الاثنين، فبراير 11


هو احنا ليه بنكره بعض

سؤال دار في بالي من فتره وكل شويه يعدي قدامي موقف يخليني افكر فيه اكتر
انا افهم ان الناس تحقد على بعض في الشغل و في المرتبات والفلوس وكده يعني انما دايما بيكون في سبب
النفس البشريه كده طماعه وانانيه الا من رحم ربي

جميل وعادي واتعودنا عليه
بس المشكله ان الناس بقت بتحقد على بعض ويكرهوا بعض كده على طول من غير اسباب


يعني تلاقي واحد جاي الشغل جديد لسه معملش بتلاته مليم وبيحقد على الناس القديمه ويقولك انا عايز فرصتي زيهم وتلاقي الناس القديمه بيحقدوا عليه ويقولك ايوه يا سيدي ده جاي على الراحه احنا ابتدينا الشغل في المرمطه وهو جاي بعد ما الشركه استقرت

طيب ده برده عادي وفهمنا اسبابه

لكن تركب الميكروباص تلاقي الناس بتبص لبعض بغل كده وبدون سبب
وتلاقي بنت ركبت –سيبك طبعا من المزز اللي البنطلونات هتتفرتك عليهم دول لازم يقفوا علشان نعرف نتفرج على جسمهم كويس- المهم بتبقى بنت محترمه ولابسه محتشم وواقفه يا عيني هتتفعص وسط الناس وتلاقي الرجاله والشباب وبالذات الرجاله تلاقي الواحد متنح كده وواخد الكرسي واستحاله يقعدها ويقف لها ويقولك ايه اللي بينزلهم اصلا من البيوت يزاحمونا مع ان هو برده بنته نزلت الصبح معاه تروح شغلها
وتلاقي الواحد بعد ما كان زمان اللي مش عايز يقف ويقعد البنت او الست تلاقي عينه في الأرض او باصص من الشباك عامل فيها عبده العبيط
انما دلوقتي تلاقيه مبحلق فيها كأنه هيقولها حاجه وهو متنح بيتفرج عليها ناقص يقولها ورينا بقى الحركه السحريه واقعدي في الأرض او الزقي في السقف علشان نسقفلك

النهارده مثلا لقيت بنت ركبت الميكروباص بتاع الهرم ده والميكروباص عامل زي علبة الصلصه البايظه هيفرقع ناس والبنت واقفه هتنكفي على الأرض لولا الزحمه سانداها وواحد راجل قاعد جنبها بيبصلها هاموت واعرف متنحلها كده ليه الأول افتكرته هيقفلها وبعدين لقيته هو بيبصلها يتفرج عليها وهي مزنوقه اهي لو كانت لابسه محذق وملزق كنت عذرته انما كانت لابسه عادي يعني رايحه الشغل واضح
المهم فجأه واحد قاعد على الحته اللي في ضهر السواق حديده معفنه كده قام وقالها تعالي اقعدي هنا احسن


وقبل ما تعرف توصل واحد راجل ناصح هوب جري قعد هو- قال يعني مش واخد باله -هي ابتسمت وقالتلهم خلاص خلوه مستريح المهم فقت انا من السرحان والتأملات الهبله بتاعتي وقمت قعدتها مكاني

مش بس كده تعالوا اتفرجوا في عربية السيدات في المترو استحاله واحده تقف لحد غيرها
كل واحده حاسه انها اكتر واحده تستحق تقعد وتلاقي بيعاملوا بعض بغتاته وخنقه وكأن كل واحده بتكره التانيه طب لييييييييييه

الرجاله بقت بتكره الستات
والستات بتكره الرجاله
والرجاله بتكره الرجاله
والستات بتكره الستات
ممكن حد يقولي فاضل مين يحب مين

وشكرا

هناك 32 تعليقًا:

Ma 3lina يقول...

و الله انا زيك كده مستغربة حال المجتمع المصرى و مش فاهماله حاجة يعنى فين الطيبة و المجدعة خلاص بح و لا اخلاق و لا اى حاجة

طيب تصدق شفت واحدة جوزها و لا خطيبها بيضربها بالروسية فى الشارع و لا اى حد راح ينقذها من ايد الراجل الهمجى دى و لسان حال الناس احنا مالنا و اللى يقولك اصلها اكيد عملت حاجة علشان يضربها و انا مستغربة الناس حتى لو هيا غلطت يبقى عقابها الضرب و كمان فى الشارع !!!!!!!

الدرويش المرووش يقول...

فعلا الكلام ده موجود
و فيه أسباب كتير من وجهة نظرى أهمها القهره اللى الناس فيها و المعامله الرسميه الغير ادميه

الشنكوتي الكبير يقول...

ما علينا

اهي دي مصيبه تانيه
وهي برده نتيجة الكراهي اللي انتشرت قوي
الراجل بيضرب مراته او خطيبته كانه بينتقم من العدو الصهيوني
يا واطي نفسي اشوفك بتضرب ظابط فاسد بيعذب اخ ليكي من بلدك
انما لأ احنا نتشطر على اللي نقدر نأذيه بس
والناس تحسي بتشمت بدل ما تسلك

نورتيني جدا
سلاااااااااااااااام

خمسة فضفضة يقول...

السلام عليكم ورحمة الله وبركاته

اصل المشكله ان كل واحد فاكر ان التاني هوه سبب مشاكله وهوه اللي عامله ازمه وهوه اللي واخد فرصته في الحياه وان الدنيا من غير التانيين هاتبقي احلي

الرجاله بيقولولك الستات دول ايه اللي منزلهم من بيوتهم مايسيبوا اماكنهم للرجاله والشباب اللي مش لاقين شغل
والستات تقولك الرجاله دول عالم مفتريه عاوزين كل حاجه لنفسهم وعاوزينا مجرد خدامات

الشنكوتي الكبير يقول...

الدرويش المرووش

ايه النور ده
والله فرحت لما شفت تعليقك
منور يا باشا
تصدق كلامك تقريبا جاب معظم الحقيقه القهر خلى الناس بقت بتكره بعضها من غلبها

بس مش عارف هل ده السبب الوحيد ولا في حاجه ذادت
اصل زمان ايام الأحتلال كان فيه ظلم برده بس الناس مكانتش بتكره بعض كده

ولا ايه
سلاااااااااااااااااام

الشنكوتي الكبير يقول...

خمسه فضفضه

جبت المفيد في جزء الستات بتكره الرجاله والرجاله بتكره الستات
لسه فاضلك نقطتين كل طرف بيكره بعضه ليه

نورتني

سلااااااااااااااام

بت خيخة وأى كلام يقول...

وانت ايش عرفك يا واد يا ايهاب ان الستات مش بتقف للستات فى عربية الستات بتاعة المترو
تكونش يا واد واحد من الرجالة الرخمة اللى بتركب عربية الستات بتاعتنا
المهم بص يا سيدى
انا هاتكلم عن نفسى
انا بصراحة مش بقف لاى حد
يعنى لازم تكون الست يا اما عجوزة او تعبانة او حامل او شايلة عيل او معاها حاجات كتير
غير كدة
انا بقعد مكانى باعتبار ان انا نفسى بيكون معايا عيل هيتفرم فى الزحمة لو قمت وقفت انا وهو
لكن هو عموما فى حالة كدة ماشية اليومين دول بين افراد الشعب والطبقات المختلفة
لكن انا مش بسميها كره انا بسميها تعب قرف قلة حيلة
كبت فى كل حاجة
الناس مكبوتة يا ايهاب يا اخويا
والكل مش طايق نفسه
ومستنى حد يقوله بم يقوم يفتح فيه على طول
ربنا يفرج كربنا
تحياتى ليك
اختك خيخة

صوت من مصر يقول...

والله المشكله انى لازم احقد على الاغنياء لانهم معاهم فلوس وانا فقير
لا بجد عندك حق وربنا يقويك على مين يعاديك
بوست هايل

عصفور المدينة يقول...

يا أخي أؤيد كلامك ولكن الناس فعلا ملهية في الرزق والهموم أو التحرش البصري ومحاولة الفهلوة

بس فعلا بياخدوا وقت طويل لو عاملتهم بحب أو بشاشة على مايفهموا إنهم يجب عليهم الرد بالمثل ويفعلون بصعوبة

sa7afia_rwsha يقول...

عارف يا شنكوتى انا بروح شبين كتير جدا وبردو فى ميكوباص وفى حديدة ورا السواق وتلاقى الرجالة بيزنقونا ويلازقو فينا لا خشا ولا حيا لكن على مين انت عارف اختك مفيهاش الا لسان بيوقف كل واحد عند حد
بقة يوم ما تزورنى مرة تقولى انتى مصيبة اما لو زرتنى تانى هتقولى اية
اتمنى فعلا يكون البلوج عجبك وانا على فكرة شلت الورد فيربريكشن عشان تيجى تعلق براحتك مش تعلق حاجة من البلوج لا تعلقعلى البوستات سلام

بت خيخة وأى كلام يقول...

ايهاب انت فين
عايزة اشكرك على تعليقك عندى على بوست شكر وتقدير
انا مش هابطل تدوين
مش علشان شوية عيال سفلة قلوا ادبهم عليا هابطل تدوين
مش هاخيب ظنك فيا
تعالى بقى مستنياك
سلام
اختك خيخة

شريف طلال يقول...

أنا معاك ان الرجاله بتكرهه الرجاله
و الستات بتكرهه الستات
و الستات بكرهه الرجاله
بس مش معاك ان الرجاله بيكرهوا الستات
ههههههههههه
على العموم انت عندك حق
خلق الناس بقى ضيق معدش حد يستحمل حد
ولا بقى فيه شهامه و لا حب ولا ود
ولا زيارات ولا جيران ولا صله رحم زى زمان
كله بيقول مصلحتى اولاً
موضوع جامد
تحياتى

خمسة فضفضة يقول...

السلام عليكم ورحمة الله وبركاته

انها الغيره ياسيدي الفاضل

الغيره والحقد علي بني الجنس الواحد هي السبب الاساسي ان الرجاله بيكرهوا بعض والستات كمان
ده لان كل واحد فيهم شايف انه احسن من التاني اللي مايستحقش كل اللي وصل ليه ده وانه احق بكل الامتيازات

لو واحده ست حلوه شويه تلاقي كلهم غيرانين منها وحاسين انها طمعت في الحلاوه كلها علشان كده هما طلعوا وحشين ، ماهي ماسابتلهمش حاجه
لو واحده متجوزه جوازه ميه ميه تبقي خدت حظ واحده تانيه
وتلاقي الامثال اللي علي شاكلة يدي الحلق للي بلا ودان تشتغل علي ودنه


الغيره والحقد وعدم الرضي بالنصيب كانوا السبب ورا اول جريمه حصلت في التاريخ ، لما قابيل قتل هابيل
وهما لسه برضو السبب ورا الكره اللي بين الناس ، لو كل واحد يعمل كل اللي عليه وبعد كده يرضي بكل اللي ربنا يقسمهوله
لوكل واحد فهم كويس معني الآية اللي بتقول لا تمدن عينيك إلى ما متعنا به أزواجا منهم
لو كل واحد عرف يحفظ الآيةاللي بتقول وفي السماء رزقكم وما توعدون
لو الناس فاهمين الحديث اللي بيقول لو انكم تتوكلون على الله حق توكله لرزقكم كما يرزق الطير تغدو خماصا وتعود بطانا
لو فاهمينه صح
كانت الدنيا اتغيرت للاحسن كتير

مش الناس كلهم عاوزين يقعدوا مانتخين في بيوتهم وكل حاجه عاوزينها تجيلهم لحد عندهم


علي فكره الكلام اللي فوق ده كان موضوع بوست كنت باحضرله وهاكتبه عندي بس موضوع النقابه عطله ،
علشان كده ماكاتبتوش في التعليق اللي فات ، بس مايغلاش عليك

انت كده حرقتلي البوست اهه ،ابقي افتكر الجمايل دي

عموما هابقي اكتبه برضو بس بعد فتره

الساحرة يقول...

دي حاله من الزهق العامه كل واحد بيقول يله نفسي والله حصلتلي امبارح في الميني باص واحد قاعد وعمال يبصلي تقولش بيغيظني روحت قيلاله مالك انت تعرفني طبعا اتكسف وفام وانا قعد ت مصلحه برضوةوعلي فكرة انا لما بلاقي حد يستاهل افوم اقوم واخليه يقعد سواء راجل او ست لو كل واحديبداء بنفسه هيبقي الحال احسن بكتير

aya يقول...

عيش ندل تموت مستور
====================
اعمل عبيط او من طنطا
======================

ليه تساعد الناس وتتعب عشان خاطر حد لما ممكن تعمل نفسك مش من هنا
-----------------------

اخى
كل تلك الشعارات والمبادئ الذى اصبح يتبعها الاغلبية من بنى ادم

الا بالطبع من رحم ربى

اخى دعنا نقول على الدنيا السلام
فقط

وفقط فلندعو الله ان يعفو عنا

حقا اصبحت الحياة فى تلك الدنيا مزعجة

حقا ربنا يعفو عنا

sa7arkash يقول...

الاخ الفاضل
اولا السلام عليكم ورحمة الله وبركاتة
انت فعلا عندك حق...اصبحت المشاعر السلبية هى المسيطرة على 95 فى المائة من البشر..احتمال لعدم شعور الناس بالرضا اوالسعادة وغير متصالحة مع نفسها....فكيف لها ان تتصالح مع الغير

ربنا يستر

sa7afia_rwsha يقول...

اية يا شنكوتى
انت بتكتب بوست لما بتفتكر ولا اية
وحشتنا بوستاتك
متتاخرش علينا
سلام

قلوب بتغنى يقول...

شوف يا عم الشنكوتى
لان ببساطه السيد الرئيس ربنا يخليه لينا يارب ولايحرمنا منه ابدا وحكومتنا الرشيده الى ربنا ميضرهاش ابدا
خلت الشعب كله ملهى على عينه فى الكفاح من اجل لقمة العيش
علشان رغيف بمساميره
علشان امبوبه مليانه لحد نصها بس
علشان فتورة كهربا مبتوصلش
علشان ميه مش نضيفه
ومع ذلك ده كله بيجى بمرار
لازم لما يلاقى كرسى يمسك فيه باديه وسنانه
ويلعن ابو الذوق
مفتقده رايك فى البوست الجديد
سلالالالالالالالالالالام

لـــى لــــىِ يقول...

هههههه

يبقى فاضل العيال الصغيرين

الكراهية دى حاجه، وفيه حاجه تانيه غريبه جدا

وانت نازل الصبح كده، تمشى شويه، تبص فى وش الناس اللى ماشيه تلاقيهم سبحان الله مكشرين تكشيره غريبه جدا وكأنهم مش خارجين من بيوتهم خارجين من خناقة ولا حاجه.

نفسى اعرف الناس مكشرة بمناسبة ومن غير مناسبة ليه؟

فيها ايه يعنى لما نمشى فى الشارع وعضلات وشنا مستريحه ومفروده مش لازم نضحك علشان ميقولوش علينا عبط ولا حاجه

انا بجد باستغرب، ده غير اللي يبقى ماشي فى لامبالاه ويعدى قدامك وانت سايق فى طريقك وعادى كأن العربيه بتشوف وبتسمع وهتقوله حاسب كابوتى من فضلك

وحاجات كتير بس نقول كفايه كده

سلاماتى

لى لى

Nani يقول...

السلام عليكم
يوجد تفسير علمي للموضوع
يدمن الدماغ على الهرمون الذي تنتجه الغدد
اي ان الانسان النكد يفرز هرمون النكد ويدمن عليه
والسعيد يفرز هرمون السعادة ويدمن عليه
وهذا ينطبق على هرمون الكره
وهو اقواها
فهذه المشاعر السلبية سهلة الحدوث والمحفزات الخارجية والداخلية كثيرة
يمكن للانسان ان يعلم نفسه الا يحقد او يكره
علينا ان نتذكر بصرف النظر عن معتقدنا الديني
اننا كلنا الى هباء
ولن يبق شيء منا هنا الا الكلمة الطيبة لحين قصير
:)
مواضيعك ملفتة للنظر

فرنسا هانم يقول...

طبعا الصوره مش زى مانتى صورتها خالص
انت بتسأل مين فاضل بيحب مين ؟
اقولك
واحد بيروح يقف عند الجزار بيشترى لحمه
بيشتريها ليه ؟
علشان بيحبها
واحد راح يشترى تورته وجاتوه
علشان بيحبهم
واحد راح يشرب عصير قصب
علشان بيحبه
عرفت
لسه فى حب موجود

Lemonada يقول...

والله انت جيت على الوجع
الناس مش بتحب بعضها عشان بقينا زي الحيوانات
الناس مابقتش ناس
الناس وحوش والدماغ الي فوق ده ده فاضي من جوه والقلب ميت خالص
مش عارفه اقول اي
المهم انا بحبكم كلكم ونازله مصر ان شاء الله الاربعاء ده
شوف المدونه بتاعتي وشوف حصلي اي لما رحت احجز
افتكرتك لما ضاع الموبايل بتاعك واليوم المهبب الي حصلك
سلام يا معلم
اشوفك على خير

أنا وهي يقول...

الكراهية أنتشرت جدا حتي في البيت الواحد

ربنا يرحمنا برحمته

dina يقول...

هههههههههههههه
تصدق بتتكلم صح...الناس مش طايقة بعض..و الغلطان لا يمكن يقول انه غلطان و كل واحد بيعامل اللى ادامه على انه سبب كل المشاكل اللى فى البلد...طب ماشى يا عم كلنا مضغوطيين و تعبانيين انما دا سبب عشان نراعى بعض مش نولع فى بعض
يلا ربنا يهدى بجد

nonoymm يقول...

اايه دةة هو حضتك مش من البلدي ولا ايه
اول زيارة وساتواصل باذن الله
مدونتك شيقة دمت بخير

واحــــــد مبضـــــــون يقول...

يا عم الحــاج قولنا مليون مرة أن الشعب المصري بقى شعب بضاااااااااان وصوتى راح من الكلام ده
أبسط حل أن اللي يبضنك أبضنه - يعني والواحد راكب مواصلات يعمل نفسه عبيط ويحرق دم اللي حواليه عشان لو بقى عندك دم يبقى صدقني مش هتروح بيتكم سليم
أهم أسلحة المواجهة ضد بضان الشعب هي البرود والتنفيض والنوم - أي والله النوم - أركب الميكروباص وكل رز مع الملايكة وأنتا هتنزل منه من غير ما بضانك تورم من فئات شعبنا البضين

فراشة يقول...

عاوزة اقلك انى قريت البوستات كلها بس ده البوست الوحيد اللي استفزنى عشان ارد اصل المواصلات دي الحاجه الوحيده اللي مخليانى عاوزة اقتل اي حد اشوفه قدامى " قفشت في الفلحوس اللي واقف جنبي " المهم انا برضه بركب ميكروباص الهرم يمكن اكون انا اللي الناس مكنوش معبرينها عادى بتحصلي كل يوم ..... ناس معندهاش دم

يالله اهوه طلعت همي في مدونة حد
بس خلاص

الشنكوتي الكبير يقول...

يا نهار ابيض انا ازاي مردتش على الناس دي كلها

ارد بقى بس متزعلوش مني علشان اتأخرت


==================

بنت خيخه و....كلام

لا يا ابله انا عمري ما اعمل كده ابدا انتي فاكراني ايه نطع

ههههههههههههه
لا ابدا بجد بس سهل جدا تتفرجي عليهم من بين الزجاج الفاصل
وانا سمعت الكلام ده اصلا من الستات نفسهم
ده غير ان لما بتيجي واحده تركب عربية الرجاله والناس تبصلها بصة دي عايزه تتحرش بالرجاله اكيد ده مش صح وفكرت كويس لقيت ان هو ده السبب انهم مبيرحموش بعض صعب واحده تقوم لواحده تانيه انتي بتقفي لو عندها ظروف لكن غيرك لو بتموت قدامها مالهاش دعوه تقولك وانا مالي متقعد في الأرض

انا معاكي انها فعلا حالة قرف عامه وطايحه فينا
نورتي يا اختي
سلاااااااااااااااااااااام

اخوكي ايهاب
--------------------

صوت من مصر

تسلم يا غالي
لازم كلنا نتكاتف ونحقد على الأغنياء يمكن يتفقروا ونبقى احنا مكانهم
هههههههههههههههههه

لا ابدا مش لازم نحقد بكره ربنا يدينا احسن منهم
نورت يا اخي
سلااااااااام

-----------------

عصفور المدينه
منور ارض الوطن يا صديقي الطيب
انت باين عليك منصاب برده من المعاملات الوحشه وردود الفعال غير الطيبه
ربنا يحفظك ويسترها علينا كلنا

--------------

صحفيه روشه

نورتيني جدا ومتشكرين على موضوع الورد فيرفيكشن
انا بزهق منه جدا
وبخصوص انتي مصيبه فده حقيقي اعملك ايه يعني اغشك في وشك
هههههههههههههههه

بس انتي فعلا تجنني
ربنا يسعد ايامك ويحفظك ويحفظ ليكي عريسك
سلااااااااااااااااام

----------------------

بنت خيخه
تاني بقولك اوعي يا بنت تضعفي ابدا
انا موجود على طول انشاء الله معاكي

----------------

شريف طلال

تسلم افكارك يا غالي
بس فكرة ان الرجاله مش بيكرهوا الستات هنختلف
هم ميقدروش يستغنوا عنهم لكن برده بيكرهوهم واعداء الى البد برغم كل العشق والمحبه بينهم يفضل الجنسين في صراع مش عارف ليه

نورتني

سلااااااااااام-
--------------------

خمسه فضفضه

يا دكتوره ازيك الأول
بوست يجنن وزعلتيني اني مخدتش بالي منه كن ممكن اضيفه على البوست فعلا

بجد احييكي على كلامك ادام الله عليكي نعمته ووهبك كل خير
نورتيني

سلااااااااااااام

--------------

الساحره
مصلحجيه جامده انتي برده
هههههههههه
جدعه يا بنت يا سحاره
بس لما تلاقيني في الميكروباص تبقي تعملي بكلامك وتبداي بنفسك وتقفي علشان تقعديني

----------------

آيه

ايه يا بنتي ده الله يهديكي
هههههههههههههه
كل دي حكم تدعو للنداله
اقولك سيبك انتي انا مش من هنا اصلا
معرفكيش بقى
سلااااااااااااااااااااام

-------------

سحركش

حلوه قوي الأخ الفاضل دي
ربنا يسعدك يارب
واشوفك دكتوره قد الدنيا

المهم يعني معاكي حق طبعا الناس مش متصالحه مع نفسها هتتصالح مع غيرها ازاي جبتي المفيد يا بنتي

--------------

صحفيه روشه كتبت يا فندم كما امرتم حضرتكم

---------------

قلوب بتغني

ربنا يسعدك يارب

معلش فيها ايه بس عيش بمساميره وانبوبه لحد نصها الظاهر التعليق ده من زمان قوي
دلوقتي حضرتك العيش مبقاش موجود ولا هو ولا المسامير حتى
والأنبوبه راحت خالص
اصلنا بعنا الغاز للإسرائيل

ربنا يرحمنا بقى

سلاااااااااااااااام

الشنكوتي الكبير يقول...

لي لي

حتى العيال مبطيقش بعض ولو شوفتيهم في المدرسه هتلاقيهم بيموتوا بعض اصلا
ده في ناس بتطلع متعقده من الذل بتاع المدرسه

ما علينا مش عايزك تكتئبي
المهم انك دخلتي عالم التدوين ترسمي البسمه على قلوبنا قبل وجوهنا
ربنا يسعد ايامك ويحفظ اسرتك

سلااااااااااااام

----------------

ناني
سيدي يا سيدي على التعليق العلمي الجامد
نورتيني ووحشني تعليقاتك هنا

سلااااام

------------------

فرنسا هانم

بصي انا عجز لساني عن النطق بعد التشبيهات الفزيعه بتاعتك دي
انا قلت انتي هتموتيني
عسل يا بنت والله
ربنا يسعدك يا فرنسا زي ما بتهوني علينا عز الهم بذكريات كرامه كنا نمتلكها
بجد انتي سكره
سلاااااااااااااام
---------------------

ليموناده

يارب تكوني جيتي مصر بالسلامه وانبسطتي هنا
ربنا يسعدك
نورتيني

------------------

انا وهي

هههههههههههههههههههههه

ربنا معاكي بقى يا عروسه

سلااااااااااااااام

-----------------

دينا
تقولي لمين بس الحل ده
كل واحد مخنوق عايز يفش غله مش عايز يساعد الناس ولا يهدي نفسه شويه على اخوانه

ربنا يهدي

------------------

نونويمم

حلو اسمك قوي

ياريت فعلا نتواصل وتعجبك المدونه بقى

-----------


واحد م...ن

عادي يعني اتمنى بس كلامي اللي قلتهولك في مدونتك يكون افادك بحاجه
ولو اني ماظنش يعني

نورت

----------------

فراشه

منك لله
انا اضطريت ارد على كل الناس اللي فاتت دي علشان اكتشفت اني نسيت ارد على الكومنتس القديمه
عموما كويس برده لحسن يحسبوني معنديش دم

وبعدين جايه تفشي غلك عندي انا
اقولك براحتك بيتك ومطرحك برده
نورتيني وسعيد جدا جدا ان مدونتي عجبتك
ربنا يسعدك

سلاااااااااااااااااااااااام

فراشة يقول...

منى لله كده مليش دعوه انا اتقمصت خلاص
هاه بس
اوعي كده يا فلحوس متحوشنيش
انته عارف لولا ان الفلحوس بتاعي مانعننى انا كنت هتهور لغاية ما اتعور

الشنكوتي الكبير يقول...

فراشه

ههههههههههههه
انتي والله عسل
تتهوري ازاي يعني بس هو انتي عايزه تفجريلنا المدونه يا بنت

لاانا ممكن اجيبلك تلاته اربعه بلطجيه يقطعولك المدونه بتاعتك برده ولا ايه

احنا جامدين قوي

سلااااااااااااااااااااااام

kiki يقول...

情趣用品,情趣,情色,成人,A片,自拍,情趣用品,情趣,色情,成人影片,色情影片,免費A片,情趣用品,情趣,成人網站,A片下載,日本AV,做愛,情趣用品,情趣,美女交友,A片,辣妹視訊,情色視訊,情趣用品,情趣,色情聊天室,聊天室,AV,成人電影,A片,情趣用品,情趣用品,情趣商品,情趣,情趣

情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

情趣用品,A片,AIO,AV,AV女優,A漫,免費A片,日本AV,寄情築園小遊戲,情色貼圖,色情小說,情色文學,色情,色情遊戲,一葉情貼圖片區,色情網站,色情影片,微風成人, 嘟嘟成人網,成人,成人貼圖,18成人,成人影城,成人圖片,成人影片,UT聊天室,聊天室,豆豆聊天室,尋夢園聊天室,080聊天室,080苗栗人聊天室,080視訊聊天室,視訊聊天室

情趣用品,A片,aio,av,av女優,a漫,免費a片,aio交友愛情館,a片免費看,a片下載,本土自拍,自拍,愛情公寓,情色,情色貼圖,色情小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,色情影片,情色網,色情網站,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人小說,成人電影

情趣用品,情趣,情趣商品,自拍,UT聊天室,聊天室,豆豆聊天室,哈啦聊天室,尋夢園聊天室,080聊天室,080苗栗人聊天室,H漫,A片,AV,AV女優,A漫,免費A片,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,SEX,微風成人,嘟嘟成人網,成人,18成人,成人影城,成人圖片,成人貼圖,成人圖片區

情趣用品,情趣用品,情趣,情趣,情趣商品