واضح اننا هنرجع تاني لموضوع قلة مندسه
والقله المندسه دي هم الناس اللي بيعملوا كل التصرفات الغلط حوالينا
زمان كانت الحكومه بترمي عليهم غلطاتها
المصيبه دلقوتي ان الشعب هو اللي بيعمل اخطاء الحكومه وبيدور على القله المندسه علشان يتهمها
لما نلاقي الاف الأفدنه الزراعيه بتتحول لمباني وتتخرب علشان تتباع بالغالي وهي اصلا بقت بالرخيص
لما نلاقي كل واحد ساكن في عمارة مساكن شعبيه فجأه بنى لنفسه شقه فوق العماره وتنهد بقى العماره على اللي فيها مش مهم وبقيت الجيران كل واحد بنى غرفتين جنب شقته هتقولولي ازاي اقولكم من الدور الأرضي بيبنوا بيت مجاور لعمارتهم ويلزقوهم في بعض وطبعا دي ارض الدوله وسلمولي على الدوله بقى وبعد كده علشان الردم والتكسير والحجاره محدش يلاقيهم وياخد باله من الجريمه قال يعني العماره اللي طلعت مش هتبان ياخدوا الردم ده ويرموه في وسط الطريق العام قدام العربيات وشوفولنا البلديه تلم بقى
والمصيبه لما تلاقي واحد بيرمي الردم فوق الدائري يعني لو عربيه لبست فيه او اتقلبت بسببه شوف كام واحد هيموت بسبب الحيوان اللي رمي الردم ده في طريق الناس
اللي بيحصل ده نفس جرائم الحكومه اللي غارت
سرقة اراضي الدوله
تخريب الزراعه والصناعه
تدمير البلد
ضياع الأمان وزرع الخوف
انا مش عارف ده لمصلحة مين الناس بتدور على السرقه والنهب كأنها مش بلدهم وكأن البلد كلها حراميه
حسبي الله ونعم الوكيل
هناك تعليق واحد:
الثورة محتاجة ثوة تانية لإنقاذها من نفسنا ومن قلة التربية ، للأسف إحنا شعي مش متربي ومحتاجين صورة على نفسنا ، ثورة من جوانا ، محتاجين نتربى شوية ، وقبل مانعمل أي حاجة نفكر هل اللي بنعمله ده هيئزي غيرنا ولا لأ ؟ ، فما بال إننا بنعمل حاجات بتئزينا احنا ، زي موضوع الزبالة اللي بتترمي في الشوارع ، وقلة الضمير في العمل ، وغيره وغيره ... ربنا يهدينا ، ويهد كل مفتري
إرسال تعليق