الاثنين، أغسطس 13

واحده ست وواحده ست ...و...واحد بدقن وواحد بدقن

انا اليومين اللي فاتوا كنت مشغول بتحضير ورق الشغل ايوه بحضر اوراقي عشان طالبينها مني في الشغل وطبعا لفيت على كل الأماكن السياحيه اللي الحكومه مشكوره عاملاها عشان الخدمات للجمهور السعيد اللي زي حالاتي عموما انا خلصت الحمد لله معظم الأوراق بسرعه لأني كان معايا فاخر وهو اصله شغله متعلق بالتأمينات فكان اكتر واحد فاهم القصص دي لكن انا مش هاحكي عن كل الرحله بتاعة الورق دي عشان اكيد كلكم عديتوا بالمهمه المستحيله اللي عديتها دي اللي هاحكي عنه هي مقارنه بسيطه بين اتنين ستات واتنين رجاله من الموظفين اللي اتعاملت معاهم وتحديدا في مكتب التأمينات اول ما دخلت المكتب كان شكله اصلا زباله من جوه وطبعا انا قولت اكيد غرفة الحاسب الألي تختلف لكن سبحان الله اول مره اشوف كمبيوتر شبه الموظفين لدرجة اني حسيت اني هلاقيه بيناقش الأله الطابعه في ميعاد الجمعيه اللي هايدخلها معاها المهم بمنتهى البشاشه والأبتسامه المشرقه على وشي دخلت على الموظفه المسؤله وقلتلها اني عايز طبعه واحد وطبعه اتنين بتوع الموقف التأميني بتاعي راحت بصاللي وقالتلي بعصبيه يعني ايه طبعه واحد وطبعه اتنين دي , كتمت غيظي من استهبالها وقلتلها بصي حضرتك هم في الشغل طالبين ورقه مطبوعه من التأمينات بموقفي التأميني فهمتي حضرتك راحت بقرف ردت عليه وقالتلي احنا معندناش طباعه هنا روح الشقه التانيه طبعا انا كنت هاقولها شقة ايه هو انا جاي ابيع لبن وجايبلك الدليفري يا ستي شقة ايه قالتلي قصدي المكتب التاني عند الغرفة التجاريه سرحت بخيالي طبعا عشان افكر فين يا اخويا الغرفه التجاريه دي وطبعا هي امتنعت تماما انها تفهمني فين الغرفه اللي بتقول عليها دي لكن الحمد لله ولاد الحلال على البوابه وصفولي المكان وطلع قريب مسافة ربع ساعه مشي رحت ركبت الميكروباص ووصلت بسرعه عشان الحق قبل ما يروحوا لقيتها عماره فخمه والسلم رخام انا طبعا انشكحت قوي وقلت طبعا انا مقامي اني اجي الحته الحلوه دي واخلص ورقي هنا سألت فين التأمينات قالولي الدور التالت طلعت بسرعه وانا كلي انشكاح بمجرد ما دخلت من الباب كأني عديت من احدى بوابات الإنتقال اليوني الجزئي لأني لقيت نفسي في نفس الشقه اللي كنت فيها هناك بس الفرق ان الطرقات اضيق شويه ولقيت ناس زحمه رحت دخلت على مكتب كده لقيت فيه اتنين موظفات وراجل بدقن خارج منه ردت الموظفه اللي قاعده بهدوء الحق الأستاذ اللي بذقن اللي خرج هو يعملهالك شكرتها واتلفت الحقه لقيته اختفى في الزحمه رحت لقيت واحد في وشي بدقن تاني شكله طيب كده سألته عن طلبي قالي روح الفرع المكتب التاني مش عندنا هنا قلتله حضرتك هم قالولي معندهومش طباعه وقالولي اجي هنا رد بعصبيه مش مشكلتي ده مش عندنا هنا وبسرعه لقيت الموظفه اللي كنت سألتها بتشاورلي اني اتبعها روحت بسرعه لقيتها قفشت الراجل التاني وقالتله لو سمحت اطبع الموقف التأميني للأخ ده قالها من عيني وقالي اتفضل حضرتك شكرتها ورحت معاه الراجل كان زوق برده وقالي اتفضل استريح وبدأ يطلع اسمي من الكمبيوتر الفقري اللي عنده وراح يجيب ورق عشان يطبع عليه المهم لقيت الشيخ التاني جاي عايز يلغي اللي على الشاشه عشان يعمل حاجه تانيه الراجل قاله استنى يا شيخ نطبع للراجل مصلحته قاله بغيظ طيب يا سيدي اطبع اخدت الورقه اللي حبرها اصلا مختفي ومش شايف منه حاجه وهربت من قدامهم بسرعه عشان الحق مكتب العمل اعمل كعب عمل ولقيت هناك شوية ستات حاطين مكياج يكفي انهم يدهنوا بيه اسوار القلعه كلها وقلت اكيد هايزهقوني ويتغابوا عليه والغريب انهم كانوا سكره كلهم كانوا بيضحكوا وانا مش عارف حتى اهزر معاهم من كتر زهولي من الموقف واخدت الورق بسرعه وخرجت وقعدت افكر ايه الفرق بين الست اللي ردت عليه الأول في المكتب بتاع التأمينات بأسلوب في منتهى الغباء وبين اللي ساعدتني عشان اخلص ورقي وايه الفرق بين الشيخ اللي كان عايز يحدفني من الشباك والشيخ اللي ساعدني اخلص حاجتي
انا شايف ان الفكره مش في ان ده شيخ ولا لأ او ان الست دي محجبه ودي مش محجبه لأن الأتنين كانوا محجبين والأتنين الرجاله كانوا ملتحيين الفرق بيكون في اخلاق الشخص نفسه ولأن في بلدنا الخدمات اللي بتتقدم للشعب الموظفين بيحسوا انهم بيتفضلوا علينا وبيعطفوا علينا بيها مع ان هو ده شغلهم اللي بيقبضوا مرتب عليه لكن هم بيحسبوا انهم بيقبضوا مرتب على انهم بيحضروا في الميعاد ويمشوا في الميعاد بغض النظر عن اللي عملوه طول اليوم لما اتفتحت خدمات المحمول في مصر وبدات الناس تشوف المعامله الهايله بتاعة خدمة العملاء لكن ده عشان الناس دي بتفهم الموظف عندها ان العميل هو رقم واحد وان تقديم الخدمه هو فن يجب اتقانه مش يعاملوا الناس كأنهم بيشحتوا مش عارف اقول ايه عن الناس دي الغلط فيهم ولا الغلط في الناس اللي بتديهم التعليمات والقرارات وفالحين بس يقولك كلنا في خدمة الجمهور انا نفسي اروح اشوف الجمهور اللي بيتكلموا عنه ده يمكن قصدهم ناس من بره عموما مش مهم المهم اني خلصت الورق ادعولي ان ربنا يسهل في باقي الأجراءات

هناك 16 تعليقًا:

الدرويش المرووش يقول...

ألف مبروك و ربنا معاك يا أستاذ
عقبال ورق المعاش و أهو كله تأمينات

و بالنسبه لملحوظتك الذكيه فليك حق

الموضوع أننا كلنا بشر و فينا حاجات حلوه و حاجات وحشه

و شكل الإلتزام و حتى جوهره ما بيغرش الحقيقه دى

و النبى عليه الصلاة و السلام له حديث ما معناه
إن حد سأله
أيكون المؤمن جبانا
قال نعم
أيكون المؤمن بخيلا
قال نعم
أيكون كذا و كذا و كذا
قال نعم
أيكون المؤمن كذابا
قال لا

يبقى إيه
يبقى بالراحه على بعض
و مافيش ملايكه

لا مؤاخذه يا شنكت
أنا سرحت
المهم إنت عامل إيه

Mirage يقول...

هو التعامل مع الأماكن الحكومية دى اصعب حاجة ممكن تحصل للبنى آدم فى مصر

بتحسسك فعلا قد ايه انت فى دولة متحضرة

بس ربنا يكملهالك على خير

أيامنا الحلوة يقول...

فكرتني بيوم ما عملت البطاقة بتاعتي ... واللهي شوفت اللي عمري ما شوفتوا وفي الاخر جيت استلم البطاقة لقتهم كتبين اسمي غلط

عااااااااااا ليه يابني تفكرني كده باليوم ده

وفعلا الموظف بيخليك تشعر انو بيتفضل عليك مش ان ده شغلو وبياخد مرتب عشانو ....... واتمنالك فرصة تانية احلى من كده في التأمينات

تحياتي

همسات يقول...

ربنا يسهلك يارب
...............................

فعلا الفرق فى الاخلاق والضمير
مش فى المظاهر
بس مشكلة الموظفين انهم بيطلعوا مشاكلهم اليومية عالعميل

لكن اللى عنده ضمير بجد هو اللى يعرف يفرق

يالا هى بلد كوسة اصلا
:)

Doba يقول...

أولا ربنا يوفق ويتملك أوراقك وخطواتك على خير بإذن الله

ثانيا - الموضو كله نابع من داخل الشخص وقدرته على العطاء وزى مقلت الاتنين خلصولك حاجتك بمنتهى السهولة وبرد لطيف - واحسن ثواب عند ربنا ان الشخص يتم عمله على اكمل وجه ويكون بيراعى ربنا فى اللى بيعمله - والانسان لو حقيقى اتقى ربنا الدنيا هتمشى مظبوط - ميبقاش خايف من ان رزقه يقل - لان ده مكتوب عند ربنا - ميخفشى من سلطة حد علشان يؤدى أعماله لان عمله المفروض انه خالص لوجه الله - وفى النهاية لابد انه يكون عمل صالح

ثالثا - ان شايفة من اسوأ الحاجت اللى بتؤدى لانهيار المجتمع من حواليا اختفاء القيادة الجيدة - لو كل مكان فيه مدير مظبوط ماسك بزمام الامور وبصحة الاعمال بدقة وبرعاية تأكد ان كل شىء هيمشى كله على ما يرام وبأحسن جودة

تحياتى وسلامى
هبة

Queen eraser يقول...

ياللا ربنا سيهل ان شاء الله و تخلص الورق اللى مطلوب منك بأقل خساير..

أنا معاك ف كل كلمة أنها مجرد اختلافات فردية ف الشخصية بين موظفة و موظفه تانيه أو بين شخص و شخص تانى عموما بس كده ولا كده نقدر نقول عليها مسأله ضمير و خوف من ربنا و لو بصينالها من وجهة نظر أكتر عمليه يبقى الفرق ان واحد بيتقن عمله و واحد لأ.أنت قلت كل اللى ممكن أقوله ف الجزء ده.

بس أنا نفسى أقهرك بقى شوية و أحسرك على نفسك بعد الزيارة بتاعت المصلحة الحكومية دى و بمناسبة انك جبت سيرة شركات المحمول و خدمة العملا و كده.. أنا بصراحة متمسكة بفودافون جدا جدا عشان موقف..
أنا طقت ف دماغى كده أشغل خدمة لايف عشان أفتح النت و كده قمت اتصلت بخدمة العملا و حولونى على موظفه و بعتتلى رسايل تثبيت الخدمة أنا أسجلها بس على الجهاز و بعد التسجيل الخدمة مشتغلتش استحلفتلها و اتصلت تانى و حولونى على واحده تانية بردو بعتتلى و مفيش قمت استحلفتلها و اتصلت تانى قامت واحده تالته قالتلى يبقى التليفون بيتظبط مانيوال مش اوتوماتيك عن طريق رسالة.. قامت بكل ذوق و بعد ممكن و بعد اذنك قالت عايزة نمرة أى تليفون أرضى أو موبايل عشان تكلمنى هيه عليه و تشحلى أعمل ايه بالظبط على تليفونى و هوه ف إيدى..هيه اه قعدت ربع ساعة بتكلمنى بس أنا كنت مبسوطة جدا جدا جدا.. عمر ما حد عاملنى باحترام أوى كده حتى لو بدفعله فلوس..

أنت ممكن تبيع الهوا للناس و همه يشتروه و عارفين انك بتضحك عليهم و بردو يشتروه لو بتكلمهم كويس و تديهم حقهم.. أنا معنديش مانع انى أروح مصلحة و يمشونى يقولولى فوتى علينا بكرة بس يقولوها و همه بيضحكوا.

طولت عليك معلش يا شنكوتى.. بابياى

NeRmeeN يقول...

الله يكون فى عونك ..قمة الذل ان يكون ليك مصلحة فى ايدين موظفين الخكومة دول..بيطلعوا عليك عقدهم ..طبعا فى ناس كويسة ..بس قلة

بتفكرنى لما كنت بحول اوراقى من كلية لكلية فى سنة اولى..طهقونى ..من مكتب لمكتب روحى عند استاذ فلان ..واستاذ فلان يقولى روحى عند مدام مش عارفة مين..واحدة بقى دخلت عليها المكتب وبقولها انا عايزة احول اوراقى..لاقتها برقت شوية و قعدت تقول بصوت عالى اطلعى بره مش هنا مش هنا..وكانى دخلت عليها صالون بيتها مش فى مكان حكومى..قمت انا بقى فقدت اعصابى وقعدت ازعق و صوتى كان بيرن :ي وانا عمالة اقولها انتىىىىىى بتكلمينى كده ليييييييه هو انا بشتغل عندكككككككككك و صحابى بقى قاعدين يشدونى على بره :ي ..جيت بقى وانا قاعدة تايهة ومش عارفة اروح فين..لاقيت راجل ابن حلال بيقولى مش انتى اللى كنتى بتتخانقى من شوية ..تعالى ورايا وانا اقولك تروحى فين :ي
ولاد الحلال دول بيجوا فى الوقت المناسب فعلا :ي

يلا ربنا يكرمك يا شنكوتى و تخلص كل الورق اللى انت عايزه

تحياتى

Olivia يقول...

الى الشنكوتى الروش على فكرة دة اول مرة اكتبلك يا شنكوتى اولا الف مبروك وربنا معاك فى رحلة العذاب اللى بداتها فى المكاتب الحكومية على فكرة عمر المظهر مابيدل على الشخصية وكمان انا بحس ان الناس اللى فى مكتبنا الحكومية صلاحيتهم منتهية وبيطلعو قرفهم على الناس الغلابة اللى بيقعوا تحت اديهم زيك كدة يا يعينى عموما ربنا ينجيك منهم اهم بردة هايكفرو عن سيأتك اللى عملتها فى دنيتك تعرف ان الناس دة معندهاش حاجة اسمها عطاء علشان كدة مبيقدروش يتعملوا مع الجمهور لكن انا احيانا بعذرهم لان لو بصيت للمكان اللى شغلين فية او بمعنى اوضح صفيحة الزبالة اللى قاعدين فيها مع الحر والعدد هتلاقى بردة هما معذورين ولازم يطلعوا شوية من اللى بيعانو منة على الناس الغلابة اللى بتيجى تحت اديهم ودة بيكون نتيجة ان حكومتنا ربنا يخليها ويكتر من حكومتها متعرفشى حاجة اسمها الادمية للانسان فبيعملو الموظفين على انهم حيوانات فطبيعى دة هينعكس على الناس وبعدين انت بتقارن موظفين الحكومة بالقمرات بتوع شركات الموبايل راعى الظروف يا شنكوتى والمرتبات وشكل المكاتب والبس والتكيفات اللى قاعدين فيها وانت تعرف لية دول كدة ولية دول كدة على فكرة انا مش بدافع لكن بس بعذرهم مع انى برجع واقولك بردة انهم معندهمشى ضمير وبعدين متخليش فرحتك تضيع فى وسط المكاتب الحكومية اللى عمرها ماهتتغير امسك فيها واوعى تقع منك فى مكتب منهم ربنا يوفقك
olivia

shahy يقول...

ربنا معاك يا شنكت وتخلص اوراقك كلها على خير
وربنا يديم المحبة اللي بينك وبين فاخر

اما بقى موضوع الموظفين مش هاقدر اقول فية حاجة غير
اه اة اة
دي اهات العذاب
بس جرب تصلي قبل لما تنزل ركعتين قضاء حاجة
صدقني دول بيفتحوا الابواب المغلقة بأذن الله

سبحان الله في امر الموظفين دول مع انهم لو سهلوا المواضيع للجمهور هما هايرتاحوا واحنا كمان

وفي حديث معناة
ان اللي بيسعى علشان يخلص حاجة الناس ربنا هو اللي بيسعالة في تخليص حاجاتة

تمنياتي لك بالتوفيق ان شاء الله وابقى سلم لنا على فاخر

تحياتي
يا صاحب اجمل تعليق اتقال لي في مدونتي

shahy يقول...

نسيت اقولك
ابو الدراويش معلق عندك اول واحد

ماشي ماشي

من ورايا

keda-sponser يقول...

شنكوتي باشا

أنت كده تعتبر عديت

يعني الموظفين في مصر حاجه تقرف

بس أهم حاجه أن ورقك خلص

مبروووووك على الشغل


سلاااااااااام

الشنكوتي الكبير يقول...

الدرويش المرووش
انا سعيد جدا بالزياره الجميله دي يا ابو الدراويش ده انت نورت المدونه كلها بجد سعيد بزيارتك دي جدا وعموما انا اتمنى حد يبقى يخلصلي ورق المعاش
وشكرا على التحيه يا باشا
ربنا يسعدك انت والعائله الجميله
تحياتي يا باشا
سلااااااااااام
_________________
ميراج
تسلم يا ميراج وشكرا عموما انا اكيد عارف قد ايه احنا في بلد متحضر ورائع والمواصلات سهله والشقق كتير والعيش حلو
الله يسامحك هتوديني في ابو نكله
____________________
ايامنا الحلوه
يا جميله معلش فكرتك بالذكريات الفظيعه دي اوعي تضيعي البطاقه لحسن تعيدي الموال تاني وعموما هو تطمني على حبايبك الموظفين
تحياتي يا جميله
_____________________
همسات
يا جميل معاكي حق انهم بيخلوا مشاكلهم تأثر على تعاملهم مع الجمهور برغم ان الناس ملهاش ذنب في اللي بيحصلهم
عموما نورتيني
سلاااااااااااااااااام

الشنكوتي الكبير يقول...

دوبا
ودايما احلى تعليق واقواهم يا باشا
بصراحه انا عارف ان الواحد لازم يدور على القائد اللي المفروض يحرك ده كله وعموما شكرا على الدعوه الجميله
ربنا يخليكي ويباركلك في زوجك وابنك
وبعدين انتي مش ناويه تنزلي حاجه جديده
سلاااااااااااااااام

الشنكوتي الكبير يقول...

كوين ايريسر
يا بنت يا استيكه يا فقريه هو انتي عامله ايه
عموما ده انت مش بس بقيت تكتب بوستات جامده لأ وكمان كومنتات حلوه ماشي يا عم
تسلمي على الكومنت الجميل ده يا لذيذ
نورتي
سلاااااااااااااااام
______________-___
نرمين
يا جميلتي ابقي هدي اعصابك شويه لحين انتي اللي هتتعبي معاهم دول ناس اعصابها حديد وفعلا زي ما قلتي في ناس ربنا بيبعتهم يرحمونا من الناس المؤذيه دي
نورتيني
سلاااااااااام
________________________

اوليفيا
نورت يا سكر وشكرا على احلى تعليق
عموما فعلا المظاهر كتير بتخدع
وبرده موافق على موضوع ان المكان اللي بيشتغلوا فيه بيأثر عليهم لكن ده مش ذنب الناس الغلابه لكن هنعمل ايه هي دايره وكلنا مربوطين فيها
اجمل التحيات ليك يا سكر
سلاااااااااااااام
___________________

شاهي
يا عزيزتي تسلمي على الكومنت ولو فعلا الناس دي تقدر ان انهم المفروض يتقوا ربنا في شغلهم كانوا اكيد غيروا حاجات كتير في تعاملهم
نورتيني

وابو الدروايش نورني يا شاهي
ربنا يسعدك ويخليكم لبعض
نورتوني وسعيد جدا بمعرفتكم
سلاااااااااااااااام

غير معرف يقول...
أزال أحد مشرفي المدونة هذا التعليق.
الشنكوتي الكبير يقول...

!!!!!!!!!!!!