الأربعاء، مايو ٢٣

نافذه على العالم وجولة الكاميرا وحاجات كتير بالشكل ده

حد فيكوا يفتكر برنامج نافذه على العالم
كان برنامج مدته حوالي خمس دقائق ولكن كان الواحد بيقعد يتفرج كانهم حلم جميل البرنامج بيعرض لقطات من اغرب الحاجات في العالم يعني فقرات من كل بلاد الله وكانوا يجيبوا حاجات تضحك قوي عروض سيرك حيوانات غريبه ناس بتعمل حاجات مجنونه ودايما كانوا يجيبوا عروض ازياء بس مجانيني خالص هدوم مش للبس بس تضحك جدا
الغريب اني معرفش البرنامج ده اختفى ليه
برنامج جولة الكاميرا
وبرده كان بيجيب حاجات من كل الدنيا مناظر طبيعيه وعجائب الشعوب وكانت المذيعه ست شيك قوي وحلوه بس مش عارف اسمها ايه وكان ليها اسلوب كده تحب تقعد تسمع صوتها وهي بتحكي
وطبعا برده تم الغاء البرنامج مش عارف ليه

وطبعا كان فيه برنامج مواقف وطرائف وكان زمان بيجيب حاجات حلوة قوي لكن فجأه حبوا يطوروه عشان ينافس برامج الفضائيا الجنبيه اللي بتلعب على نفس الفكره لكن للأسف بقى سخيف قوي ومكرر وتحس انه فقد شخصيته المميزه
حاجات كتير كانت حلوه لكن اختفت من حياتنا مش عارف ليه
يا ريت كل واحد يفكر معايا في حاجه كان بيحبها في صغره لكن بطلوها بدون سبب
وسلااااااااااااااااااااااااااااااااااااااااااااااااااام
______________________

خايف بكره يلاقوا المدونات شيئ جميل يقوموا يلغوها

هناك ١٩ تعليقًا:

Mirage يقول...

عندك كمان برنامج عالم البحار وحياتى والبرلمان الصغير ومازنجر اللى بموووووووووووووووت فيه

Ehab يقول...

جدعه يا ميراج انتي كده فهمتي الحاجات اللي انا بتكلم عليها
وبمناسبة مازنجلا احب اقولك
القبضتين المدمرتين
ارجعي يا فاتن افروديت ليست مجهزه للقتال
هيا يا مازنجر انا معك
وسلااااااااااااااااااااااام
نورتي المدونه كلها

Doba يقول...

هههههههههه
ماشى يا فقرى يا بتاع أفروديت

رجعتنا لحاجات فعلا كانت جميلة وبطلوها
انا كنت بحب قوى حوار صريح جدا جدا بتاع منى الحسينى وبرده بطلوه كنت بستناه من رمضان لرمضان وبحب قوى اشوف الف ليلة وليلة بتاعت زمان بس برده مبيجيبوهاش

سلالالالاموووووووز

غير معرف يقول...

دي اول زيارة لبلوجرك بس ماشاء الله عليك يامان بلوجر ليه طابع ساخر واسلوب مرح بالتوفيق يا فندم ...بس كان في برنامج زماااان كده بحب اسمعه مشعارفة انت فاكره ولا لا اسمه في بيتنا نجم اكيد فاكره ياريت يرجعه ..بس هما لو هيلغوا المدونات هيلغوها علشان مش حلوة لا علشان هي بيتخلي الشعب في حالى فضفضة ويبقى مبسوط وده مش بينص عليه ...ولحد كده واستوب

reri يقول...

ههههههههههه
إنت فكرتني بشوية برامج غير اللي إنتى قلتهم
فاكر عالم الحيوان ... هم بطلوه ولا لسه؟؟
ولا عالم البحار وصوت الراجل اللي كان بيقدمه
و كان في برنامج بتاع مصطفي محمود إسمه العلم والإيمان كنت بحبه أوي
و الكابتن ماجد لما يجيب جون في خمس ست حلقات
و مازنجر كان وهمي .. كنت بتنح لما بييجي أنا والعيال ولاد خالتي وإحنا صغيرين

فكرتني بالحاجات بتاعة الطفوله كانت أيام حلوه أوي

سلاماااااااااااااات

reri يقول...

لقيتك نزلت بوستين بعد آخر بوست كنت شايفاه عندك
بعيدا عن قصيدة نجم الرائعه
ما قدرتش أمنع نفسي إني أعلق علي البوست بتاع أختك وقلت أعلقلك هنا علشان تشوفه
البوست جميل أوي وصادق أوي يمكن لأني حاساه بس أنا بقي مكان أختك ... أكبر من أخويا برده بسنه بينا ذكريات مشابهه أوي لذكرياتك مع اختك ... يمكن أبقي أتكلم عنها في بوست عندي... وطبعا براءة الإختراع عندك يا شنكوتي
ربنا يخليللك أختك

Ehab يقول...

طبعا انا اسف يا ميراج عشلن حسبته اسم بنت
على العموم نورتني وانا سيبتلك تعليق على قصتك الهايله
تحياتي
بس انا مش بحب حياتي عشان كانت ماما بتعيط من التاثر
______________________________
اكيد بتحبي حوار صريح جدا عشان انتي مفتريه زي منى الحسيني
ونورتينا يا شيخه
_____________________________
يا قلوب يا حائره طبعا فاكر في بيتنا نجم واللي كان مجنني هما هيجوا عندنا احنا كمان امتى
اشمعنى الناس دي
وانا هاكلم المسؤلين عشان يرجعوهولك
اصل انا واصل قوي
نورتيني وشرفتيني
__________________________________
يا سلام على عالم الحيوان ده يوم الجمعه ميبقاش يوم الجمعه من غير
سينما الأطفال الصبح وعالم الحيوان الظهر
وطبعا هاقولك
واااااااااااااااااااااااااااااااااهدف
هدف لفريق المجد يحرزه الكابتن ماجد بالكره الصااااااااااااااااااااااااااااااااااااااااااااااااااااااااااااااروخيه
وياعيني عليك يا كابتن وليد انت وبسام
وحشتينا
___________________________________
فعلا يا جماعه فكرتوني بالذي مضى

حقى اهرتل يقول...

يامجرى ريق القلم على ورقه م الدفتر
اوعى لكلام خداع قبل الميعاد يفطر
خليه يكمل صوم لحد سبت النور
لو قش هوه ببنت بالتالته هيبصر

Unknown يقول...

بطلوا يجيبوا توم و جيرى و فلقونا تلات انصاص بالكراتين(جمع كارتون) اللى اشكال ابطالها مفتعلة و كلها كلام مكلكع و عنيفة الاحداث اوى
الاهم ان عليها كتابة صينى عجيبة اللى عملها نفسه مش فاهمها
خلونا نتذل عشان نجيب توم و جيرى و بطوط عالكمبيوتر
اهئ اهئ

Ehab يقول...

نورتني يا هرتله بقالي كتير مش شايفك وحشتني
_____________________
معلش يا muse

انا هامسكهم اقطعهم خمس ارباع
ومعاك حق بس جميل ان الناس عندها توم وجيري على الكمبيوتر اختي جابت كمية كرتون على الكمبيوتر لما هنج ما علينا نورتني جدا وسعيد جدا بزيارتك ليه عايزك تيجي كتيرر ونبقى اصحاب على طول
سلااااااااااااااااااام

sosoooo يقول...

البرامج دي بموت بموت فيها ،، فاكرين ،، ماما نجوي وبقلظ في صباح الخير وماما عفاف الهلاوي وكرنبة كل جمعة في سينما الاطفال سينما فيها حقيقة وفيها خياااال ، ولا عالم البحار الاستاذ العظيم حامد جوهر بكلمته الشهيرة " مساء الخير " وحدث في مثل هذا اليوم لمدة خمس دقايق قبل نشرة ستة يوميا ،، كلها زكريات تحفة برافو عليك ياشنكت ، عرفت تلمع الذاكرة صح....
تحياتي للموضوع الهايل ده

sosoooo يقول...

انت اختك اللي كتبت عمر وسلمي أأقصد عمر وسارة ،، ده انا حبيتهم اوي ،، ربنا يخليلنا اختك والنبي ترسلها سلامي وقولها ميمي بتقولك ماشاء الله عليكي ربنا يحميكي

sosoooo يقول...

فكر ثواني واكسب دقايق

Ehab يقول...

mimi
شاطره يا قطه
لبرامج دي فعلا كان ليها ذكريات معانا كلنا ونا بنقعد نتفرج واحنا سرحانين كأننا هندخل جوه التلفيزيون وطبعا مكانش النت انتشر زي دلوقتي فكانت الدنيا اللي بيفرجونا عليها حاجه عجيبه وجميله
شكرا على الكومنت الجميل
وعلى فكره بقلظ بيسلم عليكي
********
بخصوص عمر وساره
هي كانت بتكتبها كسلسله في مجلة بص وطل على النت بس لما اتسرقت الحلقات وناس كتير فبركت حاجات مش ظريفه زعلت وبطلت تنشرها اعتقد انها مخبيه شوية حلقات عندها بس الكمبيوتر عطلان مش عارف اشوفهم انا كمان
عموما شكرا يا جميله
سلاااااااااااااااااااااااااااام

maroa يقول...

هاي يا جماعه انا كمان كنت بشوف البرامج الجميله دي زي مثلا يوم الخميس اليوم المفتوح والموسيقى الي كانت بتميزه وبابا ماجد وماما عفاف الهلاوي في سينما الأطفال وأليس في بلاد العجائب وأغنيه فولا فولا بالوم بيلا على فكره مقدمه برنامج جوله الكاميرا كان اسمها هند ابو السعود وفاكرين برنامج تكنولوجيا ؟ ده كمان كان عبقري وحديث الروح ألي بعد المسلسل فاكرين كمان كوكي كاك؟بتاع إيمان الطوخي ومحمود الجندي؟ يااااااااااااااااه كان ايام جميله اوي مفهاش الكعبله بتاعه دلوقتي والله يا جماعه احنا عشنا طفوله هاديه اوي احنا اتظلمنا اوي في العصر ده بجد تصدقوني لو قولتلكو اني مخنوقه اوي من لون وطعم وريحه الحياه في العصر ده ربنا معانا ونكون افضل من كده الا كده بئا نييييييييييله اوي

Ehab يقول...

مروه

نورتيني يا مروه طبعا وليكي حق في ان كده بئا نيله قوي
هههههههههههه

بس صدقيني اطفال دلوقتي برده مبسوطين بطفولتهم وعايشينها كأنها اجمل ايام
زي ما كان اهالينا زمان مستمتعين بحاجات كنا هنشوفها احنا ساذجه ومش مسليه
كل واحد بيستمتع بذكرياته علشان هي ذكرياته

نورتيني جدا وتحياتي

سلاااااااااااااااااااااام

Philosopher يقول...

صباح الفل يا شباب و شاباب زى الفل
انا كنت بعمل سيرش فى جوجل على برنامج جولة الكاميرا و لقيت تعليقك يا شنكوتى .
مش عارف دخلت ليه بس حاسس انى عايز اقول لك و اقول للبشر كلها اللى دخلت ان احنا بندور على البرامج دى مش عشان البرامج نفسها انما بندور على المتعة اللى كنا بنستمتعها و احنا بنتفرج عليها .
ممكن تقولوا انه رغية فى استرجاع ما هو محفور بالذكريات اللى بقينا عايشين فيها عشان نهرب من واقعنا اللى مش عارفين نعيشه .
الحياة بتمشى لأدام و احنا هنفضل ندور على اللى فات و سلام مشنكت لكل الشناكيت الموجودين
اخوكم فيلسوف

Ehab يقول...

Philosopher

يا سيدي انت نورتني جدا وسعيد بمرورك ده
وهو ده فعلا كان الهدف من البوست اننا بنفتكر حاجات قديمه قوي علشان نسترجع طعم الأحساس زمان قبل ما كل حاجه تدمر كده
حتى الحاجات البسيطه بوظوها بغبائهم

متشكر على كلمات
وسعيد بمعرفتك
تحياتي

سلااااااااااااااااااااام

Unknown يقول...

أنا مش عارف أقول اية لأنى لما دخلت هنا حسيت بحنين شديد للأيام اللى كنا فيها أبرياء وكانت كل حاجة صغيرة جدا تكفينا ببساطة ودة اللى مش موجود دلوقت بجد حسيت بقشعريرة لذيذة بمجرد انى أفتكرت أسماء البرامج دة لأن فعلا كل البرامج دة ذى السؤال الاجبارى فى الامتحانات ولكن هى دة اللى بنت زكرياتنا الجميله كلها بطول 30 سنة مرت بالتقريب وأعتقد أن كل التعليقات لشباب لا يقل سنة عن 25 سنةوعموما شكرا لأثارة هذا الموضوع اللى رجعنا للحظات لطفولتنا الجميلة اللى دايما بحس فيها بخير مش موجود دلوقت...