السبت، أكتوبر 3

وبقيت راجل متجوز

وبقيت راجل متجوز

كتبنا الكتاب الحمد لله بعد جهد جهيد

المهم اننا بقينا ناس متجوزين
ودلوقتي بقى اصبح عندي بندقيه يوه لا مش دي دلوقتي بقيت من المتزوجين

اللي حيرني فعلا هو الرد اللي سمعته من كل واحد متجوز اقوله انا هكتب كتابي
" ارجع يا مجنون"
وانا بصراحه عايز اسأل الناس دي سؤال " ايه اسوأ شيء في الجواز
انا هفترض كام اجابه وارد عليهم واستنى منكم بقية اجاباتكم

اولا كبت للحريه ومسؤليه
الأجابه بقى انه اه مسؤليه ومش لعبه لكن هي المسؤليه كبت لو الأتنين شايلين المسؤليه مع بعض يقى مش هيحسوا بكبت لو الأتنين اتنازلوا عن شويه انانيه هيستريحوا قوي قوي

زن الستات
وده مش شيء هنكره واقول انهم مش زنانين لكن بايدك تتفاهم وتناقش الموضوع عايز طولة بال علشان يقتنعوا بس لو فعلا انت معاك حق ومش مجرد عند وخلاص هتلاقي الدنيا فله قوي

بلاش عند
بلاش انانيه
بلاش معيله
والدنيا هتبقى فله
ولو عملت كل ده ولقيت الحياه لسه مش حلوه يبقى اعذرني انت اخترت غلط من البدايه
لأن قبل كل شيء اهم حاجه الأختيار


وسلام بقى علشان انا بقيت راجل مشغول

ملحوظه تخينه التلات مدونين اللي كلموني امبارح بدون ذكر اسمائهم انا متشكر جدا جدا جدا على مكالمتكم دي
ربنا يخليكم ليا


سلااااااااااااااام

هناك 40 تعليقًا:

Appy يقول...

جا انا فرحانه لك فرح والله العظيم بجد كان اخويا اللى اتنيل قصدي اتشنكل
انا بس عاوزه اقول للقمر بتاعنا الف مبروك عليها واد من اجع الشباب فيكي يا محروسه واحلاهم كمان ربنا يخليكوا لبعض وقولها تاخد بالها منك وتعرف ان انا حماتها الصغننه بجد يا ايهاب اعدي الايام اللى انا فيها دي واعزمك انت وهى ونجيبكم نحتفل بيكم حفله نونو كده على قدنا
ربنا يوفقك واهو كاس مو يا ضنايا وهنشرب منه ههههههههههههه
متسمعش كلام البنت الخيخه دي احسنلك انا بقولك اهو
بوس القمر بتاعنا بقى كتير وقولها مبروك عليكى ايهاب ومبروك علينا اخت حلوه لنا

Appy يقول...

واد يا هوبا انا فضحتك على البلوج عندي وعملت لك تهوئه يالا يا عم ابسط بقى

لماضة يقول...

الف مبروك يا شنكوتي
والله واتشنكت بحق وحقيق
مبروك يا باشا وعقبال البكاري
ملحوظه
انا حاجزه اول عريس صغنن

بت خيخة وأي كلام يقول...

امبارح كان عيد جواز اخويا اسر

كان عيد جوازه الاول

وامبارح كان كتب كتاب اخويا التانى اللى هو سيادتك


وانا مازلت مصرة على رأيي

جاتكم نيلة انت وهو
جاتكم ستين نيلة
فرحانين على اييييييييييييييييه

ده انتوا هتلبسوا شوية خوازيق انما ايه؟

وابقوا تعالوا اعملوا بي بي على قبرى لو ماندمتوش على عملتكم السودا دى؟



اخر كلامى
احسننننننننننن تستاهلوا

اللى مايتعلمش من اخطاء غيره يبقى يستاهل اللى يجراله

جاتكم نيلة
بس بقى ها

واحدة مفروسة يقول...

مبرووووووك الف الف مبروك
بس خد النصيحة من افواة ......هههههههه المتجوزين
مش انت كتبت الكتاب؟؟؟ بس خلاص خليك على كده
هههههههههههههه
و الله ربنا يسعدك و يسعد ايامك و يهدى سركم يارب

بت خيخة وأي كلام يقول...

خلاص شنكوتى اتجوز
خلاص وقع فى الفخ
وهيبقى خلاص متنيل
وخلاص هيدوق الكخ

خلاص هيدوق الكخ
خلاص هيدوق الكخ
وايييييييييييييييييه
ايييييييييييييييييييييه


نصحته انا كتير
وياما قلتله بلاش
عملى فيها كبير
وقال ايه مايستناش

قال ايه مايستناش
قال ايه مايستنااااش
وايييييييييييه
ايييييييييييييييه


الواد يا حبة عينى
عنيه اتزغللت
اتاريه مش واخد باله
ان حياته اتقندلت

حياته اتقندلت
حياته اتقندلت
واييييييييييييييه
ايييييييييييييييه



صعبان عليا يااخويا
صعبان عليا حالك
ارجوك شيل الغمامة
شيلها وارجع فى كلامك

شيلها ورجع فى كلامك
شبلها وارجع فى كلامك
وايييييييييييييييييه
اييييييييييييييييييييييه



انا رايحة اعمل بي بي
رايحة افك حصر
مزنوقة انا كتير
مزنوقة من ساعة العصر


مزنوقة من ساعة العصر
مزنوقة من ساعة العصر
وايييييييييييييييييييه
ايييييييييييييييييييييه

بت خيخة وأي كلام يقول...

واد يا ايهاب

انا فرحنالك بجد
قفشت نفسى عيونى بتدمع
وانا بقرا ردك عليا على البوست اللى قبل ده
قفشت نفسى فرحنالك

انت بتكتب وانت فرحان
كلماتك فيها فرحة

ربنا يسعدك يا هوبة
ويسعد مراتك حبيبتك

وانا مستنية انك تعرفنا عليها
عايزة اتكلم معاها كلام كتيييييييير اوى
وعايزة اتكلم معاك انت كمان
عايزة اقولكم شوية اخطاء ارتكبتها فى حياتى الزوجية
عايزة اقولكم عليها علشان تاخدوا بالكم ومتقعوش فى الاخطاء دى علشان حياتكم تكون اسعد وتكون احلى


انا متخيلاك وانت لابس البدلة امبارح

ومتخيلاك وانت لابس البيبيون
ومرة تانية متخيلاك وانت لابس كرافت
كنت زى القمر فى تخيلاتى
متخيلة نظرة عيون حبيبتك لعيونك


ربنا يسعدكم


يارب باركلهم فى حياتهم يارب
يارب الاتنين دول انا بحبهم
فعلشان خاطر حبيبك النبي يارب
باركلهم وابعد عنهم كل شر
واسعدهم كتيييير اوى
والنبي يارب ماتشمت فيهم واحدة خيخة ابداااااااااااا


من قلبى بجد
الف مبروك يا ايهاب
وبوسلى عروستك فى جبينها

فى جبينها يا واد....قلت فى جبينها


سلام يا أطيب اخ

اختك خيخة

كيكى عوووووو يقول...

لولولوولىىىىىىىىىىىىىىىىىىىىىىىىىى
لولولوولىىىىىىىىىىىىىىىىىىىىىىىىىى
لوولوولىىىىىىىىىىىىىىىىىىىىىىىى

فاتيما يقول...

بس يا خيخة سيبى الواد يفرح بقى
يا بنتى بكرة هيكتشف لوحده كل حاجة
سيبييييه ينبسط شوية
ألف مليون مبروك يا إيهاب
ربنا يسعدك
و يباركلك يا شنكوتى
متسمعش كلام اصحابك
اللى بيقوللك اعقل
و بتاع
و لا كلام البت الخيخة حبيبة قلبى
و لا كلامى لما بكون معكننة من الجواز
و سنينه
و لا كلام أى حد يا بنى
اسمع كلام قلبك و بس
أى علاقة بين اتنين مش شبه حد تانى
و حاجة لوحدها غير الدنيا كلها
و الجوز دول اللى ف إيديهم ينجحوها أو تفشل بسببهم
فربنا يكتبلك الخير و النجاح
كنت منزلة غنوة فى البوست الاخير من وحى الا محيص و لوحدى كدا
بس دلوقتى بعد الخبر الحلو دا إعتبرها أهداء ليه إنت و العروسة
ربنا يسعدكم ويفرح قلبك يا رب
اختك ام يوسف

funky girl يقول...

الف مبرووووووووووووووووك بجد
ان شاء الله ربنا يتمملوكو بخير و تبقى حياتكو جميلة
و ربنا يوفقكوا ان شاء الله :)

عاشقه وغلبانه يقول...

ابي وخيخه وفاتيما قالوا كتير اوي وخصوصا القصيده الخيخيه هههههههه
واضح جدا انهم كلهم بيحبوك وقلبهم عليك ومن هذا المنطلق بيحذروك ويوعوك علشان ماتستفيد من تجاربهم وهذا شئ كويس
ههههههههههههههههههههه
عموما دي اول زياره انا جايه من عند فاتيما وقولت اهي مناسبه في اولها حلوه اروح ازرغطلي شويه واشرب شربات
مبرووووووووووك ليك كتير
والجواز كاس وداير علي الكل وانا لسه قاعده مستنياه ياريت تبعته بعد ماتشرب منه
هاتعيش التجربه بحلوها ومرها
انت وشريكه حياتك لوحدكم مش حد تاني قادرين تظهروا محاسنه وتتجازوا عن سيئاته وتقللوها وماتخلوهاش تعكنن عليكوا
الجواز لوحه كبيره فيها الوان ابيض واسود لو ركزنا في الاسود هانشوفها كلها سوده في وقت ان الابيض موجود
ولو ركزنا بنظرنا علي الابيض فمش هانشوف غيره
فاهم حاجه من كلامي اصلي مش فاهمه روحي
ههههههههههههههههههه
عموما الف مبروك لتاني مره

ابو على يقول...

مبروك واللهى وعقبال كل اللى متجوزوش يتجوزو بقى هههههههههه

سنه حلوه يا جميل

سبهللة يقول...

الف مبروك يا ايهاب
بارك الله لكما وبارك عليكما وجمع بينكما فى خير
على فكرة
الجواز حلو جداجدا
وانا رأيى دة بعد 8 سنين جواز
الحمد لله
دة كفاية نعمة الاولاد

ربنا يتمم لك بخير

إنـســـانـة يقول...

بارك الله لكما وبارك عليكما وجمع بينكما فى خير

مليوووووووووون مبروووووووووووووك يا استاذ شنكوتى

بس نصيحة منى طالما قررت تنط فى البحر لوحدك بمحض إرادتك ودون إجبار من حد فكمل للآخر وماتسألش ولا تناقش حد غير لما تغوط شوية فى البحر

وقال على رأي المثل: لا تذم ولا تشكر الا بعد سنة وست اشهر

يعنى لسة قدامك هدنة - سنة وست شهور - لحد ما تقول رأيك الحقيقى فى تجربة الجواز


أيها الشاب الشنكوتى المتزوج ... نحن السابقون وانتم اللاحقون وعقبال كل مجنون
:D

Doba يقول...

دقو المزاهر يلا يا أهل البيت تعااااالوا
جمع ووفق والله وصدقوا اللى قالووووووو

اللهم بارك لهما وبارك عليها واجمع بينهما فى خير يارب العالمين
================

الف مبروك يا ايهاب ويارب دوما من فرح لفرح
وزى انت مقولت الموضوع ما هو الا اختيار ومسؤولية مشتركة ومودة وحب وعشرة بالمعروف

اتمنى انك نكون قوام عليها عن حق والا تاخذك الدنيا وحوارات المجتمعات للأسفل وتطلع دوما للأفضل

خلى ايديها ف ايديك يا واد على طول واوعى تسيب ايديها

كل راع وكل مسؤول عن رعيته
اتمنى تخلى بالك من أسرتك وترعاها وتكون قدها وقدود

كل واحد بيحب يعيش كويس سعيد ومبسوط فاتمنى ان انتم الاتنين تسعوا دايما لده وتحققوه ويكون ده هدفكم دايما وكل واحد فيكم يكمل التانى قلبا وقالبا

كل امنياتى لكم بالتوفيق والسعادة والذرية الصالحة

لولولولولولولولى
هبة

حاسوباتيه يقول...

الف الف مبرووووووووك وربنا يتمملكم بخير يارب

عصفور المدينة يقول...

مبروك يا إيهاب وربنا يتمم لك بخير
وسيبك من الناس اللي بيتهكموا على الجواز

مخبر قمل دولة يقول...

بارك الله لكما وبارك عليكما وجمع بينكما في خير
ربنا يرزقك الذرية الصالحة ان شاء الله
بس مش عاوزين شباب شناكيت تاني في البلد
كفاية واحد بس :D

ňįĝŗő يقول...

حبيبي حبيبي حبيبي
ألف مليون مبروك يا عمونا
ربنا يباركلكم في بعض و يجمع ما بينكم على خير دايما .. قول آمين

مبروك يا إيهاب
فرحانلك من الحتة اللي هي جوا ع الشمال دي
ربنا يسعد ايامكم يا رب و يبعد عنكم كل شر



يلا سلام
أخوك محمد

وومن يقول...

ألف ألف ألف مليوووووووون مبروووووك يا إيهاب

بارك الله لكما وعليكما وجمع بينكم في الخير
إن شاء الله

ربنا يحعلهالك نعم الزوجة الصالحة ويجعلك ليها نعم الزوج الصالح آآآآآآآمين

... amr يقول...

مبروك يا واد :) بس انا هسألك كمان 6 شهور كدة مثلا ولا حاجة , وهأقولك
اية أسوأ حاجة في الجواز
ساعتها ممكن اسمع منك اجابات زي
و الله المشكلة اللي ممكن فعلا مش لاقي لها حل , هي انك بتضطر تتعامل مع ناس - ممكن- ميكونوش نازلين من زورك :)
بس المضطر يركب الصعب
أو .. ممكن ترد تقوللي اية بقى

انك بتضطر تعيش حياة ناس تانية , مش حياتك لوحدك بطولك و براحتك بس .

:)

ارجع يا مجنووووووووون :)))))


ربنا يوفقك يا واد , انت تستاهل كل خير

ساره يقول...

يارب يسعدك يا ايهاب انت وغاده
ويرزقكم الذريه الصالحه امين
ان شاء الله لما ازور مصر اتعرف علي اجمل عروسه :)

ساره يقول...

طب ما ترسلي علي ايميلي صوره للفرح تصبيره لغايه ما اجي :)

همس الاحباب يقول...

ههههههههههههههه
انت وقعت يا سى حسبو
ههههههههههه
الف مليون مبروك يا هوبا
وبالرقاء والبنين
ولا يهمك يا عم احنا قدها وقدود
هو احنا هندخل القفص لوحدينا
يلا المغفلين زادو واحد
ههههههههههههه

طوبه فضه وطوبه دهب يقول...

الف مبروك بارك الله لكما وبارك عليكما وجمع بينكما فى خير عارف ايه اصعب ما فى الجواز اننا شايفينه شىء صعب لكن لو شفنا الجوانب الايجابيه والكويسه فيه اكيد هتختلف وجهات النظر انتم السابقون ربنا يخليكم لبعض يارب

Lyssandra يقول...

أهلاً يا إيهاب

ألف ألف مبروك
وآسفه انها متأخرة شوية :)
معلش بقي
عطل فني :)

مرة تانية ألف مبروك
ربنا يباركلك يا رب

أختك
Lyssa

زقطـوطـة يقول...

ألف مليووووووووون مبروووووك
يا عرييييييييييييس
ألف ألف ألف مبروووك
ما تقلقش من الجواااز
أهم حاجة التفاهم
تبقى تيجي تزورني بقىىىىىى بققققىىىى

كيــــــــــــارا يقول...

ايه اسبوع الاخبار الحلوه دا

الف الف الف مليووووووووون مبرووووووووووووووووووووووك

لولولولولولللللووووووووووووولي

احلي زغروطه لايهاب ياجدعان

بس ماله الجواز بقي مش تسمع كلامهم (^_*)

يا مراكبي يقول...

طيب

بعد الف مبروك والذي منه .. أحب أشوف البوست اللي هتكتبه في الذكرى السنوية للجواز .. والأيام بيننا

كان معكم .. متزوج سابق .. سيبوني ده أنا كاتم ف نفسي وساكت

:-)

آيوشة يقول...

الف الف مبروووووووك انت كده عملت عين العقل ولا يهمك من كلام الناس :)
ربنا يتمم بخير ويجمعك بينكم على خير دايما

حزينه يقول...

الف الف مبروك

ويارب يتمملك بخير

حزينه

حزينه يقول...

الف الف مبروك

ويارب يتمملك بخير

حزينه

مطلق يقول...

ههههههههههههههههه

زادوا واحد يا ايهاب.................

وخلي خيخه تقولك همه مين

ماء تشرين يقول...

الف مبرووووك

وبجد بجد متسمعش كلام حد لانه كل حد منهم بيقول الكلام ده وبيرجع ينام في حضن زوجته ويجنن لو مش في البيت

ربنا يباركلكم يارب ويجعل بينكم الموده والرحمه يارب

حـــلـــم كــــان يقول...

الف الف الف مبروك

بجد فرحت لما عرفت

الشنكوتي الكبير يقول...

آبي

الله يبارك فيكي يا ابي ويسعد ايامك يا جميله
عقبال فرحك يارب واجي ارقص معاكي ونغيظ العريس كمان
هههههههههههه

اوعي متجيش فرحي لحسن اقطع راسك

====================


لماضه

يا لماضه العرسان كلهم تحت امرك
بس ده انتي عنك ثقه كبيره فيا بقى على اساس اني مش بس هخلف بسرعه وكمان هيبقى على مقاسك مره واحده كده


عقبالك يا جميله


==================

بنت خيخه واحلى كلام


ما احلى هذه الخوازيق

انا معاكي بيبقى فيه مشاكل وتعب ومنغصات بس صدقيني لحظه حلوه بتنسي كل ده سبحان الله ممكن نقعد نتخانق اسبوع على حاجه ونزعل قوي من بعض بس لحظه بينا نتصافى فيها تعوضنا زعل الأسبوع كله وربنا يعدي ايام العصبيه الأولانيه دي على خير ومتشكر ليكي يا قمر على تليفونك وتشجيعك وكل اللي بتعملي هده يا قمر ربنا يسعد ايامك وتفرحي بشريف يارب ربنا يخليكي يا اجدع اخت في الدنيا

================

هكمل باقي حبايبي بعد شويه لو عرفت اخد الكمبيوتر تاني من اخواتي

سلااااااااااااااام

وعقبالكم كلكم ومتشكر لكل اللي باركولي يا اخواتي

mimi يقول...

مبروك الف مبروك يا شنكت

انا عرفت من دوبا ..

في الفرحة الكبيرة ان شاء الله

سلامي للشبراوية زوجوجتك

وكل سنة وانت طيب

هابي بيرث داي

خواطر شابة يقول...

مبروك الزواج وبالرفاء والبنين ان شاء الله

مدحت محمد يقول...

المغفلين زادو واحد

Plogs يقول...

This is such a nice addition thanks!!!
فعاليات الصوتي
شات صوتي
شات صوتي
شات صوتي
غلا الصوتيه
شات صوتي
شات صوتي
شات صوتي
شات صوتي
الشات الصوتي
غلا الصوتيه