السبت، يونيو ٢

الواد محمد بتاع الفول


في شخصيات بتمر علينا وتخلينا غصب عننا نقف نتفرج عليها ونضحك شويه او نزعل ساعات وممكن برده نقف نستغرب منها
محمد بتاع الفول هو ولد صغير واقف في محل الفول بتاع ابوه عمره مش اكتر من 13 سنه بالكتير يعني
قصير القامه زي عم فرغلي ابوه مليان شويتين وعنده حتة كرش مش عارف لحق يكونه بالسرعه دي ازاي مع انه مش موظف حكومه ولا متجوز طبعا بس تشوفه وهو ماشي ناقص يدحرج ومع ذلك فحركته نشيطه جدا وبيقتح المحل من 7 ص يعني قبل كتير من المحلات الأخرى ويقف محمد لوحده الصبح يقطع الخضره للطعميه ويثبت القدره في مكانها على النار الهاديه ويظل يعاكس في اللي رايح واللي جاي ويتريق على الأولاد اللي اكبر منه وبيشتغلوا في المحلات المجاوره الغريب اني تخيلت محمد هذا لو انه التزم بدراسته فقط وترك مهنة ابيه لربما رأيته ببدانته هذه مسخرة الطلبه الذين لا يجدون متعه اكثر من السخريه من كل طفل او طفله بدينه وربما اصبح ضعيف الشخصيه لا يفقه من خبرات الحياه شيء ولكنه الآن يتلعم الكثير من الدنيا هو يعرف معنى ان يعطي للرجل الفقير الذي يمر عليه صباحا بعض الطعام ليفطر به بدون مقابل اللهم الا الدعوات له ولوالده بالصحه والخير ويعلم ان عليه ان يعير جيرانه بعض المواد اذا نقصت لديهم من شنط واوراق وملح وبصل لأنه سوف يحتاجهم في يوم ما وسيقرضونه ما يحتاج ايضا وهو يعلم متى يرفض ان يعطي شخصا مشاكسا البضاعه على الحساب لأنه ليس عبيط ولن يستكرده احد وايضا تعلم ان يعطي الزبائن المضمونين بضاعتهم اذا لم يتوفر لديهم فكه في جيوبهم ويدفعون لاحقا لنهم زباين مضمونين ولن يخسرهم عشان ربع جنيه مالوش لازمه وهو ما لا يدركه ال كل بائع عرف معنى التجاره واهمية رضاء العميل هو ايضا يعرف ان عليه ان يدفع للبعض كي يسكتوا عنه من التموين والضرائب وخلافه
هو الآن لم يصبح طفلا ذو 13 عاما هو الآن رجلا عاملا يعرف مسؤلياته قد تقولون لي انه يفقد اجمل ايام عمره وطفولته في هذا الشقاء ولكنني لا ارى ذلك في عينيه الضاحكه دائما فهو سعيد جدا بكونه اصبح رجلا يعمل وليتك تسمعه وهو يسمس كل واحد من اقرانه حسب وظيفته فهذا الواد فينو شغال في الفرن الأفرنجي وهذا جبنه شغال عند البقال وغيرهم اما ذلك الواد الذي لا يناديه الا بإسم الصايع فهو لا يعمل لقد كان يعمل في محل الجزاره ولكنه تركه بعد ان مل من العمل اصله عيل حرع ومش راجل
لقد اصبح يقيم الأشخاص بعملهم ويعتبر نفسه من قوى الشعب العامله
الغريب انه لم يترك المدرسه كل ما في الأمر ان مدرسته صنايع او تجاره لا اذكر بالضبط فقد اخبرني من قبل ولا اذكر الآن المهم انهم لا يهتمون بالحضور او الغياب هو فقط يترك اباه في ايام الأمتحان عشان يروح يمتحن
الجميل هو اني وجدت اباه يعامله معاملة رجل لرجل لم يعد منظر الواد بليه اللي الأسطى عمال يفرغ فيه عقده واحباطاته بل هو الآن مثله مثل اي موظف ليه حقوق وممكن يعترض على رأي ابوه في الشغل في حدود الأدب وضحكت جدا عندما احتدم النقاش بنهم مره واخذ يبرطم بكلام غير مفهوم فنهره ابوه بتقول ايه ياض فاسرع قائلا بقولك هاتجيب خضره للطعميه دلوقتي ولا استنى شويه فتناسى الأب ما حدث واسرع قائلا لأ استنى شويه لما نعوز واللي هنا يخلص ابقى روح جيب وانتهى الموقف في هدوء
قد يكون محمد مظلوم في هذا الوضع وقد لا يكون انا لا اعرف
اخبروني برأيكم واشخاص مثله قابلتموهم

هناك ١٥ تعليقًا:

LOJAIN يقول...

القصة ده بتفكرنى بيبقى انت اكييييد اكيد فى مصر

المصيبة انه لما النماذج دى بيبقى عندها 40 سنة فما فوق ولا حاجة بيقول معيشتش طفولتى و يجيب قطر و صفافير

ياما يعمل زى عبد الغفور البرعى و يهدد ولاده اللى مش هجيب الدرجات النهائية هخده اشغله فى الوكالة
والعيال يقعدوا يتريقوا عليه و يقولوا بياكل بلح فى وكالة البلح

بس اعتقد ان هى دى سنة الحياة عشان ميحصلش خلل فى المجتمع مش كلنا دكاترة ولا مهندسين

Regards:
Lojain :)

Mirage يقول...

ماهو عشان بقى راجل وهو صغير قوى كده ده جه على حساب طفولته
وبعدين ايه علاقة تخنه بكونه هيبقى ضعيف الشخصية لما يدخل المدرسة

ماهو ياما عيال تخان ومحدش بيعرف ياخد
معاهم لا حق ولا باطل

هو عرف حاجات كتير بس كله قبل اوانه ودى مش شطاره يعنى لأن كل حاجة المفروض تيجى فى ميعادها

عصفور المدينة يقول...

شفته إبراهيم بن عم سلامة الميكانيكي
راجل جدا
المشكلة إن الغربيين يتكلمون عن عمل الأطفال على أنه مشكلة وهذه انتقلت إلينا
من حقه أن يلعب طيب مين قالك إنه مش بيعتبر ده لعب
بنروح اسكندرية اولادي بيطلبوا انهم يركبوا الترماي رغم إن الناس اللي بيركبوا الترماي عايزين عربية
الأطفال بيسيبوا اللعب ويلعبوا بالعدد والأدوات

طيب ليه الغربيين بيطالبوا بالثقافة الجنسية من سن مبكر ويزعلوا من ثقافة العمل في سن مبكر

Doba يقول...

انا مع ميراج فى ان كل مرحلة وليها وقتها وبرضه مع لوجين فى ان لما يكبر وميكونش مر بطفولته هيقول انا معيشتهاش ده ابويا كان مطلع عينى

فيه نماذج كتير فى المجتمع من الاولاد دول وحقيقى كلهم بيبقو عيال رجالة قبل اوانهم - وتصدق اوقات الواحد بعد مبيربى ويكبر يقوم يقابل واحد زى ده يقول هو انا بس قصرت فى ايه وابنى مطلعشى راجل كده

لو كنت شفت الفيلم بتاع عمارة يعقوبيان لما الولد كان عاوز يدخل شرطة واصحاب الشقق بيتريقوا عليه ومتغاظين انه جاب اكتر من اولادهم - اوقات الشقاء بيخلى الشخص ينضج بدرى بس المهم متكونش فيه خلايا شر حواليه او المجتمع ينقده

طولت انا عارفة بس اصل الموضوع ده شاغلنى قوى وخاصة اولاد الشوارع بتوع المناديل والنعناع والكلام ده

سلام والى لقاء اخر
هبة

ابو العربى يقول...

هو فعلا بقى راجل ولا انه يدعى الرجوله هى دى المشكله انت شايف انه بقى راجل لا بس هيفضل الطفل جواه وممكن يسبب له مشاكل نفسيه بعد كده
تحياتى

أسوور يقول...

هو طفل وليس بطفل
هو رجل وليس برجل
لم يعش كطفل ولن يعيش كرجل سوى
لكى يكون المرء سويا ينبغى ان يعيش طفولة سوية ومراهقة مشاغبة وشباب فائر
ترى هل عاش هذا الطفب كطفل
اشك
تحياتى

Doba يقول...

أين أنت يا شنكوتياااااااا

انتظار مؤقت يقول...

انا اعرف واحد ابوه خدو من صغرو في الشغل معاه هوه و اخوه الكبير بس اخوه الكبير منفعش في الشغلانه بس هوه بقه شاطر و فهم اليله بسرعه و ماشاءالله عليه كلها كام سنه و يبقى رئيس جمهوريه
شنكوتي اوعى تكون متراقب
تحياتي

bastokka طهقانة يقول...

يعني هم اللي اتعلموا اخدوا اية؟
ده هو الكسبان

اوروفوار

emos يقول...

sob7an allah heyya el donia deh ya emma kolena feha 3'alaba ya emma kolena feha gababra

ma7adesh 2a7san men 7ad

2e7na fe ta7tena wa7ed mechniky keda bardo bs wala ka2enno mechaniky

mahsy fel share3 zay maykoon sa7eb el 3omara elly fha el warsha la2en howa 2ashtar wa7ed beyefham fel 3arabeyat

sob7an allah begad rabena beya7'od men na7ya w yeddy men na7ya tnya

Ehab يقول...

لوجين
يعني هو الرجاله اللي بيجيبوا زمامير وهم كبار هم بس اللي كانوا بيشتغلوا فيه ناس اتعلمت احسن تعليم لكن اهلهم حرموهم برده من حرية الطفوله واتحرموا من حقهم في الكلام بصراحه واللعب وحاجات كتير وفي الآخر بيكبر يبقى عامل زي العيال وطبعا معاكي حق ان مينفعش كلنا نبقىدكاتره ومهندسين وال مكناش هنلاقي اللي يفتح مطعم واللي يكنس الشارع واللي واللي ... حاجات كتير المهم ان احنا ناخد بالنا دايما من اللي حوالينا ونرعاهم شكرا ليكي على زيارتك وتعليقك الجميل
__________________________
ميراج
قصدي ان فيه اطفال كتير بسبب تخنهم اطفال كتير بتضايقهم وساعات مدرسين اغبياء او متخلفين بيتريقوا عليهم ويحرجهوم صحيح في عيال محدش يعرف ياخد معاهم حق ولا باطل
وصحيح هو عرف الحاجات دي بدري عن ميعادها لكن صدقني كده احسن من انه ميعرفهاش خالص وفي النهايه احب اقول ان انا مش مقتنع ان هو مش مظلوم تماما ولكن قصدي ان لما بتضيع منك حاجه ربنا بيعوضك بحاجه تانيه
شرفتني يا ميراج
ووحشتني
_____________________________
عصفور المدينه
انا فاهم قصدك لكن انا في رأيي ان الغرب عامة بيدور على الثقافه اللي تأذينا ويصدرهالنا يعني عايزينا نفتح عيون الأطفال على الجنس ومش عايزينا نعرفهم قيمة العمل مع ان دهه هيفيده ويفيد مجتمعه اكتر
وشكرا ليك جدا على زيارتك الجميله
_________________________
هبه العزيزه
انا مش معترض على كلامكوا وتقدري تقولي انك جبتى المفيد لما قولتي عن ازاي ولادنا مطلعوش كده رجاله اا كل اللي عايزه من الموضوع انك تفكروا معايا في نقطة ان ازاي نربي جيل يعرف يعني ايه رجوله ومسؤليه وفي نفس الوقت منسرقش منه احلى سنين حياته
وحشتيني جدااااااا
_____________________________
ضد الظلم
ممكن كلامك يكون صحيح واتمنى ان ربنا يسترها عليه وميحصلوش مشاكل نفسيه في حياته ولكن ممكن اقول نقطه وانا مش بفهم قوي في الطب النفسي ان الواحد لما المجتمع كله بيكون ماشي على نظام معين هو مش بيحس انه مختلف عنهم بالتالي مبيحسش انه عنده مشكله
وشكرا ليك على زيارتك ويا ريت تكررها
_________________________------
ياسمين
والله يا ياسمين شكلك كده كنتي خاربه الدنيا وانتي صغيره وطلعتي عنين باباكي ومامتك لكن اهو الراجل طلع عينك برده
نورتيني بعد غياب ويا رب تكوني احسن في شغلك دلوقتي اتمنى لكي التوفيق ومتغيبيش كتير كده تاني

_____________________________
انا هنا يا دوبه
________________________
انتظار مؤقت
يا واد يخرب بيت فقرك ده انا حاسس اني هاتمسك دلوقتي
هههههههههههههههههههههههههه
بس تصدق هو اظاهر ابن الوز عوام لكن مين قالك ان الكبير مفلحش انت مش فاهم الحكايه ان ابوه اخد الكبير على ورشه تانيه بتشتغل في التجاره مش في الميكانيكا
ولو اتمسكت ابقى تعالى زورني
___________________________
طهقانه
معاكي حق يا اختي كتنا نيله في حظنا الهباب
مع الإعتذار لقاسم السمًاوي
اوعي تفتحي للعيال مطعم انتي كمان
ههههههههههههههه
________________________--------------------------------
ايموس
والله انا كنت عايز احييك على الكلمتين بس نا احوليت لحد ما قرأت العربي بتاعك ده
ما علينا هي كده ساعات مش بنفهم مين مظلوم ومين اخد حقه
شرفتني
___________________________
وختاما سلامي وشكري للجميع على ردودهم
سلاااااااااااااااااااااااااااام

غير معرف يقول...

فكرتنى بحاجات حلوة قوى وانا بقرا كلامك..
كأنى شايفه شارع ضيق و زحمه و دكان عجلاتى و فلاحة بتبيع فجل و جرجير على الارض و ناس طيبه ماشيه ف حالها..
عادى ان محمد يشتغل من سن صغير لان اهله اكيد على قد حالهم و ف نفس الوقت هوه كمان بيتعلم عشان يبقى بيرضى نفسه و معاه شهاده..
و انا شايفه انه كمان عايش حياته لو مكانش عايشها مكانش وقف ف الدكان كده..
ده عندى احسن و افيد من شاب كتكت بياخد من بابى المصروف كل يوم..
عجبنى اوى اسلوبك وان شاء الله حاتشوفنى عندك كتيير.

Ehab يقول...

queen eraser
ده انتي وصفتي بالظبط الشارع اللي بتكلم عنه انتي يا بنت بتراقبينا ولا ايه اوعي تكوني حكومه
شكرا ليكي جدا
ومعاكي حق طبعا انه احسن من الكتكت اللي بيكبر وهو مش عارف قيمة الفلوس اللي بيصرفها عشان كده سهل يضيعها على حاجات تضره
ويا ريت فعلا اشوفك عندي كتير وتنوريني على طول ده انا كنت اعملك عزومه على البسبوسه والهريسه اللي هاندبس نبض اسكندريه فيهم
شرفتيني يا سكره
سلاااااااااااااااااااااااااااام

reri يقول...

أنا كنت أول كومنت في البوست ده
أه والله العظيم
بس وقتهاوبعد ما كتبت الكومنت الكهربا قطعت قبل ما أحطه
بس مش مشكله
أحطه تاني
كنت بقولك
إن شخصية محمد دي موجوده كتير وبتتكرر اللي هم الناس اللي بتكبر قبل الأوان وتشيل مسئوليه بدري بدري
بس أنا مش عارفه حد منهم بصفه شخصيه ممكن أحكي عنه

سلاماااااااات

غير معرف يقول...

موضوعك معبر فعلا عزيزي
فيه فعلا ناس كتيره مش بتعيش طفولتها كما ينبغي
بس في الاخر اهم حاجه انهم يكونوا بيعملوا حاجه هما مقتنعين بيها و مبسوطين بيها عشان في مجال العمل لو احنا مااقتعناش باللي بنعمله مش حنتقنه
حنكون زي الألات و بس
و ده طبعا شئ مش ظريف بالمره
يعني لو فضلنا كل يوم نروح الشغل و احنا مغصوبين علي كده اكيد اكيد حيجي يوم حننفجر و النتايج مش حتكون لطيفه ابدا كمان حيحطنا دايما ده تحت ضغط نفسي رهيب
اهم حاجه الواحد يعمل اللي بيحبه و مقتنع بيه
تحياتي ليك و للموضوع الجميل
:)))