الخميس، يوليو 14

انا عايز اكون مسؤول

امبارح في الراديو كان في برنامج عن الوزاره واعبائها والمنصب الوزاري وصعوبته وايه رأي كل واحد هل يحب يبقى وزير ولا هيخاف من المسؤليه وهل المنصب ده ممكن حد يمسكه ويرضي الناس كلها ووووو

حسيت اني بسمع برنامج مسكنات من بتاع النظام الزفت البائد
كل حاجه صعبه والمسؤوليه كبيره ولازم نتحمل المسؤولين اكتر من كده ونصبر عليهم
يا عالم اللي مش قد المسؤوليه بيتحملها ليه
ولا هي طفاسه وخلاص
اللي بيقبل منصب كبير بيقبله ليه وهو مش هيقدر عليه

رد واحد من المتصلين بالبرنامج وقالهم انا عايز ابقى وزير تقوم المذيعه تقوله علشان الوجاهه والمنصب يعني
قالها لأ علشان ده واجب وطني ان كلنا نبقى مسؤولين في بلدنا ونقوم بيها والسيد الوزير اللي مش قادر يقوم بمهام منصبه يتفضل متشكرين ليه قوي ويرحل من غير صداع
عجبني رده عليها
احنا مش عايزين النظام القديم بتاعهم الوظائف والمناصب تتوزع على الحبايب بس

احنا عايزين ناس كفاءه بجد
عايزين ناس تقوم بالبلد دي بجد
عايزين ناس عارفه يعني ايه ثوره
ولا هم متهورين ولا هم متخاذلين
ولا يكونوا طمعانين ولا يكونوا مستغنيين قوي برده لأن المستغني عن البلد دي مش هتفرق معاه قوي
عايزين ناس رجاله بجد

وانا متأكد ان مصر فيها رجاله كتير جدا بمعنى كلمة رجاله


سلاااااااااااااااااااااااااااام كبير لكل رجالة مصر

هناك تعليق واحد:

ندا منير يقول...

الفكرة ان الواحد وهو برة المنصب بيظن ان الموضوع محتاج ضمير وخبرة
لكن مسئولية وزير او اى منصب اللى بيمسكه بيكون حاجة تانية خالص
لان بيكون فى حاجات اكبر من ادراكنا ليها بجد
وبنكون مش فاهمين ليه فيه تباطؤ فى الاحكام وكدة

ودا مش معناه ان كل وزير غصبن عنه االى بيحصل لا
اللى اقصده ان المسئولية اللى عليه بتكون اعلى مما نتصور
وبيكون ليه حدود يشتغل فيها مش بايده يخرج عنها