السبت، مايو ٣١

عشر اسئله


عشر اسئله عايز اسئلهم ونجاوب عليهم سوا
انا هاقول رايي وعايز كل الناس تقولي رايها في الأستفتا ده

1 لو في جواك حب قديم او على الأقل ذكرى لحب قديم تعمل ايه؟
2 لو كان الحب ده سايب جواك ذكرى جامده وجرح معلم قوي في قلبك
3 لو الجرح ده باين في عينك الحزن منه وماليك قوي تمحيه ازاي من عينك وتخفيه عن الناس
4 هل انت لو كملت حياتك مع حد جديد وحب تاني وارتبطت واتجوزت تبقى بتظلم الشخص اللي هترتبط بيه
وايه هو نوع الظلم انك خبيت عنه ولا انك تكون لسه محتفظ جواك بالحب القديم ولا انك بس تكون لسه مجروح من الذكرى اللي معلمه جواك
5 هل الحب الجديد بعد الجواز يقدر ينسيك اللي فات وحبك القديم
6 هل من حق حبيبك الجديد انه يعرف بماضيك وحكايتك مع الحب القديم وايه هي الحدود اللي المفروض يعرف عنها وايه اللي ميخصهوش ؟
7 هل لو صارحته باللي كان,هل هتقدر تصارحه ان لسه جواك مشاعر او حتى ذكرى مش قادر تمحيها؟
8 لو قابلت الحبيب القديم صدفه هتتصرف ازاي هتكلمه ولا هتتجاهله ولا هتبصله وتمشي وهتعرف حبيبك بالموقف ده ولا لأ
9 هل من حقك تحتفظ بمشاعر حب جواك لحبيبك القديم بعد الجواز من حد تاني
10 هل انت راضي عن قرارك بالمواصله في حياتك ونسيان الماضي وانك تكمل مع شريك حياه جديد وهتنسى الماضي وهتبني اسره جديده وحياه احلى ولا انت بس بتخدع نفسك وياترى كده بتظلم الشخص اللي هتختاره يكمل معاك؟؟؟؟؟
******************************************************************************

بصوا انا هابتدي اجاوب من وجهة نظر رجالي طبعا عايز اعرف ردودكم وياريت متطنوشونيش
اولا لو جوايا حب قديم او ذكرى حب قديم هافضل غصب عني فاكرهم طول الوقت حتى لما انساهم اي ذكرى بسيطه هتفكرني بيهم لأني مادمت حبيت حد يبقى خلاص ده معلم جوه قلبي وليه مكان صغنن لسه اسمه مكتوب فيه الا اذا كانت نهاية القصه بخيانه او غدر بالتالي مكانه ده هيتمسح والذكرى هتبقى مجرد احتقار بس مش اكتر

لو سايب جوايا جرح قديم قوي ومعلم فيا قوي يبقى بمنتهى الأنانيه هادور على حب جديد يعوضني عنه اما لو كان هو اللي غدر فعلا وانا متأكد من ده يبقى من غير انانيه ولا حاجه من حقي اكون حياه جديده ومش من حق حد يتهمني بالأنانيه

اخبي حزني عن الناس ازاي دي بسيطه قوي اندمج مع الناس اهتم بيهم اكتر ما اني اهتم بمشكلتي
افكر في مشاكلهم وماربطهاش بحالتي مفضلش اقيس كل قصه على قصتي انسى اللي حصل وامسح من عيني الحزن بأني ارسم ضحكه وبسمه على شفايف حبي الجديد وهي اكيد هتنسيني الدنيا وما فيها

الحاله الوحيده اللي اظلمه فيها اني اكون لسه بحب الشخص القديم ومخبي عنه الموضوع
لأني هافضل طول الوقت مش معاه وقلبي متعلق بحد تاني يعني بخونه من الأخر وماتدهوش فرصه يختار اذا كان يوافق يقبلني كده ولا لأ
واظن مفيش حد يقبل يتجوز حد لسه مرتبط بحد غيره وبيحبه وشايل ذكراه وحبه جوه قلبه
اه يقدر طبعا مادمت انا مستعد لده لكن لو انا مصر اني مش انسى يبقى مهما عمل هيفضل ينفخ في قربه مقطوعه يعني القرار قراري اني اسيبه ينسيني ولا اني افضل فاكر واضيع حبه في الهوا

من حقه يعرف اني ارتبط بحد قبل منه وده بيبقى في مصلحتي علشان لو يوم عرف من حد غيري ميبقاش انا خبيت عنه وساعتها هيشك فيا وفي نفس الوقت هيقدر ظروفي وحياتي اما حدود المعرفه ايه يكفيه يعرف ان نوع العلاقه كانت ايه ومدى القرب بينا كان قد ايه انما التفاصيل الصغيره مالهوش فيها مش بس علشان الحريه وكده لكن كمان علشان متتعبهوش وتخليه حاسس ان حد غيره امتلكني قبل منه او اني ممكن اقارن بينه وبين التاني مثلا في العلاقه وكده فبلاش التفاصيل الدقيقه يكفيه الخطوط العريضه
اصلا لو كان جوايا لسه مشاعر للتاني القديم يبقى مش من حقي احب حد تاني واظلمه معايا انما لو ذكريات غصب عني يبقى المفروض اني اصارحه لكن الواقع واللي انا شايفه اني مقولهوش مادمت ناوي انساه يبقى مع الوقت ومع حبي الجديد ولما علاقتي بالحب الجديد تبقى اقوى تلقائيا هلاقي القديم والذكريات دي كلها حاجات وقصص اسطوريه نسيتها من زمن وباتسلى بيها من وقت للتاني بدون ما اخون حبيب ولا اجرحه ويمكن نتريق عليها سوا كمان

لو قابلته مش انا اللي هاخد الخطوه هاسيبه هو يختار عايز يسلم ولا لأ لأني معرفش ظروفه تسمح بأيه ومش بحب اسبب لحد موقف محرج خاصة لو كانت اتجوزت يعني لكن لو هي قررت تيجي تسلم عليا اول حاجه هاعملها هاحاول اعرفها على مراتي وافكر مراتي بيها ولأن حبيبتي ذكيه اكيد هتفهم انا عايز اوصل ايه هتفهم اني بفهم التانيه ان حياتي مستمره مع حد تاني والسكه هنا مقفوله اتوكلي بعيد بقى
يعني هاعرف حبيبتي بالموقف حتى لو كانت مش موجوده وقتها لازم تعرفه لأن نفس الفكره اني مش بحب حاجه هي تعرفها بعدين من غيري واكون وقتها في موقف اللي بيخبي علشان غلطان اكيد

مش من حقي احب حد وافضل احب القديم برده واصلا مادمت لسه بحب القديمه يبقى انا محبتش مراتي الجديده ولا حاجه انا واخدها زوجه شكليا وخلاص مجرد قضاء للوقت ويبقى ساعتها جواز فاشل بلا طعم

انا موافق تماما على فكرة ان الدنيا مبتقفش على حد يعني مش معنى ان قصه انتهت يبقى خلاص اقفل كتاب حياتي واقتل نفسي او اتجوز بدون حب واقضيها نكد طول عمري لأن لو القصه انتهت يبقى اكيد مكانش فيه ليها تكمله انا وهي فشلنا نكمل واكيد اقتنعنا بالحل ده يبقى نستاهل نسيب بعض ومادام كده يبقى من حق كل واحد فينا يبني حياه جديده

الدنيا على الحال ده طول عمرها واللي بيخالف ده بيتعب نفسه واللي حواليه وخلاص
وانا مش هاظلم حبيبتي علشان حبيت قبلها اللي قبلها هي مش مسؤله عنه ولا يعنيها في شيء اللي يخصها وابقى بظلمها فعلا لو بخونه وانا معاها انما القديم ميخصش حد غيري

وفي الأخر احب اوضح نقطه الحب مفهوم كبير قوي وعظيم قوي بس مش معناه اسطوري زي ما احنا بنتخيل ويا اما نهايه سعيده جدا يا اما ماساه لا الحب ممكن يتكون ويجي بطرق كتير قوي وصدقوني بيكون برده جميل قوي

لكنه زي انواع الأكل في اطباق كتير شهيه لكن لكل منها مذاق مختلف وكل واحد فينا بيفضل نكهه معينه لا يقدمها الا طبق معين

وبالتالي ميقدرش يختار غير الطبق ده بس مش معنى كده ان اللي عمل الطبق ده مش هيطبخ غيره زيه يبقى مادام طبق وقع مني اروح اخد غيره الدنيا فيها اكل كتير مش لازم نقعد نعيط جنب اللي اندلق بقى
اللي راح راح وخلصنا قوم اطلب طبق جيد احلى واطعم وانضف من اللي على الأرض متمدش ايدك في الطبق المدلوق صدقني هتلاقي الطبق اتكسر وايدك هتنجرح منه وخلاص
اتمنى اعرف رأيكم في اللي قلته

تحديث :

كاميليا اضافت سؤال للبوست عايزكم تردوا عليه برده

اذا كنت من اصحاب قلم، تكتب، تعيش لحظات تكتب فيها بمشاعرك، قد تكون مشاعر حب للحب ذاته، هل هذا مسموح؟؟؟؟ أم عليك ان تنتظر حتى يمتلئ قلبك بحب من ارتبطت به كزوج، ثم تعود لتكتب؟؟؟؟

لازم اكتب طبعا لازم افضل اكتب لأني اكيد من كتابتي هعرف اقيس مدى زوال السم من جسمي الكتابه هتبقى معياري للحكم على حالتي خفيت ولا لسه مريض بيه نسيته ولا لسه هو محور حياتي المهم يعني استغل كتاتبي علشان اصارح نفسي بالحقيقه واكشف لنفسي الواقع اللي عامل نفسي مش شايفه اتكلم عنه بصيغة الماضي علشان اتعود انه خلاص بقى ماضي مش واقع حواليه

هناك ٤٠ تعليقًا:

كاميليا بهاء الدين يقول...

اوووووووووول تعليق

هاروح اقرأ

وبعدين ارجع نتفاهم



تحياتى

كاميليا بهاء الدين يقول...

انا قرأت الاسئلة بس
مش قرأت اجابتك علشان مش أتأثر بيها

السؤال الأول : لو في جواك حب قديم او على الأقل ذكرى لحب قديم تعمل ايه؟
مش عارفة

السؤال التانى: لو كان الحب ده سايب جواك ذكرى جامده وجرح معلم قوي في قلبك
نعم

السؤال الثالث: لو الجرح ده باين في عينك الحزن منه وماليك قوي تمحيه ازاي من عينك وتخفيه عن الناس
حد يقولى علشان انا محتاجة الاجابة دى قوى

السؤال الرابع: هل انت لو كملت حياتك مع حد جديد وحب تاني وارتبطت واتجوزت تبقى بتظلم الشخص اللي هترتبط بيه
ماهو لازم نكمل، مش ظلم فى حالة اختفاء الحب القديم من حياتى ماديا يعنى مش اشوفه ولا اسمع عنه نهائياً

السؤال الخامس: هل الحب الجديد بعد الجواز يقدر ينسيك اللي فات وحبك القديم
لسة مش جربت الحكاية دى

السؤال السادس: هل من حق حبيبك الجديد انه يعرف بماضيك وحكايتك مع الحب القديم وايه هي الحدود اللي المفروض يعرف عنها وايه اللي ميخصهوش؟
أنا عملت كده، قولت كل حاجة، وكان رده، كلنا حبينا وفشلنا، المهم نعطى فرصة لحب جديد ان يداوى جراحنا.

السؤال السابع: هل لو صارحته باللي كان,هل هتقدر تصارحه ان لسه جواك مشاعر اوحتى ذكرى مش قادر تمحيها؟
لأ ، دى صعب، احتراماً لمشاعره

السؤال الثامن: لو قابلت الحبيب القديم صدفه هتتصرف ازاي هتكلمه ولا هتتجاهله ولا هتبصله وتمشي وهتعرف حبيبك بالموقف ده ولا لأ
كأنى شوفت هوا ، او عدم، ومش هاقول لزوجى لانى اصلا اعتبر مش شوفته.

السؤال التاسع: هل من حقك تحتفظ بمشاعر حب جواك لحبيبك القديم بعد الجواز من حد تاني؟
لأ ، دى تبقى خيانة، وخيانة عظمى كمان

السؤال العاشر: هل انت راضي عن قرارك بالمواصله في حياتك ونسيان الماضي وانك تكمل مع شريك حياه جديد وهتنسى الماضي وهتبني اسره جديده وحياه احلى ولا انت بس بتخدع نفسك وياترى كده بتظلم الشخص اللي هتختاره يكمل معاك؟؟؟؟؟
لو ده قرار ، يبقى اكيد راضية عنه، لانه ناتج عن تفكير بالعقل

انا بقى عندى سؤال ، وسؤال مهم جدا

اذا كنت من اصحاب قلم، تكتب، تعيش لحظات تكتب فيها بمشاعرك، قد تكون مشاعر حب للحب ذاته، هل هذا مسموح؟؟؟؟ أم عليك ان تنتظر حتى يمتلئ قلبك بحب من ارتبطت به كزوج، ثم تعود لتكتب؟؟؟؟

سمية يقول...

للاسف معظم الاسئلة هجاوب عليها اجابات حصلت بالفعل

وبقول للاسف عشان كان نفسى اختار اجابة بنفسى .. يعنى بتفكيرى دلوقتى

السؤال الأول : لو في جواك حب قديم او على الأقل ذكرى لحب قديم تعمل ايه؟

هافضل فاكراهم .. لكن بدون ما يبقى جوايا اى مشاعر تجاهم .. يعنى فاكرة الاحداث بس كانها حصلت قدامى لوحدة تانية غيرى .. معرفش ده مدلوله ايه بصراحة بس هيا دى الحقيقة


السؤال التانى: لو كان الحب ده سايب جواك ذكرى جامده وجرح معلم قوي في قلبك

حصل
اتجرحت .. و اتجرحت قوى كمان لانه كان اول حب ليا فى حياتى كلها
لكن الجرح ده داويته بنفسى لانى اقتنعت انى كنت لسة صغيرة و اكيد قلبى اختار غلط


السؤال الثالث: لو الجرح ده باين في عينك الحزن منه وماليك قوي تمحيه ازاي من عينك وتخفيه عن الناس

للاسف اما حاولت اعمل كده اتمحى معاه كل المشاعر الحلوة اللى كانت كل اللى حواليا بيشفوها فى عنيا
ومهما كنت بحاول اندمج مع الناس كان حبى ليه بيهاجمنى و ياخدنى من وسطهم ويخطفنى بعيد عنهم و مافوءش اللا و الناس قربت تروح


السؤال الرابع: هل انت لو كملت حياتك مع حد جديد وحب تاني وارتبطت واتجوزت تبقى بتظلم الشخص اللي هترتبط بيه

انا سبت نفسى للحياه و الظروف تعمل فيا اللى هيا عاوزاه
اتخطبت
واكتشفت ان اللى بيعرف يحب بجد يقدر يعدى ازمته بسهولة و يحب انسان تانى يكون بيستاهل الحب ده
واللى هيساعده اكتر ان يكون الانسان التانى ده بيحبه قوى



السؤال الخامس: هل الحب الجديد بعد الجواز يقدر ينسيك اللي فات وحبك القديم

طبعا
لانه بيكون حب صافى قوى و نضيف قوى
واحداث كتير بتشاركو بعض فيها بتعزز الحب ده قوى قوى قوى


السؤال السادس: هل من حق حبيبك الجديد انه يعرف بماضيك وحكايتك مع الحب القديم وايه هي الحدود اللي المفروض يعرف عنها وايه اللي ميخصهوش؟

انا من رأيى ان كون انك لسة عايز تتكلم عن الحب ده و تحكى عنه يبقى لسة منتهاش من جواك .. و دى ليها حسابات تانية خالص تعتمد كليا و جزئيا على الطرف الجديد و تقبله للموقف

بالنسبالى مكنش عندى رغبة فى انى احكى لانى فعلا كنت ناسية كل احسيسى ساعتها كانت ازاى .. و اللى خلانى اصمم انى محكيش انى قريت فى الموضوع ده من ناحية الدين و لاقيت ان من حق الزوجة انها تحتفظ بالحاجات دى طالما هى انتهت من جواها


السؤال السابع: هل لو صارحته باللي كان,هل هتقدر تصارحه ان لسه جواك مشاعر اوحتى ذكرى مش قادر تمحيها؟

كده تبقى موءلمة قوى للطرف التانى .. و لو انى بحب الصراحة بس برده الاعتراف بان لسة فى حاجة جوانا ناحية الماضى ده مش من مصلحتنا احنا حتى .. لانك من جواك خلاص مش هتحارب تانى عشان تمحى اللى فاضل جواك .. لانك هتكون مطمن انها عرفت اللى جواك و هيبقى امر مسلم بيه بينكم .. يبقى متقولش عشان متفقدش روح الحرب اللى جواك اللى هتساعدك انك تمحى الذكرى لآخر قطرة


السؤال الثامن: لو قابلت الحبيب القديم صدفه هتتصرف ازاي هتكلمه ولا هتتجاهله ولا هتبصله وتمشي وهتعرف حبيبك بالموقف ده ولا لأ

ان ان ان اااااااااااااان
بدون ما افكر قبل ما اجاوب
هتنح
هتنح
هتنح
معرفش ليه .. بس هافتكر كل اللى كنت ناسياه
ويمكن اللى ساعدنى انى انسى كل احاسيسى انى من يوم ما اخدت قرار البعد مشوفتوش



السؤال التاسع: هل من حقك تحتفظ بمشاعر حب جواك لحبيبك القديم بعد الجواز من حد تاني؟

الجواب كلمة واحدة بس

خيانة


السؤال العاشر: هل انت راضي عن قرارك بالمواصله في حياتك ونسيان الماضي وانك تكمل مع شريك حياه جديد وهتنسى الماضي وهتبني اسره جديده وحياه احلى ولا انت بس بتخدع نفسك وياترى كده بتظلم الشخص اللي هتختاره يكمل معاك؟؟؟؟

لا شك الحياه الجديدة احلى من كل اللى كنت بحلم بيه
لولا بس شوية الزوابع اللى فى النص



**** يا ساتر
ده الصراحة وحشة قوى
انا اول مرة فى حياتى اتكلم فى الموضوع ده من ساعت ما اخدت القرار انى انهيه و ده من ييجى خمس سنين وللا حاجة

--------------------

سوءال كاميليا


انا بقى عندى سؤال ، وسؤال مهم جدا

اذا كنت من اصحاب قلم، تكتب، تعيش لحظات تكتب فيها بمشاعرك، قد تكون مشاعر حب للحب ذاته، هل هذا مسموح؟؟؟؟ أم عليك ان تنتظر حتى يمتلئ قلبك بحب من ارتبطت به كزوج، ثم تعود لتكتب؟؟؟؟

ده عز الطلب
اكتبى عشان اما الحب الاول يبتدى ينسحب من جسمك ميتجمدش معاه احاسيسك و مشاعرك
ودى الغلطة اللى انا وقعت فيها
جت عليا فترة كبيرة كنت قاسية قوى على كل اللى حواليا بما فيهم نفسى
لدرجة انى خسيت خمستاشر كيلو فى اسبوعين

نصيحة بقى
حطى صورة "من سترطبطى به كزوج"
حطيها قدامك و انتى بتكتبى

ومن غير ما تسألى ليه
انتى هتعرفى لوحدك ليه


تحياتى لكامى حبيبتى
و لايهاب .. اخويا الكبير قوى

مدحت محمد يقول...

انا اولا بحييك على اثارتك للاسئلة دى اوى

ويارب ناس كتير يجاوبو عليه

علشان حابب اسمع اجابتها اوى

بس عايز اقلك اجابات البنات كلها اللى مرو بالتجربة انهم صعب انهم ينسو

بالعكس عن الولاد بيقدرو ينسو

المـــفـــــــقــــــــوعـــــة مــرارتـهــا يقول...

انا هاجاوب بشكل عام عن كل الأسئلة
الست عمرها مابتنسي حب قديم ممكن تتغاضي عنه ولو جه حب جديد ممكن ينسيها القديم بس لفترة ولما الحب الجديد بيخفت لهيبه بترجع تحن للقديم
وبترجع للحب القديم كمسكن لآلامها من الحب الجديد بس مش شرط انها تحاول ترجع الحب القديم ... وده مش بيبقي ظلم للحب الجديد مادامت مش بتتصرف غلط ومش مقصرة معاه في حاجة
واحب اقولك لو كل واحد وواحدة عاشوا علي ذكري الحب القديم يبقي قول علي الدنيا يارحمن يارحيم
لازم الواحد ينسي ويتجوز ويعيش ومش شرط اللي يتجوزه يكون حبيب الطفولة او الشباب
بالعكس ده ممكن يكون واحة الراحة والأمان لما يجور عليك حبك الجديد

انا عن نفسي قلت لزوجي عن حب الطفولة مش عشان مااظلموش لا عشان هو حكالي عن حبيباته الكتير قلت يعني اطلع قدامه في البلالا كدة وماليش حب قبله قلت لا لازم اقوله
بس تعرف كل مابجيب سيرة القديم قدامه بيزعل رغم انه اللي الح عشان يعرف كل حاجة عنه ولو انه كان حب في حضانة وابتدائي يعني حب بريء جدا
بالنسبة لسؤال كاميليل
للأسف انا ماقدرش اكتب عن الحب القديم عشان ماازعلش الجديد

http://kasperb4.blogspot.com/ يقول...

ايه ده ايه ده
كل ده كلام هههههههه
طب شوف انا مكدبتش خبر اهو وجيتلك على طول عشان اسلم عليك
بس لقيت بوست مينفعش يتقري الا ف الأجازة ههههههه

اخلص امتحانات بس واجي اقراه ان شاء الله واشارككم المناقشة
بس ادعيلي وانا عارف اني مقصر والله بس انت أكيد عارف الامتحانات بتعمل ايه
سلام مؤقت يا صاحبي
:D

الـسـيـدة نـون يقول...

لو جوايا حب قديم او ذكرى لحب قديم مش هاعمل حاجة
هافضل عايشة على الذكرى دىوهافضل افكر فى الحبيب القديم وهافتكر ايامى معاه


اى قصة حب قديمة لو انتهت
لازم تعرف يا ايهاب بدال هى انتهت
يبقى اكيد سابت جرح معلم ومؤلم
ازاى نحاول نخفى ده عن عيون الناس
ان احنا نضحك
نضحك اوى
نضحك كتييير
الناس ساعتها هتفتكرنا ان احنا خلاص خفينا من حبنا
بس علشان نعمل توازن فى حياتنا
بعد الناس اللى حوالينا يسبونا فى حالنا
نبقى ندخل اوضتنا
ونقفل الباب على نفسنا ونديها عياط
عياط كتيير

لو كملت حياتى مع حد جديد
اولا لازم ادى لنفسى فرصة انى اخف من الالم اللى سببهولى الحب القديم
يعنى مطلعش من تجربة حب وادخل تجربة تانية علطول
لازم ادى نفسى فرصة انى انسى الالم والجراح علشان مظلمش نفسى ولا اظلم الطرف الجديد
لو خلاص ارتبطت
انا شايفة ان من حق حبيبى الجديد انه يعرف عنى كل حاجة حصلتلى قبل ما ارتبط بيه
علشان مظلمهوش ومايكونش فيه اى شبهة خداع
يعنى ماينفعش يسالنى انتى ارتبطتى قبل كدة
اقوم انا اقوله لأ
انت اول واحد فى حياتى
كدة هنبتدى الحكاية بالكدب وده شئ مش مقبول
والله لو هو حب يكمل حياته معايا بعد ماعرف انى كنت مرتبطة قبل منه
يبقى خير وبركة
لو هو مش عايز يرتبط بواحدة ارتبطت بحد قبل منه
برضه خير وبركة
كفاية انى هاكون مع نفسى صريحة وده المهم بالنسبالى


ايوة الحب الجحديد ممكن ينسينى الم الحب القديم
لكن مش هينسينى التجربة خالص
يعنى هيفضل الحب القديم له مكان صغنن فى قلبى
وعلى فكرة ده مش فى العلاقات العاطفية بس يا ايهاب
ده اى تجربة احنا بنمر بيها
بتسيب جوانا اثر مش بيتمسح ولا بيتنسى بسهولة
ده لو حد عمل عملية الزايدة مثلا
هتسيب اثر الخياطة حتى ولو كان الالم زال باستئصال الزايدة
لكن هيفضل اثر العملية موجود ومعلم فى جسمنا
وهيفكرنا دايما ان احنا اتوجعنا اوى واتالمنا اوى على بال ما شلنا الزايدة
مابالك بقى بتجربة عاطفية
دى بتسيب اثر فى الروح والقلب والعقل
حتى ولو كانت الاثار دى مش ملموسةومش باينة للعين

انا شايفة ان ايوة من حق الحب الجديد انه يعرف بقصة الحب القديم
لكن دون الدخول فى التفاصيل
اذا كانت التفاصيل مش هتقدم ولا هتأخر
يبقى يفضل الاحتفاظ بها


لو صارحته باللى كان من غير ما اصارحه اذا كان لسه فيه ذكرى
المفروض ان اى حد يفهم ان بدال فيها تجربة سابقة يبقى اكيد هيكون فيه ذكرى



لو انا لوحدى هاسلم عليه عادى وهاساله عن اخباره
بس مش هاقول لجوزى عن الصدفة دى
ولو انا وجوزى مع بعض مش هاروح اسلم وهاعمل نفسى مش شايفاه
لكن لو هو جه سلم رغم وجود جوزى معايا هاسلم برضه عادى وساعتها هاضطر اقول لجوزى ان ده خطيبى الاولانى


لا مش من حقى انى احتفظ بمشاعر حب لحبيبى الاولانى خصوصا لو اتجوزت
دى كدة هتبقى خيانة لجوزى انا لا ارضاها عليه ابدا
ولو انا حسيت انى بحب حد تانى وانا متجوزة
يبقى الاكرم ليا ولجوزى انى اطلب الطلاق


ايوة الحمدلله انا راضية بقرارى انى اكمل المشوار مع حد تانى ولا مش شايفة نفسى ان بخدع حد او بخدع نفسى
بس زى ماقلتلك
نسيان الماضى ده
مش بيحصضل
اى حاجة بتحصل فى حياتنا خصوصا لو كان حب حقيقى مش بيتنسى وبيفضل ذكرى
اى كانت بقى ذكرى حلوة ولا وحشة
بيفضل ذكرى وخلاص
ويستحسن ان احنا منقعدش ننبش فى الذكرى دى
خليها كدة قابعة فى معاميق معاميقنا
علشان متنغصش علينا حياتنا


بالنسبة لسؤال كامليا
انا اجابتى تقريبا هى نفس اجابتك
يعنى مش هاضيف حاجة جديدة عليها


بس خلاص
اختك خيخة

سمر الشافعى يقول...

انا معلش مش هقدر اجاوب عالاسئله لكذا سبب اهمهم انى معشتش التجربه دى بس اعرف اللى عاشها كويس

انا قريت ردك على الاسئله وفرحت اوى بجد انك مقتنع بفكره ان الدنيا مش بتقف عند حد وان الحب الجديد ممكن اوى يمحى الحب القديم لو احنا عاوزين بس ندى للجديد فرصه ومنحبسش نفسنا فالماضى

ردك بجد اسعدنى ورجعلى الامل ان يارب يارب يكون تفكيره زيك كدا عشان انا كمان اقدر اعيش حياتى ونبدا من جديد

تحياتى على الاسئله الرائعه والرد الاكثر روعه

Mafrousa يقول...

بص يا شيكو
الاحب الاول مش بيتنسى ابدا ده لو كان حب بصحيح لانه بيكون اول من حرك مشاعر و احاسيس..
و ده بيكون من الصعب نسيانه..و لو مشاغل الحياه اخدتك و نسيته حتلاقى دايما حاجه تحصل تفكرك بيه
اما اذا كنت حزين لفقدان هذا الحب...فحتفضل حزين لفترة طوووووووووووووويلة
اما انه لو من حق الحب الجديد يعرف بالحب القديم لا و لا و لا و لا احنا بشر
ولو شفت الحب القديم اعمل نفسك مش شايفه اصلا طنشه

Abo 7anf يقول...

السؤال الأول : لو في جواك حب قديم او على الأقل ذكرى لحب قديم تعمل ايه؟
لو مستحيل يرجع هحاول انسى
اينعم صعب
بس مش هعشم نفسى فى وهم

السؤال التانى: لو كان الحب ده سايب جواك ذكرى جامده وجرح معلم قوي في قلبك

يعنى التجربه المش ناجحه اتعلم منها

السؤال الثالث: لو الجرح ده باين في عينك الحزن منه وماليك قوي تمحيه ازاي من عينك وتخفيه عن الناس

صعب
ا لأانى احاول اعيش صراع نفسى من جوا حزين وقدام الناس اضحك
كدا اتعب

السؤال الرابع: هل انت لو كملت حياتك مع حد جديد وحب تاني وارتبطت واتجوزت تبقى بتظلم الشخص اللي هترتبط بيه

اكيد هكمل حياتى
بس مش مع اى شخص
يعنى مش هبقى بستغله علشان انسى نفسى
كتير من البيمروا بتجربه فاشله
بيدوروا على اول حب ينسيهم
لا لازم اخد وقتى

السؤال الخامس: هل الحب الجديد بعد الجواز يقدر ينسيك اللي فات وحبك القديم
مهو حسب الاختيار زى مقلت
لو الحب الجديد بجد
هينسى لانوا هيعوض


السؤال السادس: هل من حق حبيبك الجديد انه يعرف بماضيك وحكايتك مع الحب القديم وايه هي الحدود اللي المفروض يعرف عنها وايه اللي ميخصهوش؟

ان شايف كدا
واطبيعى ان الطرف الاخر يحترم كدا


السؤال السابع: هل لو صارحته باللي كان,هل هتقدر تصارحه ان لسه جواك مشاعر اوحتى ذكرى مش قادر تمحيها؟

اكيد لا
وبعدين لو فى مشاعر ابقى بحب تانى ازاى
ابقى بردوا بخدعوا
ممكن زكرى
وتبقى خاصه بيا

السؤال الثامن: لو قابلت الحبيب القديم صدفه هتتصرف ازاي هتكلمه ولا هتتجاهله ولا هتبصله وتمشي وهتعرف حبيبك بالموقف ده ولا
اكيد مش هقله
ومش هشوفه
لانى خلاص بقيت ملك حد تانى


السؤال التاسع: هل من حقك تحتفظ بمشاعر حب جواك لحبيبك القديم بعد الجواز من حد تاني؟

لاااااااا

السؤال العاشر: هل انت راضي عن قرارك بالمواصله في حياتك ونسيان الماضي وانك تكمل مع شريك حياه جديد وهتنسى الماضي وهتبني اسره جديده وحياه احلى ولا انت بس بتخدع نفسك وياترى كده بتظلم الشخص اللي هتختاره يكمل معاك؟؟؟؟؟

الحياه مبتقفش عند موقف
اكيد هنكمل

اذا كنت من اصحاب قلم، تكتب، تعيش لحظات تكتب فيها بمشاعرك، قد تكون مشاعر حب للحب ذاته، هل هذا مسموح؟؟؟؟ أم عليك ان تنتظر حتى يمتلئ قلبك بحب من ارتبطت به كزوج، ثم تعود لتكتب؟؟؟؟

هكتب

كيكى عوووووو يقول...

كل دى اسئلة....انا نسيت ياعم ....على العموم الحب الحقيقى عمرة مايتنسى

لـــى لــــىِ يقول...

السلام عليكم

ايه ده؟ ايه كل ده؟

قولتلى تعالى علقى ، جيت اتعلقت أنا
ما علينا

انا حجاوب على سؤال كاميليا الأول


اذا كنت من اصحاب قلم، تكتب، تعيش لحظات تكتب فيها بمشاعرك، قد تكون مشاعر حب للحب ذاته، هل هذا مسموح؟؟؟؟ أم عليك ان تنتظر حتى يمتلئ قلبك بحب من ارتبطت به كزوج، ثم تعود لتكتب؟؟؟؟

طبعا أكتب ، وأكتب، وأكتب علشان افرغ كل الشحنات المكتومة، مش مهم اقول ايه، انشالله اكتب عن ألمى وأحزانى بس المهم كل اللى جوايا يخرج، علشان لو كتمته ممكن يحولنى حجر من غير مشاعر، كلنا لينا لحظات نلتقى فيها مع نفسنا بس نفسنا القديمة.
لو عندى ملكة الكتابة يبقى خسارة قوى انى اقتلها لحد ما تتولد مشاعر جديدة
يعنى كل الشعراء والكتاب دول بيحبوا طول الوقت؟ طبعا لأ، لو كل شاعر توقف عن كتابة الشعر ولا كل اديب توقف عن كتابة القصص لان قصة حبه انتهت، مكانش يبقى فيه كل اللى بنشوفهم دول.

نشوف اسئلة سعادتك

السؤال الأول : لو في جواك حب قديم او على الأقل ذكرى لحب قديم تعمل ايه؟

منتا قولت ، حب قديم، وذكرى، معملش حاجة ماهو بقي قديم ومجرد ذكرى

السؤال التانى: لو كان الحب ده سايب جواك ذكرى جامده وجرح معلم قوي في قلبك

لو الحب ده انتهى بجرح زى ما بتقول يبقى سهل نسيانه لاننا كل مانفتكره نفتكر الجرح نقوم نقول اعتبره قلب وراح اعتبره قصر جراح واتهد على اللى بانيه

السؤال الثالث: لو الجرح ده باين في عينك الحزن منه وماليك قوي تمحيه ازاي من عينك وتخفيه عن الناس

أغسل وشى، لا بجد، اضحك واملا الدنيا ضحك، وامسح بضحكاتى دمعاتى

السؤال الرابع: هل انت لو كملت حياتك مع حد جديد وحب تاني وارتبطت واتجوزت تبقى بتظلم الشخص اللي هترتبط بيه

لأ مش بظلمه، هات لى حد ماكانش فى حياته حب اول، يبقى الكل بقى ظلم الكل؟

السؤال الخامس: هل الحب الجديد بعد الجواز يقدر ينسيك اللي فات وحبك القديم

بص هو السؤال هنا لو بتتكلم عن حب جديد، يبقى خلاص الحب الجديد هايمسح القديم ويخليه مجرد حاجة اي حاجة، لكن لو بتتكلم عن حب الزوج بعد الزواج، فده طبعا بيتوقف عليه، لو كان زوج وحبيب يقدر يمسح الحب القديم انما لو اكتفى بصفة زوج بيتفرج على الماتشات والام بى سى تو وافلام الاكشن يبقى كل سنة وهو طيب

السؤال السادس: هل من حق حبيبك الجديد انه يعرف بماضيك وحكايتك مع الحب القديم وايه هي الحدود اللي المفروض يعرف عنها وايه اللي ميخصهوش؟

اومال ايه، طبعا من حقه يعرف، بس الخطوط العريضة المنشتات والعناوين انما تفاصيل النشرة طبعا لأ مش مهمة بالنسبة له، او مضرة بمعنى أصح

السؤال السابع: هل لو صارحته باللي كان,هل هتقدر تصارحه ان لسه جواك مشاعر اوحتى ذكرى مش قادر تمحيها؟

لا مقولوش ان لسة جوايا ذكرى، عشان ذكرى اتقتلت اصلا وأسأل السويدى

لو قابلت الحبيب القديم صدفه هتتصرف ازاي هتكلمه ولاهتتجاهله ولا هتبصله وتمشي وهتعرف حبيبك بالموقف ده ولا لأ

هاعمل نفسى مشوفتوش ، لانه اصبح انسان غريب بالنسبة لى يبقى مش من حقه انه يبص لى ولا يسلم عليا

السؤال التاسع: هل من حقك تحتفظ بمشاعر حب جواك لحبيبك القديم بعد الجواز من حد تاني؟

دى تبقى خيانة يحاسبنا عليها الله سبحانه وتعالى ، ويعاقب عليها الضمير

السؤال العاشر: هل انت راضي عن قرارك بالمواصله في حياتك ونسيان الماضي وانك تكمل مع شريك حياه جديد وهتنسى الماضي وهتبني اسره جديده وحياه احلى ولا انت بس بتخدع نفسك وياترى كده بتظلم الشخص اللي هتختاره يكمل معاك؟؟؟؟؟

اخدع نفسى لو فضلت ادور فى فلك الحب القديم المنتهى واوقف حياتى عليه وانا عارفه ان ده وهم، لكن لما اقرر انى اقلب الصفحة وابدأ من جديد ابقى نجوت بنفسى وبقلبى وهو ده القرار الصح، الحياه مش بتنتهى بخروج حد منها سواء بالفراق او الموت.

ربنا يسامحك
ده تاج من الشوك

تصبح على خير يا حاج

سلاماتى

klmat يقول...

احييك جدا على مناقشه الموضوع الحيوى ده لانه بيمس حياتنا كلنا
حاجاوب اجماليا
المفروض ان لا يتم الارتباط والقلب مشغول
بحد تانى ده فيه ظلم لكل الأطراف لا نبدا
بالارتباط الا بمن يشغل قلبنا وعقلنا وطالما ده حصل يبقى الحب القديم اصبح ذكرى
قد نتذكره من موقف معين اغنيه كلمه لكن مجرد ذكرى نحاول ان نركنها
لو الحب القديم معلم وباين فى العيون من الصعب ان نداريه لان العيون بتفضح المشاعر لكن قدر الامكان نشغل وقتنا الفراغ هو اللى بيخللى الذكريات تطفو
نشغل عقلنا ووقتنا قدر الأمكان والايام بتداوى
طالما حا ارتبط لازم اكون نسيت الماضى
ولا ارتبط الا بمن يشغل قلبى وعقلى مش
جواز وخلاص . والا حا اتعرض لاحتمال الفشل لا داعى للاستعجال دى عشره عمر
وسعاده اسره
الحب الجديد طالما حبيت يبقى هناك من يشغل قلبى وعقلى وبلاش نفكر فى الماضى
لو كان فى ارتباط سابق يبقى زى ما انت قلت لازم نصرح به لانه حايتعرف لكن نأكد انه انتهى وبنقوله من دواعى الامانه لكن لا نجيب سيرته اطلاقا منعا
لشك الطرف التانى ومساعده انفسنا على النسيان
عند مقابله الحب القديم صدفه لا نتعمد المواجهه ان امكن لكن لو كان فى مكان
عند طبيب مثلا ساكتفى بسلام زى اى معرفه قديمه مش اكتر
هل من حقك تحتفظ بمشاعر قديمه . لن نبدأ
الا بعد نسيان ويكون مجرد ذكرى لا نعيش فيها قد تمر علينا لكن نحاول ان لاننميها
اما عن الكتابه . نكتب ما نريد ان نكتبه مع الأخذ فى الاعتبار ان من سيشاركنا رحله العمر حايقرأ ونضع
انفسنا مكانه لو قرأتى ان حبيبك ولهان
وغرقان فى مشاعر حب حد تانى حتى لو كان ماضى بيجرح ممكن نكتب
على انها مجرد خواطر مما يحدث حولينا لا تخصنا ولكن موجوده وياريت ننظر للأمام
مش للخلف لا نسجن انفسنا فى الماضى طالما
من الصعب الارتباط نحاول ننسلخ منه
كل حاجه فى الدنيا محتاجه اراده ممكن افكر فى عيوبه وعدم تمسكه واضخمها حتى
اساعد نفسى على النسيان
مره تانيه بحييك واشكرك على اسئلتك
خالص تحياتى وتقديرى

Doba يقول...

بما إنى جالى استدعاء على مالا وشى
احب أقول انى إجاباتى تتفق بالكامل مع إجابات لى لى

كلها كلها
بجد نفس الآراء تماما
=================

انا بس حابة أضيف ان حب الست غير حب الراجل - لان مش كل الرجال بيقبلو انهم يعرفو بماضى الست اللى كانت بتحب واوقات كتير بتكون المعرفة دى عن حق مضرة للغاية وبتسيب آثار سيئة على الحياة الجديدة
====
اما بالنسبة للراجل اللى بيحب وحبيبته بتخونه او بتجرحه فهو بيقفل على قلبه واه بيتعامل مع غيرها لكن بيتعامل بعقله وبس لانه دايما بيكون مقتنع ان الستات زى بعض وان التانية هتجرحه برده فبيسبق هو برد الفعل وبيجرح علشان ميتجرحش
===
الستات قلبها حنين ودايما غلابة ومع الكلمة الحوة بيلينو ولما بتتجرح مرة وقابلت اللى يطبطب ويداوى الجرح الجديد بتسيبه يلملم جراحها ويمكن تحبه اكتر بكتير قوى
===

آخر حاجة بقى عاوزة اتكلم فيها هى ان ربنا بيكون كاتبلنا نتجرح او نحب او او او علشان بعدين نقر ونعرف نتعامل مع اللى فى ايدينا صح ومين مننا لما حب زمان او حب مرة واحدة متعملش - كل حاجة بتمر علينا فى حياتنا بتثقل معرفتنا وخبراتنا فى الحياة

اهم حاجة اننا نرضى بالمكتوب ونستمتع بيه ونحاول بقدر إمكاننا اننا نعيش كويس بالمعطيات اللى فى ايدينا

هبة

قوس قزح يقول...

انا هجاوب من غير ما اقرا ردك او تعليق اى حد لان ساعات القراءة بيكون لها تاثير على التعليق

- لو جوايا حب قديم عمرى ما هنساه و يمكن يمر على اوقات ابقى عايزة اعرف اى اخبار عنه بس عمرى ما اخد الخطوة دى لانه بقى قديم خلاص

- لو الحب ده سايب جرح جامد هنسى الحب ده بس مش هنسى ابدا انى ممكن اتجرح تانى هفضل فاكرة الم الجرح لكن مش هفضل فاكرة مين السبب لانه ميستهلش

- فى ناس كتير هقدر اخبى احساسى قدامه و يمكن اتنين تلاتة بس اللى هيحسوا حتى لو خبيت


- محدش بيبدا حب جديد و هو لسه بيحب اللى جرحه ..الحب بيتنسى لكن الجرح لا .. و مفيش ظلم هنا انك مجروح ..هو فى حد الايام دى سلم من جرح القلوب ؟؟

- ممكن اى شىء ينسى الحب مش شرط الجواز يكون هو السبب الوحيد


- مش من حقه يعرف اى شىء عن مشاعرك قبله الا لو انت عايز ده .. حقوقه عليك تبدا من تاريخ معرفته بك

- الرجل بيقدر يصارح و يقول انه لسه بيحب .. لكن البنت لا و بردو بسبب ان الرجل ميحبش يعرف واحدة لسه جواها مشاعر لغيره او حتى كان لها فى يوم من الايام المشاعر ده مع غيره


- هبصله و امشى و لو كلمنى هسلم و امشى على طول .. لان مينفعش اكتر من كده بدام فى حد تانى فى حياتى .. ومش هقول و فى نفس الوقت مش هنكر لو اتسألت

- هو الاحتفاظ بالحب فى ايدينا ؟؟ زى ما الحب بيجى لوحده بيتنسى لوحده من غير ما يكون لنا يد فيه


- الحمدلله راضية .. و مقتنعة جدا كمان ان ربنا له حكمته فى البعد بين الناس و القرب بينهم


اروح بقى اقرا كلامك و كلام الناس

بس ليا سؤال قبل ما اقرا ردك .. هو انت اتجرحت من حد ولا ايه؟ :(

قوس قزح يقول...

انا رجعتلك تانى اهو بعد ما قريت

الحمدلله انه كلام عام مش نتيجة جرح لك :)

بس السؤال التاسع لو انت تقصد به تقعد تفكر و تسرح و تتخيل حبيبك اه دى تبقى خيانة طبعا لكن لو جواك مشاعر حب و بقيت ذكرى و ساعات بتيجى على بالك دى مش خيانة لانها مش بادينا زى ما قلت

اما عن سؤال كاميليا

الكتاب بيتخيلوا حالات الحب اللى مرت عليهم علشان يكتبوا ، فطبيعى جدا انك تكتبى عن الحب سوا جديد او قديم او بتتمنيه يحصل .. المشاعر دى لما بتخرج على الورق بتوضح اكتر و بيبان لنا قدرها اد ايه و هل هى لسه قوية جوانا ولا

ولــــــــــو يقول...

ازيك يا كبير
انا مقصر معاك انا عارف بس انت برضه هاتسامحني بقلبك الكبير

ماشاء الله الناس كلها مجاوبة على الاسئلة زي ما يكونوا ما صدقواحد فتح الموضوع وهاتك يا كلام

على العموم الموضوع عايز دماغ علشان انا مش عدى عليا اي حاجة من الكلام ده
فهاحاول افكر وابقى اجاوب

سلام مؤقت

دعاء مواجهات يقول...

كلااام جميل واجاباتك حلوة اوى

ويميزها الواقعية والدبلوماسية ف ذات الوقت وخاصة فى حتة انك مش عاوزها تعرف من برة دى

بتنم عن الثقة بردوو

اما انا بقى شايفة انة من اكبر الخطايا انى افضل افكر ف واحد وانا مرتبطة بغيرة

واكيد الحب الاول صعب يتنسى خاصة لو كان حقيقة وفية اخلااص متبادل

بس انا بقى مش هقولو عن اى علاقة فى حيااتى لان دة صعب جدا لانة هيفضل مفتكرها والشك يبدا كل الرجاال كدة خاصة ف مصرنا

متقوليش والصراحة فين لان الصراحة عمرها مابتريح بالعكس
لانى جربتها وكانت النتيجة الشك والغيرة الغبية

صدقنى

تقبل تحيااتى

منتظرااك

دعاء مواجهات يقول...

اة ياخبر

نسيت ؤال كاميليا حبيب قلبى

لا ياكاميليا عادى الواحد يحب ويشعر بالحب قل الارتباط الرسمى

مش يمكن بعد الارتباط الرسمى الواحد ميلاقيش الحب اصلا

اقصد بدة انك ممكن تكتبى عن الحب وتحبى حد لسة ماقابلتيهوش دة اسم حب طيعا

تقبلى تحيااتى

رندا يقول...

بص فى الاول كدة مش هقرا اى تعليق

وهرد على سؤال كامى الاول

1- اذا كنت من اصحاب قلم، تكتب، تعيش لحظات
تكتب فيها بمشاعرك،
قد تكون مشاعر حب للحب ذاته،
هل هذا مسموح؟؟؟؟
2- أم عليك ان تنتظر حتى يمتلئ قلبك بحب من ارتبطت به كزوج، ثم تعود لتكتب؟؟؟؟

.....................

فى حب هكتب مفيش حب برضة هكتب مع انى فى وقت ما مش مسكت قلم خالص
وكان وقت كبير كمان
وكان كل احاسيسى غير معلومة ليا
وكانها فقدت معالهما كما فقدت معها
قلمى وكراستى
ففضلت الصمت بكامل انواعة
بس من فترة رجعت وقلت لازم اعبر
لازم اقول احساسى كفايا تلك الكتلة التى تجمعت فى قلبى وكانها قطعة دم لابد وان تخرج والكتابة تكون الحقنة وكانها تفعل فيها مفعول البزل وتخرج كل الدم المختنق
وتخرجها لكى يتجدد دماء قلبى

ـــــــــــــــــــــــــــــ

اسئلة الشنكوتى

1- لو في جواك حب قديم او على الأقل ذكرى لحب قديم تعمل ايه؟

** مش ذكرى يبقى صباح الذكريات بقى

2- لو كان الحب ده سايب جواك ذكرى جامده وجرح معلم قوي في قلبك

** هقول راح لحالة وربنا يسامحة

3 - لو الجرح ده باين في عينك الحزن منه وماليك قوي تمحيه ازاي من عينك وتخفيه عن الناس

** اصلا محدش هيشوفة لانى فى الفترة دى بختفى عن اقرب الاقربين منى علشان مش بحب اعذب حد بياولا حد يشفق عليا

4- هل انت لو كملت حياتك مع حد جديد وحب تاني وارتبطت واتجوزت تبقى بتظلم الشخص اللي هترتبط بيه

** لا طبعا لانى باخد فترة كبيرة جدا علشان اكون انسلخت من كل الماضى
ومش بحب احط الحاضر مع الماضى

- وايه هو نوع الظلم انك خبيت عنه ولا انك تكون لسه محتفظ جواك بالحب القديم ولا انك بس تكون لسه مجروح من الذكرى اللي معلمه جواك

** رديت على السؤال لانى باخد وقت كبير علشان مش اظلم حد معايا
يعنى بكون صفحة بيضة معاة ولية يبقى علشان مش اظلمة يبقى انتظر كتير قوى

5 - هل الحب الجديد بعد الجواز يقدر ينسيك اللي فات وحبك القديم

** مفيش حد بينسى حاجة الا اذا جالة زهايمر او اتخبط على نافوخة بقى
بس احترامى للشخص الى معايا بحاول مش افكر فى اى حاجة غيرة لانى بقيت ملكة هو بس والى بفتكرة ان ربنا حسابة عسير يبقى لازم احترم زوجى


6 هل من حق حبيبك الجديد انه يعرف بماضيك وحكايتك مع الحب القديم وايه هي الحدود اللي المفروض يعرف عنها وايه اللي ميخصهوش ؟

** الحمد لله زوجى مش سئلنى وجيت احكيلة قالى مش يخصنى يعنى الموضوع دة بيكون لازم عقل واعى وكبير
مع ان الحياة بتوضح كل شئ وبرضة بيعرف من طرق كثيرة حب استطلاع بس على تقيل ههههه من الطرفين
ولو حب يحكيلى ولية يعنى مش اسمعة واتعلم كمان من الاخطاءالى خلتهم يفقدوا بعض انا بحس انى مثلا لو عرفت عن زوجى ممكن قوى اتحاشى اى شئ جعلة يتركها مش احسن مااعمل حاجة تكون سبب فى خلاف وبكدة باخد تجربة من الى حصل قبلى
واعرف هو بيحب اية وعايز اية

7- هل لو صارحته باللي كان,هل هتقدر تصارحه ان لسه جواك مشاعر او حتى ذكرى مش قادر تمحيها؟

** ياعم ازاى يعنى اصلا يكون جوايا مشاعر لغيرة من اساسة لا بقى معايا استيكة وبمحيها كمان
شكلك كدة عايز تودينى النار حدف
ولا جاى تهدى النفوس

8- لو قابلت الحبيب القديم صدفه هتتصرف ازاي هتكلمه ولا هتتجاهله ولا هتبصله وتمشي وهتعرف حبيبك بالموقف ده ولا لأ

** بص حسب ممكن اسلم وممكن لا بس مش علشان بترعش بقى انى شوفتة وفرحانة

ايوة ممكن قوى اسلم وسلامى هيكون ضربة قاضية للطرف التانى علشان يعرف انة عندى زية زى اى حد عدى واعرفة شكلا فقط
لكن لو تجاهلتة هيقول فى نفسة
مش قادرة تسلم اصلها مش عارف اية وهيفهم غلط انا بقى مش هديلة الفرصة دى
وهعرفة انة زية زى اى حد


9- هل من حقك تحتفظ بمشاعر حب جواك لحبيبك القديم بعد الجواز من حد تاني

** اية ياعم السؤال دة بص لاجاباتى كويس وانت تعرف لوحدك هههههه

10 - هل انت راضي عن قرارك بالمواصله في حياتك ونسيان الماضي وانك تكمل مع شريك حياه جديد وهتنسى الماضي وهتبني اسره جديده وحياه احلى ولا انت بس بتخدع نفسك وياترى كده بتظلم الشخص اللي هتختاره يكمل معاك؟؟؟؟؟

** اتصدق بقى هاجى اعضك بجد هى كل الاسئلة شبة بعض ههههه
الحمد لله كل شئ ومش ارضيا لية حضرتك
انا مش بحب اخدع لا نفسى ولا حد قدامى
ولا اى حد فى دنيتى اتخدع منى
الحمد لله
الدنيا مش مستاهلة خداع وظلم
كما تُدين تدان ياعمنا
انا بقى بخاف قوى من الكلمة دى

اية دة هى الاسئلة خلصت ولية يعنى كدة بسرعة
حراااااااااام عليك اتصدق
لا كتير كتير والله
شنكوتى ابعد عن وشى السعادى ماشى هههه ومش هراجع كمان ردى

( وش متشحتف على الاخر )
ها فين بقى الجايزة ههههه

دمت مغلبنا ياعم :(

رندا

رندا يقول...

ده مش هيطبخ غيره زيه يبقى مادام طبق وقع مني اروح اخد غيره الدنيا فيها اكل كتير مش لازم نقعد نعيط جنب اللي اندلق بقى
اللي راح راح وخلصنا قوم اطلب طبق جيد احلى واطعم وانضف من اللي على الأرض متمدش ايدك في الطبق

.............

شنكوتى

هو انت اكيد كنت جعان قوى وانت بتكتب
هو انت داخل على جوزاة ولا طبخة هههههه
معلش بقى هفش غلى فيك دبستنى ياعم
لاقيت نفسى اطول تعليق
انا كنت هجيب متر اقيس الاطول
قلت بلاش بقى واضح انى اندمجت فى الرد ههههههههه

دمت بكل سعادة تصبح على خير بقى

رندا

غير معرف يقول...

طب عندى سؤال لو كنت حبيت تلات اربع مرات و كل مره ليها مذاقها و حلوها و مرها و مشاعرها و ذكرياتها لمختلفه عن غيرها .. تجاوب على الاسئله بتاعتك دى ازاى ؟؟

على فكره الحب الجديد مش بينسى الحب القديم و لو حبيت اكتر من مره و ده ممكن على فكره مش خيال علمى هتفضل فاكر لكل حب جماله و حلاوته مشاعره لكن كذكرى جميله مش اكتر .. و مع الوقت هتنسى تماما الجرح و القساوه بس بشرط انه مايكونش حصل خيانه او كدب.

Empress appy يقول...

1- بحاول انسى بس غصب عنى بفتكر بس مع مرور الوقت بنسى فعلا
2-بنساه ومش بحاول افتكر بديله ضهرى من الاخر بس عمرى ما افكر اجرحه ولا اخد بحقى منه خالص
3- بحب نفسى جدا وبكون حنينه معاها وبفهمها الن اللى فى عينى مش حقيقه خالص وبحاول اندمج مع الناس وانسى ومديش لنفسى فرصه افكر فيه
4- لا طبعا لانى لازم اكون نسيت الاول من حياتى علشان اصلا ارتبط بالتانى ولا يمكن ارتبط الا كده
5-هو منسيه ليه من قبلها اكيد يعنى من اول ما فكرت فيه والا اذا انا كنت ارتبط بقى بيه علشان يبقى دوى وعلاج يبقى غلط
6- من حقه لو انا عاوزة اقوله بس انا اشيفه انى مخبيش وهو يقرر افضل حاجه علشان مبقاش جنيت عليه ولا اديت فرصه لحد يوقع بينا
7-انا شايفه انه اساسا مفيش مشاعر للقديم
8-بعرفه بالموقف وبتجاهل التانى طبعا تماما بجد وبحكى لحبيبى هههههههههه
9- لا مش من حقى طالما اتجوزت دى خيانه
10- اكيد طبعا طالما اليم
اى اعترفافات ليليه تانيه ههههههههههه انا تحت امرك هتودينى فى شجرة عارفه

Lyssandra يقول...

صباح الخير ياإيهاب

الفكرة اللي بتطرحها في البوست ده مهمه وأكيد بتواجه ناس كتير أوي

استعنا ع الشقا بالله

نبدأ

السؤال الأول:
------------
لو في جواك حب قديم او على الأقل ذكرى لحب قديم تعمل ايه؟
-----------------------
انت بتقول أهو .. قديم
بس مش شرط كل قصة تنتهي بخيانه وغدر
ممكن جدا قصة تنتهي باتفاق طرفيها ان الأمر مستحيل يستمر .. الأمر أكيد مؤلم لكن مش بنفس درجة الألم لو اتعرض لخيانه
فالإجابه هنا تحتمل أمرين
أ- لو الموضوع منتهي بغدر يبقي يتنسي أحسن لأن أي ذكري منه هاتسبب ألم وممكن كمان تخلي الشخص يفقد الثقه في انه ممكن يبدأ من تاني
ب- لو الموضوع منتهي من غير تجريح فوالله بتبقي ذكري طيبه .. يعني لو جه علي بالي هافتكره بالخير .. لا هافرح ولا هازعل

==================================
السؤال الثاني :
---------------
لو كان الحب ده سايب جواك ذكرى جامده وجرح معلم قوي في قلبك
----------------------------
لو سايب جرح يبقي مش المفروض أفتكره تاني
أكيد الجرح ده مؤلم أوي لأنه كان غير متوقع ..
وأظن الزمن كفيل بتضميد الجراح
وحتي الذكري المفروض تندفن لأنها مع الوقت مش هاتفتح الجرح تاني لكن هاتثير الإحساس بالألم في كل مرة تفتكر القصه دي
===============================
السؤال الثالث :
---------------

لو الجرح ده باين في عينك الحزن منه وماليك قوي تمحيه ازاي من عينك وتخفيه عن الناس
------------------------

دي صعبة شوية لأنه الواحد مهما حاول يداري جواه ومهما كان بارع أكيد بيظهر عليه بعض التغير
وفي ناس بقي كل شغلها تتصيد الدموع من عيون الناس
لو هاحاول أمحيه .. أعتقد اني لازم أكون مع نفسي لبعض الوقت بعيد عن الناس
بعد كده أعتقد ان أفضل حل السخريه
لما تسخر من جرحك وتحاول تظهر لنفسك ان القصه دي مش مستاهله اللي بتعمله ف نفسك عشانها أكيد ده هايهون عليك
بعدها قضية الناس بقي مش مشكلة لأن اللي هايهمه جرحك هايشوفه مهما داريته أما اللي مش بيهمه أو بيسعده انك تكون مجروح فده بعده .. لو قدرت علي نفسي هاقدر علي الناس
==================================
السؤال الرابع :
---------------
هل انت لو كملت حياتك مع حد جديد وحب تاني وارتبطت واتجوزت تبقى بتظلم الشخص اللي هترتبط بيه
وايه هو نوع الظلم انك خبيت عنه ولا انك تكون لسه محتفظ جواك بالحب القديم ولا انك بس تكون لسه مجروح من الذكرى اللي معلمه جواك

--------------------------
هل انت لو كملت حياتك مع حد جديد وحب تاني وارتبطت واتجوزت تبقى بتظلم الشخص اللي هترتبط بيه
ليه ؟
ماهو عشان أبدأ حياة جديدة لازم أقفل الباب علي الحكاية القديمة نهائي
يعني مايبقاش ليها أدني أثر
كل واحد من حقه يبدأ حياته من جديد
ده كان طريق وده طريق تاني خالص ومفيش حد يقدر يمشي في سكتين سوا
الغلط هنا لما حد يحاول يداوي جرحه بإنه يشغل نفسه بقصة تانية .. ده الظلم بقي .. لأنه بيحاول يداوي جراحه علي حساب حد تاني
أكمل حياتي من جديد .. آه .. لكن وأنا متأكده اني بابدأ من جديد فعلا مش بابدأ من فوق أطلال قصه قديمه

================================
السؤال الخامس:
--------------
هل الحب الجديد بعد الجواز يقدر ينسيك اللي فات وحبك القديم
--------------------------
أقول تاني .. المفروض قبل أي قصة أو ارتباط جديد يكون القديم منسي تماما

بل ممحي من الذاكرة

لو مش هاقدر أنساه يبقي المفروض آخد وقت كافي قبل الارتباط بحد تاني علشان ما أظلمش نفسي وما اظلمش معايا حد تاني ممكن يكون بيحبني بجد وأضيعه من إيدي بأني أخليه علي هامش حياتي

================================

فاصل ونعود

lyss

Lyssandra يقول...

عدنا

السؤال السادس:
---------------
هل من حق حبيبك الجديد انه يعرف بماضيك وحكايتك مع الحب القديم وايه هي الحدود اللي المفروض يعرف عنها وايه اللي ميخصهوش ؟
---------------------
بالتأكيد أيوة .. ولما يعرفه مني أحسن مايعرف بالصدفه .. وليه بتخبي لو كنتي صح ؟
وزي ما المفروض اكون عارفه عن ماضيه
المفروض يكون في صراحه متبادله
بس المفروض تكون الخطوط العريضه بس
بدون تفاصيل ممكن تتعبه وتخليه يفكر أكتر من اللازم في أمور بالنسبه لي منسية أصلا
لأنه مهما كان متفاهم ومتزن وعاقل
لكن أي كلام ممكن يسيب أثر في نفسه حتي لو ماصرّحش بده ..
وبالتاكيد أنا مش هاخسر حد المفروض يكون عندي الدنيا وما فيها بسبب حد مش في بالي أصلا

=================================
السؤال السابع :
---------------
هل لو صارحته باللي كان,هل هتقدر تصارحه ان لسه جواك مشاعر او حتى ذكرى مش قادر تمحيها؟
----------------------
ازاي يعني ؟ وهوا ليه أبدأ حكاية وأنا جوايا مشاعر نحو شخص تاني
يعني ينفع حد يقدم قلبه يقوم يتهادي بطعنه ؟
المفروض ما قبل البداية الجديده عملية غسل مخ وغسل قلب كمان
طالما هانبدأ من جديد يبقي نبدأ بدون رواسب .. لا ذكريات ولا مشاعر مركونة
بس ممكن ده يحصل في حاله واحده
لو الواحده كانت مجبرة مثلا انها ترتبط بواحد تاني غير الشخص اللي بتحبه
أو بلاش نقول مجبرة ممكن نقول الظروف جت كده
برضه يبقي صعب انها تحكي او تصرح بمشاعرها نحو شخص تاني
لأنه برضه مهما كان الشخص اللي هيا مرتبطة بيه عاقل ورزين الا انه مش هايقبل ان حبيبته تحكي قدامه عن حد تاني بتفكر فيه .. مش ممكن أبدا
أعتقد الأفضل انها تأقلم نفسها علي الوضع الجديد وتعود نفسها انها حتي لو مش بتحب الشخص الجديد ده لكن المفروض تحترمه
بكرر .. ده لو مش في وقت كافي بين القصه الاولي وارتباطها بحد تاني

================================
السؤال الثامن :
---------------
لو قابلت الحبيب القديم صدفه هتتصرف ازاي هتكلمه ولا هتتجاهله ولا هتبصله وتمشي وهتعرف حبيبك بالموقف ده ولا لأ
---------------
ووووووووولا الهوا
ولا كأني شفت حد أصلاً
هاتجاهله تماما وبالتالي مش هاحكي علشان ماثيرش غيرة أو ضغينه أو أفكار سودا
لكن لو هوا بادر بالسلام ممكن أرد بعدم ترحاب ( أصلي غلسة شوية)
وساعتها لازم أحكي وأعرّف شريكي بس من باب الفكاهه وان الأمر مش الحدث الجلل يعني ولازم يحس كمان ان المقابله دي ماسابتش أي أثر ولم تثر ذكري واحده
ده المفروض انه يكون حصل فعلا ومايكونش ليها تأثير

===============================
السؤال التاسع :
---------------
هل من حقك تحتفظ بمشاعر حب جواك لحبيبك القديم بعد الجواز من حد تاني
-------------------------------

كلا البته .. مش ممكن أبداً طبعاً .. غلط غلط غلط .. دي أسوأ أنواع الخيانه .. وليه أبدأ حياة جديده وانا لسة شايلة ولو ذكري واحده

مانا لسة باقول لازم نقفل الابواب القديمة ونتخلص من المفاتيح
ولازم نغسل أرواحنا وعقولنا وقلوبنا وماتكونش في مشاعر مركونة
صاحب بالين كداب وخسران كمان

بصراحه الفكرة نفسها مقززة
ييييييييييييييي

================================

قربنا ولا إيه ؟؟

السؤال العاشر :
---------------
هل انت راضي عن قرارك بالمواصله في حياتك ونسيان الماضي وانك تكمل مع شريك حياه جديد وهتنسى الماضي وهتبني اسره جديده وحياه احلى ولا انت بس بتخدع نفسك وياترى كده بتظلم الشخص اللي هتختاره يكمل معاك؟؟؟؟؟
-------------------------------
بالطبع كل الرضا
وليه ماكونش راضيه عن نفسي
أنا ماظلمتش حد
في حالة اتخاذ القرار ده يبقي متأكدة تماما اني علي أول طريق جديد ومش هالتفت ورايا تاني
لازم الماضي يتنسي لأنك لو فضلت تبص عليه هاتفضل واقف مكانك تقدم رجل وتأخر التانية وتمشي خطوة وترجع عشرة
ومحدش خسران غيرك
مفيش خداع ولا ظلم
انت بتبدأ من جديد بروح جديده وقلب جديد وعقل جديد
كله جديد ف جديد
هاتبقي بتخدع نفسك بس لو ماخدتش وقت كافي تنسي فيه او انك زي مانا قلت بتحاول تداوي جرحك علي حساب حد تاني
بتهاديه جرحك عشان تتخلص من الالم وانت بكده بتجلب الالم للجميع
عاوز تبدأ من جديد لا لوم بس ابدأ صح

=================================

أخيراً خلصت
ياتري النتيجه هاتظهر امتي ؟ ابقي عرفني انا جبت كام من عشرة بس انا عاوزة نجمة لو سمحت

==================================

تحياتي وسلااااااااااااااااااام كبير أوي

lyssandra

Lyssandra يقول...

لسه سؤال كامي
ده عليه درجات ولا برة الامتحان ؟
ماعلينا

انا عن نفسي هاكتب
مش شرط كل تجربة بتحكي عنها تكون مريت بيها
ممكن جدا كلمه .. صورة .. موقف حصل قدامك بيلهمك تكتب
مش كل حد بيقدر يكتب
دي هبه من ربنا اننا نقدر نحكي عن نفسنا او اللي حوالينا
ومش معني اني حكيت 100 حكاية اني أكون عشتهم كلهم

الانتظار مش مفيد
لأننا هانخنق جوانا الكلام والاحساس
وبنسد أي طريق الكلام بيخرج من خلاله
ممكن بعدها لو مسكنا قلم مانعرفش حتي نشخبط ع الورق
وصعب اوي لما الكلام بيتخنق جوانا

وفيها ايه لما نكتب للحب نفسه .. والغدر نفسه
انا لما كتبت وتراهنا علي
لم امر بالتجربة دي ولا حد قدامي مر بيها
فكرة طرأت في بالي اتأثرت بيها وكتبت

طول مافي قدرة اني أكتب باكتب حتي لو أي كلام
انا قريت ان الكتابه مفيدة جدا للهدوء النفسي
ممكن تكون تنفيسيه او إبداعية أو أنواع تانيه مش مجال الكلام فيها حاليا

بس التنفيسيه دي لو بتحكي عن نفسك زي اليوميات والمذكرات
الابداعيه بقي مش شرط يكون مر بيها الشخص لكن ده نتيجة اللي بيقراه واللي بيشوفه وبيسمعه .. بيسجل ويرّكب ويحكي

----------------------------------

أتمني تكون اجاباتي واضحه علشان التصحيح

ههههههههههههه

------------------------

سلام
lyssandra

Lyssandra يقول...

علي فكرة
أنا نسيت

عندي مدونة جديدة للصور فقط
ابقي عدي شوفها

الدعوة عامه يا جماعه
انا ماعرفش طقوس افتتاح المدونات الجديدة بس كلكم مدعويين

بنت مصريه يقول...

على فكره التفكير ف الماضى
بيؤدى الى خراب ما بنيته ف الحاضر او ما ستبنيه ف المستقبل
والعشره الطيبه والمعامله الكويسه ف عيش الزوجيه كفيله انها تبنى اقوى حب ف الوجود

بنت مصريه يقول...

بوست جميل
اتمنى تنورنى

صوت من مصر يقول...

وحشنى البلوج بتاعك جدا تانى حاجه احنا شعب بيستعبط اه ينسى لا ان كان حب قديم او جرح او صاحب كله واحد

walaa يقول...

ايه الاعترفات الغريبه دى ا ايهاب
له كده
بص بقه

السؤال الأول : لو في جواك حب قديم او على الأقل ذكرى لحب قديم تعمل ايه؟

الحمد لله معنديش جوال اساسا هههههههه

السؤال الثالث: لو الجرح ده باين في عينك الحزن منه وماليك قوي تمحيه ازاي من عينك وتخفيه عن الناس

الحمد لله انا اصلا محبتش حد غيير جوزى هتقولى كدابه هقولك اه والله انا اصلا اتخطبت وانا فى الكليه واتجوزت بعد التخرج علطول
علشان كده ملحقتش احب حد غيييره
هههه
دانا حكايتى حكايه
السؤال الرابع: هل انت لو كملت حياتك مع حد جديد وحب تاني وارتبطت واتجوزت تبقى بتظلم الشخص اللي هترتبط بيه

معرفش والله انا اللى حبته اتجوزته

السؤال الخامس: هل الحب الجديد بعد الجواز يقدر ينسيك اللي فات وحبك القديم

بجد من اللى شفته قدامى البنت غير الولد بتقدر تنسى كل حاجه وزجها وبيتها ببقوا كل حياتها
مش عارفه بقه الناس ل
التانيه
السؤال السادس: هل من حق حبيبك الجديد انه يعرف بماضيك وحكايتك مع الحب القديم وايه هي الحدود اللي المفروض يعرف عنها وايه اللي ميخصهوش؟

انا اول ما اتخطبت حكيت لخطيبى على كل حاجه مش على حب ولا حاجه
بس حياتى السابقه وخلاص ومكنش فيها حاجه اساسا تستخبى
غير انى كنت بكلم صاحبى فى الدراسه ولاد يعنى وقالى امنعى علاقتك بيهم
وانا سمعت الكلام
كنت عله لسه هههههه
كفايه كده ا ايهاب
اصلها كلها بتتكلم عن الحبب القدم
وانا مشفتهوش اصلا
تحياتى ولاء

Unknown يقول...

برصاحة مش عارفة لو كنت فى المواقف دى حعمل
بس العموم أنا مابنساش حاجة بحبها بسهولة مبالك بنى ادم

سمية يقول...

شنكوتى
البوست الجديد نزل
بس انا عارفة هتقول يارتنى ما سألت و يا رتها ما نزلته

احب اعرف تعليقك عليه

إنجى يقول...

ازيك يا شنكوتى

انا مع ليساندرا فى رأيها مية فى المية

وهى بتقول

lyssandra يقول...
لسه سؤال كامي
ده عليه درجات ولا برة الامتحان ؟
ماعلينا

انا عن نفسي هاكتب
مش شرط كل تجربة بتحكي عنها تكون مريت بيها
ممكن جدا كلمه .. صورة .. موقف حصل قدامك بيلهمك تكتب
مش كل حد بيقدر يكتب
دي هبه من ربنا اننا نقدر نحكي عن نفسنا او اللي حوالينا
حكاية اني أكون عشتهم كلهم

الانتظار مش مفيد
لأننا هانخنق جوانا الكلام والاحساس
وبنسد أي طريق الكلام بيخرج من خلاله
ممكن بعدها لو مسكنا قلم مانعرفش حتي نشخبط ع الورق
وصعب اوي لما الكلام بيتخنق جوانا

وفيها ايه لما نكتب للحب نفسه .. والغدر نفسه
انا لما كتبت وتراهنا علي
لم امر بالتجربة دي ولا حد قدامي مر بيها
فكرة طرأت في بالي اتأثرت بيها وكتبت

طول مافي قدرة اني أكتب باكتب حتي لو أي كلام
انا قريت ان الكتابه مفيدة جدا للهدوء النفسي
ممكن تكون تنفيسيه او إبداعية أو أنواع تانيه مش مجال الكلام فيها حاليا

بس التنفيسيه دي لو بتحكي عن نفسك زي اليوميات والمذكرات
الابداعيه بقي مش شرط يكون مر بيها الشخص لكن ده نتيجة اللي بيقراه واللي بيشوفه وبيسمعه .. بيسجل ويرّكب ويحكي
..........

مش شرط نكتب عن حقيقة ، ممكن يكون ابداع او خيال خصب او موهبة حرام تضيع في انتظار تكوين تجربه جديده عشان تخرج من خلالها الكلامات


تحيتى

أنا و أنت يقول...

مدونتك جميله
وكلامك أجمل
تنم عن إن صاحبها يمتلك قلب ينبض بالحب

ليتني تسعفنى الكلمات مثلك و كامليا
أن اعبر ععما بداخلى من أحاسيس و مشاعر

mostafa rayan يقول...

بص يانجم انا لما احب حد ويجرح فيا طبعا هنساه هدوس عليه كليك يمين دليت
دليت فور ايفر من حياتي كلها دليت من غير ريكفر فور اول
ولوحسيت ان قلبي بيفكر فيه هدوس علي قلبي بالجزمةواقوله لازم تنساه
لكن هتعلم اني لمااحب جديد مايكونش زي التاني اللي جرح فيا
طبعا مش هقول لحبيبي الحالي لأن القديم مش هيكون له وجود في حياتي فليه نتكلم عن حاجة ملهاش اصلا وجود
وطبعا اكيد لما هشوفه مش هعبر اهله كأنه هواء كأنه مش موجود هو اصلا مايستحقش اني اروح واسلم عليه
ولو بكتب هكتب عنه في الأول بس لمجرد تفريغ شحنة الغضب اللي موجودة جوايا ناحيته لكن بعد كدة هاخد الورقة واحرقها علشان مايكونش في اي ذكري بتفكرني بيه
سلام ياصاحبي

الـسـيـدة نـون يقول...

ازيك يا شنكوتى

واحد من فرنسا قرا تعليقك عندى وكتبلك الاجابة
اللى هى معناها انا عندى خمسة وعشرين سنة
ابقى روح انت اقراها بقى علشان انا طبعا مش هاعرف اقولهالك

تحياتى ليك وسلامى لغادة
اختك خيخة

Unknown يقول...

مش عارفه اقول ايه؟

Ehab يقول...

كاميليا
انتي كمان يا عروستنا بتحجزي
من حقك مستنيكي خلاص

---------------

كامي
اظن اجاباتك مش محتاجه تعليق وعموما السؤال بتاعك تم اضافته للبوست علشان الكل يجاوبه

---------------

سميه

منوراني دايما بكلامك وبرأيك
ومش عارف اشكرك على ردك الطويل الجميل
بحبكم لما تقروا تردوا بالتفصيل كده
كده بحس انكم قريتم فعلا
نورتيني
سلاااااااااااااااام

--------------
محمد مدحت

يا سلام على المختصر المفيد
انت جبت المفيد يا جميل بجد
وعموما تابع بقيت الأجابات ياريت يعجبوك واكيد هنسمع عجب من الناس

اسمك على اسم واحد اعرفه انت بتشتغل فين

---------------------

المفقوعه مرارتها

تعالي يا مغلبه فوفا
عامله ايه
ماشي اجابات عامه كويس برده

ولو انك مشغوله بقصة حماتك اكتر من اي قصه تانيه
ربنا معاكي
هههههههههههههه

--------------------

الام وامال
كفايه بس انك نورتني في عز زحمة اوقاتك دي
وحشتني يا اجدع اخ
ربنا يوفقك

---------------------

بنت خيخه واي ....

طبعا رد فزيع كالعاده
جدعه يا خوخه

تسلم ايدك

--------------------

سمر الشافعي
ربنا يسعد ايامك
والحمد لله انك ممرتيش بالتجربه دي وربنا يديمها عليكي نعمه

سلااااااااااااااااااااااااااام

Nani يقول...

السلام عليكم
انت مقتنع بالكلام الي بتقوله ولا بس مجرد فكرة عم بتحاول تقنع حالك فيها؟
يمكن انت بتقدر تحكي لزوجتك انك حبيت وحدة قبلها وانتهت العلاقة
زوجتك امامها خيارين
1- تسكت وتتحمل اي هاجس ممكن يخطر ببالهاوتحاول تتغاضى عن اي تصرف يمكن انها تفسره انه مقارنة خفية غير مقصودة منك بينها وبين حبيبتك الاولى
او
2- تطلب الطلاق وتتحمل نظرة المجتمع العربي للمطلقة وتخسر بيتها او اطفالها

هل تعتقد انه حبيتك الاولى رح تحكي اي شي عنك لزوجها؟؟
طبعا لا
زوجها اكيدرح يطلقها بعد ما يكون فضحها على كافة الصعد العائلية
لانه مفهوم الحب مختلف بين الرجل والسيدة
هو معلش يحب ويكون اله علاقة سابقة للزواج لانه حبه شريف
هي ممنوع تحب لانها اكيد عملت اشي غلط مع حبيبها و شرف زوجها وابوها واخوها على المحك
من الافضل براي انه هيك موضوع يظل طي الكتمان افضل لكل الاطراف