الخميس، يناير ١٠

يا سلام لو نبطل نكدب على نفسنا


ساعات بنحب نضحك على نفسنا قوي

كل واحد شايف نفسه افضل الناس وكل واحد شايف ان اخطائه دي حاجه بسيطه وعاديه جدا ايه يعني كل الناس بتغلط ده انا اللي بعمله ده حاجه بسيطه جدا انتم مش بتشوفوا الناس بتعمل ايه والمصيبه ان الناس بقت بتتفاخر بالغلط فالبتالي اللي بيسمع يقولك الحمد لله انا يا عم كويس قوي كده ومحترم جدا

تلاقي مثلا الزوجه الخاينه وده اشنع صوره الست ممكن تتخيل نفسها فيها
فتلاقي كل ست مش بتخون جوزها مع راجل تاني فرحانه قوي انها ست شريفه وعمرها ما كانت ست خاينه مع انها ممكن تكون بتخونه بصوره تانيه مش شرط تنام في السرير مع راجل تاني علشان تبقى بتخونه ساعات الخيانه مش بتكون جنسيه بس ممكن تخونه وتبيع افكاره ايوه بجد ممكن واحده تاخد افكار زوجها وتنسبها لنفسها او لحد تاني عزيز عليها او هيدفعلها مقابل كويس دي برده خيانه وممكن تخونه لما تكشف اسراره لصاحبتها الأنتيم وتقولك انا عمري ما خرجت سري بره بيتي مع ان صاحبتها استلمت منها السر وبكل نيه خالصه راحت تحكي لأمها وامها تحكي لزوجها ولأختها واللي طبعا هتحكي لزوجها وعيالها واللي هم كمان هيحكوا لأصحابهم ويا سلام بقى على التسلسل بتاع القنبله لما تفضل الناس تحكي لبعض لغاية ما تلاقي سر بيتك جايلك من اذاعة اليابان تصحى من النوم تلاقي مذيع ياباني واقف بيتكلم ويقول "هذا وقد تردد في الأوساط المصريه ان حضرتك نسيت تشتري هديه لحماتك في عيد الأم او انك يوم الخميس صحتك كانت مش ولابد فالبتالي لم تقم بواجباتك كما ينبغي
تلاقي الناس بتتكلم مع بعضها عن اسرارها كان مفيش اسرار خلاص ويرجع يقولك الدنيا مفيهاش امان


عندك مثال تاني الراجل اللي شايف نفسه مصلح الكون طبعا الدعوه واجب كل انسان مسلم لكن برده مش معنى كده تفرض على الناس رأيك وكأنك العالم الوحيد في الكون وتلاقي الواحد منهم عمال يشخط فيك ياجاهل يا فاسق يا ســـــــــافــــــــــــــــــل
ويقولك اصلك بتهمل في شغلك واصلك بتستغل ممتلكات الشركه لأغراض شخصيه واصلك وفصلك وطبعا مش عايز اقولك ان هو غالبا بيعمل اكتر منك بس هو ناصح بيعملها في صوره سليمه بيظبط نفسه برده بس في السليم


وحتى المدونات اللي الواحد قال اخيرا هنهيس ونرغي بحريه تلاقي واحد مش عاجبه اسلوبك خالص وده طبيعي مش كل الناس بتتفق على حاجه واحده لكن اللي مش طبيعي انه يهينك ويهينك قوي كمان وطبعا هو مطمن انك مش هتعرف تجيبه من قفا امه وتديله العلقه التمام على طولة لسانه دي ده برده يودينا لناس تانيه

اللي بيعتمد على نقطة انك مش عارفه ويئذيك كده بدون سبب لمجرد انك مش عارفه ومش طايله تلاقي واحد كسر اي حاجه من حاجاتك وبدون داعي خالص مجرد انه عارف انك مش هتعرفه او يشتمك من على الشات او الميل او يبعتلك فيرس هديه
او يديك زمبه حلوه عند رؤسائك

واحد تاني بياذي نفسه ومش بيئذيك انت وده اللي بيضحك على نفسه
معايا واحد في الشغل نفسه يعينوه بمرتب كويس ويتعمله عقد ويتظبط كده ومع ذلك يقولك لو مش عملولي العقد بمرتب كويس هامشي واروح حته تانيه الشغل بره على قفا من يشيل اقوله ايوه يا حبيبي على قفا من يشيل بس كل واحد وامكانياته يعني حضرتك معندكش خبره في حاجه ومعندكش لغه خالص والكمبيور بتعرج فيه بالعافيه يبقى حضرتك هتشتغل بره ايه بتاع بليله

مش عارف هي المشكله ان الناس بتحب تضحك على نفسها ولا هو نوع من التعامي عن الحقيقه علشان نهرب من الواقع المر ولا ايه بالظبط

طبعا مش عايز انسى اشهر واقوى مثال الراجل الخاين اللي بيعمل كل المنكرات ويقولك لا انا عمري ما نجست بيتي قال يعني هو مادام بيخرب الدنيا بعيد عن البيت يبقى كده كويس ويقولك دول غانيات يعني ليله وبتعدي وانا بحب مراتي ومش بخونها تقوله ازاي يقولك اخونها دي لما احب واحده تانيه عليها واعمل معاها علاقه يعني تقوله والستتات اللي انت عامل معاهم علاقه يقولك لأ دول علاقات عابره كده نزوات يعني
اموت واعرف مين اللي ابن الكلب اللي قالهم ان كلمة نزوه يعني حاجه سهله وممكن مراته تسامحه عليها لأنها نزوه يعني غصب عنه ومؤقته وتعريف جميل قوي
يخليني عايز اروح اشوف موضوع النزوه ده
وختاما ياريت نبطل نضحك على نفسنا كل واحد يشوف اخطائه وعيوبه ويعرفها كويس يمكن لو معرفناش نمحيها على الأقل نقللها شويه

هناك ١٥ تعليقًا:

Doba يقول...

اولا بطل طولة لسان
ثانيا كل واحد وليه طريقة تفكير وعقل
وكل واحد مدام ربنا مديله مقدار من العقل والحكمة يبقى نقدر ان ربنا اعطى للآخرين القليل

فيه ناس متقدرشى تعيش غير وهيه بتكدب على نفسها لان الواقع بيتعبها قوى وبيخليها بتتمزق طول الوقت

أرفق بيهم وبحالهم

وتذكر قول الرسول عليه الصلاة والسلام
اختلق لأخيك سبعين عذر

سلام يا صديقى
هبة

sally يقول...

يا نهار ابيض
ده انت شايل جواك لما جبت اخرك
انت فعلا عندك حق بس \الموضوع مش موضوع ان الناس بتضجك علي نفسها اعتقد ان الموضوع هو ان الناس مش بتبص جواها كويس
ما بتعرفش تتفرج علي عيوب نفسها

MerMaid يقول...

اولا
ازيك يا سعادة الشنكوتي الكبير؟
يارب تكون كويس

اتمني تكون طلعت كل اللي كاتمه جواك في البوست ده
انت عندك حق ..كل واحد مننا شايف نفسه مفيش زيه وحاسس نفسه ابن بارم ديله وانه اتقي الاتقياء و كل ده
و انا منكرش اني ساعات بحس كدة لما بشوف بلاوي تانية ناس غيري بتعملها
بس انا هقولك علي حاجة مؤخرا
انا بدات اشوف نفسي وحشة قوي و ان كل الناس دي احسن مني
معرفش ليه؟؟يمكن لاني بمر بحالة اكتئاب مش بسيطة.
ارجع واقولك ده مجتمعنا الشرقي
العرب كلهم كدة مش وراهم الا القيل والقال و هم مش عارفين ده هيوصلنا لفين ولا هياثر علي اللي حوالينا ازاي
و احنا اعتقد يعني الوحيدين اللي في العالم اللي فاضيين للكلام و الشكوي وحكاوي القهاوي
و تلاقي عدد لا باس به من الشباب بيرسم صورة تانية لنفسه مجرد ما يروح مكان جديد محدش عارفه فيه او علي الانترنت مثلا
انا معرفش ده نتيجة ايه؟؟
هل نتيجة الكبت اللي بيحصللنا من واحنا صغيرين وكل حاجة عيب ؟؟
لدرجة ادت الي استفحال الشذوذ الجنسي و التحرش الجنسي؟؟
و لدرجة ادت الي اننا نكذب الكذبة و نعيش فيها
و يا دار ما دخلك شر
تلاقي الواحد مننا عايش حياة مزدوجة
تلاقيه محترم في مكان ..وتلاقيه واقف طابور يتحرش بالستات في مكان تاني محدش عارفه فيه..............
انا مبقتش فاهمة المجتمع ده

لكن بالنسية للخيانة الزوجية ..الناس اصلا بعدت عن دين ربنا ومبقتش عارفة حق عليها و حق ليها..فتلاقي الست من دول تقعد تشتكي من جوزها و من ظروفه اللي بيمر بيها
وهكذا الرجالة
تلاقي الواحد يطلع زي مانت قلت كدة يعمل علاقة عابرة ..ويقولكك نزوة
صدقني
لو الدين في حياتنا مهم زي النزوات و الشهوات بتاعة الناس دي
مكنش كل ده حصل

و اعتذر لك عن الاطالة

:))

امرأة من عبير الورد يقول...

أحنا مجتمع متناقض و الضحك بيجي من عدم وضوح النوذج الأنساني .... أو حدوث خلل فالقيم لأنسانية او اننا مبنشوفش غير اللي بيضحكنا عشان زهنا من الهم.

Ehab يقول...

دوبه
اولا سامحوني على طولة لساني
عادي يعني هو انتو اول مره تشوفوا واحد قليل الأدب
ما علينا
جميله قوي نصيحتك
صلى الله على سيدنا محمد
شكرا على الكلام الجميل ده

---------------------

sally

يا بنت يا سالي ازيك
ايوه انا كنت هاطق من جنابي من الناس دي
ويمكن معاكي حق الناس مش بتشوف عيوبها
نورتينا

--------------------------

mermaid

اولا شكرا للأطاله
معنى انك طولتي يبقى الكلام عاجبك وعايزه تناقشي وتعبري معايا
يبقى شكرا ليكي مش تعتذري

وبعدين معاكي حق كل واحد فينا لما بيقعد مع نفسه ويصارح نفسه بعيوبه وبلاويه بيشوف صوره مشوهه ووحشه قوي
بيحس انه سافل وقذر قوي
مش قصدي انتي انا بتكلم عن نفسي وبصفه عامه
كل واحد بيشوف في نفسه اصعب حاجات جواه اللي ممكن عمره ما يخرجها قدام حد لكن هو عارف انها جواه فبيشوف نفسه وحش بيها
لكن هو الظاهر البني ادم هو كده مخلوق من جواه بلاوي كتير قوي
ربنا يهدينا ونبطل نشوف عيوب الناس قبل عيوبنا
---------------------

امرأه من عبير الورد

حمد الله على السلامه يا فنانه
هو ايه بس الكلام الكبير ده
نموذج وخلل وقيم وفيه كمان مجتمع
يظهر ان الموضوع بتاعي طلع كبير قوي وانا مش واخد بالي
المهم انك نورتيني

احنا بنشوف على هوانا
يعني بنشوف عيوب الناس علشان نحس اننا كويسين واحسن منهم

سلااااااااااااااااااااام

كاميليا بهاء الدين يقول...

انا متأكده جداً انك تعبت اوى وانت بتكتب البوست ده
صوت ألمك كان عالى بين السطور
ولكن
هى دى الدنيا، وسميت دنيا لانها من الدنى
والإنسان مش معصوم من الخطأ
ولكل إنسان وجهة نظره وظروفه
تفتكر لما تقول لحد بطل تكذب على نفسك
هيسمع كلامك؟
طبعا لا، ده هيكذب عليك فى نفس اللحظة

سبحان الله العالم لما نخفى وما نعلن

مش تبقى تتعصب كده وانت بتكتب
انا خوفت منك ياعم

دمت بكل السلام النفسى والهدوء يارب
واسعد الله قلبك

كاميليا

فرنسا هانم يقول...

زى مانتى تحكى لواحد موضوع وتستنى رايه فيه
لو اتكلم على هواك وقال انك على حق تسمعله باهتمام وانصات وتبقى مش عايزه يخلص كلامه
ولو
كلامه معجبكش تصدر له الطرشه
وتبقى عايزه يخلص كلامه بسرعه
دى طبيعه بشريه
موجوده فى ناس كتير

الـسـيـدة نـون يقول...

احويا الصغنن الشنكوتى الكبير
اولا مش عارفة هو انا قلتلك قبل كدة ان الكلام اللى انت حاطه عندك فى البانر بتاعك عجبنى ولا لأ عموما لو ماكنتش قلتلك ادينى بقولك
ثانيا
مش زعلانة منك علشان لسانك طويل
اصل انا كمان لسانى طويل
ثالثا انت بتتكلم فى موضوع مهم جدا
بس عموما انا هاتكلم عن نفسى فى الموضوع ده
انا مش بكدب على نفسى
مش معنى كدة ان معنديش عيوب
لاااااااااااااااااااا
ده انا عندى بلاوى متلتلة
بس عارفاها وعمرى ما انكرتها بحاول اصلح اللى ينفع يتصلح وبحاول معملش اللى مش هينفع يتصلح يبقى ابطله احسن
وكمان بصراحة لما كبرت شوية كدة بقيت مش بحب احكم على الناس
بقى عندى قناعة اننا كلنا بشر وكلنا بنخطئ يبقى ماينفعش انى اقعد اقول لحد انت غلطان واطلع نفسى مصلحة اجتماعية
لانى مقتنعة بالحكمة اللى بتقول من كان منكم بلا خطيئة فليرجمها بحجر
وانا مليانة اخطاء يبقى ماينفعش ارجم غيرى
على راى المثل اللى بيقول اللى بيته من ازاى مايغيرش هدومه فى الصالون
وسلام يا شنكوتى يا كبير
اختك خيخة

truelove يقول...

يعني يا عمل ايهاب مينفعش نتكلم من غير شتومة ماشي انا والله معاك في كل كلامك كل واحدة تدي نصايح لصحبتها ولوبصيت ليها هتلاقيها هي نفسها عاوزة تنتبه لنفسها شويا أقولك ده ليه تفسير في علم نفس هو ميكانزم دفاع الانسان بيحاول يقوم بيه مابين الفترة والتانية علشان يقلل الشعور بالذنب الي بيقتله من جواه فبيعمل ايه بيحاول يدي في نصايح وبتاعت علشان يهدي الاحساس بالذنب ده مع العلم ان الحل سهل قوي لو صلح من جواه زي ما دكتور ابراهيم الفقي بيقول " التغيير يبدامن الداخل " هيبقى ميت فل وعشر يالا سلام وكل سنة وانت زي الفل

Ahmed Mubarak يقول...

حضرة الاستاذ المحترم شنكوتي
حلوة الدخله ديه..متفصله على شنكوتي
:D
هو انا اول مرة ازور المدونه..وصراحة انا مقرتهاش كلها بس انا ضربت بعيني أخر موضوع كدة لقيت حته المدونين الي بيضربوا كلمة ويجروا..هوا ديه عن نفسي حاجة انا مش بحبها خالص..

بس برضوة هدي شويه يا حبي..انت شكلك متعصب خالص..الناس غلابه..وفينا من العيوب ما يكفي..
نحاول نتكلم من غير ما نقول على فلان وفلان حتى لو اسمه مش موجود..

وبس كدة..
مش عارف عندي رغبه شنيعه اني اغني شنكوتي مع اني مش بحب الاغنيه ديه
:D
تحياتي

فى القلب يقول...

والله يا شنكوتى كلامك كله حكمه

ما عدا الشتايم طبعا

عجبتنى جدا فكره خيانه الزوج عن طريق نقل أسراره بحسن نيه

فعلاً فعلاً دى فى الصميم خصوصاً أنها بترتكب دون قصد لكن يترتب عليها نتائج لا يحمد عقباها

Ehab يقول...

كاميليا
عزيزتي منوراني دايما
"تفتكر لما تقول لحد بطل تكذب على نفسك
هيسمع كلامك؟
طبعا لا، ده هيكذب عليك فى نفس اللحظة"
كلامك في الجون
اكيد كل واحد شايف ان هو ملاك بريء وان عمره ما بيكدب على نفسه ولا على الناس
وعموما حاضر هاحاول مش اتعصب تاني
بس هاعمل ايه من غلبي مفيش حته تانيه ازعق فيها براحتي غير هنا وسطيكم
وعموما اوعي تخافي تاني
انا عايزك اسد
سلاااااااااااااام

Ehab يقول...

فرنسا هانم
نورتي المدونه يا استاذه
البحر الأحمر كله نور المدونه
كلامك مظبوط قوي
عارفه لما بنحكي لحد عن موقف حصل لينا مش بيبقى علشان نوعظه
لكن علشان نسمع منه كلمة تشجيع ومسانده يعني عايزين نسمع اللي يعجبنا وبس
وعموما نورتيني قوي
سلااااااااااااااااااااااام


--------------

بنت خيخه واي كلام
يا بنتي ببقى محرج وانا بكتب اي كلام دي علشان انتي مش اي كلام خالص
ولا بتخذي العين يعني وخلاص
المهم
انا مبسوط قوي قوي من كلمة اخويا دي
بس صغنن ازاي يعني ده انا قربت اعجز خلاص وبانت عليا كل علامات الشيخوخه خلاص
المهم اولا كلام البانر ده ربنا يخليكي واتمنى دايما كلامي كله يعجبك
ثانيا حكاية طولة اللسان دي انا وانتي لسانا بيطول من اللي بنشوفه غصب عننا يعني
ثالثا
انتي بنت ميه ميه واجدع من ناس كتير علشان اتوجهتي للخطوه الصح ان كل واحد يبدأ بنفسه ويحاول يصلح عيوبه بدل ما يتفرج على اندر ويرات الناس من الصالون
سلاااااااااااااااااااام


----------------


قلوب حائره

حلوه التفسيرات الجامده دي عموما هعوزك لما احب اتنطط على العيال تبقى تديني مصطلحين من اللي بتدريسيهم دول اتفشخر بيهم كده

ولو ان انا على قد ما فهمت منهم ان الواحد بيطلع عقده على غيره يعني اللي فيه عيب بيلزقه للناس كلها علشان يبقى هو احسن واحد
وكل سنه وانتي طيبه
سلاااااااااااااااااااااام

Ehab يقول...

احمد مبارك

عزيزي واخي تنورني في اي وقت وياريت متكونش اخر زياره
علشانم خاطرك هاهدي الكلام شويه
ولو انه طبع العرب كلهم نحب نعلي صوتنا يعني
ما علينا المهم نورتني
سلااااااااااااااااااااااااااام

Ehab يقول...

في القلب
حمد الله على السلامه الناس المختفيين

لو فعلا كل واحد ياخد باله من الغلطه الصغننه اللي بتسبب بلاوي كبيره هنستريح من مشاكل كتييير

وبالنسبه للشتايم هاقفل بقي بعد كده خلاص وهابقى مؤدب
سلااااااااااااااااااام