الاثنين، يناير 21

فازه مكسوره


عيل صغير بيلعب خبط بالكوره بتاعته الفازه الفخار وقعت اتكسرت ميل عليها لمها على بعضها لزقها بشريط قص ولزق ساذج قوي
الفازه اتجمعت بس بقت متشوهه خالص
الطفل بص ليها وقال الحمد لله صلحتها علشان ماما متزعلش
بس تفتكروا هو كده صلحها فعلا وياترى مامته هتنبسط قوي بانه صلحها كده
مع انه عكها خالص
بس هو مكانش ممكن يعمل اكتر من كده مفيش حاجه بتنكسر بترجع زي الأول بالظبط
انما يعني على قد ما بيقدر كل واحد فينا بيصلحها كده ويلصمها على ما تفرج يعني لزقه هنا وسناده من هنا وكلمتين اسف من هنا
واهي الحياه بتمشي
بس يا ترى الزهريه هترجع تاني زي الأول زهريه جميله وشيك ولا خلاص كده اللي اتكسر مش ممكن يبقى جميل زي الأول ويا ترى هو فعلا مصدق ان هي كده بقت حلوه وكويسه وانه ادى واجبه ناحية الزهريه دي
مش عارف
ناس كتير بتعمل مواقف فظيعه وبعدين تصلحها بكلام عبيط ميفيدش ببصله لكن اهي بتريح ضميرها
اعذرني سامحني مكانش قصدي
انا عارف ان المسامحه والمغفره حاجه عظيمه وكل واحد لازم يكون قلبه كبير ويساع الناس ويعرف ان مفيش حد مبيغلطش
بس
ليه من البدايه نلعب بحاجه قابله للكسر كده
ليه من البدايه نمد ايدينا على حاجه مش من حقنا على حاجه مش هنعرف نحافظ عليها
يمكن طمع يمكن غرور ويمكن حاجات كتير الأسباب كتير بس ياترى في الأخر الفازه استفادت ايه دلوقتي عمالين نتكلم من غير ما نقدم حل مفيد للفازه
فكروا معايا يا جماعه ايه الحل اللي ممكن نعمله لكل فازه اتكسرت
على الأقل ياريت كل واحد مننا يقابل فازه متلصمه يحاول ميفكرهاش ويشاورلها على الشروخ
ياريت متسألش مين كان السبب
ياريت لو قدرت تداوي الشروخ ومعاك معالج للفازات متبخلش بيه
ساعات كلمه منك
وقفه شهامه
كتف صديق وفي
بيكونوا علاج مفيد قوي للشروخ اللي اتسبب فيها طفل غبي بيلعب بكورته وخبط الفازه

سلام

هناك 21 تعليقًا:

A.SAMIR يقول...

القصة كلها قصة لسااااان في الاول وفي الاخر
لو كل واحد حفظ لسانه مش هيكسر اي فازة وبالتالي مش هيكون مطالب انه يصلحها اساسا
تحياتي
مدونة جميلة

wa7dania يقول...

يااه يا شنكوتي
لمست جرح عميق أوي فيا
معاك حق
مادام انت عارف إن دي بتتكسر
بتلعب بيها ليه ؟؟
و إنت عارف إن اللعب ده هيكسرهااا
طب ما كان من الاول
تحطها على جنب
بس تقول لمين بأى ؟؟؟؟
اللي بيحسوا...بقوا قليلين أوي
تحياتي
منى

Nani يقول...

السلام عليكم
نلعب بهذه المزهرية لان كل منا لديه تلك الفطرة الاساسية للاكتشاف فلا بد من ان نتلمسها ونستطعمها ونعرف تفاصيلها
كل هذا رد فعل طبيعي عندما يغيرنا شيء ما
لكن غير الطبيعي هو ان نقوم بافعال نعرف يقينا وضمنا انها ستتسبب بكسرها
وهذا ان دل فهو يدل على فقدان الاهتمام او اللامبالاة او حتى الانانية
كثير منا يكون تلك المزهرية او الكرة او الطفل او حتى مجرد مشاهد عابر للسبيل
ايهما تفضل ان تكون ؟
بالنسبة لي افضل ان اكون جرة- قلة-قبيحة على ان اصبح مزهرية مشروخة
دمت بخير

لـــى لــــىِ يقول...

ياريت فعلا
بس تقول ايه بقى للناس
ده اكتر حاجه بتلفت نظرهم وتشعل حب استطلاعهم
انهم يلاقوا انسان متلصم
يفضلوا يخبطوا فيه بالاسئلة لحد مايتكسر ادامهم

ياريت نرحم علشان ربنا يرحمنا

دى اول زيارة واول مرة اعلق عندك
بس مش اول مرة اقرا لك
قريت لك كتير بوستات
وردود خاصة فى مدونة
زهرة الكاميليا

بس مكانش عندى الجرأة اعلق علشان مكونتش مدونة زيكو
بس دلوقت بقيت زميلة ، زميلة تدوين هههههههه

ابقى نورنى

لى لى

كاميليا يقول...

القصة لها أكثر من معنى

اللعب الى الحد الذى يؤدى إلى الكسر
اي نوع من الكسر وعلى رأسها كسر القلب

وكذلك الاصرار على الإقتراب
ممن يحاولون إصلاح كسورهم
بنهم المعرفة وحب الاستطلاع
وليس بنية المساعدة فى تجبير الكسور

لا تركوهم يعالجون انفسهم
ولاشاركوهم فى العلاج

بوست له مذاق خاص

دمت بكل الود

كاميليا

Dalia يقول...

سعات كتير يا ايهاب بنجرح من غير ما نقصد
طبعا هتقولى من غير ما نقصد ازاى ماهو كل واحد فيه عقل يفكر بيه و يوزن الكلام .. بس سعات فيه كلام بيخرج بحسن نيه او بسذاجه او بيبقي له اكتر من معنى و ده اللى انا اقصده
يعنى الطفل اللى كسر الفازه ماكنش يقصد يكسرها .. هو كان بيلعب و لما كسرها ارتجف و خاف و لمها بسرعه لانه خايف و لانه بيحبها و عارف ان مامته بتحبها

فيه حاجات لو اتكسرت مابتتصلحش
بس كلمه اسف ممكن تكون البلسم اللى يداوى الجرح

Ghada يقول...

هى دى طبيعة الانسان بيعمل اى شئ علشان يمتلك الشئ الجميل ويكون مهتم بية جدا وبيحافظ علية اوى وبمجردمايحس انة امتلكة يبدا الاهمال لدرجة ان الشئ دة بيتكسر لكن للاسف بيسح بكسرة بعد فوات الاوان وبيحاول انة يصلحة لكن بعد مابيضيع كل شئ ياريت بجد كل واحدعندة شئ جميل يحاول يحافظ علية وميكسروش زى الفازة

ghalia يقول...

ازيك يا ايهاب
والله ممكن يكون استخفاف بمشاعر الناس وبكرامتهم واستغلال لطيبة قلبهم
أنا شخصيا الحمد لله بقدر اسامح لكن طبعا بحدود
من قريب كان حصل معايا موقف زى اللى انت حكيت عنو وسبحان الله استغربت من نفسى أوى
كنت فاكرة قلبى ابيض بس اكتشفت انو مش دايما بيكون كدة
بوست حلو أوى

بت خيخة وأى كلام يقول...

فاكر يا شنكوتى البوست بتاعى اللى عن الصلصال
اهه كلام ده بيفكرنى بالصلصال
ولو حبيت ارد عليك مش هلاقى رد احسن ولا اوقع من القصيدة اللى انت كتبتها رد عندى على البوست بتاع الصلصال

بجد بجد
بوست قلب عليا المواجع تانى
بوست جامد اوى يا ايهاب
شكرا ليك
اختك خيخة

MerMaid يقول...

فكرتني فعلا ببوست البت خيخة
----------------------------
متضايقة قوي يا شنكوني بجد والله انا في عيال كتير قوي كسروا الفازة بتاعتي و مكلفوش نفسهم حتي يلزقوها
بس هاعمل ايه؟؟ هو ده النصيب والقدر
و انا السبب فيه
الواحد المفروض يحافظ علي نفسه قوي و ميسمحش لاي حد انه يجرحه او يمس مشاعره بسوء..حتي لو كان ده هيكلف نهاية العلاقة دي...انا بقيت بعمل كدة
بجد بوستك رائع
تحياتي
اه صحيح؟؟ ازيك؟؟
:))
نورتني ...

Mo3Az يقول...

اصبت فى تناول الموضوع يا ايها الشاب الشنكوتى ;)

بجد تسلم ايدك
(F)

Arabic ID يقول...

أولا فيه فرق بين الطماع اللى عايز يلعب بحاجة مش بتاعته والحسود اللى ما يحبش يشوف اجة غيره سليمة أو أى حاجة حلوة أصلا وبين الأخرق اللى بيجى يكحلها يعميها والانسان اللى هو انسان ومن غير ما يقصد بيكسر حاجة ما كانش شايفها أو كانت فى سكته وقبل ما ياخد باله كسرها أو لما أتخبط فى نافوخه داخ وسند عليها وقعها وكسرها

بتفرق كتييير فى كل حالة عن التانية فى منها حالات هتلاقى نفسك تلقائيا استعوضت ربنا فى الفازة دى وكل فازة بعدها تتكسر
وفى حالات هتلاقى نفسك أنسب حل تقتل الراجل اللى كسر الفازة دى (مش تقتله قتل يعنى ، المقصود انك تبعده عن حياتك ولو بخناقة)
وحالات تانية هتلاقى نفسك بتبتسم وبتقول ولا يهمك وحتى لو كانت الفازة دى من أيام جدودك الأتراك يعنى

المشكلة فى الموضوع هى النقطة التانية، ان كل واحد يشوف فازة محتاجة تصليح يحاول يصلحها...، طيب فى فازات صعبة جدا، لأنها رقيقة جدا ، وفى فازات ممكن تجرح ايديك لو حاولت تصلحها، وممكن فازة تكون أحلى لما تتكسر وتتلزق تانى، أو لما تنكسر منها حتة صغيرة
والناس فى تصليح الفازات مذاهب برضه
منهم اللى بيحب يصلح الفازات ويحطها فى دولابه ومنهم اللى بيحب يصلح الفازات وبعد كده يرميها فى الزبالة ومنهم اللى لما يشوف متبقى منها حاجة يكسرها ويطحنها كمان لحد ما تبقى تراب

الأحسن دائما هو نسيب حاجة غيرنا فى حالها ونحاول بس نحط يافطة عليها "توجد هنا فازة غالية الثمن جدا ولكن بها عيب ، على من يرغب فى تصليحها أن يثبت حسن نيته أولا وأن يتعهد برعايتها حتى لا تنكسر مرة أخرى"

تحياتى
أنا مبسوط أنى جيت لمدونتك جدا

لـــى لــــىِ يقول...

انت فين؟

تعالى اقرا الحلقة التانية
مستنياك عشان انزل الحلقة الثالثة ياريس

انا قاعدة ايدى على خدى اهو

اظهر وبان ياقبطان

لى لى

فرنسا هانم يقول...

حلو تشبيه الفازه ده
لانها اكتر حاجه فى البيت بتتعرض للكسر
على العموم
ياريت الناس تعمل كده
وتحاول تبعد عن شروخ بعضها
لان كلنا ملزوقين بالقص واللزق
كلنا عندنا شروخ
لكن فى ناش شروخها اكبر
لازم نقف معاهم
علشان يتخطوا شروخهم

همسات يقول...


فى ناس كتير مش بتبص غير على نفسها وبس انشالله تدوس اى حد

الجحيم هو الأخرون وليس أنا

ناس كتير ماشية بالمبدأ ده

الشنكوتي الكبير يقول...

احمد سمير
نورت يا باشا
صورتك فكرتني بمدون كان قديم هنا برده كنت احب اعاكسه واقوله عامل زي الملك فاروق بنضارتك دي
المهم يعني نورتني قوي
وفعلا لو كل واحد يصون لسانه مش بس الفازه اللي مش هتنكسر حاجات كتير هتبقى حلوه قوي

سلااااام

الشنكوتي الكبير يقول...

وحدانيه

اسف ان كنت فكرتك بجروح قديمه
بس معلشالجروح يا ما بتتفتح غصب عننا وساعات فتح الجرح بيكون علشان نطهره ونداويه
اتمنى تكوني بخير دلوقتي
ومحدش يلعب بالزهريه بتاعتك تاني
سلاااااام

الشنكوتي الكبير يقول...

ناني
يا سلام يا نونه لو الواحد يبقى قله دي تبقى عيشه فله

بس متزعليش اعتبري نفسك من دلوقتي احلى قله في المدونات

تحياتي
سلاااااااااام

الشنكوتي الكبير يقول...

لي لي
ازيك يا لولا
اديكي بقيتي مدونه زينا واجدع مننا كمان
بالتوفيق في تدويناتك الجميله
وربنا يستر من نهاية القصه بتاعتك دي
تحفه بجد

سلاااااااام

---------------


كاميليا

صديقتي المسافره في بلاد الخواجات الحلوين
انتي نورتيني
طبعا تعليقك سكره
فهمتي كل ركن من القصه احلى من كلامي انا فيها
ربنا يسعدك وييسرلك حالك
وترجعيلنا بالسلامه
او تبعتيلي عقد عمل في المانيا لو كانوا عايزين صيع عندكم هناك
انا جاهز في اي وقت

سلاااااااااااااااام

---------------

داليا

يا ريت فعلا كلمة اسف دي تكون كافيه
ساعات الجروح اللي بنسببها للناس بتبقى مينفعش فيها اسف
وبيبقى انك تبعد هو الحل الأمثل علشان النسيان يعمل علاجه السحري وياخد مفعوله

--------------------

غاده
يا ريت والله يا غاده محدش يكسر الفازه
ومحدش يلعب في عداد عمره وكده يعني واخد بالك انت
وياريت الناس تسمع الكلام واخد بالك برده

وكل سنه وانتي طيبه
فاهماني طبعا
سلاااااااااااااااااااااام

-------------


غاليا

ازيك انتي يا صديقتي
الغاليه
مش حكاية قلبك مش ابيض
الحكايه ان الواحد لما بياخد مقلب في حد قريب منه بيتجرخ قوي
مهما كنا بنسامح الجرح برده بيكون صعيب
ولازم نستنى شويه لحد حرقانه ما يهدا
نورتيني
سلااااااااااااااااام


-----------------

بنت خيخه واي كلام

انتي ياللي مش خيخه ازيك الأول
انا يا ستي اسف اني قلبت عليكي المواجع
بس هي الدنيا كده
على رأي الأغنيه
متقلبش المواجع ده الجرح لسه واجع

اما عن تقليب المواجع ده انتي استاذه في تقليب المواجع على الغلابه يا فالحه
بكلماتك القويه واسلوبك الصريح
بجد احييكي
سلاااااااااااااااااااام

الشنكوتي الكبير يقول...

مير ميد

انتي يا بنت يا سمكايه انتي
تسيبيهم يكسروا الفازه ليه
لازم تخشوشني شويه
الدنيا فيها بلاوي كتير
بطلي حنيه وطيبة قلب
مش بقولك كوني من غير قلب
بس حرصي قبل ما تدخلي اي حد جوه القلب
تحياتي
اه صحيح ازيك
سلاااااااااااااام

------------------
معاذ
اسمك حلو قوي
ربنا يكرمك نورتني جدا وسعيد بتعليقك

سلااااااااااااااام

---------------

arabic ID

ارابيك انت نورتني قوي
تعليقك هايل والله
انت قسمت انواع كتير
معاك حق في كلامك
مش عارف اتفذلك عليك بحاجه
بس اقولك ادينا نبقى اصحاب احسن
تحياتي
سلااااااااااااااااام

--------------------

لي لي

انا اهو يا استاذه
تأمريني
سلاااااااااااااام

------------------
فرنسا هانم
الله ينور عليكي
في ناس شروخها بتبقى كبيره قوي
ولازم نقف جنبها
وفي ناس الأحسن نسيبها تفوق لوحدها
نورتيني
سلاااااااااااااااااام

----------------------

همسات
بجد هي دي الخلاصه
كل واحد بيبص على ان هو مش بيعمل حاجه وحشه لا ده انا كنت بصلحها
لا ده انا كنت بطبطب عليها
وهوب تلاقيها بقت ستميت حته
ياريت نعرف كويس اثر اللي بنعمله قبل ما نعمله
سلااااااااااااااااااااام

تــــايه ومش تـــايه يقول...

اللى اتكسر يتصلح .جمله مشهوره عندنا اوى.اوقات ممكن اللى اتكسر يتصلح واوقات بيبقى خلاص مينفعش
بس لو اتكسر ومينفعش يتصلح .هنبقى مظطرين نقبل اى اصلاح حتى لو مش هيرجعو لحالتو الاصليه.هنبقى مضطرين نقبل الاعتذار او اى تعويض .ويا ريت الناس كلها تفكر تفكير الطفل الصغير فى انها تحاول تصلح اللى بتكسرو .