السبت، مارس ٧

الشجره

الشجر عامل زي البني ادمين
والنهارده هتكلم عن شجره من دول
الشجره لما بتتولد بتكون ضعيفه ومجهده
العود طري
واي شده بتقلعه
واي قسوه عليه بحبل جامد تعوجه
في ناس بتربط بالحبال جذع الشجر من يوم تيجي وتزرعه
عشان اما يكبر يبقى ضهره منحني
ميسدش الشباك بورقه الكبير
لكن ده طبعا لما يبقى العود طري
والجذع لسه ضعيف قوي
والشجر دية كانت ضعيفه وهاديه زي صفحة نهر في بداية المسار
لكن الجانيني كان غبي
قال ايه عشان تبقى جميله وطيبه
لازم يشد الحبل يعصرها قوي
علشان تصير حلوه وسهله عليه يشيلها يحطها
الشجرة طلعت حلوه فعلا في العيون اللي تشوفها تشدها
لكنها من جوه تصرخ الف اه
الشجره كبرت على البستان ولازم تنقطع
وتروح على حته جديده تليق لها
لكن الجنايني قرر انه هو بس اللي يقول على فين تروح
ولا همه هي عايزه ايه
ولا همه هي ناسبها ايه
والصفقه تمت في الخفا
وجاي قال علشان ياخدها بجدرها
ويحطها عند الجنينه اللي صاحبها دفع لها
الشجره المره دي عصيت زمجرت
عم الجنايني مش مصدق من العجب
الشجره نطقت يعني ايه
ازاي وليه
بس اخرسي
يا شجره يا لعينه لسانك تقطعي
مالكيش تقولي رايحه فين
ولمين اكون
الشجره كبرت وفروعها صبحت مذهله
نفضت فروعها والورق
ورمت عليهم جذع واحد من الخشب
عم الجنايني اندهش
لا هو قادر يجبر الشجره على الرحيل
ولا هو قادر يقتنع
بأنه مش قادر يحكمها زي ما كان زمان
بيهزها
يرعبها كان بالفاس زمان
لكن النهارده الفاس قدم
والصحه صبحت مش قوي
مقدرش يعمل أي شيء
فرضخ لها
وسابها تختار ارضها
القصه لسه في البدايه يا ناس هنا
ولسه يا ما راح نشوف
يا هل ترى الشجره صح في الأختيار
يا هل ترى الشجره راح تقدر على الدنيا الغريبه لوحدها
طب لو في يوم حست برغبه في انها تكون كما عم الجنايني كان لها
وتكون قويه في كل شيء
تفرض على الأرض الجديده رأيها
يا هل ترى ايه بكره يحصل يا شباب
انا مش هاخمن أي شيء
هاستنى لما يكمل كل شيء
وهابقى احكي واقول عليه
يمكن يكون الجاي احسن من اللي راح
يمكن

هناك ١٦ تعليقًا:

dodda يقول...

يا رب يجى يوم يكون الجاى احسن م اللى راح...

بس الجناينى المفترى امتى بنزاح من على قلب الشجره

يا ترى حيمشى وهى لسه فيها خير؟؟
والا حيسيبها جذع ناشف من جوه خاوى؟؟؟

يارب خير
يا رب يجى اليوم..
وانا وانت مستنين....

كاميليا بهاء الدين يقول...

الشجرة اتشدت بالحبال اتقومت .. واتعلمت

وعودها شد .. وبقى يقدر يصد

بس المهم يا هل ترى .. اختارت ارض خصبة

ارض تقدر تضمها وتزيد فروعها وثمارها؟

بكرة نشوف باقى الحكاية

بس هو كده م البداية

الشجرة ماشية صح ..


قصة جميلة اوى
معانيها كبيرة وعميقة

دام القلم المبدع بعفوية وإبهار

مساؤك سعادة ..

Empress appy يقول...

شجره بتتكلم انت هتستعبط
لا طبعا مفيش ده المره الجايه ابقى افهم ايهاب انا مفهمتش
المعنى فى بطن الشاعر وانا معنديش استعداد ادخل بطنك او اجيب كرشك بمعنى اوضح

Foxology يقول...

اتمنى اشوف يوم احس فيه ان اللى جه احسن من اللى راح :)

تحياتى :)

عروسة يقول...

وبعدين اكيد العيب فيا مش فاهمه يا اخي العزيز

عروسة يقول...

ولا انا فهمت شكلي غبية جدا وووحششششششششششششش

حروف يقول...

مممممممممممممممممممم مش عارفه
بس دمت بالف خير ومنورني ديما

ليلى فى عالم ادم يقول...

الله
حلوة اوى وى اوى
كلها معانى وصور
وفيها كمان موسيقى جميلة
انا حاسة يا ايهاب ان اسلوبك اتغير
نضج وبئا فيه عمق

تحياتى ليك ولموهبتك اللى بتكبر يوم عن يوم

Zika يقول...

ازيك يا ريس
انا ممدوح زيكا كنت معاك يوم الجمعه اللي فات
واول زياره لمدونتك زي اول زياره لمدونين كتير اتعرفت عليهم اليوم ده
تحياتي

*البت المشمشية *حلوة بس شقية * يقول...

الشجرة اتشدت بالحبال اتقومت .. واتعلمت

وعودها شد .. وبقى يقدر يصد

بس المهم يا هل ترى .. اختارت ارض خصبة

ارض تقدر تضمها وتزيد فروعها وثمارها؟



المعانى فيها حلوة اوى اوى
تسلم ايدك يا هوبة

kochia يقول...

هل فعلا اللي جاي احسن ؟؟
ولا دي مقدمة للاسوأ

ربنا يستر

تحياتي

Unknown يقول...

الله

Ehab يقول...

دودا
المدونين قالولي انها بتتنطق بالشده على الدال التانيه طبعا انا كنت بقراها كده لوحدي مش هم اللي قالولي يعني
هههههههه

تعليقك مهم جدا يا ترى فعلا لما بيجي الوقت اللي يرحل فيه الجنانيني المؤذي هل بيسيبها سليمه وبيسيبها قادره تعيش بكره براجه وسعاده ولا العلامات اللي سابها عليها بتشيلها معاها طول عمرها ويا ترى هينزاح امتى اصلا من على قلبها

ربنا يستر

سعيد بتعليقك قوي

---------------------

كاميليا

ازيك يا بنتي عامله ايه واخبار ابو حميد ايه سلمي عليه كتير قوي
مادام انتي حكمي انها بقت اقوى خلاص هنمشيها انها بقت اقوى وندعي زيك انها تكون اختارت ارض تستاهلها وتحقق فيها احلامها

دمتي بكل خير
عواف عليكي يا اختي

----------------------

آبي

يا بتنجانه يا سليلة قوم نمنم
ما انتي طول مانتي متنيله مع الخرفان هتفهمي اقاصيصي العميقه دي ازاي
خليكي في البتنجان بتاعك

ومالكيش دعوه بكرشي
ده مامي تعبت فيه قوي

----------------------

فوكسولوجي

انت منورني يا كبير

---------------

عروسه
ليه بس بعد الشر مين جاب سيرة الغباء

المشكله بس انك مفروض تحاولي تحلي الفزوره بالراحه مين في واقعنا بنطبق عليه الوصف
ومين ممكن يكون هو بطل القصه
مش قصدي حد معين بالأسم لكن الشخصيه يعني
زي فوازي الوظائف كده ده دكتور وده سباك وكده يعني

نورتيني جدا يا عروسه
ربنا يسعدك يارب

-------------------

حرروووف

ربنا ينور طريقك ويسعدك
بس متفكريش كتير
ههههههههه

----------------

ليلى في عالم ادم


دي شهاده جامده قوي
الحمد لله يا ستي اننا بنتقدم
عموما سعيد جدا ان البوست عجبك
وياريت ده يخليكي ضيفه مستمره هنا وصاحبة مكان كمان

ولو ان هيبقى لينا كلام كتير على بوستاتك انشاء الله
مش هنتخانق ولا حاجه بس غالبا هنفتح كرش بعض
هههههههههههه

منوراني دايما وربنا يديم الأخوه

--------------------

ممدوح زيكا

ازيك يا برنس
عارفك طبعا بضحكتك الطيبه
بأتفاق الجميع
انا سعيد بمعرفتك عاجباني روحك المتفائله الطيبه
ربنا يحفظك ويديم المعرفه الطيبه

---------------------

البنت المشمشيه حلوه بس شقيه

يا بنتي نفسي بيتقطع في اسمك بس
هههههههههههه

عموما يا ستي الله يسلمك ويسعدك
متشكر قوي على كلامك الجميل منوراني دايما وممشمشه المدونه بمشاميشك

-------------


كوشيا

فينك يا جميل من زمان

يا ستي ربنا يستر
لو فضلنا خايفين من بكره يكون اسوأ يبقى مضطرين نتقبل النهارده بمساؤه اللي كرهناها
على الأقل لو بكره مش حلو بس عندنا فيه امل

----------------


انجي

الله الله

منوراني

سلاااااااااااااااااااااااام

اخوكم ايهاب

دعاء العطار يقول...

فعلا للصبر حدوووووووود

على فكره طريقتك فى الكتابه بتعجبنى اووووووووى

بترجعنى لطفولتى والحواديت

بجد بتابع القصه بكل لهفه انى اعرف ايه اللى هيحصل

قلب ينبض بالحب يقول...

يارب فعلا تقدر تواجه وتصمد في وجه العدي وتقدر تثبت على الي هي فيه وما تتطايش لحد تاني، سلامي ليك ياايهاب ودمت بكل الخير

رحلتنا في الحياة يقول...

اعتقد اللى اتعود على الضعف والتبعية مش هيكون قوى ولا يواجه الحياة بسهولة
دى لحظات تمرد بس من جواها خايفة من المواجهة فى الحياة
بوست جميل جدا