الجمعة، فبراير ٢٩

نفسي الاقي بيتنا....بعد ماسبتك عند المترو

تحديث
انا كاتب حاجه خياليه مش واقعيه يعني غ مش بتشرب سجاير ولا انا كمان يا جماعه
ومبحبش شرب البنات او الرجال للسجاير عاده مش لطيفه خالص
لكن هو الكلام جه كده على اساس القصيده اللي انا اتأثرت بيها وكتبت الكلام ده

انا كنت في مدونه همسات


وعجبني قوي بوست هناك


فعملت فيها الشاعر العالمي ورحت كاتب كلمتين من نفسي يا جماعه


اشمعنى انا يعني اصله بصراحه فكرني لما بوصل غاده للبيت واسيبها عند المترو








واقف جنب المترو بفكر
يعني خلاص هتسيبني وتمشي
اصل خلاص المترو هيجي وهي هتركب
يمكن ترفض تركب فيه
يمكن تلقى المترو زحام
تصبر تاخد واحد تاني
وانا هاستنى معاها المترو لحد مايجي ياخدها ويرحل
هافضل اسرح ويا المترو لما هيمشي وهي معاه
هافضل افكر لما هتوصل مين هيكون على بالها كلامه
مين راح يشغل بالها خيالها
فجأه لقيتها مدت ايدها على جيب جاكتي
اخدت منه الولاعه
وحتى سجايري اخدت واحده
بين شفايفها اتغرس الفلتر
طرف سيجارتي ناره تنور
كنت اتمنى ابقى مكانه
لكن نار اشواقها وحبي دي بتحرقني
خفت عليها
مسكت ايديها
اوعي يا عمري تأذي شفايفك من دخاني
اوعي وحاسبي بنت جميله رقيقه في سنك
ليه بسجايري تلوثي نفسك
شفت في عينها نظره عارفها
جوه عيوني في اخواتها
نظره وكلمه قاللولي حكايتي هي حكايتك
وجه المترو وركبت جنبي
انا مقدرتش اسيبها وامشي
رحت معاها لحد شارعها
وهناك شفت البيت والناس
وهناك تهت من الأحزان
اصل لقيتها بتجري سابتني
راحت على باب بيتها ودخلت
وانا من يومها بعدي استنى يمكن تخرج كده بالصدفه
او يوم حتى اسمع صوتها
انا ملحقتش امسك ايدها انا ملحقتش ادوق شفايفها ولا خدودها
بكره هيجي اليوم واشوفها
والمس ايدها
بكره هتيجي واشوفها واخدها جوه في قلبي
لكن لما انا شفتها بكره
ولا قلتلها ولا خبتها جوه عيوني
ولا حتى قدرت اكلمها وافهمها
كل اللي قدرت اني اقولهولها
اني امبارح بعد ما سبتك
تهت في شارعك
واني لحد اليوم ولبكره هفضل ماشي ادور يمكن اعرف ارجع واوصل بيتنا






اتمنى يكون عجبكم وميكونش سخيف قوي يعني


سلااام
==============

تحديث تاني
ده تعليق كاميليا اختي ربنا يسعدها

"لما المترو اتحرك بيا
حسيت حاجة خطفت قلبى
وصورة حلوة جوا عنيا
وشوق وحنين مقدرتش اخبى
ولاقيت نفسى بطلب رقمه
عايزة احس انه معايا
رد عليا .. همست باسمه
ضحك وقالى احنا حكايا
قولت وحشت قلبى طيب
قالى ياريتنى كنت قريب
قولت تعالىقالى ياريتنى كنت معاكى

كاميليا

هناك ١٩ تعليقًا:

أبو أمك يقول...

خوفه عليكي من التدخين ده ليه علامة
ده مش خايف على صحتك...ألـف سلامـة
ولا خايف من تفكير الناس وكلام وملامة
بس يا غادة لو ولعتي سيجارة في المترو
هاتاخدي غرامة

فرنسا هانم يقول...

يعنى انت وصلتها وعرفت بيتها
وبعدين تانى يوم شفتها
طيب ليييييييييييه
سؤال
ليه مقولتلهاش هاتى السيجاره بتاعتى ؟
او
ولعى يا موزه - احنا مش فى بنزينه

الـسـيـدة نـون يقول...

سخيف ايه بس
يا ايهاب انا جسمى قشعر
بجد ربنا يحميك انت مافكرتش تجمع اشعارك دى
بس انا كنت عايزة اسأل سؤال بايخ اوى
هى غادة بتدخن؟
سلام
اختك خيخة

الساحرة يقول...

ازاي تسمحلها تدخن انت مش عارف
ان التدخين ضار جدا بالجيب
وبعدين عرفت بيتها لما توحشك روحلها
حلوة اشعارك ولو انها ريحتها سجاير
حلوة بجد
تحياتي

Ehab يقول...

ابو امك

اه طبعا لو خدنا غرامه هاتدايق قوي ادفع ليه عشره جنيه انا يعني

ههههههههههههههههه

نورت يا باشا

------------------

فرنسا هانم

يا ساتاذه ولعي يا موزه ازاي يعني
انتي عايزه عمي (ابوها يعني) يخلص عليا

ما علينا
نورتيني
--------------

بنت خيخه و....كلام

الله يكرمك دايما رافعه معنوياتي

انا مش بدخن خالص وغاده طبعا مش بتدخن
كل الحكايه ان البوست اللي خلاني اكتب كان فيه موضوع التدخين فالفكره دخلت في الموضوع بس مش معنى كده ان غاده يتدخن
انا يعني حبيت اشبه فكرة ان اللي بيحب عايز يقلد حبيبه في كل حاجه
بس الحمد لله انا مش بدخن اصلا

نورتيني

-----------------

الساحره
اهو لو على السجايز هرش معطر جو علشان خاطرك يا ستي
والحمد لله هي مش بتدخن ده خيال شعراء يا ناس

سلاااااااااااااااااام

Unknown يقول...

العزيز
الشنكوتى الكبير
هذه زيارتى الاولى لك وكم كانت سعادتى بهذه المدونة المختلفة والصراحة التى تهل علينا بين كلماتها والحمد لله انك عرفتى من الاول انكط مش شاعر كنت هزعل فعلا انت بتحاول تقول ...على العموم تجربة جيدة حاول تانى اكيد هتكون احسن
طبعا الشطر الموجود بتاع
( مدت ايدها فى جيب جاكتى )
ملوش داعوة بالشعر مش عارف انت مبتغيروش ليه
-----------------------
اخى الفاضل
انا من مؤسسى اتحاد المدونيين المصريين وادعوك للتواصل معنا من اجل اتحاد قوى يضم جميع مدونى مصر للعمل على تقنين حقوقنا وحماية المدونيين والرقى بعملية التدوين
فى انتظار تواصلك معنا على مدونة الاتحادhttp://egyptadwin.maktoobblog.com
------------------------
للعلم انا عملت هذه المدونة للتواصل مع مدونى موقع البلوج سبوت
فاتمنى مساعدتى للرقى بها
شكرا لكم مقدما

simple girl.. ..simple dream يقول...

حلوة اوى ورقيقة جدا يا ايهاب
ليه بتقول عليها وحشة بس
انت برضه كنت سايبلى حاجة فى الكومنت عندى برضه كانت جامدة اوى
بس انا زعلانة منك
بتقولى ايه اخبار الوااااد ؟؟؟
انا يتقالى اخبار الواد
ماااااشى
انا هجيب الواد ونيجى مناقشة كتاب هبة واخليه هو الى يرد عليك بنفسه

simple girl.. ..simple dream يقول...
أزال المؤلف هذا التعليق.
ملك الكبدة يقول...

بصراحة تااااااااااااامة

انا بحقد عاسيجارة زيك تمام

و شنكتها كمان و كمان يا مان

احلى حاجة في الموضوع ان مافيش صور ميتافيزيقية و دلاالات بلاغية و استعارات فحلقية

احبك و انت في الدوغري

كاميليا بهاء الدين يقول...

لما المترو اتحرك بيا
حسيت حاجة خطفت قلبى

وصورة حلوة جوا عنيا
وشوق وحنين مقدرتش اخبى

ولاقيت نفسى بطلب رقمه
عايزة احس انه معايا

رد عليا .. همست باسمه
ضحك وقالى احنا حكايا

قولت وحشت قلبى طيب
قالى ياريتنى كنت قريب

قولت تعالى
قالى ياريتنى كنت معاكى

كاميليا

Empress appy يقول...

لا بجد كلام بسيط كده خالص وحلو
بقولك ايه سيبك من اللى بيقولك التدخين مضر بالصحه ده اى كلام مالها لوزة سيبك من السجاير
اقولك على حل روح لها كل يوم فى مواعيد مختلفه يمكن تشوفها

الـسـيـدة نـون يقول...

ايوة كدة طمنتنى اصل انا حسيت من زمان انك مش نوعية الرجالة اللى بتدخن ولا حتى تسمح لمراتها بالتدخين
فاستغربت اوى على القصيدة وافتكرت انك تقصد غادة
الحمد الله طمنتنى
واحب اعتذر عن سوء الظن بيك وبغادة
سلام يا ايهاب
اختك خيخة

قلوب بتغنى يقول...

صباحو ياعم الحساس
ايه الحس العالى ده
انا كمان مببقاش عاوزه اسيبه
بس للاسف هو بيمشى بسرعه مبيحسش بالى فقلبى
جميل الى انت كاتبه

Doba يقول...

جميلة كلماتك
رقيقة مشاعرك

حسيت ان السيجارة بسمة جميلة نفسك تخطفها من شفايفها

تحياتى لغادة اللى مالية حدودك
ولعلقك صاحب الكلمات الشعرية المبعثرة والمتناثرة المعبرة

هبة

صوت من مصر يقول...

جايرنال احنا انكتب علينا سجايرنا تبقى واحده يعنى اديكى سجاره تدينى سجاره اولعلك بالولاعه تطفيها وتقولى هوف
هايل يا شنكوتى

حواء يقول...

فعلا التدخين عادة سيئة جدا ومؤذية للر بيشرب واللى غصب عنه بيستنشقها من اللى حواليه وهى سيئة للصبيان والبنات بصرحة مش بحس ان البنت اللى بتشرب سجاير انها انثى .. ربنا يهدى

SomeOne يقول...

الباشا الكبير

مشاعر جميلة بجد

وشعر أجمل

انت وهدي وكامليا

بس اية اللي خلاك تتخيل انكم بتدخنوا انتوا الاتنين

اكيد دي رغبة دفينة في اللا شعور بتاعك
:)
:P

ولا اية ؟؟

غير معرف يقول...

يا عينى ياعينى وكمان بتكتب شعر
:))

حلوة اوى يا شنكوتى

وحلو جزء كاميليا اوى

سلامى
:))

3abdo me7tas يقول...

ايه ده يا مان
ايه دا كله
طلعت فنان من ورانا ولا ايه
اكتب تانى ورينا
لما المترو يعدى علينا

يلا كفاية كان نفسي أكتب لى بيتين كده بس يلا ملحوقة
:]
تحياتى