الأحد، يناير 27

الموبايل ضـــــــــــــــــــــــــاع ..............عااااااااااااااااااااااااااااء


الحمد لله


يوم الجمعه صحيت من النوم عايز انام خمس ساعات كمان

بس لازم انزل اروح الشغل علشان عندي كوم متلتل هناك وبالمره اعمل اضافي

واهو بدل ما اجي يوم السبت اخد كلمتين على الشغل المتعطل


-صحيت لقيت ابويا مش رايح بدري قاللي انا هاجي بس متأخر شويه

قلت مش مشكله انزل اروح بالمواصلات وبالليل نرجع سوا بالعربيه يبقى مفيش مشكله حلو برده

وفعلا جهزت ونزلت

-وبعد ما ركبت التوك توك الجميل ومشيت اكتشفت اني نسيت الموبايل في البيت فقلت للواد ارجع يا ابني تاني نسيت حاجه فرجعت جبت الموبايل من البيت -خدوا بالكوا كويس رجعت جبته بنفسي- المهم ركبت ونزلت في الميدان ركبت الميكروباص ومنه نزلت في الجيزه

- بحط ايدي على جيبي ملقيتش الموبايل امسك يا جدع الميكروباص لقيته بيلف من بعيد ومش هيجي تاني من هنا غير بعد شويه كتير طيب اعمل ايه بسرعه واحد من السواقين قالي اديني النمره نتصل على الموبايل قبل ما حد يقلبه وطبعا كان الخط اتقفل خلاص الناصح اللي لقى الموبايل او اللي سرقه بقى قفله فورا قبل ما الحق ارن عليه وخلاص كده عليه العوض يا ساتذ نصيبك كده قلت خلاص قدر الله وما شاء فعل


ورحت الشغل لقيت الدنيا مكركبه ومفيش حد حتى اخد منه كوباية شاي في البوفيه


-واكتشفت اني كان المفروض اشتري اكل من الطريق علشان الكافتيريا هنا قافله يوم الجمعه فمفيش اكل لحد ما بابا يجي او لحد ما اروح


-وطبعا ابويا كلمني قالي انه مش جاي النهارده تعالى انت بقى


-فقلت الحق عربية الشركه اركب فيها بدل بهدلة الصحراوي في يوم الجمعه وفعلا ركبت معاهم


-بس اكتشفت اني نسيت اختم على البوابه قبل الخروج يعني هتكتب مجتش قلت انزل جري الحق اختم


-يقوم ايه بقى يقولك خلاص العربيات هتمشي واول ما حطيت رجلي بره العربيه قفلوا الباب وطلعوا كلهم وسابوني

والحمد لله رحت على الطريق لقيت ميكروباص اتزنقت فيه كده وخلاص


-جينا في الرمايه الواد اللي جنبي قالي لو سمحت انزل علشان اعرف انزل قبل ما الأشاره تفتح وفعلا نزلت ويادوب لسه ماسك الباب الأشاره اتفتحت والسواق انطلق فورا وانا ايه بقى متشعلق بأيدي وسناني في الباب وطبعا اترزعت في الباب رزعه حلوه كده ودخلت العربيه عايز اكل زمارة رقبته

وقعدت ازعق في السواق وهو متنح كده مش مصدق اني بشخط فيه اصله من الأشكال اللي الواحد في العاده بيتجنبها تماما بس كنت جبت اخري اصلا

المهم نزلت من الميكروباص وركبت من الهرم للجيزه فطبعا قعد جنبي شوية عيال راكبين مع امهم وليه رخمه كده سابتهم وطفشت قعدت ورا خالص وهم قعدوا جنبي او بمعنى اصح على حجري وقعدوا يصرخوا وبضحكوا ويفركوا لما كنت هاعيط من الغيظ

ولما نزلوا كنت عايز احدفهم بالطوب من الشباك


وصلت البيت الحمد لله دخلت بسرعه على السرير وقلت لأمي انا هنام لحسن حاجه تحصل تاني بقى

انا فاضلي شعره واحدف العيال بالطوب في الشارع


وقبل ما انام قلت اكتب البوست ده قبل ما انسى بس اكتشفت ان الكمبيوتر بيعلق وصفخة الأكسبلورر بتقفل لوحدها فمعرفتش اكتب حاجه

بس النهارده الحمد لله عرفت اكتب اهو


وبعدين قبل ما انام ساعتها فكرت في حاجه غريبه قوي

لما سيدنا موسى كان مع الرجل الصالح في سورة الكهف

وكان عمال يحصل قدامه حاجات عجيبه وهو شايف انها اذى كبير للناس بس هي في الحقيقه خير ليهم عظيم ميعرفوش مقداره ايه

فكرت ان الناس اللي مصدر رزقهم اتعطل بتخريبه للسفينه اكيد زعلوا قوي على مصدر رزقهم

يبقى الواحد المفروض ميزعلش ويقول الحمد لله قضاء اخف من قضاء

والحمد لله على كل شيء


ملحوظه

طبعا انا كده فقدت كل الأرقام اللي كانت عندي ولسه هادور على العقد علشان اوقف الخط القديم واجيب شريحه تانيه وموال كده

لما يبقى يخلص ابقوا الله يستركم تدوني ارقامكم اللي ضاعت مني

وعليه العوض ومنه العوض


سلااااااااااااااااااااااااااااااااام

هناك 39 تعليقًا:

الساحرة يقول...

ربنا يعوض عليك الظاهر ان اليوم مكنش يومك وسرقته من حد ههههه وبعدين الموبيل اتسرق علشان موتوريللا ابقي اشتري نوكيا

عصفور المدينة يقول...

ربنا يخلف عليك

doda يقول...

ربنا يعوض عليك
بس احمد ربنا ان هو رزقك بالصبر دة كلة
يالله بقا اتشطر وهات لك موبايل تانى

صوت من مصر يقول...

والله انا بجد لو مكانك هنفجر بس ربنا سترها عليك
ويوعدك بنوكيا n 96

Najwan يقول...

يلهوى ان الو منك كان جالى انهيار عصبي
عضان ان احصلى يوم كدا زيك ورجعت البيت اعدت اعيط ساعتين
روحت الصبح المطار ع شان اسافر قوليلى انتى مش ماكده حجزك ورجعونى مردتش اروح البيت قولت اروح اتغدا برا دخلت فراديز لقيته زحمه وحطونى في طاولة كدا صغيرة على الجنب ومحدش عبرنى فاخدت بعضى ومشيت قولت مش مشكله اروح اكال ايس كريم من المحل الى قدامه روحت هناك لاقيت الفلوس مش معايا رجعت تانى فريدايز لقيت الفلوس الحمد لله ( دي كانت احسن حاجه حصلتلى ف ياليوم دا ) روحت بقى اجيب ايس كريم لسه طالعه من المحل وماسكه ايس كريميا قدى لقيت زبال بيبصلى بحقد قامت الايس كريميا وقعت على الراض شر وقعه عايزة اقولك انى كنت عايزة اشتم الزبال دا المهم قولت خلاص انا هدخل سينما خدت تاكسي وروحت الراجل مرداش يدخلى جوا واتخنقنا ورمتله الفلوس دخلت الفيلم بقى طلع نكد جدا الفيلم بتاع ويل سميث البحث عن السعاده طلع مفيش اى سعاده في الموضوع
والله رجعت البيت بعيط كان يوم بشع

عشان كدا انا حاسه بالموضوع اوى
بس الحمد لله على كل حاجه

كاميليا يقول...

كل ده حصل فى اقل من 24 ساعة؟

عموما فداك ...
أهم حاجة انك رجعت البيت
بالسلامة
ومش مهم كل اللى حصل
والحمد لله انك كنت صبور كمان

هات موبايل جديد
واوعدك

أنا

أول

واحدة

مش

ها

أديك

نمرتى


هههههههه

تحياتى

كاميليا

MĕŢø & ŘǿŖêĔ يقول...

الله يعوضك
معلش فداك
المهم انك انت بخير

روري

shahy يقول...

فداك يابو الشنكيت
وربنا هايعوض عليك ان شاء الله

قلوب بتغنى يقول...

انت ياعم يابتاع رئيس جمهورية نفسك
لذيذ جدا العنوان
عثل والنبى عثل
بجد عايزه اقولك ان الاسم جميل عارف ليه؟
علشان اجمل حاجه ان الانسان يكون مالك زمام نفسه لا سلطان عليه ومع ذلك بيحترم نفسه ويحترم الى حواليه زى ماهو باين من تدويناتك
ثانيا دمك خفيف
وفى حاجه لفتت نظرى انت بتشتغل
طب كويس لسه فى حد بيلاقى شغل فمصر اهو
بالنسبه لموضوع الموبايل ابويا لقى حل للمشكله دى
بيشترى عده بعيد عنك خشب
الحرامى نفسه ممكن يدفعله عليها فلوس وحتى لو واحد اتعمى فنظره واخدها يبقى عذب نفسه
دى اول مره ازور مدونتك واكون سعيده لو زرت مدونتى وعلقت عليها
sbedtime.blogspot.com
meshmasha.blogspot.com

قلوب بتغنى يقول...

خطا غير مقصود انت شنكوتى مش بتاع جمهورية نفسك
بس الاسم ده مش لايق عليك انت مش شنكوتى انت حد محترم يعنى
بقيت التعليق ليك
لامؤاخذه العتب على النظر

نوراى يقول...

هاى شنكوتى

دى اول مرة ازور البلوج اد اية هو بجد رائع

اما بقة عن يوم الجمعة اياة

معلش هو كدة فية ايام بتنبقة نحس من اولها

بس انصحك نصيحة

اول ما تصحا من النوم وتلاقى اليوم كدة منحس معاك متعملش فية اى حاجة غير انك ترجع تنام تانى دى احسن حاجة تتعمل فى الايام اللى زى دى

على فكرة انا دايما بيحصل لى كدة يوم الثلاثاء عشان كدة انا باخدها من قاصرها واخلى يوم الثلاثاء يوم النوم منعا للحوادث

Doba يقول...

يوم هايل هايل الصراحة
من أوله لآخره

كل ده علشان عملت شملول وقلت تخلص شغلك
وكمان علشان مركبتش العربية مع عمو

اومال لو بتركب كل يوم نفس المواصلات والمرمطة والسواقين والعيال والعياط والزق والقرف

يابنى احمد ربنا ان الموبايل بس اللى ضاع انا حسيت انك على اخر اليوم هلاقيك مخطوف ومطلوب فيك فدية

فعلا لما الحاجة بتروح بتفدى حاجة تانية بدالها - والعوض على الله

الحمد لله
استغفر كده كتير
سامع

يلا روح كمل نوم بقى
ولا قوم روح الشغل

ثم تعالى هنا
راكبلى توك توك
توك توك

الاخلاق انعدمت من البلد خلاص
مفيش اخلاق - راحت خلالالاص

توك توك

اخرج من بيتى يا وغد
ههههههههههههه

انا همشى بقى قبل متضرب
سلام
هبة

MAKSOFA يقول...

معلش ياابني شكلك كده في اليوم ده كان برج زحل راكب فوق نفس البرج بتاعك

قلوب حائرة يقول...

بص يا ايهاب مش هعلق غير بمقولة وتحدة لعمرو بن الخطاب " لو تعلمون مافي الغيب لتمنيتم الواقع " يعني لو انت كنت سيبت الموبايل في البيت كان ايه الي هيحصل يعني التشكيل الوزاري هيفوتك يعني دايما كده والله احنا بنجيبه لنفسنا ونهاية " وعسى أن تكرهوا شي ويجعل الله فيه خيرا كثيرا زي ماانت ختمت البوست

عروس البحر يقول...

ربنايعوض عليك
ياريتك سبت الموبيل في البيت ما علينا
البلوج حلوة اوي ماشاء الله عشان الموبيل الجديد ميضعش اديني قولت ما شاع الله

Ma 3lina يقول...

ههههههههههههههههههه

اليوم غريب فعلا كل الكوارث حصلتلك فى نفس اليوم

معلش ربنا يعوض عليك

همسات يقول...


ههههههههههههههه
يالله تعيش وتاخد غيرها
كل حاجة بتحصلنا بتبقى خير حتى لو ضرتك فى الوقت القريب هتعرف بعدين انها حكمة من ربنا


يالله احنا ممكن نعمل جمعية منقبضهالك الاول عشان تجيب واحد جديد بكشاف
:p

هههههههههههههه

TAM يقول...

لسه واحد صحبى النهاردة نفس الحوار برضه بس فقل الشريحة وجاب شريحة جديدة ومحتار يشترى ايه

يبنى هات تليفون ما يتسرقش

تحياتى

عاليا حليم يقول...

ههههههههههههه

معلش الزهايمر و لما حد يبقى واخد عقلك برده مش انت لسة عريس جديد او حتبقى على ما اعتقد

بس ابقى هات الجديد نوكيا احسن

امرأة من عبير الورد يقول...

معلش يا شنكوتي انت فالأخر وصلت بيتك احمد ربنا والخط مش محتاج العقد حيبقي محتاج البطاقة بس و ممكن تقفلوا بالتليفون ولو عندك السريال بتاع الموبيل ممكن تجيبوا من القرية الذكية اعتقد ان هناك بعد بلاغ القسم بيجيبوا الموبيلات حاول لو الموبيل عزيز عليك

Lemonada يقول...

هههههههههههههههه
صوتي من الضحك عبى الدنيا
متاسفة بس شر البلية ما يضحك
معلش يا عم
ربنا يعوض
ويرزقك احسن واكثر
بس بجد انت تحفة
عارف الصبر جميل
المهم انك نمت وماشوفتش كابوس وانت نايم
كفاية مشاكل مش كدة
وش بيغمز
متاسفة اني مش بزورك
بس اوقات المدونة بتاعتك مش بتفتح معايا
متشكرة زيارة الدائمة لمدونتي
بجد ببقى مبسوطة لما اشوف تعليق منك
تحياتي واحترامي
ليمو

shayma يقول...

بجد بجد الله يكون فى عونك
يومك كان لذيذ اوى الصراحه وكملت بالموبايل
:))

معلش متزعلش ربنا معاك ويعوضك خير انشاءالله

سلامى
:))

منى محمود يقول...

معلش يا شنكوتي .. ولا تزعل .. تتعوض ان شاء الله

وبعدين هي دي مصر يا عبلة :D

سلااااااام

Mermaid يقول...

ههههههههههههههههههههههههههههه

مش ممكن
بجد اولا انت واحشني جدا يا ابني
فينك من زمان؟؟؟
بص يا سيدي ..احيانا كل فترة كدة بييجي يوم يقلب حياتك راسا علي عقب ويبقي كله مش في صالحك
و كل ما تعمل حاجة تلاقيها تلاقيها بتبوظ
وكل ما تحصلك حاجة تلاقيها مش في صالحك
سبحان الله يعني حاجة غريبة
يمكن ده تذكار من ربنا لينا علشان نذكر النعمة اللي احنا فيها وان كل شيء سهل و مسخر لينا بامر الله

معلش ربنا يعوض عليك في الموبيل بتاعك
و تجيب موبيل جديد وخط جديد
:))
تحياتي ليك

الشنكوتي الكبير يقول...

اولا اسف جدا على التأخير في الرد
بس النت مشكلته كانت عندي مضاعفه شويه
مبقتش عارف ارد على اي حد خالص
بس وحشتوووني قوي

الشنكوتي الكبير يقول...

الساحره
الله يخليكي يا ساحره
وبعدين على فكره انا فعلا اشتريت موبايل واشتريته نوكيا كمان
بس كده اي خدمه
نورتيني وسحرتي المدونه كلها

------------------



عصفور المدينه
اخي الكريم دايما سابق بالخير كده ومنورني وبتسعدني زيارتك قوي
ربنا يحفظك ويديمك اخ عزيز
------------------

دودا

اول مره تقريبا تيجي هنا
بس نورتيني جدا
عموما انا الحمد لله اتشطرت واشتريت موبايل نوكيا حسب نصيحة الساحره

-----------------

صوت من مصر
ربنا يحفظك
ربنا لما بيبتلينا بحاجه بيرزقنا الصبر والتهوين معاها
الحمد لله
ويسمع من بقك ربنا

----------------

نجوان
تصدقي ان امي قالتلي اللي يشوف بلوة غيره تهون عليه بلوته
اهو انا دلوقتي فهمت قصدها
ايه يا بنتي ده كله ربنا يعوض عليكي بيوم احسن منه
عموما بعد كده لما تجيبي ايس كريم عملاق ابقى اقعدي جوه المحل كليها
او اديني منها حته انا بموت في الأيس كريم الضخم ده

نورتيني

-----------------------

كاميليا
اختي الغاليه
ربنا يكرمك
بس يا ندله بقى مش هتديني نمرة تليفونك
طيب ماشي
اصلا انا مكنتش هاتصل بيي علشان انتي عايزالك كارت بسبعتلاف جنيه مثلا علشان اكلم المانيا دي
اخرك كنت هابعتلك رساله من ام نص جنيه بحاله

ومادام النت موجود ابعت منه ببلاش وخلاص

بس برده احساس معزتك وصلني وغلاوتك عندي بتذيد كل يوم
ابقي فكري بجد في اقتراح اننا نعمل مدونه مشتركه
سلاااااااااااااااااااااام

الشنكوتي الكبير يقول...

MĕŢø & ŘǿŖêĔ
الله يباركلك

بس انا برده مش عارف اتهجى اسمك
مش مهم المهم اهتمامك

نورت
--------------------

شاهي
الله يبارك فيك
ومادام اصحابي جدعان زيكم يبقى ده احسن تعويض من ربنا

سلامي لأبو الدراويش والعيال
----------------

قلوب بتغني
شكرا على الزياره

وامنى متكونش الأخيره
وربنا يوفقكم
مبروك على المدونتين

--------------------

نوراي

حلو اسم نوراي ده
جبتيه منين
ما علينا
طبعا نورتي المدونه وشرفتيني بزيارتك جدا

ومعاكي حق ياريتني نمت انا كمان زي ابويا وكنت ريحت نفسي

-----------------

دوبا

يا باشا انت يا بتاع الأجابات المنطقيه
بس والله جبتي المفيد لازم الواحد يكتر من الأستغفار
نورتين
سلامي ليوسف وابوه

-----------------------


مكسوفه

منوراني دايما يا قمري
بس برج زحل ايه
هو زحل ده مش اللي بيبقى حواليه حزام تراب كده
اه هو يومي كان مترب ومنيل كده
بس الحمد لله عدى وخلاص
نورتيني
---------------

قلوب حائره

ايوه يعني تشكري على الدعاء بس قصدك ايه يعني بالتشكيل الوزاري انتي يا بنت بتشككي في اهميتي السياسيه والعلميه
ده انا من غير الموبايل مصالح الدوله تتعطل
امال ايه
انتي فاكره ايه

هههههههههه
نورتيني
سلااااااااااااااااااااام

الشنكوتي الكبير يقول...

عروس البحر
ايوه كده حاجه من ريحة البحر واسكندريه تنور المدونه

نورتيني وبعدين انا عارف انك مش هتحسدي يعني
هتنقي بس
انا لو كنت سبته في البيت
اااااااه
ما علينا

نورتيني
سلااااااااام
------------------

ما علينا
اهو اسمك هو الحل
ما علينا
هنعمل ايه يعني قدر الله وما شاء فعل
اكيد راح فدا حاجه تانيه

نورتيني
----------------

همسات
بقى كده هتعملولي جمعيه وتلمولي من بعض
اهو هم دول الأصدقاء بجد
بس ياريت تجيبوه بكاميرا مش بكشاف يا بتاعة الحفريات انتي
هو في موبايلات بكشاف دلوقتي
عايز بكاميرا يا بنت متخنصريش حاجه من التبرعات
نورتيني
---------------

TAM

نورت يا باشا
عموما هو ده الحل الي انا اخدته
جبت موبايل عادي خالص
بدون امكانيات علشان ميبقاش فيه الطمع
بس المشكله ان الحراميه بقت مش فارقه معاهم بيقولك هاته كله بينفع

نورتني
----------------


عاليا حليم
بقى انا اللي عندي زهايمر يا سوسه
اذا كنتي منتيش عارفه عريس جديد ولا لسه يبقى الزهايمر عند مين
انتي اللي عندك زهايمر انا عندي توهان بس
عموما اكتر من كده وبيزيح ربنا
سلااااااااااااام يا فقريه
-----------------

امرأه من عبير الورد؟؟!!!

ده ايه النور ده كله
بنفسك حضرتك جاي تواسيني
يا ستي الله يسعدك
بس هو انتي مختفيه ليه
وبعدين هو يعني علشان انتي بتعرفي فرنساوي تكتبي المدونه فرنساوي
طب اللي بيحب كلماتك ومبيعرفش فرنساوي يشرب من البحر برده
ماشي
----------------

ليموناده يا سكره
الحمد لله ان ردودي بتهمك
وتنوريني في اي وقت طبعا
مادمت عارف اننا اصحاب
ومسيرك تنزلي مصر ونبقى نرحب بيكي ساعتها احلى ترحيب

------------------

شيماء
الله يباركلك
ويسعد ايامك
الحمد لله هنعمل ايه بقى
ايدك على تلاته جنيه تبرع
علشان اجيب حته بكاميرا
سلااااااااااااااااام

--------------------

منى محمود
ربنا يسعدك
وشكرا على الزياره الجميله

بس مش هم لغوا حكاية عبله دي
بيقولوا دلوقتي هي دي مصر يا عباس
هههههههههههههه

--------------------

ميرميد

يا باشا انا النت كان مجنني وحاجزني عنكم
بس اهو بدأ يتصلح الحمد لله
انتي اخبارك ايه
ربنا يسعدك

سلااااااااااااااااااااااااااام

بنوتة من وسط البلد يقول...

يا نهااارك ويا لييلك
كل ده وانت لسه مصمم تكمل

انا لما بيحصل معايا كده بجرى على اول حفرة وادفن روحى فيها لحد ما اليوم يعدى

احمد ربنا ان الموضوع ما قلبش بكوارث طبيعية ويبقى مع كل ده كان يوم مطر وطينة وبراكين


يالا تعيش وتاخد غيرها :)

وفداك الف موبايل نوكيا بنانا

walaa يقول...

دى اول زياره ليا لمدونتك
اللاقى الموبايل بتاعك اتسرق يالا مش مهم المهم اللى انت تكون بخيير
ولاء

3ala asm masr يقول...

معلش بقى ربنا يعوض عليك بواحد احسن منه
كله فداك

3ala asm masr يقول...

ياريت تشاركونا وتبقوا معانا احنا شباب هيروق مصر http://hnro2masr.blogspot.com/

عاليا حليم يقول...

لا يا أخويا مش عارفة اخر مرة كنت بتتخطب بس... أجوزت و لا أيه ؟
و بعدين انا عندى حدث سعيد فى البلوج

بت خيخة وأى كلام يقول...

اللى يجى فى الريش بقشيش يا ايهاب
المهم انك ماتسرقتش انت نفسك مع الموبايل
ربنا يعوض عليك
سلام
اختك خيخة

kafrawy يقول...

ياعم فداك مليون موبايل

ولا يهممك

sa7afia_rwsha يقول...

يعوض عليك ربنا عوض الصابرين ابنى ويخليلك ولادك
ويكسبك ويربحك يسترك ما يفضحك قول امين
اااااامين
ههههههههه شكلى بشحت وانت معكش فكة
ابقة زورنى فى بلوجى بقة
يلا سلام

mariamagdolen new يقول...

انا بحب النوع دة من التدوين جدا
بس اية انت حظك نار

سهر يقول...

ايوة قضاء اخف من قضاء
خير ان شاء الله

تــــايه ومش تـــايه يقول...

يبقى انت اكيد فى مصر