الخميس، يونيو ١٠

جيت اكحلها



مثل مشهور قوي جه يكحلها عماها

اصعب موقف تتحط فيه انك تكون بتعز شخص معين جدا وهو جدع معاك جدا وتقعد تدور على حاجه تعملها تنفعه وتبقى كويسه كده ويحس انك شايل جميله فبدل ما تعمل حاجه تفيده تعمل حاجه تضره وتتحول لأنسان ناكر للجميل ويبقى لسان حال الناس بص مش هو ده اللي انت واقف معاه اهو بيضرك فتبقى انت مش عارف تعمل ايه لأن الموقف شكله منيل فعلا

كتير ده بيحصل وانا نفسي حاليا مريت بموقف تمام كده

مديري في الشغل وبيعاملني كأني اخوه الصغير وانا بحترمه جدا لكفائته واخلاقه وشخصيته ده غير الجمايل اللي عملها معايا

حبيت اجرب حاجه جديده في الشغل علشان تبقى تطوير لشغلي ويبقى الناس عارفه ان اختياره ليا كان صح لكن المشكله اني دبسته في مشكله تانيه خالص كنت ناسيها بقيت لا انا عارف اوريله وشي علشان اعتذر ولا عارف اسكت واسيب الموضوع كده

النهايه طبيعي كان لازم نتقابل بحكم الشغل مقاليش حاجه خالص ولا حتى وبخني واتعامل عادي خالص قدام الناس

وتاني مره دخلتله وافتكر الموضوع سالني بأستغراب يا ابني حديعمل كده رديت بكلمه واحده وبدون ما ارغي كتير زي عادتي واشرح مبرراتي

هي كلمه واحده انا اسف

سكت ومعلقش وقالي خلاص روح شوف الشغل بقى

بس انا عارف انه مش هيزعل وهينسى بعد شويه الموقف لكن بفكر ان صحيح التسرع ممكن يكون نقمه رهيبه ويخسرنا ناس مهمين في حياتنا ويخلينا نغلط غلطات مش معقوله علشان كده حتى لو نيتك كويسه فكر الف مره قبل اي خطوه مبقولش نبقى سلبيين ونمشي جنب الحيط وبلاش افكار جديده لكن بقول نفكر ونسال ونتشاور الف مره قبل ما ننفذ بأندفاع

تحياتي لصديقي ورئيس م ياسر

وسلام كبير قوي لفاخر صاحبي اللي علمني ازاي اعترف بغلطي واعتذر مادمت غلطان


سلااااااااااااااااااااااااام

هناك ٦ تعليقات:

Fakher يقول...

إزيك ياهوبة
معلش ياباشا ، أنت بصراحة مع أنك ممكن تكون عملت حاجة غلط من غير ماتقصد ، بس فعلاً أحسن حاجة عملتها أنك إعتذرت من غير نقاش .
وهو برضه بيحبك وعارف أنك كنت حسن النية ، ومش قصدك تعمل مشكلة ، وزي ماأنت عارف : حبيبك يبلع لك الظلط وعدوك يتمنالك الغلط .
علشان كده هو سكت وماردش عليك لما حس أنك إعتذرتله وحاسس بغلطك .

وكمان أنا مبسوط أنه فتح معاك الموضوع ، أحسن ماكان سابك ومكلمكش خالص ، وأنا عارف إن ده ريحك كتير .

وبعدين ياباشا أنا برضه أتعلمت منك كتير أوي
خد بالك من نفسك ، وربنا يسترها عليك ... وماتتسرعش تاني

وحشتني أوي

Fadya يقول...

والله انت سكر :):)

افروديت يقول...

ههههههه..بس هو شكله عنده وق وإلا كان أخد منك موقف تاني خالص ..س أكيدكان عارف أنك مش أصد تعمله مشكلة.

Fatma El-Zahraa Mohamed يقول...

ههههههههه
و انا بقرا البوست افتكرت مواقف عدت علية و فعلا جيت اكحلها عميتها
زى صديقتى اللى بعزها لما صبغت شعرها و طلع لونة فيرانى و الناس قالوها كويس على شان ما تزعلش لانها دفعت كتيرررررررررررر فا لما اتقابلنا قالتى انتى ها تقوليلى الصراحة
فا اول ما شوفته صعقت من لونه و قلتها " ايه اللى هببتية ده" وطبعا جرحتها مع انه ما كانش قصدى
سعتها اتعلمت ان التسرع فعلا ممكن يؤدى لمواقف نفقد او نجرح فيها ناس بنحبهم و عزاز علينا

بس بجد
اولا احى مديرك لانه و اضح انه حد زوق فعلا
و ثانيا احيك على شجاعتة فى الاعتذار مش اى حد يقدر يعمل دا

تحياتى 

غير معرف يقول...

معاك حق
بس معلش..الحياة دايما كدة..لازم نغلط عشان نتعلم
الاهم اننا نتعلم و إن شاء الله المدير حينسى زى ما انت قلت
بس فعلا التسرع عمره ما جاب من وراه غير المشاكل الواحد لازم يفكر الف مرة و يدرس اى حاجة كويس داخل عليها

Mohamed Metwally (Be Different) يقول...

يا استاذ ايهاب هى الدنيا كده لازم نغلط عشان نتعلم بس المهم نتعلم.

that will make us different .