السبت، أغسطس ١٤

الله اكرم


كل عام وانتم بخير

ربنا يتقبل منا ومنكم صيام الشهر الكريم ويقدرنا جميعا نجمع اكبر قدر من الخيرات والحسنات في الشهر الجميل اللي ربنا امرنا بالصيام فيه وجعل السنه بمقام فريضه والفريضه بمقام 27 فريضه

استغربت قوي من كم المسلسلات اللي هتتعرض في رمضان ونوعها هو اللي خلاني استغرب اكتر مشاهد عري ورقص وسفالات اكتر من الطبيعي وكأنهم بيتحدوا ربنا في الشهر الكريم وكأن الناس دي واخده عهد على نفسها تكون ضد الدين وضد التدين

ومع ذلك بيدعوا الفضيله

لما واحده مخرجه افلام متستاهلش اقول اسمها عندي تغلط في عمرو خالد وتقول صوته بينرفزني وتدعي تقول ربنا ما يكتب عليا الحجاب ابدا نرد عليها بأيه

اولا عمرو خالد بيتحارب من زمان من اللي زيها لأنهم خايفين دعوته تحول الناس كلها للدين فيتبقى شياطين الأنس ويتكشفوا قدام كل الناس علشان كده بيكرهوه
زمان الكفار برده حاربوا النبي وقالوا عنه كتير برغم ان لو هم مقتنعين انه شاعر او مجنون زي ما قالوا كانوا مش هيشغلوا دماغهم بيه اصلا لكن كلمة الحق بتوجعهم هم خايفين على عيشتهم اللي معتمده على الفساد

عموما انا بس بدعي الناس على قد ما تقدروا في رمضان تقاطعوا المسلسلات والبرامج اللي فيها عري وسفاله افتكروا يا جماعه لما تيجوا يوم القيامه ونبقى مستنين حسنات ورحمات رمضان ومستنين نطلع من عتقاء النار تفتكروا المسلسلات دي هتنفعنا


ربنا اجعلني وكل احبائي من عتقائك من النار


كل سنه وانتم طيبين

هناك ٩ تعليقات:

كاميليا بهاء الدين يقول...

اللهم آمين يا رب العالمين
كل عام وأنت بخير
تقبل الله صيامك وقيامك وصالح أعمالك
وكتبتك عنده من الفائزين بهذا الشهر.
(f) اوعى تشمها وأنت صايم أحسن بتفطر
:)

ساره يقول...

كل عام وانت بخير يا ايهاب
اللهم تقبل منا ومنكم صالح الاعمال امين

والله انا معاك في حكايه المسلسلات المخزيه في رمضان ... وهو شهر واحد بس لازم نجتهد فيه علي قد ما نقدر والمسلسلات مش هتنفعنا بشي غير جرح صيامنا

الله يجعل تنبيهك وحرصك على المسلمين في ميزان حسناتك

تحياتي للغاليه غاده

Fakher يقول...

قشطة ياباشا
كل سنة وانت بألف صحة وسلامة
إيه الكلام الشديد ده ، واضح انك داخل شمال .... هو طبعاً ليك حق
علشان كده هحاول أعمل إتصالاتي وأحدد لك معاد مع توني خليفة أو الست وفاء في بدون رقابة علشان تقول رأيك براحتك يامعلم هههههههههه

رمضان كريم عليك ، وسلملي علي الخشاف وقمر الدين والمحشي والمكرونة بالبشاميل والكنافة والقطايف ....

دعاء العطار يقول...

كلللللل سنه وانت طيب

انا اساسا مش بسمع المسلسلات فى الايام العاديه

يبقى هسمعها فى رمضان

بلااااا وجع دماااغ

هما مسلسلين بس اللى بحاول اتابعهم كليوباترا والجماعه

ودمتم على كده

ورمضان كرررررريم

Ehab يقول...

كامي
ايه النور ده كله يا مساء الخيرات والسعاده عليكم انتي والبنوته والدكتره
اخباركم ايه
كل عام وانت بخير
يارب السنه الجايه تكونوا وسطنا هنا في مصر ونفطركم يوم عندنا بقى

==================

ساره
اختي الطيبه العزيزه جدا
اخبارك ايه كل سنه وانتي طيبه وعقبال ما تيجي وتجيبلنا معاكي مية زمزم متنسيش

========
فاخر
كل اللي هقولهولك ربنا يجيبك بالسلامه ويطمني عليك

قولي بس مختفي ليه

====a========

دعاء العطار

احسن حاجه بتعمليها انك تنفضي للتلفزيون وذنوبه وقرفه كله ربنا يجعله في ميزان حسناتك



سلاااااااااااااااااااام

اقصوصه يقول...

رمضان كريم :)

Unknown يقول...
أزال المؤلف هذا التعليق.
امرأة من عبير الورد يقول...

حبيت أسلم عليك جدا لاني افتقدك

غير معرف يقول...

مصر فى مهب الريح

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 – العدالة الاجتماعية .. وأطفال الشوارع والذين يملكون كل شىء .
5 – ضرورة الاتحاد مع السودان لتوفير الغذاء وحماية الأمن القومى المصرى.
6 – رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

لمزيد من التفاصيل أذهب إلى مقالات ثقافة الهزيمة بالرابط التالى www.ouregypt.us