الأحد، فبراير ٢٨

ازاي تكون موجود

عايز اكون حاضر حاضر
مش حاضر غائب
يعني ايه
بعد ما اتفرجت على فيلم الف مبروك بتاع احمد حلمي واللي اتأخرت قوي في الفرجه عليه في النهايه قررت اني انا كمان نفسي اكون موجود وليا دور
طول عمري كانت سياستي هي الحياديه مادمت لا اقدر على التغيير
يعني في بيتنا مادمت مقدرش اواجه ابويا او اعترض على قراراته يبقى التزم الحياديه التامه وعمري ما ابديت رايي في اي موقف بيحصل والنتيجه ان ده بقى انطباع الكل عني اني مليش راي ومش متوقع يكون ليا راي على القل في المليون سنه اللي جايين
طب وناوي تعمل ايه دلوقتي يا فلحوس افندي بعد الهنا بسنه
لا مش بعد الهنا بسنه قوي يعني
اولا انا اخدت موقف قبل كده واكتر من موقف كمان
واكتشفت ان لو الواحد عايز حاجه وبجد مصمم عليها وقرر انه مستحيل ييتخلى عنها ومهما كان اللي بيواجهك لازم هتوصل وربنا هيوفقك ليها المهم متريحش وتقول لا انا تعبت او ده مستحيل والمهم برده ان الحاجه اللي بتحارب علشانها تكون تستاهل برده
عموما انا بدور على حاجه دلوقتي اعملها علشان احس ان ليا راي وموقف واني مش الحاضر الغائب بس انا مش عايز موقف بطلوي ولا كلام من ده ولا عايز موقف يحصل وانجح فيه ويعدي وخلاص على كده انا عايز اسلوب حياه
عايز يكون انطباع الناس عني من كل تعاملاتي هو ده
عايز يكون هو ده اسلوبي الدائم مش موقف في ساعة حماس وخلاص
وعلشان كده مش عايز اهيص مره واحده انا همشي خطوه خطوه وهتغير خطوه خطوه علشان مخبطش جامد في سور السجن واتعور
يمكن بالراحه اعرف اتشعبط على السور وانط بره
واوعدكم هبعتلكم من هناك جوابات كتييييييييييييير
سلااااام
اخوكم ايهاب

هناك ٨ تعليقات:

Fakher يقول...

إزيك ياهوبة ، أنا مبسوط أنك بدأت تكتب بعد إنقطاع طويل ، عودٌ أحمد ياسيدي
طبعاً فكرة أنك عايز تاخد موقف ، ديه مش جديدة عليك لأنك زي ماقلت قديم في الموضوع ده ، علشان كده أنا مش هكلمك في إنك تاخد موقف ، لكن هكلمك في إن بما إنك عايز تعمل تغيير في أسلوب حياتك ، فده معناه أنك عايز تطور نفسك بشكل أو بآخر ، وده في حد ذاته حاجة حلوة أوي ، بس ده معناه أنك محتاج أنك تتفق مع شركاءك في الحياة ديه علشان تتغيروا وتطوروا كلكم مع بعض لأن ماينفعش الموضوع ده لوحدك ، بيني وبينك هي خطوة خطيرة ، وقوية ، بس برضه لذيذة أوي .... أبدأ بس أنت وربنا معاك

وحشتني أوي

Doba يقول...

أولا ازيك وازى غادة سلم عليها كتير

نيجى للمهم

ليه شايف نفسك مش موجود
انت موجود
موجود وسط اصحابك
موجود مع والدتك
موجود مع اختك
موجود مع مراتك وعامل اسرة جميل

بتود اهلك واهل مراتك وبتتقى الله ف عملك ومع مراتك

يتاخد بالك من اصحابك ولو ف يوم حد احتاجلك اكيد بتكون جنبه

متفتكرشى نفسك مش موجود
مش معنى انك مشقادر تخرج على تفكير والدك احيانا يبقى انت بكده مش موجود بل بالعكس انت بتتقى ربنا فيه وبتعمل بمقوله ربنا وبالوالدين احسانا

اعرف انك موجود بل ثق ف كده انه بالفعل متحقق حاول بس انك تركز انك تفضل موجود وان وجودك ف حياة الكل يتشكل بلمحة تفاءل وحب واحتواء

بس خلاص

يلا سلم على دودى
هبة

ميرا ( وومن ) يقول...

ايهاب عود أحمد احنا قولنا انت نسيتنا

بس مش عارفه انت ليه حاسس انك الحاضر الغائب

مش لازم الواحد يبقي ماشي بخالف تعرف

وانت بنفسك يتقول انك أخدت مواقف وقت مكنت محتاج تاخد موقف يعني مش سلبي

والحيادية مش علي طول وحشة ومش علي طول كويسة بس مينفعش طول الوقت يبقي لونك رمادي

ساعات بتحتاج تاخد لون

Ehab يقول...

فااااااااخر

ايه النور ده معلق عندي كمان يا برنس
ده انا كده بقيت مبسوط ومنشكح تمام

ربنا يسعد ايامك يا اخي

حلو قوي رأيك كالعاده
محتاج شركائك يتغيروا ويقبلوا فكرة التغيير
هو ده يا احمد لازم اللي حواليك كمان يتغير وال عمرك ما هتتحرك لأنك مربوط باللي حواليك

بجد وشحتني يا ابو حميد

سلاااااااااااااااااام
اخوك ايهاب

Ehab يقول...

دوبه

الأخت الغاليه جدا هبهوبه
هي كمان بتسلم عليكي كتير
تفتكري فعلا انا كويس قوي كده زي ما بتقولي اتمنى فعلا
ربنا يسعد ايامك يارب

سلاااااااااااااااااام
اخوكي ايهاب

Ehab يقول...

ميرا ( وومن )

ازيك يا بنتي
ملكة الموبايلات عندنا هنا ايه النور ده بس
تصدقي يا ميرا ن انا قبل اللقائات التدوينيه مكنتش اعرف مدونتك قوي
وبعدين لما اتقابلنا قررت ادخل اقرأ فيها واكتشفت انك قصصاصه هايله
يعني بتكتبي قصص هايله


نورتيني وعمري مقدر انسى المدونين يا بنتي
ده انتم اخواتي بجد

سلااااااااااااااام
اخوكي ايهاب

دعاء العطار يقول...

حلو اوووووى القرار اللى انت خدته ده

ربنا يوفقك وتكون دايما موجووووود

ahmed_k يقول...

ههههههه أيه ده كلله يا هوبه
ربنا يفك سجنك يا هوبه هههههه

سلام يا صاحبي
يا واحشني ومبتسألش على أصحابك