؟

kalamfisamt يقول...

ونـــــــبى مفيش بعد كدا أنا بقا رغم أنى لسه جديده على الموقع بس وسع كدا شويه
ســــــــــــــاره ميرسى ليكى أنك خليتى شاب شنكوتى يكتب الكلمات الحلوه دى بجد جااااااااااااااااامده
انا همشى بقا لحسن تقولو عليا انى رغايه
سلاااااااااامو عليكوووو