الاثنين، مارس 30

اتصالات





اتصالات
مش قصدي الشبكة بتاعة النوبايل
انا بتكلم على فكرة الأتصالات في بلدنا
اي موقف تقع فيه لو عندك اتصالات تخرج زي الحلاوه
تموت حد تتخانق مع حد تشتم حد مش مهم عملت ايه
المهم ان عندك اتصالات وانا بصراحه معنديش اي اتصالات بأي حد خالص
اكبر رتبه في عيلتنا كانت جدي الله يرحمه عسكري في البوليس
قعدت احسب حاجات قد ايه كان ممكن تتغير في حياتي لو عندي اتصالات
اولا مكانش جدي هيسيب اسكندريه لما الجزار اللي قبضوا عليه بيبيع بغير التسعيره اتحبس على ايد جدي فحلف ليقتله طبعا الحكومه قالت لجدي منقدرش عليه احسن حل تسيب اسكندريه وتتنقل مصر
وقد كان يعني يا مفتريين كان زماني دلوقتي اسكندراني بحق وحقيق وعايش في اسكندريه ومتمزج المهم
قعدت افتكر لما كنت داخل من باب الكليه وغصب عني كتفي خبط في دراع امين الشرطه اللي واقف يتفرج على مانيكانات سياسه واقتصاد الجامدين المهم طبعا الراجل حب يترسم قدامهم قفشني من هدومي كده و"انت رايح فين مش تاخد بالك هو يعني الدنيا زنقت معاك مفيش غير هنا تعدي منه انت منين ياض طبعا اخوكم خاف على كرامته فرديت بهدوء وادب خالص انا من الجيزه حضرتك قالي خلاص عدي انت تبعنا مش فاهم تبعهم ازاي بس المهم اني نفدت ولو كان عندي ساعتها اتصالات كنت اكيد هتنفخ كده واقوله انت عارف بتكلم مين يا ابن التييييييت انت
افتكرت برده لما في الكليه طلعوا عيني علشان ضيعوا وصل الدفع بتاعي وقالولي انت مدفعتش السنه اللي فاتت ولازم تدفع تاني يا ستي انا دفعت بس الوصل مش لاقيه
مالناش دعوه انت متسجل مدفعتش
طبعا لو كان عندي واسطه كان ممكن يرجعوا للدفاتر بتاعة السنه اللي فاتت ويتأكدوا اني دفعت بدل ما انا طلع عليني لحد ما لقيت الوصل القديم
لو كان عندي اتصالات مكانش الراجل اللي اشترى جهاز تكييف من ابويا وقضى بيه الصيف كله جه يرجعهوله اخر الصيف ويقوله اصلي مش محتاجه وعايز فلوسي ولما ابويا رفض عملنا محضر في القسم والظابط ابن التيييييييت يقولنا لازم نحل الموضوع ده ودي اديله فلوسه وخد جهازك يا حاج وعوضك على الله
مواقف كتير قوي مش هاقدر احكيها كلها علشان البرستيج يعني وكده
بس المهم اني اتمنيت كتير يبقى عندي اتصالات

طب انا دلوقتي موبينيل ممكن احول اتصالات
ولا الفقري فقري برده

هناك 23 تعليقًا:

Doba يقول...

الفقرى فقرى برده
اوعى تحول اتصالات ليتقبض عليك بتهمة الرغبة ف انك تعيش كبنى آدم له حق يعيش ويتواصل مع الآخرين

اوعى تفكر تحافظ على ضميرك وتخاف ربنا وتعامل الناس كويس

اوعى تتقى ربنا فيهم ولازم تتعلم ازاى تهبش ف كل واحد بيحاول ييجى عليك
=============

بالذمة ده اسمه كلام
=============

احنا بقيينا عايشين ف غابة كل واحد بياكل وبينهش ف لحم الآخرين

ده بدل منتقى ربنا ف اعمالنا واحوالنا وبعد ده كله نقول ليه بس يارب كده ونلوم على اللى خالقنا ظروفنا المقندله واحنا السبب فيها
===========

اعرف ان القوى فيه الاقوى منه
وان اللى ليه اتصالات مش هيكونله ف الآخرة اتصالات توصله للجنة وتخفف عنه حسابه

===========
احمد ربك ان معندكش اتصالات وانك عندك ضمير يخليك تمشى با يرضى الله

والسلام ختام
هبة

Gemy يقول...

تسلم ايدك يا هوبه
بجد انا افتكرتك هتعمل دعايه لشركه اتصالات...(:
بس بجد بوست جميل...وانا معاك بجد ان كل واحد ليه اتصالاته بيدوس زى ما هوه عايز
بس الحمد لله كلنا مؤمنين ان ربنا اعلى من كل حد
(ومن يتوكل على الله فهو حسبه)
تسلم مره تانيه
وتقبل مرورى
اخوك محمد

Bant El7ag Dracula يقول...
أزال المؤلف هذا التعليق.
Bant El7ag Dracula يقول...

aslan bldna dy bald al etisalat ya bny mash `3reba y3ny m3ak alwooooo tsay alwoooooo m3aksh m3a al sla7af

ahmed_k يقول...

هههههههههه
طبعا ممكن تحول وبنفس النمره كمان هههه
دي مأساه يا هوبه بجد
فالواسطه والمحسوبيه تفشت في كل المواقع
فتجد انه لا يصبح قاض إلا من كان ابوه قاض
والضابط كذلك وفي كل المواقع الحيويه
فمن هنا يأتي الفساد حيث يتولى الأمر من ليس له بكفئ

ربنا يعدلها لأن الأمر لو أستمر على هذا الحال فلا أحد يعلم كيف سيؤول المآل


دمت بكل خير يا صديقي

*البت المشمشية *حلوة بس شقية * يقول...

هههههههههههههه
عارف يا ايهاب لو سبت موبنيل وحولت اتصالات دى
انا ممكن اعورك
انا بكره اتصالات جدا
خليك موبنيل
الدقيقيه بشلن دلوقتى
هههه

ايوشة يقول...

هو ده حال الدنيا فى مصر لما مسنود لم طالع عنيك وحقك مهضوم

زهرة الكاميليا يقول...

ههههههههههه

فكرتنى بفيلم سلفنى ثلاثة جنيه
لما على الكسار دخل حلبة المصارعة
والحكم بيقوله .. انت جيت هنا بإذن مين
الكسار رد وقال له .. جيت بإذن الله ..
ههههههههه

واسطتك ربنا .. سبحانه وتعالى
ونعم بالله


لك كل الود والاحترام

همس الاحباب يقول...

لا ممكن تحول يا باشا
ويبقالك اتصالات
وربنا يكتر من اتصالاتك يا باشا
بلد وسايط يا برنس
تحياتى وتقديرى

ملكة بحجابى يقول...

يافقرى يا ايهاب
هههههههه
ياابنى انت نسيت انك تعرفنى
هو انا مش اتصالات كفاية واللا ايه
؟؟
ياخبررررر
بس بصراحة انا لو كنت اتولدت ايام جدك ..ماكنتش سمحت يخرجوه من اسكندرية ولا بالطبل البلدى .. وسمعنى احلى سلام اسكندرانى لجنتى اللى بعشقها ياجدع

فكرتنى بقفشة بحبها بخصوص اللى مالوش ضهر والاتصالات والحكومة (اللى مالوش خير فى حاتم ..مالوش خير فى مصر)) أنا الحكومة
ماتخفش يا شنكوتى وراك بنات البنت منهم بميت راجل

GHARAM يقول...

البوست ده بيفكرني بالمثل اللي بيقول اللي ليه ضهر ماينضربش على بطنه

دعاء مواجهات يقول...

هههههههههههههههههههههه

والله ياهوبا انت زى العثل بجد

مفيش منك

بوست حلو اوى مش بس عشان دمة خفيف بس كمان علشان انت اللى كاتبة ودة سبب كافى طبعا

ميرسى ع البؤين الحلوين اللى قولتهم ف بوست الحكايات ..

يتردلك ف الافراح

ههههههههههههههههههههههه

سلام

مرجانة يقول...

فعلا االاتصالات يا ايهاب سر الحياة وخصوصا دلوقتي
واللي مالوش اتصالات ينضرب على كارته هههههههههههههههههه
سيبك انت المهم برده انك بناقر في الدنيا و هي بتناقر فيك ولو سكت يبقى تستاهل اللي يجري فيك
تحياتي

امرأة من عبير الورد يقول...

يا جميل البلد دي بلد أتصالات اصلها راحت علي الشهادات خلاص لنا الله ....
وحشتني جدا علي فكرة

كيكى يقول...

ههههههههههههه
يااااااااة يعنى لو كان فى اتصالات من زمان
مكنش الظابط واقفك ولاجدو ساب اسكندرية ولا كنت روحت القسم
ياة ياجدع دة التطور حلو فعلااا!!
بس انت يعنى عايز تجيب اتصالات رمز للتطور
انا فودافون بس بشوف اعلانات اتصالات والرصيد الضعف
حول واتكل على الله
عووووووووووووو1

الجواز و سنينه يقول...

يااااااااااه بقى اتصالات بقى ليها كل ده
طيب كويس انى اتصالات مش موبنيل و لا كليك
و بعدين ازاى جدك يخرج من الاسكندريه
انا من منصبى هذا و بكارت اتصالات اللى معايا اطالب برجوع جدك
و إلا هاطالب بأضراب و لا اضراب ابريل فى زمانه
اتأكدت بقى انى اتصالات

emadiab يقول...

التحويل لاتصالات دى الحاجة الوحيدة اللى ممكن تعملها و انت معندكش اتصالات
حول يا عم و اتكل على الله

بس لو كان عندك اتصالات احتمال كنا نعتر فى بعض بطريق الصدفة و نبقى اصحاب اصل محسوبك اسكندرانى

اللى مش فاهمه الناس اللى علقت ناقمين جدا على الناس اللى عندها اتصالات هو الواحد يا اما يبقى بضمير و شرف او يبقى عنده اتصالات مفيش حاجة تالتة شكل العالم دى موبينيل و فودافون

تعرف ان ساعات الاتصالات بتبقى مفيدة و تحمى الواحد لما واحد يظلمه و يستعين باتصالاته عشان يزود فى ظلمه
عرفت بقى الاتصالات مهمة ازاى
اكرمنا يا ااااااااااااارب

shayma يقول...

هههههههههه
لا جامده
اكيد تقدر تحول اتصالات بس ده اخر احلامك على فكرة متفكرش بعد كده انك تقدر توصل لاى حاجه عشان معاك خط اتصالات يعنى
هههههه
دى كوسه يا ابنى مش اى كلام

وبعدين وانت لو كنت فودافون مكنش حصلك كل ده
:))))))))))

سلامى
:))

Soooo يقول...

وماتنساش لو انت عندك اتصالات .. كنت هتقدر تستخدم تكنولوجيا الثري جي قبل اي حد


واحشني والله ياهوبا





سلامووووووووووز

الشنكوتي الكبير يقول...

دوبه
عيب عليكي يتقبض على مين يا ابنتي
ده اتصالات يا ناس
اتصالاااااااااااااات

==================
Gemy
اخي الجميل محمد نورتني وسعدت بمرورك جدا
اعلانات مين ده انا لو ياخدوني في الأعلانات مكنتش عرفتكم اصلا
ههههههههه

===============

بنت الحاج دراكولا

سلاحف ايه حرام عليكي حولتيني بالحروف بتاعتك دي
يعني مش كفايه الرعب في مدونتك كمان هتجيبيلي عته منغولي هنا

=====================

احمد يا غردقاوي

ربنا يستر يا ابو حميد
مش عارف الواسطه هتعمل فينا اكتر من كده ايه

دمت بكل خير يا اجدع اخ

==================

البنت المشمشيه رخمه بس شقيه

ايوه رخمه علشان بتعب من طول اسمك
هو انتي فاكراه رمضان مبروك ابو العلمين

عالم معندهاش دم
ههههههههههه
وبعدين فين الشلن ده يا نصابين امال الكارت بيخلص بسرعه ليه كده
وخلاص مش هحول بدل ما تعوريني

----------------------
ايوشه
ازيك يا صعيديه عامله ايه
ربنا يسترها عليكي وتشيلي ايدك من على خدك بقى

====================

زهرةالكاميليا

اختي
ازيك قبل اي شيء
وحشتيني جدا اخبارك ايه
وبعدين سلفني تلاته جنيه ايه يا شحاته انتي

هههههههههههههه

بس اقولك ليكي حق
ونعم بالله


======================
خالد همس الأحباب

ربنا يكر من اتصالتنا واتصالاتك يا كبير واحشني يا طيب اخ

====================

ملكه بحجابي

يا ساندني انت ورافع معنوياتي
ههههههههههه

المصيبه يا اختي ان البنات بقت بميت راجل
امال الرجاله راحت فين
=========================
GHARAm
ويفكرك ليه
ما هو نفس المعنى يا بنتي
منوراني خطوه عزيزه يا ابلتي
معلش اصل الملايه بتاعتك بتحكم القافيه

==========================

دعاء مواجهات

يا بنت انتي سكره نيجي فيك ايه انت يا سكر

ربنا يسعد قلبك يارب
وتسافري عمره تاني والمره دي تجيبيلي شال
واللي بعديها جلابيه
اللي بعديها طاقيه
وتعيشي وتكسينا يا سكر

=========================
مرجانه

قال سيب دماغك قال

مرجانه يا جميل منوراني ومنوره المنطقه التوينينه
بس يا خوفي على كارتي

=====================

امرأه من عبير الورد

ده ايه الهنا اللي انا فيه ده
وبتعلقي عندي كمان
ده النهارده عيد بقى

وحشتني موضوعاتك

====================

كيكي

ايوه امال انتي فاكره ايه

حولي معايا علشان ناخ رصيد ونبقى نكلم بعض بيه
اه كنت هنسى
عوووووووووووووو

====================
الجواز وسنينه

هههههههههه يعني سعادتك هترجعي جدي بعد ما الله يرحمه ودع خلاص
طب كنتي جيتي بدري شويه

اقولك انقليني انا وخلاص

منوراني

====================


emadiab

يا اخي دي فرصه زي العسل انا بحب اسكندريه واهلها كلهم
ربنا يسع ايامك
يجعلها معرفة خير قول امين

====================

يا شيماء مش علشان انتي فودافون تثبتيني وتضحكي عليا وتقوليلي قال فودافون قال

يا بنتي دي اتصالات وبعدين هو انتي عارفه ليه لونها اخضر علشان لون الكوسه يا عبيطه
يعني اتصالالت والكوسه قرايب

هههههههههههههه==

----------------------------

سووووووووووو


حليب هارتي

يا جدع انت لو تعرف ضحكتني قد ايه
لما افتكرت تعليقك على موضوع هاتلك عده ثري جي لما قلتلي هاتها بدل الجواز
تصدق لو كنت اتصالالت كنت استفدت من عروض الثري جي الجامده

وحشتني

سلاااااااااااااااااااااااااااااام
اخوكم ايهاب

غير معرف يقول...

طبعا انت عارفنى يا بيبو ماليش فى القرايه ع النت بس بما انك سايب الصفحة مفتوحة قلت أخش اتفرج. ليه يابنى كده تفكرنى بالحاجات دى. بس تعرف ياض انت ماشاء الله موهوب من يومك. مش عارفه اقولك رأيى فى البوست لأنه احسن من أنى أقول رأيى فيه. بس انت كل يوم بتثبتلى فيه انك دماااااااااااغ.
بس بقوله ايه؟......انت عارف
امضاء
ستك و تاج راسك

مدحت محمد يقول...

لا ده انت حظك وحش وحش يعنى

غير معرف يقول...

plzzzz ya3ni èyh èbn ètèbiiiite plzzz 3ayza afhamha