الأربعاء، ديسمبر 26

ده مش تأثير العفاريت ...ده حسد الناس


عم سعيد

كنت زمان بسمع كتير حد يتكلم عن شخص بسيط او طيب قوي كان يعرفه او مازال يعرفه وتعب فجأه ويحكي للناس ازاي الدنيا مالهاش امان وان ممكن الواحد فجأه يلاقي نفسه تعبان والدنيا صعبه قوي حواليه وكنت في العاده بعتبرها قصص لازم نتعظ منها ونعرف ان الدنيا والصحه والمال كلها اشياء زائله وممكن في لحظه كل ده يروح والواحد ميبقاش ليه غير عمله

بس اول مره يحصل قدامي موقف مؤثر زي ده
عم سعيد ده راجل شغال معانا في الشركه سنه مش كبير قوي شخصيه طيبه جدا هو بيشتغل في البوفيه لكن اسلوبه وزوقه واخلاقه تخليك تفتك انه احسن من اجدع مدير عندنا علشان كده طبعا اي وفد اجنبي بيجي الشكره ودول كتير قوي استحاله حد يتعامل معاهم غيره لأنه شيك في لبسه واسلوبه وبيتعامل معاهم كأنه متربي بره مصر غير الناس اللي في البوفيه خالص المهم يعني عم سعيد ابنه الكبير جاب مجموع كبير في ثانوي ودخل كلية هندسه ربنا يوفقه
والحمد لله هو قدر يوضب بيت لنفسه يستقل فيه عن بيت العيله اللي كان عايش فيه وبالتالي اصبح عم سعيد الحمد لله عايش في بيت ملكه لوحده وبأسلوبه في الشغل اخد وضع محترم جدا لدرجة انهم ادوله الرشيف يديره وقلناله اكتر من مره ليه متشتغلش في الرشيف بس وتسيب البوفيه لأن شغل الأرشيف مسؤليه ومن حقك تتفرغ ليه ويبقى برستيج احسن ليك لكنه قال انه شايف انه بيعتبر مرتبه مقابل كل تعبه يعني مينفعش يقلل الشغل اللي بيعمله علشان هيحس انه بياخد فلوس اكتر من حقه طبعا انا كنت هاتشل قدامه

بعد العيد رجعت الشغل لقيته مش موجود قالوا انه واخد اجازه سالت عنه عرفت انه تعبان اتصلت بيه لقيته بيقولي انه تعب جامد في العيد وانه قضى العيد في السرير وفي المستشفى زعلت من نفسي قوي اني مفكرتش اتصل بيه في العيد اسلم عليه وكنت ساعتها هاعرف انه عيان وهازوره مثلا المهم قررت فعلا ازوره وكنت اعرف بيته بالوصف كده طبعا مش هاقولكم ان الفذلكه بتاعتي خلتني الف قد ايه علشان الاقي بيته ولما قابلته اكتشفت انه كان تعبان جدا ولسه مش عارف الأشعه هتبين ايه

والنهارده الشعه ظهرت واتضح ان عنده ورم في المخ

حسيت اني اتصدمت قوي بس انا عارف ان ده ابتلاء من ربنا يعني اكيد ربنا هيعوضه عنه بحاجه تانيه او رحمه من ابتلاء تاني اكبر
عم سعيد راجل طيب قوي حتى وانا بكلمه وعايز احاسب على كلامي قوي معاه لحسن يتخض ولا يفهمني غلط لقيته هو اللي بيهزر ويضحك
ربنا يصبره ويشفيه

انا حبيت احكي للناس وافكر نفسي معاكم ان فعلا مفيش حاجه مضمونه في الدنيا ممكن في لحظه كل حاجه انت شايف انها تحت ايدك وواثق منها ممكن تخونك وتضيع منك فلوسك صحتك اصحابك حتى
ادعوا لعم سعيد ربنا يشفيه ويرجع بالسلامه


اخر حاجه الناس قالوهاله انه عفريت لمسه مع ان انا شايف ان الحسد هو اللي لمسه

هناك 18 تعليقًا:

عصفور المدينة يقول...

اللهم عافه واعف عنه وهون عليه
عدت للتو من زيارة مصاب بورم في المخ
عافى الله عباده وجعل بلاءه رحمة لهم ورزقهم الصبر واليقين

جزاك الله خيرا

3abdo me7tas يقول...

ربنا يرحمه ويرحم المسلمين جميعا
طيب ده راجل ربنا يشفيه
امبارح حصل موقف غريب انا بكيت فيه
انا داخل أنام الساعه 2 بعد يوم فظيع فى الشغل ولسه رايح فى النوم لقيت صويت وناس بتعيط ومشاكل
قمت لقيت ناس جارتنا ابنهم مات
ابنهم اللى لسه شايفينه أول امبارح
توفاه الله
فى لحظة ومات موته ربنا
عشان كده انا بكيت وقلت ياااااااه الموت ملوش كبير ولا صغير
الموت ممكن ييجى فى أى وقت
ربنا يرحمنا جميعا
ويحسن ختامنا بإذن الله

MerMaid يقول...

ربنا يشفيه يارب العالمين
و يرحمه برحمته الواسعة
---------------------
فعلا محدش ضامن بكرة ولا ضامن الثانية اللي جاية فعلا

اللهم احسن خاتمتنا يارب العالمين

:))

كاميليا يقول...

السلام عليكم

ازيك يابطل؟
وبعدين بقى فى المدونة بتاعتك دى؟
مش بعرف ادخلها خالص دايما بتعاكسنى
واضطر اعمل فيجوال اى بى وحركات علشان تفتح معايا

المهم
عام سعيد ده اولا

كل بوست لك بيبين قد ايه انت إنسان جميل
مشاعر جميلة وتقدير للبشر أجمل

ربنا يرحمنا جميعاً ويرحم المسلمين اجمعين

لك كل الود

كاميليا

sally يقول...

لا حول و لا قوة الا بالله
ربنا يشفيه و يقومه لأولاده بالسلامه

الشنكوتي الكبير يقول...

عصفور المدينه

شفى الله مريضك ومرضى المسلمين
وجزاك الله خيرا على الدعوه

نورتني واسعدتني بزيارتك


-------------------

عبده محتاس

اولا نورتني
ثانيا مش عارف اقولك ايه موت الفجأه هو اصعب شيء على الناس كلها ويمكن ده من اقوى الحاجات اللي بتحرك قلوبنا علشان نفتكر الأخره وقد ايه الموضوع قريب مننا كلنا

تحياتي ليك

-----------------

مير ميد

جزاكي الله خير على الدعوه
ومعاكي حق مفيش اي ضمانات
ربنا يرزقنا حسن الخاتمه ويعفو عنا

---------------------
كاميليا

ازيك وعامله ايه
ربنا يكرمك ويسعدك
متشكر على المجامله الجميله دي
ربنا يحفظك

------------------------
سالي

الله يحفظك
نورتيني


سلاااااااااااااااااااااااام

Amr Ahmed يقول...

ربنا يشفيه ويشفي كل مريض ان شاء الله

ربنا يعافيه ويعافينا

CresceNet يقول...

Gostei muito desse post e seu blog é muito interessante, vou passar por aqui sempre =) Depois dá uma passada lá no meu site, que é sobre o CresceNet, espero que goste. O endereço dele é http://www.provedorcrescenet.com . Um abraço.

Doba يقول...

الحمد لله الذى عافانا مما أبتلى به الآخرين وربنا يشفى أمراض المسلمين جميعا

الف سلامة عليه ولكن حتى المرض خير بكامله فهو إزالة للسيئات وزيادة فى ميزان الحسنات

اللهم اعفى عنه برحمتك وقدرتك يا كريم

على فكرة ده مش حسد ولا حاجة
ده قدر من ربنا وله حكمة

نتعظ خير لنا

تحياتى
هبة

بت خيخة وأى كلام يقول...

ولا عفريت ولا حسد
انا شايفة ان ربنا بيحبه جدا وده اختبار من عند ربنا لعم سعيد علشان كل مايشكر ربنا اكتر ربنا هايديله حسنات اكتر
ربنا يشفيه يارب
ويشفى كل اللى زيه

وعلى فكرة ياشنكوتى انا خلاص نزلت البوست اللى قلتلك عليه

سلام
اختك خيخة

زُمُرده يقول...

هابى نيو يير ... وحاجات حلوة وطراطير .... وجاتوه وفطير....والأهلي خطير ..... والريس لسه قدامه كتير

فى القلب يقول...

ربنا يشفيه ويرفع عنه ويؤجره على صبره

وكل سنه وأنت وهو وكل ألى بتحبهم طيبين

عاليا حليم يقول...

طبعا مافيش حاجة مضمونة فى الدنيا احنا مش ضامنين اذا كان النفس الى جاى حيطلع و لا لا ... الراجل ده ان شاء الله ربنا حيكرمه و يكون مرضه سب لتكفير ذنوبه انا اعرف كده

معلش اتأخرت فى العيدية كنت مشغولة جامد و قلت الحق اقولك باه كل سنة و انت طيب و سنةسعيدة عليك باذن الله :) و اخبار العروسة ايه باه ؟ :)))))))

الشنكوتي الكبير يقول...

عمرو احمد

ربنا يعافينا ويعافيك شكرا يا صديقي على الدعاء

------------------

دوبه
هبهوب
ممكن يكون معاكي حق ويكون مش حسد انا عارف طبعا انه ابتلاء من ربنا
وربنا يغفر له بيه ويجازيه خيرا ويرحمه ويرحمنا جميعا
---------------------

بنت خيخه واي كلام

نورتيني يا استاذه
ربنا يكرمك ويحفظلك بيتك واولادك

-----------------

زمرده

وانتي بصحه والسعاده

فينك من زمان يا ابله
كل سنه وانتي طيبه

--------------------

في القلب

اوشه يا سكر
وانتي بصحه وسعاده
ربنا يكرمك ويجعله عيد سعيد عليكي وعلينا وعلى المسلمين

-----------------------

عاليا حليم

ولا يهمك من التأخير انتي تنوري في اي وقت
اخبارك ايه
اتمنى تكوني بخير

--------------



سلااااااااااااااااااااااام

ghalia يقول...

الله يشفيه ويعافيه ويشفى كل مريض ياااااااارب

المرض ابتلاء بس إبتلاء صعب أوى ربنا يقدره عليه

==========
كل سنة وانت طيب وسنة سعيدة عليك

فرنسا هانم يقول...

عفريت ايه وحسد ايه
ده ورم فى المخ
مرض زى اى مرض
ملهوش دعوه بالعفرته والحسد
عموما ندعوا الله
لعم سعيد بالشفاء

امرأة من عبير الورد يقول...

ازيك يا شنكوتي ليك وحشة جامدة ... انا رجعت لدنيتي لما اتأكدت فعلا ان الدنيا دي مفيهاش شئ ثابت وان أسعل حاجة فيها الخسارة ....
اتمني انك متفقدش حد عزيز عليك ابدا
أمرأة من عبير الورد

esraa يقول...

ربنا يشفيه يارب