الأحد، فبراير ٨

اسطوره فرعونيه مش حقيقيه



هاحكيلكم اسطوره فرعونيه
بطلها الأمير نخت وده امير كان جامد جدا بس لسوء حظه اتفق عليه اربعه من السحره الأشداء
وقرروا يحبسوه علشان يستعبدوه ورموا عليه لعنه يفضل في الجب محبوس
لكنه كان طيب والكل بيحبه والشمس والقمر قرروا يساعدوه
الشمس تبعت نورها ودفئها عليه من بين جدران الزنزانه تكسر الموانع وتعبر تنورله وتدفيه
والقمر يجي بعديها يطمنه في لياليه ويخاف عليه ويحميه
وعرفوه ان مفتاح حياته مدفون في صخره تحت زنزانته
وكل اللي عليه يلحق يلاقيه
قبل ما السحره تعرف بيه
وبقى كل يوم يحفر حبه صغيرين
والسحره مش عارفين
وفي يوم عرف ان الميعاد قرب
لازم بسرعه يخرج المفتاح
وبدأ يسرع من خطته ويحفر بسرعه
لكنه فجأه الشمس فقدت سحرها اللي كانت بتساعده بيه
ومبقتش توصل عنديه
بالعافيه بتبعت له بواقي اشعتها من بين القضبان
وكلها كام يوم والشمس هتبعد عنيه
وقف عن التكسير والتدوير
وبصلها من بين القضبان
الشمس خافت عليه
قالت له سيبك مني واتلفت لمهمتك وقتك هيهرب منك
ابتسم وقال مهما كان اللي فاضل من الوقت قليل مقدرش اسيبك تمشي من غير ما اشبع من اخر قطره منك
سلام يا اعز صديق

طبعا محدش يسالني حصل ايه بعد كده لأني لسه مش عارف ومحدش يسالني طب القصه بترمز لأيه ولا حاجه كل ده انا مش هاقوله انا فاهم وخلاص يالا سلام بقى

هناك ١٩ تعليقًا:

Empress appy يقول...

انت بتودع صديقك طيب اسهل بدل الدوشه دى شغله اغنيه بودعك بتاعت وردة ايه الزهق ده هتجيب ليه نخت وفخت
صباحه يا شنكت
بس تفتكر فعلا ان ممكن يبقى فيه صديق وفى كده زى الامير يسال على صديقه او صديقه وفيه زى الشمس تشجع صديقها
امممممممم مجتمال برضه

البت المشمشية حلوة بس شقية يقول...

ههههههه
طيب وبعدين يعنى
اوصل فى الاخر للا يه
وبعدبن كل شوية تقول توصل لعندية
اسمه عندو مش عنديه
وبعدين ايه النظام هتكمل القصة ولا ايه
عايزة اعرف لاقى المفتاح ولا لاء

غير معرف يقول...

طب يعنى و إيه نظام المفتاح فى الليلة دى

لااااااا أنا محبش حد يسبنى معلقة

بس الأمير ده وفى اوى يا ريت يكون فى حد كدة اليومين دول

Lyssandra يقول...

حاسه اني قربت افهم حاجه
بس مش فاهمه اذا كنت فاهمه ولا لأ
علشان الفهم بقي حاجه صعبه اليومين دول
إيه اللخبطه دي ؟؟
حد فاهم حاجه ؟؟

:)

بس لو زي مانا فاهمه يبقي مغزاها عميق ونقي لأبعد حد

.....

ياريت بعد كده من غير ألغاز لو سمحت

دمت بخير دوماً
ويارب الأمير ده يلاقي المفتاح

:)

....

علي فكرة في صورة جديده في وحي الصورة
ابقي عدي بقي .. ومنور دايما والله يا إيهاب

أختك
Lyssandra

كاميليا بهاء الدين يقول...

طبعا محدش يسالني حصل ايه بعد كده لأني لسه مش عارف ومحدش يسالني طب القصه بترمز لأيه ولا حاجه كل ده انا مش هاقوله انا فاهم وخلاص يالا سلام بقى
...................

هو ايه ده؟

إنت بتكروتنا؟

ههههههههه

طب مش نفهم ..

ماشى .. بوست فلسفى إيهابى شنكوتانى خالص

طيب أنا هروح اجيب لك قصة فرعونية جميلة قرأتها
بس ليها مغزى .. مش زى قصتك اللى سرها عندك انت بس

ثوانى وراجعة

كاميليا بهاء الدين يقول...

يوم عادى فى حياة (عا-مرو)

الام: انت مش رايح المعبد يابنى

(عا-مرو) يتثاءب فى كسل هوه كل يوم معبد معبد
امتى بقى يا رب تتوب علينا من الدراسة وقرفها

الأم: معلش يابنى كلها لفتين للأرض حوالين الشمس وتبقى امنحتب قد الدنيا

عا-مرو: يسمع من بقك ربنا

يستحم (عا-مرو) من النيل ثم فجأة يصرخ :انتوا ياحماعة ياللى فى منف
الميه شوية ال صا-بون دخل فى عينى (مشاكل فرعونية يومية) ;)

ثم يفطر ويتعطر من زجاجة اللوتس ( اللى حبيبته نو-سا حابتهاله آخر مرة الشمس تعامدت على بيتهم)ا
يأخذ (عا-مرو) شاكوش و أجنة و يذهب الى المعبد

- صباح الخير يا شا-ويش(حارس المعبد)

- صباح النور

- الكاهن جه ولا لسه

- يعنى مانتاش شايف العجلة الحربية بتاعته راكنة قدامك اهى

- آه صحيح........استر يا رع

يدخل المعبد _اللى كان طبعآ على شكل هرم_بعد لما الكاهن طهقه

(عا-مرو): حد معاه صخرة زيادة يا جماعة

الكاهن: يعنى جاى متأخر وكمان ممعاكش صخرة

(عا-مرو): معلش يا كاهن أصل الجبل اللى جبته فى أول الدراسة خلص

الكاهن: ياسيدى انقش على ضهره...داحنا لما كنا طلبة كنا بننقش على زلط ونذاكر على ضوء الشهب

ثم يلتفت الى باقى الفراعنة .... المهم:انا كنت الاستشارى بتاع الهرم الوسطانى بتاع الملك خفرع طال عمره

الطلبة فى صوت واحد:آمووووووووون

ينتهى الدرس ويكون أول الخارجين(عا-مرو) بعد ما نقش اسمه على الحيطة بتاعت الغياب

ويتعمد المرور من امام كهف (نو-سا)فى طريق عودته ويحدفها بطوبة مكتوب عليها كلام حب وبتاع

......... مشهد تانى
يفاجأ (عا-مرو)وهو ماشى بعشرة شباب فراعنة زى الفل شايلين صخرة مستطيلة كبيييرة

(عا-مرو):ايه النظام واخدين الهارد و رايحين على فين

الشباب: رايحين عند رآ-فت .. عنده فيلم بس فى التمام

(عا-مرو):طب استنوا انا جاى معاكوا

...... مشهد تانى
ولد فرعونى صغير بيجرى بيزعق :اى-من...اى-من .. خير من يحكم الفراعنااااااااااااااااه يلا ياجدعاااااااااااان

ويوزع عليهم كل واحد حتة بردى مرسوم عليها صرصار (انتخابات يعنى ;) )


احد الشباب- كان ابوه وزير قبل توحيد القطري - "منك لله يا مينا .أشوف فيك يوووم" (بيكلم نفسه)

- عا-مرو : محدش له قريب فاتح محل جعرانات ياجماعة؟؟؟ أصل انا زهقت من الجعران بتاعى وعايز اجيب جعران بكاميرا

- واحد صاحبه: ياعم شوف حد معرفة يكون عايش فى آشور ولا بابل يبعتلك جعران مانزلش طيبة قبل كده و برخص التراب.......

منقولة من عام 2400 ق.م :D

ahmed_k يقول...

القصه جميله يا إيهاب
والمدلول من وراها كبير
أنا تقريبا فهمت فحواها
أن نفضل قد ما نستطيع مع أحبائنا
فلا ندري أتسمح لنا الدنيا بلقاء قادم بهم أم لا
فعلا قصه معبره لمن يعتبر

دمت يا أخويا بكل ود وحب

TIMMY !! يقول...

هههههههههه
الحمد لله ..

المهم النية :)

Lyssandra يقول...

سلام يا إيهاب

معلش التعليق المرة دي لكامي

.....

إيه يابنتي كل ده ؟

لالالالا أنا ماكنتش أعرف عنك كده خااااالص
دانتِ حكايه يابنتي

هههههههههههههههه

بس فين المغزي اللي قلتي عليه بقي ؟؟

:)

بجد مش ممكنه ..
تحياتي يا جميله

.........

شكراً يا إيهاب

وشكراً لمرورك عند وحي الصورة

يابني الصور دي علشان تخليك تفكر فعلا لأن تعليقك عليها بيعطيها أبعاد تانيه بجد

شكراً جدااااا

أختك
Lyssa

:)

princess يقول...

يعنى كفاية انك فاهم واحنا نتفلق ههههه
ماشى خلاص:))

dodda يقول...

رغم كل التنبيهات

الا انها حلوه

واعتقد انه يكون محبوس فى زنزانه احسن ما يتحبس فى قبر حفره بأيده...

Kiara يقول...

امممممممممم

مش في احسن من الاصدقاء في الدنيا بجد

وفي ناس منقدرش نبعد عنهم ونبديهم عن انفسنا

القصه مدلولها قوي

بس كويس انك انت فاهم :)

رابطة هويتي اسلامية يقول...

الحجاب حقيقة ثابتة أم مجال للتفكير

من باب تناول جميع الأراء وفتح باب النقاش كان لابد أن نتبني في رابطتنا هذا النقاش الذي سوف يجعل من النقاش مرجع للجميع للوصول إلي الحقيقة التي يعرفها البعض وتخفي علي البعض ويحاول البعض تجنبها.
ومن هنا تبنت الرابطة أن تكون هي حجة علي من يدور بينهم النقاش علي صفحاتها.
نفجر الجديد دائما حوارنا اليوم
الحجاب حقيقة ثابتة أم مجال للتفكير
وفيها ننقاش بعض المدونات التي أعلنتها صراحة رفضها للحجاب وحوارنا اليوم موجه إلي مدونة " مذكرات ثائرة ".
ندعوكم للمشاركة في هذا الحوار المفيد
تقبلوا دعوتنا ننتظركم لنستفاد منكم
رابطة هويتي إسلامية

دعاء مواجهات يقول...

هى مش ألغاز اى نعم
بالعكس الاسلوب اللى عاوز توصل بيه احساس معين جديد ومختلف وجدير بالاحترام

ربنا مايكتب الواداع على اى حد

تحياتى ليك ياهووبا

سلام

إيمان قنديل يقول...

القصة بتقول أننا لازم نسعى لهدفنا مهما كانت الظروف وحتى لو أتخلت عننا الناس أو الكائنات اللي بتساعدنا




انت مخاصمني والا حاجه مابتجيش تزورني في المدونه ليه ياشنكوتي؟؟؟؟

الرابطة وبناء الأمة يقول...

السلام عليكم ورحمة الله وبركاته
دعوة
أخي يا من رفضت سياسة مبارك عليك أن تكمل معنا الطريق حتي لا تكون دعواك دعوة إفتراء دون إثبات
دعوي مرفوعة ضد مبارك بنص ".........................."
أول جلسة
نتمني منك أخي المدون الحضور للجلسة
مع تحياتنا لك بالتوفيق
الكتيبة السياسية

*البت المشمشية *حلوة بس شقية * يقول...

هو اسم المدونة هو هو عشان متستغربيش
ونفس النظام بس اللينك اتغير
ضيف الجديد بقه عندك
اشطة

17 فبراير, 2009

Doba يقول...

لما الواحد يحب الشمس ويعتبرها صديقته
لازم يكون متأكد انها هتكون موجودة طول الوقت وعمرها مهتغيب ابدا ودايما هتمده بدفاها طول الوقت

الصداقة علاقة متينه ولما بتكون صادقة وبدون مصالح شخصية بتمتد للأبد

ربنا يديم قرب أصدقائك الأوفياء

هبة

فتــافيت (رحاب الخضري) يقول...

يعني محدش يسألك عن اي حاجة
يعني لما احب اخاطب المدونة اكل مين انا

ممكن تقول؟؟.. يعني اتصل على 0900 ولا ادخل السحب دلوقتي انا

بوست لايت مع ان محتاجة انك تقولي فحواه عاااااااا

بس هو تقريبا الاخلاص والكلام ده

جواب بقى عليا