الأربعاء، مايو 21

بتحبوا بعض....... ايه الدليل


بتحبوا بعض
يا كدابين بتحبوا بعض
ايه الدليل على انكم بتحبوا بعض
ايه اللي يثبت انكم دايبين في بعض
بتقولوا ايه
قال مشتاقين
ودي فيها ايه
لو مشتاقين يمكن يكون لأي شيء
مش شرط يعني تحبوا بعض
علشان يهب الشوق في قلبكم
بتقولوا ايه متقربين
ازاي يكون بقى قربكم
هو الدليل على حبكم
يا اغبيا
هو اللقا سر الهوى
بتحبوا بعض ده شيء كبير
محتاج دليل
وحاجات كتير
تثبت لنا وتثبت لكم
كده انكم بتحبوا بعض
عايزين تقولوا مالكش فيه
ازاي بقى
دا انا كلى فيه
وليا فيه
وحياتي بيه
وازاي اعيش من غير عينيه
ارجع يا واد منك لها
واتعلموا من عمكم
معنى الهوى
بصوا على عاشق قديم
غرقان لشوشته في الهوى
عنده الدليل مليون دليل
على حبه اللي مدوخه
مش زيكم
تايه ذليل
الحب لازم وياه يكون مليون دليل
لازم تدوق الويل وذله
تسهر دموعك فوق خدودك تلسعك
تسهر تنادي على القمر
تبعت معاه مليون سلام
يمكن كمان تسهر تحارب في الشيطان
وهو ماسك فكره واحده لحضرتك
ابعد وسيبها
دي مش تليق بحضرتك

تهجم عليه
تخرم عينيه
وتقوله هي مفيش كلام
هي الأمل
عايزين دليل
على اني فاهم ايه بقول
مش بس عامل فيه فالح والسلام
استنوا حبه هاقولكم
انا كنت بردك زيكم
محتار قوي
والشوق واخدني وهدني
والحيره ماسكه في النافوخ راح تخرمه
والشك فجأه مني راح
لما التقيت اسمي انكتب
على صفحه بيضا حنينه
الصفحه هي قلبها
وفي قلبها اسمي انكتب
وتحت اسمي اترسملي خط سير
روح من هنا
احود هنا
اطلع وعدي من هنا
وفي نهاية سكتك
توصل اكيد
لحته واسعه مبحبحه
تقعد وتتربع كمان
في عرشها
فاهمين يا بقره منك لها
بحبها

ومهما عدى على العيون
اشكال وناس بنحبها
بردك يا عمري بحبها
واشتاقلها
واحس هي لوحدها هاسملحها
تدخل وتقعد فوق عروشي وعشتي
فارس انا وبحبها



فارس انا دي بالعند في دوبه علشان بتتريق عليا اني بتكلم عن حصاني وقصري كتير البنت مش مصدقه اني كنت ابن السلطان بس انا اللي بتواضع معاكم يعني

هناك 23 تعليقًا:

رندا يقول...

جيت اقولك مش تعمل حسابى فى تانى تعليق لانى اول تعليق :)
وهرجع تانى لما اروح اقرا كويس

دمت انت اجمل شنكوتى
ودمت انا اول تعليق ههههه

رندا

سمية يقول...

دعنى اخلع القبعة و انحنى تقديرا لما كتبت ..

كنت ابتديت اقتنع
ان الرجاله كلها
كده بقت زى بعضها
محدش بيعيش
عشان حبيته لوحدها
دايما يكون فى حد غيرها
عشان الدلع و الفرفشة
وهيا بقى .. مش مهم
تغطس تموت او حتى تفطس
المهم انه بيجبلها
اكلها و شربها
وكمان برده بيقولها
كام كلمة كدة تسدها

ارجع ياواد منك لها
ادينى لقيت المعجزة
واحد اختار واحدة اهو وحبها
ما تيجى نتعلم بقة
مين عارف
جايز تبقى انت زيه
او حتى انا
جايز اكون زيها


لسة الدنيا بخير .. طالما لسة فى حبيبين بخير.. حتى لو كانوا اتنين بس ..

بجد ربنا يكرمكم و يكملكم حياتكم على خير

رندا يقول...

بتحبوا بعض واية الدليل
.....

انا قلت ميت مرة ليك ولها
بحبها وفى قلبى ساكن حبها
قولتوا كيت قولوا هيت برضة هفضل احبها
وفى قلبى ساكن عشقها
موتوا بغظكم منها
ماانا قلبى ساكن قلبها

قولتوا اية بكام ولية
ودليلها اية

مش كفايا يعنى نطقها
اةةة قلتوا هاتوة من ودنة شيلوة
علشان يفهم منها

مهما تقولوة او حتى شيلوة برضة هفضل جنبها

دليلك اية حكايتك اية تقصد تعيش فى قربها

مش هقتنع ولا ارتجع ولو الدليل عندها

هنمشى خلاص بلاش تزق خلاص سلمنا بامرها

كلماتك جميلة خلتنى اقولك الكلمتين دول ههههههه

دمت بكل حب وربنا يخليكم لبعض

رندا

أبو خالد يقول...

جميلة جدا يا إيهاب
و كم الأخلاص فيها عالى
هى دى صورة إيهاب الحقيقية
فارس نبيل مخلص لمن أحب
سعدت بقرأتها مرارا
دمت فنان مبدع

كاميليا يقول...

شنكوتى

رندا

هو فيه ايه؟؟؟

الحرب قامت ولا أنا .. باين عليا مش من هنا

اعلان بالحب والوفا .. يعنى خلاص قلبه اكتفى

الحب مش محتاج كلام .. محتاج أمان .. محتاج سلام

هابقي اكمل بعدين
ههههههههههه

تحياتى

قوس قزح يقول...

والشك فجأه مني راح
لما التقيت اسمي انكتب
على صفحه بيضا حنينه
الصفحه هي قلبها
وفي قلبها اسمي انكتب
وتحت اسمي اترسملي خط سير
روح من هنا
احود هنا
اطلع وعدي من هنا
وفي نهاية سكتك
توصل اكيد
لحته واسعه مبحبحه
تقعد وتتربع كمان
في عرشها

جميلة اوى

بس مهما اتقال عمر ما حد يقدر يوصف احساس الحب اللى هو حاسه و بيحس ان الكلام اقل كتير من احساسه

اول زيارة لى لمدونتك لكن بعد البوست ده مش هتكون الاخيرة ان شاء الله

ضد الظلم يقول...

رائع رائع رائع

ارجع يا واد منك لها
واتعلموا من عمكم
معنى الهوى
بصوا على عاشق قديم
غرقان لشوشته في الهوى
عنده الدليل مليون دليل
على حبه اللي مدوخه

فين الدليل
السهر والبكا مش دليل ولا ايه رايك

تحياتى
ابوالعربى

رئـــــيسـة حزب الأحلام يقول...

الحب اليومين دول كلام وبس لكن افعال وتصرفات متلاقيش
جمييييلة الخاطرة دى
تحياتى لك

حماتــــــــــــي ملاااااااااااك يقول...

حمد الله علي السلامة
انت فين ياراجل ؟
بقالك مدة مش بتكتب جديد

انا ليا سؤال تعليقاً علي البوست ده
هو يعني أيه حب ؟؟؟؟؟؟

Soooo يقول...

----
سمعت؟؟؟؟
ده صوت تسقيفي على كلامك يابو الشناكيت
برافو برافو برافو برافو بجد

مش عارف اقولك ايه
الحاله حلوه قوي ياد
قوييييييييي
وبسيطه وصريحه ومباشره ومعبره ووووو
يخرب بيت كده
بجد حلوه قوييييييي

ربنا يارب يوفقك ويكرمك ويسعدك ويحبب فيك خلقه وينولك مناك يابو الشناكيت ياصاحبي

ملحوظه
انا باستمتع لما باشوف كزا مدون بيردو على بعض بالشعر زي مارندا وسميه وكاميليا بيعملو
والله العظيم باحبكوووووووووو


سلاموووووووووووز

رندا يقول...

ابو الشناكيت يعنى انا برد على الى بيسئل عن اية دليلك فى الحب
وكتب كلام عنك كانك انت الى بدافع
عن الحب
وتقوم هوب تخبطنى خاطرة جامدة عندى طيب روح شوف الرد بقى هههههههه
على فكرة كلامك روعة بجد انت شاعر جامد جداعجبنى جدا كلماتك ودفاعك عن الرجل


دمت مبدع

رندا

Doba يقول...

ماشى تقول تتربع على عشتك بس بلاش بقى موال القصور والفرسان اللى انت عايش فيهم

حلوة قوى يا ايهاب
اينعم كان بلاش كلمة بقر لكن بجد رتمها حلو قوى

ويابختها اللى بتقدر تطلع كل الحاجت الحلوة دى كلها

ربنا يسعد ايامك ويجمعك بغادة على كل الخير

هبة

Doba يقول...

حاول بجد تجمع زى مقولنا اللى بتكتبه فى التعليقات لانه بجد بيبقى تحفة

وبجد كلمات البوست حلوة قوى قريتها تانى وتانى

يلا باى يا اجدع فارس فى الساحة
سلام يا صديقى الصدوق
تيمون وبومبا

هبة

كوارث يقول...

علشان يهب الشوق في قلبكم
الجملة الوحيده اللى حاسس انها خرمت القصيدة
القصيدة جميلة جدًا واستمتعت بقراءتها جامد ابداع فعلاً
واضح انك شاعر متميز ومتمكن جدَا من كلماتك
ومسار القصيدة نفسه صح .. ودايمًا ببقى نفسي اسأل كل اتنين بيحبوا بعض ايه الدليل ؟
لان لو دوروا عالدليل من الاول وطابقوه كانت قصص الحب بتاعت بير السلم ده كلها اختفت !
ملحوظة أخيرة
انا مش بقرة :D

lyssandra يقول...

جميل جميل جميل .......
تصفيقه حادة بجد..
اعذرني لأنه رغم ان الكلام عجبني فعلا
بس ضحكت أكيد ..
مش عارفه بس الحرفيه الجامده والثقه
في انك فاهم جدا واللي بتوجهلهم
الكلام مجرد أطفال .. أو مش فاهمين
حاجه .. الصورة دي خلتني أضحك خصوصا لما قلت يابقره ..
ههههههههههههههههههههه



بس بجد جامدة وأسلوبك فيها سلس جدا
بسيط وساخر وفي نفس الوقت واعي جدا

تقبل تحياتي

-----------------

علي فكرة .. عندي بوست جديد .. حضر
نفسك بقي للمناظرة يا إيهاب

سلام


lyssandra

shayma يقول...

حلوة اوى بجد
والردود عليها برضه حلوة اوى

بجد اسلوبها حلو اوى

سلامى
:))

بت خيخة وأى كلام يقول...

ايوة بحبها مش عجبكم كمان انى بقول لها
طب طز فيكم كلكم وانا يهمنى ايه منكم
كفاية ان حبيبتى وانا دايبين دوب فى بعضنا
كفاية ان الشوق مبهدلنا سوا
كفاية ان الشيطان اللى حاربته انا هى كمان حاربته و يمكن اكتر ما حاربته انا
كفاية انى بشوف نفسى فى قلبها
وهى جوة قلبى شايفة نفسها
ايوة بعلنها على الملأ
غادة بحبها
واللى فيكم مش عجبه حبى ليها
يخبط دماغ حضرته
فى اى حيطة تكون قصاد جبهته
ويارب تكون الخبطة جامدة
وراسه مش بس تورم لا كمان دى تخر دم
وياريت قبل ما يورينى جمال خطوته
يمسح الحيطة من اثار خبطته

الشنكوتي الكبير يقول...

رندا
انتي بتذهليني بكلامك سواء الأولى او الأخيره في التعليق وجودك يشرفني

نورتيني

----------------

سميه

سيدي يا سيدي على الكلام اللي خارج من القلب

تسلم ايدك يا سميه
كتير بحتار فيكي ازاي جواكي المشاعر دي كلها والأحساس ده كله ومع ذلك واقعه في مشكلة زي اللي بحسها في كلامك دايما
ربنا يسعد قلبك
وسلميلي على العروسه القمر بتاعتي اللي عندك

----------------------

رندا
تاني برده بتكتبي كلام جميل قوي قوي

تسلم ايدك
ربنا يسعد قلبك
اتمنى نبقى اصحاب واخوات على طول وتشرفيني وتنوريني دايما بكلامك الجميل ده

سلااااااااااااااااام

--------------------
ابو خالد

ابي واخي العزيز

ربنا يخليك ليا ولكل المدونين ولكل الناس اللي بتحبك
كلامك دايما في دفء وحب جميل قوي
ربنا يعزك ويحميك

سلاااااااااااااااااااام
--------------------

كاميليا


كنتي كملتي علشان نبقى انا وانتي ورندا وخيخه مسلسل فزيييييع

ربنا يسعد قلبك دايما ويحميكي يا اجمل اخت
افضلي ادخلي قلوب الناس كده يا سوسه وعششي جواهم براحتك

سلااااااااااااااااااااام
اخوكي ايهاب

------------------------

قوس قزح

نورتني في اول زياره ويارب متكون الأخيره

ومعاك حق محدش يقدر مهاما حاول يوصف احساس الحب الحقيقي

------------------

ضد الظلم

بص يا ابو العربي انا سعيد بزيارتك جدا
واتمنى تكون دائمه
السهر والبكا برده مش دليل تصدق معاك حق

----------------------

رئيسة حزب الأحلام

يا ساتر على النظره التشائميه
ليه كده يا بنتي

اقولك اليومين دول الحب قليل لكن مينفعش اقول الحب كلام والا يبقى مش حب اصلا
مادام حب يبقى مش مجرد كلام
اما اللي مجرد كلام وخيال يبقى افتتان وانبهار او يمكن اعجاب
الحب صعب قوي تلاقيه
ولما تلاقيه هتلاقيه صعب قوي ومتعب جدا صدقيني

-----------------------

حماتي ملاك

منوراني يا مجننه حماتك

الوليه العسوله حبيبة قلبي عامله ايه معاكي

فوفا يا قمر

انا جيت اهو انتي عامله ايه بقى

---------------------


سووووووووو

حبيب قلبي واخويا الجميل

اقولك ياد انا عمري ما قابلتك انما بستجدعك قوي
وحاسس ومتأكد جوايا انك الصاحب الجدع قوي اللي فعلا يقف وينفع في الزنقات بعيدا حتى عن التدوين وغيره
بحبك في الله يا جدع اخ

تحياتي اخوك ايهاب

----------------------

رندا
يا سكره انتي اللي بتنكشيني بكلامك
زي كاميليا برده مبقدرش اسكت
عموما انا شفت الرد ومتابعك على طول

سلاااااااااااااام

---------------------

دوبا اختي العزيزه

ربنا يسعد ايامك

بس متتريقيش على الحصان بتاعي تاني انا بقولك اهو

سلااااااااااااااااام

------------------

دوبا

هاحاول اجمع اللي اقدر عليه انشاء الله

-----------------

كوارث

ليه يا ابني الأسم الفزيع ده

عموما شكرا على كلامك الطيب
اتمنى دايما اسلوبي ومدنتي تعجبك ونتشرف بيك على طول

---------------------


ليساندرا

يا فندم انا هاجيلك دايما للرد على بوستاتك التحفه من غير ما تدعيني راشق عندك على طول
اسلوبك جميل قوي دايما
ممكن في بوست عندك من تلات سطور تقولي كلام اخلى من كتاب كامل
بجد بحب اسلوبك السهل الممتنع ده
تسلمي ومنوراني دايما

----------------

شيماء

ربنا يسعد قلبك
وتنوريني على طول

سلاااااااااااااااااام

--------------

بنت خيخه و.....كلام

انتي يا بنت ايه الحاجات الجامده دي
ده انت مش صحفي بس ده انت كمان استاذ شاعر
سيدي يا سيدي
بختك يا عم هاني بقى

ربنا يسعد ايامك ويفرح قلبك ويحفظك ويكرمك ويبارك ليكي

سلااااااااااااااااااااااااااام
اخوكي ايهاب

appy يقول...

هههههههههه انت مالك بهدلت الناس كده يا عم طيب دخل الطبنجه بس السلاح يطول
بجد حلوة قوى
ويعنى هخلى دوبا على طول تستفز فيك يا ابن السلطان علشان تكتب كده

shahy يقول...

ياخبر ابيض
انا عجبني الكلام اوي وقلت ادخل اعلق لقيت في خناقات وكلام كبير خالص

عاوزين كلام زي دة تاني كتير اديك شايف كلامك عمل اية في الناس

دمت بكل ود ياشنكت
السلام امانة لبنات شبرا

نسر الشرق يقول...

السلام عليكم

دى اول زيارة لية

هذة المدونة جميلة ودماها شربات

سلااااام

appy يقول...

اولا انا زعلانه منك لان الخطوبه لسه من اسبوعين بس
ثانيا انت عارف انى بلطجيه من قبلها ههههههههههه وخرفانى مبهدله الدنيا
وبعدين انت بتختفى فين كده فجأة

فارس بلا جواد يقول...

بصراحة كنت داخل اعلق علي البوست الجديد بس لاقيته لسه ما نزلش .. لكن حمدت ربنا اني قريت الشعر الجميل اللي انت كاتبه ده
كل واحد ليه وجهة نظرة في الحب .. يعني لو سالت حد ليه بيحب هتسمع اجابات مختلفة من كل واحد ..
اتمنالك التوفيق .. وياريت تنورني واسمع رايك