السبت، يونيو 23

اسف صديقي .....لم استطع ان احميك

اسف صديقي
نعم انا اسف ممكن تستغربوا وتقولوا انا عملت ايه زعله انا معملتش حاجه وهي دي الغلطه اني سيبت صديقي من غير ما اخد بالي منه وانا عارف كويس قد ايه هو كان محتاج حد يحميه وهو في ضعفه ده
انا حاسس اني شايف السيف مغروز بين ضلوعه والدم بينزف من جرحه وانا واقف ندمان اني اتأخرت عليه
لأنه فنان علمني حاجات كتير قوي اتعلمت منه يعني ايه جمال وازاي اشوف الجمال في حاجات بريئه ورقيقه ازاي لما اشوف ورده اشوف خجلها وجمالها وعلمني يعني ايه حريتي متأذيش حرية الناس واتعلمت منه اني لما يكون عندي صاحب اسيبه يعيش حياته بأسلوبه وبطريقته ومحاولش افرض فكري عليه وعلمي اني مش قاضي عشان احكم على الناس كل واحد يحاكم نفسه وفي الأخر ربنا يحاكمنا كلنا بس يا خساره اتعلمت منه حاجات كتير واتعلمت برده من ناس تانيه عرفتهم ان الدنيا مش خير وجمال بس الدنيا فيها وحوش وشياطين واتعلمت اني اذا كنت ضعيف مش هاقدر اتحمل الضربات الغادره يبقى لازم اضرب الناس قبل ما يضربوني اتعلمت اني لما الناس تخاف منك احسن ساعات من انها تحبك عشان كده مش هايحاولوا يلعبوا بيك اتعلمت امتى اكون ملاك واتعلمت امتى اكون شيطان اكدب واخدع واجرح ناس ولقيت الدنيا كده احلى قوي وبطلت انجرح صحيح ساعات مش بلاقي فرصه اضرب الأول وبنضرب برده على دماغي بس خلاص عرفت ازاي افاديها عشان اطلع بأقل خسائر بس يا خساره اتعلمت كل ده ونسيت اعلمك انت كمان كنت فرحان بيك وبأنك فنان جميل وقلبك طيب قوي نسيت اعلمك اللي انا اتعلمته لحد ما انت جربت انك تنجرح من ناس معملتلهومش حاجه
انا عارف ان الجرح مش جرح قصة حب لكن لو دورت كويس هتلاقي ان مشكلتك انك كنت صريح ومخدعتش حد فالنتيجه انهم هم اللي قرروا يردوا على رفضك ليهم بأبشع الأساليب واذوك قوي
ياريتني كنت جنبك من بدري يمكن كنت لفت انتباههم وقدرت اخدعهم ونكون احنا الظالمين احسن من اني سيبتك تكون مظلوم
الغريب اني اكتشفت اني اتعلمت كل حاجه عن القوه بس نسيت اتعلم ازاي اداوي ودلوقتي كان نفسي اداوي جرحك واوقف نزيفك بس يا خساره انا نسيت اتعلم اني اشفي الجرح عشان مكنتش فاضي اداوي
مش عارف اقولك ايه هل انت كنت غلطان انك كنت بريء في عصر خلصت منه الكرامه والشهامه والأخلاق انت بيقيت فارس جاي في زمن غلط احسنلك ترجع زمنك تاني او تتعلم انك تكون زيي فارس من فرسان الزمن الجديد
بجد يا صديقي انا اسف

هناك 28 تعليقًا:

Dalia يقول...

مش عارفه اقولك ايه يا ايهاب .. بجد كلامك عن صديقك فكرنى بصديقتى الانتيم .. ماتبعدش عنه تانى فى الوقت اللى هو محتاج لك فيه .. الناس اللى زى دى بتبقي حساسه و رقيقه اوى

على رأى زكى الدسوقى فى عماره يعقوبيان لما كان بيكلم البنت صاحبته تقريبا اسمها كاترين كان بيقولها

انتى تفكرين مثل الاطفال تتخيلين الطيبين مبتسمين و بشوشين و الاشرار وجوههم قبيحه و حواجبهم غليظه مشعسه ..الحياه اكثر تعقيدا من ذلك بكثير .. الشر موجود فى اطيب الناس و اقربهم الينا

حاول تقرب من صديقك اكتر و حاول تخليه يشوف الناس من وراء الاقنعه المبتسمه .. يبص من خلال عنيهم و يشوف قلبهم .. الناس دلوقتى بقيت بأكتر من وش

اوعى تبعد عن صديقك تانى .. ده بقي عمله نادره فى الزمن ده

الشنكوتي الكبير يقول...

داليا
اتمنى فعلا اني اقدر احمي صديقي والحق اللي فاضل منه واساعده يعدي الموقف
واتمنى فعلا اني اساعده زي ما هو دايما بيكون جنبي
وكتير كان بيداويني
بجد اتمنى يعدي الأزمه على خير
سلااااااااااااااااااااااااام

اجندا حمرا يقول...

عزيزي الشنكوتي الكبير
ماتلومش نفسك عزيزي و تضيع الوقت ابتدي من دلوقتي تكون جنب صاحبك الانتيم بجد و قرب منه اكتر و حاول انك ماتسيبهوش عشان هو اكيد محتاجلك اوي
مش مهم الوقت اللي ضاع و انت بعيد عنه المهم ماتضيعش وقت تاني اكتر
خاليك جنبه و شجعه و خاليه يعدي الأزمه دي بسلام و بأقل خسائر ممكنه يارب يطمنك عليه عزيزتي
تحياتي ليك

عصفور المدينة يقول...

اوعى تكون التدوينة دي ريحت ضميرك

ahmad hussameldin يقول...

post gamed awii ya shankoti walahi,,we wake3ii gedan, enta fakarteni benafsii lama kot betewsef sa7bak dah,,bas ana ketier ba7awel amzeg been elkheer welshr wadrab elawal bas maba3rafsh,,rabena yestor we matkonsh nehaytii darba gamda zai eli sa7bak da khadha,
bas ana mota2aked eno sa7bak da mesh sa3b eno ye3adi azmeto di,,bas me7tag menak shewayet mosanda nafsyaen wekhalek damyan ganbo el fatra di

ahmad

الشنكوتي الكبير يقول...

اجندا حمراء
عزيزتي اشكرك على كلماتك وتشجيعك واتمنى فعلا ان يكون وقوفي بجانبه الآن له فائده واستطيع ان اخرجه من حالة اليأس التي اصابته واتمنى ان اجد لدي القدره على التخفيف عنه
شكرا لكلماتك المشجعه
وتحياتي لكي عزيزتي
سلاااااااااااااااااااام

الشنكوتي الكبير يقول...

عصفور المدينه
انا فهمت قصدك وعارف ان المدونه دي مش هي اللي هتعوض صديقي عن وقفتي بجانبه وان الوقفه الصادقه اللي المفروض اعملها مش مجرد كلمتين اكتبهم واريح ضميري وكأني ريحت نفسي من الهم اللي جوايا انا مكتبتش الكلام ده عشان تقولولي لأ انت بريء واللي حصله مش ذنبك انا كتبته عشان حد يقولي ايه الغلط اللي عمله هو في انه كان انسان محترم وطيب وياترى انا اللي صح ولا هو اللي صح
ازاي نتعامل مع الناس نفترض الشر على طول ولا الخير على طول ولا في مرحله وسط لازم نمشي عليها
ومين يقدر يوازن اموره دايما
شكرا لإهتمامك
سلااااااااااااااااااااام

الشنكوتي الكبير يقول...

احمد حسام الدين
شكرا يا احمد على كلامك واتمنى فعلا زي ما بتقول انه يعدي الأزمه دي على خير ومتأثرش في حياته بعد كده
بجد شكرا يا احمد
وحاول انت كمان تحرص من الدنيا صدقني ضربات الغدر بتكون مؤلمه جدا ومفيش فيها رحمه او شرف
سلاااااااااااااااااااااااام

مريم يقول...

ايهاب صدقنى محدش بيكون غير نفسه
والشر مش قوة بالعكس

القوة انك تتحمل وتفضل نفسك

ساعات كتير كنت بشوف الغدر
ومع ذلك بفضل مستنية الطعنة
لانى مقدرش ابدأ بالظلم

جايز عبط
بس كفاية انى كنت نفسى

وعلى فكرة الاصحاب مفيش حاجة بتفرقهم
وانت وصاحبك اقوى من اى حد حتى لو كان ظالم

Doba يقول...

أحمد الله إنك لم تكن بجانبه وقت الوقوع فلقد وضع الله لنا الوقوع سبب للتعلم فكما تعلمت انت صديقى كيف يكون الوقوع وكيف تشعر باحساس المظلوم فهو كذلك لابد له من أن يتذوق هذا الإحساس ليعلم جيدا أن الله موجود وأنه أعطى له إبتلاء أياً كان نوعه ليحمد ويشكره ويصبر على هذا الإبتلاء الذى يمر به لينعم الله عليه بأحد من نعمه الجميلة

ليست الحياة سباق لكى تكون فارس الزمن الجديد ولكنك تعامل الله أولاً وأخيراً ليس البشر - يمكنك أن تنتقم كما تشاء أو تجرح كما تشاء ولكن إعلم أن الله مطلع ويمهل ولا يهمل وكما تدين تدان - أشكر الله أنه وضع صديقك الصدوق فى هذه المحنة لعلك تتعلم أن لكل منا محنة يمر بها ولكن متى وكيف تتعلم أن تستفيد وتخرج من هذه المحنة بأقل الخسائ الممكنة وبأهم شىء وهو رضا الله

تحياتى --- هبة

keda-sponser يقول...

أستاذ شنكوتي بيه
أولا كدت أنشر إعلانا عن إختفاء شنكوتي لأختفائك لفتره

ثأنيا بالنسبه لصديقك
أعتقد إن الإنسان يستمد وجوده من الناس ... فما أهميه وجود الإنسان وهو منبوذ ....ولذلك الصديق هو جزء من كيانك ولذلك يجب أن تساعده لأنه أنت ولكثره مساعدته لك

وأرجو أن تفعل ذلك لأنني خسرت أحد أفضل أصدقائي لأنني لم أدعمه لحظه ضعفه و فشله

و البوست جامد جدا بس قلبت عليا فيه المواجع

شكرا جدا جدا

الشنكوتي الكبير يقول...

مريم
شكرا على ردك يا مريم بس صدقيني الناس دلوقتي مبتفهمش غير لغة الشر يعني لغة القوه او يعتبروك لقمه سهله
عموما اكيد معاكي حق والمفروض ان ربنا هو اللي بيحاسب الناس وعمر الحل ما كان في اننا نكون اشرار بس مش عارف لما المراره بتكون شديده وتحسي انك عاجزه تساعدي حد عزيز عليكي بتحسي ان ممكن تعملي اي حاجه بدون تفكير اتمنى اقدر اساعده بصوره صحيحه
واتمنى فعلا اكون صديق في وقت الضيق مش من اصدقاء الزمن اللي احنا فيه
شكرا يا مريم

الشنكوتي الكبير يقول...

هبه
اختي العزيزه دائما تنقذيني بكلماتك من الألم واليأس
اعرف انك على صواب واني اخطأت في فكرة تعليمه الشر وانه ابتلاء من الله وسيجزيه الله خيرا عنه ولكني كنت مجروحا من اجله جدا والمني انهم اذوه بلا رحمه او اخلاق ضربه تحت الحزام كما يقولون
ولكني اعتقد ان الوقت كما قلتي سيكشف له ان الله دائما يقدر لنا الخير حتى لو لم نفهم ذلك في الوقت الحالي
ادعو الله ان يثبته ويوفقه للخير وينسى ازمته ويعبرها على خير واتمنى فعلا ان اكون الصديق الذي كانه هو عندما اصابتني المشاكل وساندني دائما
شكرا لكي يا هبه انا لا اعلم كيف اشكرك انتي فعلا الصديق الذي اتمنى ان اكونه لصديقي هذا واتمنى ان اقدر على نصحه كما تنصحيني
سلاااااااااااااااااااااااااام

الشنكوتي الكبير يقول...

كده سبونسر
ازيك يا اسكندراني وحشتني يا اخي بجد
على العموم شكرا على سؤالك ولكن الفتره السابقه شغلتني امور كثيره وقصرت في حق الكثيرين
اما بخصوص صديقك انصحك ان تحاول ان تستعيده ولا تفقده ثانيه ان الصديق كنز حقيقي لن تقدر قيمته الا في الأزمات تحياتي لك
سلاااااااااااااااااااااااام

warDaya يقول...

اكيد مش هاقدر ازود حاجه عن الكلام الجميل اللي اتقال من الناس دي كلها
بس ليا ملحوظه صغيره
كان في مثل بيقول يابخت من بات مظلوم ولابتشي ظالم
لأن الظلم ابشع حاجه في الوجود...
وان الواحد يقع عليه ظلم دي حاجه وحشه بس على الاقل عارف ان في الجبار والحق وخالق الكون ده كله واقف وراه..وهاجيبله حق ويردله مظلمته
بس انك تظلم...دي بجد..مالهاش وصف..
مش شطاره اننا نطعن قبل مانتطعن..مش شطاره اننا نظلم قبل مانتظلم...وايه اللي يعرفك ان الظلم هايقع عليك اصلا؟
انك تبتدي بالظلم بسبب توقع ده لوحده ظلم

ياريت تشيل التفكير ده من دماغك..صحيح مش حلو اننا نسيب نفسنا مغفلين وننضرب على قفانا..بس الرد بالاسيه مش هو ده الحل..
زي ما قال الرسول عليه الرسول عليه الصلاة والسلام..أدفع بالتي هي احسن..

ربنا يكرمك ياااااااااارب ...وتقدر تخلي صديقك يحس بيك وبمشاعرك الصادقه الرقيقه دي..
ربنا يخليكوا لبعض..
ان شاء الله

Ahmed يقول...
أزال المؤلف هذا التعليق.
Antony يقول...

وأنا أتجول في النت كعادتي ، لفت نظري كلماتك الجميلة عن صديقك وكيف أنه أثر بك كثيراً ، واضح أنك تعرفه من فترة كبيرة ، أحب أن أقول لك أننا لا نملك أصدقاء مثل ضديقك هذا في هذه الأيام إذا كان كلامك عنه صحيخاً ، فهو يعتبر نعمة من عند الله لك فلا تفرط فيها أبداً ، .... أيضاً أحب أن أقول لك أنه يكفين إحساسك هذا ، لا أعرف هل هو إحساس بالذنب أم ماذا ، ولكني أريد أن أقول لك أنك إن لكم تستطع تفعل له شئ ، فهذا ليس ذنبك بل ذنبنا جميعاً وذنب الظروف والمجتمع الخاطئ الذي نحن نعيش فيه ,,,, أكيد أن هذه المحنة سوف تعلمه الكثير ، ولكن لأن الضربة التي لا تقتلني تقويني ،

ولكن
حاول أن تبقي بجانبه قدر المستطاع خصوصاً لو لم يطلب منك ذلك ، لأنه يمكن أن يكون في أشد الحاجة لك بدون أن تشعر

الشفافية يقول...

أهلا عزيزي /إيهاب

ذكرتني بالمثل القائل
( الصاحب ساحب)

أن كلانا مؤثر ومتأثر في منظومة الصداقة

عموما .. أعتقد أنك أفضل حالا الآن

بعد أن فضفضت

ولكن إذا كانت مساعدته .. ليس في قدرتك

فلا بأس .. عليه أن يتفهم هذا الأمر
فالأصدقاء .. يجب أن يفهموا لكل إنسان ظروفه أيضا ....مثلما هي ظروفهم

ربي يسعدك ويوفقك إلى كل ما هو خير

أخوك المخلص /سهيل

نقطة مية يقول...

كفاية رسالتك ليه دي..هي اصدق دليل على الصداقة و مداواة الجرح..سيب صحبك على فطرته الطيبة..متغيروش عشان الزمن اتغير..ده مش سبب
تحياتي

الشنكوتي الكبير يقول...

وردايه
انا سمعت الكلام ده من كل اللي نصجوني وانا معاكوا ان دينا ميسمحلناش بكده
جايز انا اخدتني العصبيه في كلامي وزعلي على صديقي خلاني اقول كلام مش منطقي بس اتمنى فعلا اني اقدر اكون مفيد ليه في ازمته
وربنا يعوضه خير عن اللي جرى له
تحياتي عزيزتي وشكرا لردك الطيب
سلااام
__________________________
antony
كلامك اعجبني ولكني لا اعلم لماذا اشك في امرك وكأنك شخص اخر اعرفه حاولت دخول مدونتك او حتى صفحة البروفيل ووجدتها مغلقه اذا كنت لا تحب الأصدقاء فهذا غريب لأن اسلوبك الودود يدل على شخص يحب الصداقه
عموما تحياتي وشكرا على ردك
سلام
________________________
الشفافيه
انت كنت فين من فتره كبيره وبعدين ليه قفلت المدونه هو انت كل يومين هتجنني معاك كده مره تمسحهم ومره تقفلها يا جدع اثبت واجمد شويه الدنيا عايزه اللي يقف ويتحداها
عموما شكرا على ردك وانا فعلا لما اتكلمت معاكوا كلكوا وسمعت منكم رأيكم وحسيت اني مش لوحدي استريحت شويه
بجد شكرا لكل من اهتم بحالي
سلااااام
___________________________
نقطة ميه
بخصوص اني مغيروش عشان تغيير الزمن مش سبب كافي انا ممكن اوافقك لكن ان الكلمتين دول كفايه فانا مش مصدق ان كلمتين فرجت بيهم عن نفسي هم اللي هيغنوه عن مساعدتي
اتمنى فعلا اني اعمله حاجه بجد
تحياتي ليك وشكرا على مرورك
سلااااااااااااااااااااااااااااااااام

قلوب حائرة يقول...

بص يا بوب فعلا احنا في زمن لازم نكون زي فرسانه علشان نعرف نتعامل معاه وفعلا لازم يكون عندنا نسبة من الحذر بس المشكلة يا بوب ان الحذر ده يخليه ملزمك حتي في اقرب العلاقات لقلبك تحياتي لبوستك الرائع

الشنكوتي الكبير يقول...

قلوب حائره
اولا احب اباركلك على الخطوبه والف مبروك
اما بخصوص ان الواحد بيعامل الكل بعد كده بنفس الطبع الجاف
فأنتي معاكي حق لأن الواحد بيكون خلاص اتعود يهاجم دايما عشان محدش يعرف يهاجمه والمشكله انه ممكن من غير ما يقصد يهاجم ناس بتحاول تقرب منه وتحبه
شكرا على كلامك فكرتيني بحاجه مهمه فعلا
سلااااااااااااااااااااااااااام

نبض اسكندرية يقول...

لو كان صديقك محتاجلك قوى

تبقى غلطان انك سبتة وهو محتاجلك

لو كان انجرح قوى

تبقى غلطان انك مدوتش جرحة

لو كان طيب قوى

يبقى انت اكيد زية

يارب الحتة دى تفضل عند كل الناس

الصديق دة هو الحلقة المفقودة من حياة الانسان

بس عايزاك ياايهاب متنساش ان ربنا كان مع صاحبك ساعة ما اتظلم وانجرح وملقاكش جمبة

اصل اللى احسن منى ومنك ومن الناس كلها كان جنبة

تحياتى ليك ولتدونتك الرائعة

الشنكوتي الكبير يقول...

نبض اسكندريه
انا عارف اني غلطان في اني مكنتش معاه في الوقت اللي كان المفروض اعرف انه محتاجني بجانبه وياريتني كنت اعرف اداوي جرحه
اما اني اكيد طيب زيه ياريت فعلا اكون زيه بس مع اللي يستاهل بس يعني اقدر احدد امتى اكون طيب مع حد وامتى لازم اكون من غير قلب
والحمد لله ان ربنا فعلا بيصبرنا ويرحمنا في المواقف الصعبه
شكرا ليكي على ردك الجميل تحياتي
سلاااااااااااااااااااااااام

Doba يقول...

مبلاش نتكلم فى الماضى - الماضى ده كان كله جراااااااااااااح

فتقلب هذه الصحفة من كتاب حياتك ولتبدأ فى خط صفحة جديدة مليئة بالتفاؤل والحب

مش عاوزاك تكون كئيب - عاوزاك مرح ودمك خفيف زى مانتا معودنا كلنا

قل لن يصيبنا إلا ما كتب الله لنا - ولتعش حياتك فى سعادة وهناء بدلاً من أن تقضيها فى تعاسة وشقاء

تحياتى يا أرق قلب مصاحب
هبة

one true thing يقول...

بجد بجد عمر ماقريت بوست بالروعه دي
مش مجامله بس يمكن بجد اد ايه الكلام حقيق
ويلمس اي حد يقرأ فكره الملايكه
اللي بتجرحوا من غير ذنب
عاجبني اوي هو علمك ايه بس الغريب
انه يعلمك كل ده وميكونش واخد باله
من نفسه انا معلرفش الموضوع ممكن يكون لي ابعاد تانيه بس بجد بوست رائع
عاجبتني اوي حتة ان الناس تخاف منك بيبقى احسن كتير من انهم يحبوك حكمه بجد احييك عليها
اول مره ليا في المدونه بس استحاله تكون الاخيره
تحياتي يافندم

madjda يقول...
أزال المؤلف هذا التعليق.
غير معرف يقول...

انا لا ادري ماذا اقول اعجبتني جدا خاطرتك...لكن انا عكسك وقفت بجانبه وساعدته ولم اتمنى له الا كل خير ...فلهذا ارحته وتركته ...تركته لانني احسست انني ساخسره اذا بقيت معه اكتر...سيخسر حياته ايضا ...لا ادري ربما يكون هناك من فهم قصدي...فمرات يكون او يتوجب على الانسان الابتعاد والرحيل الى طرف او عالم اخر اذا احس ان بابتعاده ولو صامتا يتفادى ان يجرح صديقه وخليله ... لانني احسست وتاكدت اخيرا انني اخطات فالوحدة لامثالي ارحم و اريح...لا اعلم لماذا لكن صداقتي البريئة اصبحت بلاءا ... لم تعد الصداقة كما كانت، فالاهتمام الزائد والنية الصافية مع الطرف الاخر اصبحت غير مرحب بها و تحول الى معنى اخر غير الصداقة...فالابتعاد كان احسن من تركه ينعم بالاحلام ويستيقظ على الاوهام...لا اعلم هل صواب مافعلت؟ حتى لو لم يكن صوابا فانه بالنسبة لي راحة لصديق ورحلة عذاب ومحاولة نسيان لي...