السبت، أغسطس 18

شبرا وبنات شبرا ......ورقصني مع بنات شبرا


انا لمن لا يعرف بموت في حضور الأفراح عشان كده تلاقيني في كل الأفراح في البلد عندنا موجود عشان استمتع باللحوم الفظيعه والأكل اللي يهبل وفي افراح اصحاب عبده اخويا بكون موجود اتفرج على المسدسات وهي بتفرغ عشرات الطلقات تحيه للعروسين وساعات يخلوني اجرب اضرب طلقه او اتنين عشان يفرحوني وطبعا بخلي عبده يصورني وانا ماسك المسدس ويا سلام على افراح هبه اختي واصحابها في الغالب بتكون في نوادي او قاعات الشرطه والجيش وطبعا انا لازم اوصلها امال يعني اسيب اختي لوحدها وبحب قوي الديك الرومي اللي بيعملوه في البوفيه لكن في ايضا افراحي انا بتاعة زمايلي في الشغل اللي في الغالب بتكون في شبرا وانا اصلا من عشاق شبرا وبنات شبرا طبعا مش بعرف اعاكس حد عشان ميصحش الناس تعزمني وانا اقل ادبي واصلا انا بطلت المعاكسات بعد كلمه قرأتها عند ميس ايجيبتيانا ترابد سول

المهم طبعا عارفين انا بموت في الأفراح دي عشان الرقص مفيش دلوقتي بنات كتير بترقص في الأفراح الا نادرا في الغالب الشباب بتاكل الجو وبنفضل نرقص ونتنطط طول الليل وبروح هاموت من التعب المهم اني المره دي يوم الخميس اللي فات رحت فرح في شبرا وطبعا لقت دقني وحطيت البرفان اللي فاخر جابهولي في عيد ميلادي هديه وضربت الحته اللي على الحبل ورحت اقابل العيال عند نفق شبرا عشان مش عارف العنوان وفعلا قابلوني ورحنا الفرح وبدأت المزيكا والأغاني والليله كانت تجنن لكن فجأه جه واحد زميلنا اسمه سيد ومعاه نورهان بنت اخته طفله زي العسل لأ دي هي العسل نفسه حوالي خمس سنين هو عمرها وطبعا طولها ميعديش ركبتي بحوالي عشره سنتيمتر وكرشها قدامها يفطس من الضحك وقفت وسط الناس احنا بنرقص وهي عماله تسقف وعايزه تدخل ترقص معانا طبعا ممكن اي واحد زي الحيطه يدوس عليها يفطسها رحت اخدتها من ايديها وقعدت انا ارقص معاها وسط الشباب وهي انطلقت على الأخر عماله تحاول تعمل زينا في كل حركه البنت كانت حتة سكره تحاول تسقف بكف ايدها الصغنن وانا عمال اضحك واشاور لها تقرب لي عشان نرقص ورحت شايلها وقعدت الف بيها في الهواء ونزلتها انا دخت وهي ولا هي هنا عماله تضحك وبرده عايزه تكمل رقص وكل ما اروح ارتاح على جنب الاقي ايد بتشد البنطلون اتاريها هي برده وتشاورلي كأنها هي اللي هترقصني تعالى تعالى اقوم اروح معاها وقفت ترقص قدامي فنزلت على رجلي عشان اكون طولها ورحت مميل على الأرض وراسي للخلف وهي فضلت تضحك اول ماانا عملت كده رحت جيت اقوم راحت مشاوره تاني تاني قلت حاضر يا ستي عشان خاطرك المهم احنا كان الوقت اتأخر خالص وقررت اني امشي وكام واحد تاني ندهت لسيد خالها عشان ياخدها وهي مش عايزه تمشي طبعا بس قالها يا بنتي امك هتموتني وعرفت ساعتها منه انها من شبرا قلت يا خبر هو البنات الشبراويه بيبقوا سكر كده حتى وهم لسه ضغننين قوي كده

الحمد لله انا ناوي اتجوز من شبرا انشاء الله

اللي يكون عنده فرح قريب يبقى يعزمني يا جماعه

تحياتي للجميع وانا انشاء الله لما اجي اتجوز هاعزمكوا برده

هناك 21 تعليقًا:

shahy يقول...

مش كنت تقول لنا على المواهب دي من بدري
انا كان عندي خطوبة بنت عمتي يوم الاربع اللي فات وعملنا الخطوبة عندي في البيت
يا خسارة لو كنت اعرف انك بتحب الهيصة كدة كنت قولت لك وكانت الرايقة والجبارة رقصوا معاك
يالا بقى مش لينا نصيب
المهم تعزمنا في فرحك واوعى تنسانا وتبقى عاوز توفر في المصاريف ههههههه
وربنا يتمم لك بخير مقدما

سلام يا عريس المستقبل

عاليا حليم يقول...

حمد الله ع السلامة انت كنت مختفى فين ؟
أيه نظام الأرفاح و الحاجات الجامدة دى شكلك كده اصلك صعيدى او من الأرياف عشان موضوع المسدسات الى فى افراح اهللك ده
شد حيلك كده بس و انا عندى ليك عروسة قمر من شبرا

ولــــــــــو يقول...

سبحان الله انا عكسك تماما
مش باحب احضر افراح الا في اضيق الحدود واقرب الاشخاص
مش عشان كئيب لكن انا بطبعي مش باحب الدوشه والزحمه
ودول هما الكلمتين المرادفتين لكلمه فرح
ربنا يجعل كل ايام المسلمين افراح
وعقبالك

الشنكوتي الكبير يقول...

شاهي
يا بنتي عيب كده يكون عندك فرح وتنسي تعزميني انا كده هازعل بجد وعموما في فرحي انشاء الله انتي مش محتاجه عزومه انتي والأستاذ ابو الدراويش
ده انتم تنوروني
سلاااااااااااااااااام
______________________
عاليا حليم
الله يسلمك يا سكر
بس انا مش بتكلم عن افراح البلد لما قلت المسدسات لأن في البلد الشرطه منعتهم تماما من استخدام السلاح في الأفراح انما هنا في الأفراح بتاعة اصدقاء عبده اخويا بيجيبوا مسدسات صوت كنوع من الهيصه
عموما نورتيني بس يا خساره انا خلاص حجزت عروسه من شبرا زي القمر ما اظنش انها تتعوض
__________________________

ولو
يا عزيزي وصديقي ليه بس دي الصحبه في الأفراح تجنن والهيصه تنسيك كل المشاكل وكأنك عايش بشخصيه مختلفه تماما
جرب تروح افراح لذيذه مع شباب روشه وانت هتدعيلي
سلااااااااااااااااااااااام

keda-sponser يقول...

شنكوتي باشا

أفراح .... ده الواحد بيتهد حيله فيها .... يا سلاااااااام

بس أسوأ حاجه .... لو فرح حد قريبك قوي .... هتلاقي نفسك بتجهز للفرح معاه طول النهار ... وعقبال ما يبدأ الفرح الواحد يلاقي نفسه روبابيكيا.... مش نافع خالص

عموما ألف مبروك يا باشا

و بمناسبه الفرح عندي ليك مفاجأه


سفاح كرموز باعتلك الفصل الرابع من القصه .... مستنينك يا باشا .... ما تتأخرش علينا فيه بقى

سلااااااااااام

مريم يقول...

وكمان بتميل لورا ده انت مسخرة انسانية
وبعدين انت سيحت لنفسك جامد فى موضوع البوفيهات ده
بس نصيحتى ليك اوعى تعمل العمايل السودا دى فى فرحك اركز كده عشان الليلة تعدى على خير
هههههههههههه
الا بالحق هوه الفرح امتى عايزين نفرح فيك بقى

Queen eraser يقول...

شكلك بتموت ف أغنية ريكو بتاعت شبرا دانت حتى مقتبس جزء منها ف العنوان..

شكلك بتحب الهيصة و الفرفشة. شنكوتى بقى و بمناسبة ان البنات بطلو يرقصو دى ملاحظة صح جدا و انا موافقاك بس الموضة بقى ان البنات الصغننين همه اللى بياكلو الجو و مش بيتكسفو خالص.
الحمد لله انك فرفشت و غيرت جو و ان شاء الله تعزمنا ف فرحك عشان نلحس البوفيه.. :)

Doba يقول...

يا بنى مش هتلاقى جو اساسا زى الافراح اللى بتتعمل فى شبرا - فلها رونق خاااااااااص جدا جدا - معلومة يلا حطها فى القاموس عندك - الشبراووين جدعان جدا ولو زعلو بيزعلو بجد ولو فرحو بيقلبو الدنيا بفرحهم - ياريت يا عم تتجوز من شبرا - هتتجوز واحدة جدعة جدا ولو لفيت مش هتلاقى فى صلابة عقلها وقوة منشأها

طبعا هيطلعلى واحد من الجماهير ويضربنى بطوبة - بس انا ولا يهمنى هجيبلكو حد من الشبراوية بتوعى يقطعوه

تحياتى - وعقبالك يا اخى العزيز انت وووووووووووو!!!! ولا بلاش نسيح بقى

سلام يا صاحبى
هبة

safa7_karmooz يقول...

ههههههههههههههههههههههههه

تعال بقى استلقى الحمل واكتب الجزء الرابع

انتظار مؤقت يقول...

صديقي العزيز حبيت اعدي بسرعه و اشكرك على سؤالك عني و انا مسافر و امنى انك تكون قضيت صيف جميل انا اتبسط جداا في مصر و اسكندريه و مارينا و كل حته في مصر كانت جميله اتمنى انك بخير و تحياتي

Antony يقول...

عموماً كويس أنك قلتلنا علي المواهب الفذة في الرقص ديه ، يمكن تنفع ... أنا زيك بحب الأفراح لكن مش غي كل مكان ، فيه أماكن مش بحب أروحها ، بس أنا مش عندي مواهب زيك كده ... بس بجد لو جالي فرح محتاج حد يحركة هقولك علي طول ... واضح أنك خبرة ، ولما نشوف هتعمل ايه في فرحك ، بس أوعي تكون العروسة مش بتعرف ترقص ، بيني وبينك تبقي شكلها مش حلو خالص ... بس أنا واثق فيك ، وعموماً ممكن تحترف ده الرقص بيكسب أوي بس بصراحة هيبقي ليك منافسين كتير علشان مصر بتطلع حوالي 7200 راقصة في السنة ، يعني بمعدل عشرين رقاصة في اليوم
أشوفك في الزقة الجاية وأنت بتنقط سلام

shix يقول...

والله معاك حق فى حبك للافراح
ايون الفرحه حلوة
لو عندك فرح قريب تبقى اعزمنى بقى لانى نفسى ازور شبرا
سلام

Olivia يقول...

اية يا شنكوتى المواهب دة كلها على رأى اللى قال سبع صنايع بس بجد اة لقمة عيش يعنى محدش ضامن الايام اهو يكون معاك وظيفة محدش يقدر يخدها منك على فكرة استعد هاعزمك قريب فى فرحى بس عايزاك اية تشرفنى كدة وبعدين بنات اية ورقص بنات اية دول راحت عليهم خلاص انتو اجدع واروش واحدث ربنا معاك وتلاقى اللى يقدر موهبك ويجبلك عقد عمل فى دول الخليج على فكرة انا زيك كدة بموت فى حضور الافراح بس الافراح الشيك اللى بتكون فى فنادق سلام يا شنكوتى وبقى عرفنا على مواهب تانية زى العسل كدة olivia

الشنكوتي الكبير يقول...

كده سبونسر
يا باشا الله يكرمك وتشكر على القصه ويارب يكون عجبك اللي كتبته
الناس كلها عاجباها الفكره وعايزه تشارك فيها بعد اذنك هاندخلهم
_____________
مريم يا سكره اسكندرني
ايه يعني لما اديها شوية حركات في الأفراخ خليكي فريش في الأفراح وبعدين اعزميني كده عندك وانا اوريكي
وبعدين متخافيش في فرحي هاقعد مؤدب
سلام يا سكر
________________
كوين ايريسر
يا اسكندرانيه ده انتي تنورينا في الفرح طبعا بس يعني هو انتي متعرفيش ايه اللي خلى البنات تبطل ترقص كده يمكن الرجاله اتنحررت اخيرا
ههههه
_______________________
سفاح كرموز
حصلنا الرعب يا معلم
عموما تشكر على الهديه الجميله وبرافو عليك في الجزء اللي انت كتبته بجد تحفه يارب جزئي يعجبك
نورتني
______________________
انتظار مؤقت
حمد الله على سلامتك يا صاحبي
نورت كل حته رحتها يا باشا ونورتني كمان هنا عايزين نشوف ابداعاتك بعد الفسحه
____________________
انتوني
ايوه يا واد دي تبقى شغلانه سقع قوي
بس انا مش هاخلي العروسه ترقص في الفرح ولا في غيره انا معنديش حاجه اسمها العروسه ترقص
انا ممكن ارقص بدالها
نورت يا ابني
هو انت يا عمنا مش هاتعمل مدونه ليك بقى شوقتنا اتشجع كده
__________________
شيكس
يا باشا نورتني وبعدين ده انا لازم اعزمك على فرح في شبرا بس اوعى تقولي مش بحب الرقص
لااااااازم ترقص
نورتني
____________________
اوليفيا
ماشي يا ستي مبروك الجواز بس اوعي تنسي تعزميني زي ما قلتي لحسن ازعل وبعدين انا لازم اشوف القمر ده وهو بيتجوز واصور الفرح كمان اديني بس العنوان ومالكيش دعوه انا هاجي يعني هاجي
سلااااااااااااااااااااام


اعذروني يا جماعه اتأخرت في الرد على التعليقات بس الظروف
وحشتوني كلكم
سلااااااااااااااااام

الشنكوتي الكبير يقول...

دوبه
يا هبهوب ما انا عارف هو فيه فالدنيا احلى من شبرا وبنات شبرا وناس شبرا كلهم
حتى الفرح الأخير شفت شوية بنات هناك قمرات كلهم ميعدوش الخمس سنين ومكدخلوش الحضانه حتى بس قمر يعني الجيل القادم هيشوف شوية بنات تهبل
نورتي يا سكره
سلااااااااااااااااام

dr.Roufy يقول...

طبعاااااااا أحلى بنات بنات شبرا

ودا مش تعصب ولا حاجة لبنات حيي القمرات
:)
عاشت شبرا حرة مستقلة

تحياتي

انتظار مؤقت يقول...

وحشتيني يا وااد اوي
تحياتي

الشنكوتي الكبير يقول...

dr roufy
الدكتورة الجميله الشبراويه اللي نورتنا ازيك يا سكره نورتي المدونه
تحياتي ليكي وشكرا على تعليقك الجميل وما دمتي طلعتي من شبرا تبقي حتة سكره
سلااااااااااااااااام

________________-

انتظار مؤقت
حمد الله على السلامه يا غايب انت وحشني اكتر يا جميل
عامل ايه يا ابني واخباراتك
نورت بعد غياب
سلاااااااااااااااااام

الشينيور يقول...

و أنا كنت فى البلكونا شوفت ولد بتاع الروبابيكيا راكب عربيه حمار فجأه جت عربيت بوليس فضربو وأبضو عليه



عاب على البوليس كده

Bacteria يقول...

السيد الشنكوتى الكبيرون
طريقه سرد سعادتك للأحداث طريفه جداً
بتفكرنى ب بكار و هوا بيتكلم هيعهيع
وغريبه قوى اول مره الأقى ولد بيحب الافراح
انا اكتر حاجه تقيله على قلبى هيا الافراح
وما بروحهاش غير لما اكون مضطره
بكره الدوشه والصوت العالى
والزحمه
واللى البنات بيعملوه هناك
لأ واكتر حاجه باءه بتشل انك تشوف ولد بيرقص
وخصوصاً لو بلدى
يعع
ويهز وسطه
اصل انا فى حاجات الرقص والمياعه دى حمشه < بمثل >
يعنى انا شايفه ان الراجل لازم يكون وقور
وقور كدا وحمش وشخصيته قويه ومتفهم وحنين
قوى وضعيف فى نفس الوقت
متدين بس متفتح
عاقل ومحترم
بمعنى اصح حد كده متلقيهوش غير فى الجنه
مش اللبس المقطع
والبوكسر اللى باين وعليه دباديب و قلوب
والشعر المتسبسب
ابو جل فى شعره
والخواتم والسلاسل
واللى بيصبغ شعره
وال كت
والبودى
والبانتكور
ومعذره لكل اللى قرءوا التعليق دا وكانوا من الناس دى
ماهو الواحد زهق بقى من المناظر اللى بيشوفها فى الشارع
وماما صفاء كان عندها بُعد نظر لما قالت
البنت زى الولد
تيرارارا
بقو الاتنين شبه بعض


وبعدين مالها الجلابيه يا جدعان

رحاب

غير معرف يقول...

يا حبيبى يابتاع شبرا لا تنسى من لا يغفل ولا ينام