الأحد، نوفمبر 16

في المترو والمحاكمه

تحديــــــــــــــث
الى الأستاذ خالد عزب بص حضرتك البوست ده عن الحشريين والشخصيات اللي بتدي رايها وتحط مناخيرها فيما لا يعنيها والناس كلها لامتني على طولة بالي مع الشخص ده علشان كده قررت اني مأسكتش لحد حشري بعد كده او يفكر يهين تفكير
علشان كده احب اقول لحضرتك مع احترامي ليك يعني
"اطلــــــع بـــــــره"
ايوه بالعربي كده وبالزوق كده متجيش مدونتي تاني لا تقول رأيك ولا تتعب نفسك وتضيع وقتك الثمين عندي لما حضرتك شايف كلامي هايف ورغي من غير داعي بتتعب نفسك وتقراه ليه ثم مين اصلا قال لسعادتك ان ده موقع حكومي تعليمي دي مدونتي الشخصيه بقول فيها اللي يعجبني بس واتكلم عن تجاربي انا بس يعني كل ما فيها يخصني لوحدي انا واصحابي اللي بيهتموا بكلامي انا بقى لا اعرفك ولا عايز اعرفك ولا يشرفني اعرفك من الأخر وبدون تطويل علشان وقتك الثمين اطلع بره ومتجيش هنا تاني
والكلام لأي شخصيه حشريه, اللي يحب ينقدني يتفضل ينقدني لكن اللي يعمل علامه ويحاول يهزأني او يتطاول في الكلام مالوش غير ابو ورده هاستلفه من آبي




في المترو والمحاكمه

تاني حكايات من المترو يا اخواني
المره دي بقى هاحكي موقف حصل و مبقتش فاهم حاجه خالص منه
نبتدي
قعدت في المترو من اول الخط طبعا علشان انا ساكن في المنيب وهي اول الخط والحمد لله عرفت اظبط نفسي اني مقعش في غلطة عربية الستات دي وبقعد في عربية الرجاله على طول
المهم قاعد وفرحان بالموبايل بتاعي علشان عليه شوية برامج جديده والعاب بقى وفرحان بيهم زي اي محدث نعمه عادي يعني – الله يسامحك يا سووو انت اللي نصحتني بالموبايل الثري جي – المهم يعني قاعد بلعب في حالي وماليش دعوه بحد والمترو رايق لسه, وشويه الدنيا بدأت تتزحم وجه واحد وقف قدامي وتقريبا هو واقف فوق مني شويه شويه وهيدوس على دماغي
المهم طبعا انا بصيت لقيته مش راجل كبير ولا حاجه بس هو تقريبا عايز يتفرج على الموبايل ويمكن انا ازهق فياخد الكرسي عملت فيها عبيط طبعا وسبته واقف على رجلي براحته ,


لحد هنا وعادي الموقف بيحصل كتير وانا مشغول في الموبايل حد وقف جنبه وراح حاطط شنطته جنب مني على الرف اللي جنبي مأخدتش في بالي بصراحه ومبصتش هو مين اصلا ,


وبعد شويه الراجل اللي انا مكنتش شايفه ده بدل مكانه مع اخينا الغتيت اللي راكن فوق مني علشان يسند ظهره بصراحه كنت سرحان فمخدتش بالي ان المفروض اني اقومله لأنه فعلا راجل كبير شويه في السن وعادي يعني انا لما بلاقي حد كبير بقومله من نفسي من غير طلب منه او من غيره بس الشاب اللي جنبي فجأه اخدته الحماسه وقام وقعده لحد كده والموقف عادي خالص وانا مش مدي اهتمام هو صحيح سبقني للثواب بس برده هو فضل سايبه واقف قدامه كتير وانا مكنتش واخد بالي المهم بعد ما الراجل قعد شكره على معروفه والتاني يقوله لا يا حاج ده حقك اصلا ومكانك التاني يقوله الله يكرمك يا ابني وبعدين فهمت ان الكلام يقصدوني انا بيه على اساس اني تنح كبير وازاي مقمتش انا للراجل الكبير وان الشاب التاني قام مضطر لما لقى ان انا مفيش مني فايده مبقتش فاهم بصراحه هو ايه الفرق لو قام هو او قمت انا المهم حد قام وبعدين هو كان واقف قدامه هو يعني هو اقرب واحد منه المهم انا طبعا سمعتهم وعملت عبيط , ده يقوله اصل الناس معرفش جرالها ايه وده يقوله معلش يا ابني يمكن تعبان ولا حاجه
سكت وقلت يا واد طنش خااالص
يقوله اصل الزوق ومعرفش ايه وبعدين حسيت الكلام هيبتدوا يلبخوا بس قبل ما اتكلم اتلفتلي الراجل الكبير وقالي "مش يمكن تعبان هو مش انت تعبان برده وراجع من الشغل تعبان"


بصيتله وقلتله" الحمد لله على كل حال"
راحوا باصينلي باستغراب وقالي الراجل الكبير" انت بتشتغل ايه يا ابني "
حسيت في نبرة صوته كده انه عايز يقيمني كده ويعرف انا ايه في البلد دي يعني
رديت بهدووووووء " على باب الله "
ابتسم وقالي "لا بجد بتشتغل ايه؟"
كررتها تاني " على باب الله "
قالي" طيب انت خريج ايه ولا دي كمان على باب الله"


ابتسمت غصب عني وقلتله " على باب الله "
"يا سلام هو كله عندك كده انا عايز اتعرف بيك يا اخي ولا فيها حاجه دي"
"طيب اسمك ايه يا سيدي"
قلتله "واسمي يفيدك في ايه ولا شغلي يفيدك في ايه"
قالي" انا بس عايز اعرفك يمكن اقدر اخدمك بحاجه انت اصلك مش عارفني انا مين"
ان ان ان ان ااااااااااااه تشششششششش


مين حضرتك ؟؟؟



"انا ........" رتبه كده في الجيش مش فاكرها بصراحه , طبعا منظره ميديش على رتبه خالص وبعدين قعد يقولي انه ممكن يفيدني في جيشي وممكن يفيدني في العسكريه بتاعتي في الكليه حبيت افرسه بقى
قلتله انا ماليش جيش واخد اعفاء نهائي, وده حقيقي فعلا راح الظريف اللي واقف وقعده يقولي" اه اصله حيلة بابا وماما الحيله يا سيدي "


بصيتله باستخفاف وسكت معبرتهوش المهم راح سالني" طيب والعسكريه في الكليه"


قلتله لا ولا دي كمان ماليش عسكريه
الراجل حسيت هيضربني وبعدين قالي "ليه بقى "
قلتله" كده انا حاله خاصه على باب الله"
راح قالي "ااااااااه طيب "


مش عارف هو فهم ايه بس المهم انه زهق مني وحس اني مش بتعصب بسهوله ولا هيعرف يغلس عليا رجع سالني طيب هو اسمك ايه بس قلتله" اسمي ايهاب "
قالي "يعني اسمك حلو اهو امال مكسوف تقوله ليه "
همهمت في سري "لا اله الا الله" سمعني وقالي" الله يعني مسلم اهو" قلتله" يا سلام ايه المشكله "



سالني طيب بالنسبه للشغل يعني قلتله من الأخر بشتغل كذا كذا وخريج كذا كذا
تحب تعرف حاجه تانيه
قالي لا شكرا وسلم عليا كأننا اصحاب وسابني ونزل

بصراحه حسيت انهم حاكموني وحققوا معايا كده بأسلوب غريب برغم ان اللي كان واقف قدامنا سخيف وكنت ممكن اهزأه بس الراجل الكبير كان متعمد بصراحه ان كل كلامه يكون في حدود الصح يعني متعرفش تمسك عليه اي اساءه كل كلامه بشياكه كده برغم حشريته وسخافة بعض ملاحظاته الا اني مكانش ممكن ارد عليها باسلوب ناشف
ما علينا سرحت بعد ما نزل يا ترى انا في نظره دلوقتي ايه
تفتكروا انتوا ايه
وهل انا كنت غلطان
ولو حصل معاكم الموقف ده هيكون رد فعلكم ايه

هناك 22 تعليقًا:

~*§¦§ Appy §¦§*~ يقول...

يا طوله بالك يا ايهاااااااااااااب

يخرب بيت دماغك يعنى انا مش عارفه لو حد عمل معايا كده هعمل ايه
غير كده هو الشاب اللى قام مش فى سنك برضه هو ايه الفرق ما واحد قام ما انت كان زمانك قمت كان هو هيستريح
يا ابنى اللى زى دول تبخ فى وشهم اووووووووف

Doba يقول...

مش لاقيه غير انى اقعد اضحك على الموقف
عارف

فيه مواااااااااااااااقف كتيييييييير
قوى بتعرضلها كل لما بركب المترو انا ويوسف وكل واحد فاكر نفسه علامه فى الأخلاق والقيم ويتفلسف ولو انت عارف حاجة بالفعل أصح بتبقى كخة

يا بنى عليه العوض ومنه العوض

فكك
كبر
نفض

فى هذه الحالة لازم نلجأ لكلمات الأخوة المراهقين ونفضله يا باشا

بس بصراحة انت رخمت عليهم قوى
شكلك شحات كده - كل حاجة على باب الله

يلا حصل خير ان شاء الله
سلام يا صديكى
هبة

~*§¦§ Appy §¦§*~ يقول...

لا مش عارفه اسكت
لا يا ايهاب انت سكت ليه للواد اللى بيقولك حيله ماما وبابا ده
انت ازاى تسمح له يقولك كده
طيب يا ايهاب بس لما نبقى نشوفك يا ايهاب ماشى ماشى ماشى
انا ماشيه بقى علشان متغاظه منك اقولك احسن تستاهل

princess يقول...

الله يكون فى عونك بجد يا ايهاب
بس تصدق انا مرة دخلت ست كده المترو وانا قاعدة وشخطت فيا وقالتلى قومى يالا من كتر الخضة قمت علطول هههههههه اه والله مع انها مش كبيرة ولاحاجة
بجد مش فاهمة الراجل الى سالك ده يخصه ايه بكل المعلومات دى!!!
حاجة غريبة فعلا بس احييك انك اعصابك مش فلتت
وكل مترو وانت طيب ولسه ياما هنشوف!!
تحياتى

انا حره يقول...

يالذيذ يارايق انت

مولان يقول...

ههههههههههههههههههههه

ايه بس ياايهاب عادي الحشرين كتير

بس انت طولت بالك اوي ايه ده


يالهوي بجد ايه الناس دي

ahmed_k يقول...

والله يا إيهاب لو ما كانش جرى هذا الحوار كنت قلتلك إنك تحمل نسبه من الخطأ,
لكن بما أنه طلع تنع وطفيلي بهذا الشكل
فأنت مش غلطان بالعكس ربنا مخلكش تاخد بالك منه لأنه بهذه الطباع التنحه.
ماله أسمك أيه وشغال فين بصراحه كتر خيرك انك إستحملته انا لو جرالي الموقف ده كان ممكن أخرج من المترو يا ضارب يا مضروب ههههههه
وتلاقيه ولا رتبه ولا حاجه أصل في ناس كده متسلقه وتحب تعملها وضع لأنه بلا قيمه, وبعدين أيه يعني لواء أو عميد أو أي رتبه يعني مش قيمه اوي يعني
وراكب وسيلة مواصلات ليه مدام شايف نفسه رجل مهم
ياخي بلا نيله الناس إتهبلت


سلاااااام يا هوبه

بت خيخة وأى كلام يقول...

حسيت انهم اتنين رخمين وكانوا عايزين يستفزوك
ويجيبوا الغلط عليك

بجد يعنى رخمين جدا

smraa alnil يقول...

الاول انت نسيتني يا ابني ولا ايه
مش بقيت بتيجي عندي خالص

عامة هقولك بقي
انت فعلا غلطان لان بمجرد انك تداركت الموقف كان المفروض تقوم حتي لو كدة وكدة وتقعد الراجل اللي قام

بالاضافة بقي ان انا واحدة من الناس اللي فعلا بكون تعبانة وعايزة اقعد
والاقي واحد قاعد او اشوف واحدة حامل مع جوزها او ست كبيرة او راجل كبير وشوية شباب شايفينهم ومطنشين

في الاول انت مش غلطان ولا عليك ذتب لانك مش كنت اخدت بالك بس كان المفروض انك تغير من موقفك بمجرد انك لاحظت اللي حصل

غير كدة بقي نفض لاي حد وكبر الجمجمة
وعيش حياتك

والعب بالموبيل يا ريس

فاتيما يقول...

الموقف سخيف طبعاً بس إنت ما شا الله عليك كظمت غيظك
الحكاية دى منتشرة قوى يا إيهاب
حكاية أن الناس تحكم عليك لله ف لله كدا
و متفهمش مين اللى إداهم الحق دا
و لو متكلموش معاك زى الراجل دا ما عمل
كفاية بس يبصولك بصة بألف كلمة
اللى حاصل دا كله من اخلاقيات الزحام
الزحمة و الدوشة تخلى خصوصايتك مشاع و الناس تتحشر في مساحتك مكانياً و نفسياً كمان
تحياتى ليك

kochia يقول...

بص
انا اما اخد الامر ببساطة واجاوب واتسال واسال كمان
عادي يعني
او محدش هيطلع مني كلمة ولا معلومة مش عاوزة اقولها

كدة ببساطة

daktara يقول...

هذه اول مره لي هنا
مع احترامي الشديد لك ولمدونتك
الموضوع مايستهلش كل الكلام ( الرغي) ده
موقف وحصل وبيحصل زيه كتير ولا يستاهل منك كل الوقت اللي قعدت تكتبه او اللي احنا قعدنا نقراه فيه
خاصة مع التطويل
انا اسف بس حسيت انه بوست هايف وندمت علي الوقت اللي ضيعته عليه
اتمني المرة الجاية الاقي حاجة احسن

انظر حولك
د. خالد عزب

~*§¦§ Appy §¦§*~ يقول...

اوبا
مين بينادى على ابو ورده
اه دكتور خالد معلش يا دكاتره مكنتش تقراه بس عموما هو مش هايف لوا حاجه
لان ددى عادات قذره فى المصرين
ومعلش هحاول اكون مؤدبه معاك بما انى عارفاك
حضرتك برضه ساعات بتكتب حاجات من وجهه نظر الناس تافهه اى والله وعادى يعنى
بس اعتقد ايهاب لما اتكلم وناقشته غلطته فى حاجه علشان هو موقفش الناس دى عند حدها لان طبع المصرين الوسخ سورى يعنى
حشر مناخيرهم وتقييم الاشخاص بدون ما يبصوا على نفسهم
ودى البوينت من الموضوع
لو انت مش فهمته يبقى سوء فهم من سيادتك ابقى ركز وافهم ما بين السطور


يا هوبه خليخا هندى المره دى يا خويا صحتك يا معلم منقدرش على كده انت على وش القفص قصدى جواز

واحدة مفروسة يقول...

ازيك يا ايهاب
انا قريت البوست
بص يا ايهاب فيه ناس رخمة كتير و بتحب تعرف كل حاجه عن كل حد بطريقة مش ظريفة
بس انت ماتزعلشي مش مفروض كنت تقول اي حاجه عنك
حتى لو كان قالك هوه مين
يعنى طلع ولا نزل حيكون مين
فيه ناس وحشة يا ايهاب
و دية مشكلت اغلبنا قلبها ابيض و مش مدية خوانه فى حد
بس الناس الوحشة كتير خد بالك و النبي
و حرص...ماتقولشي اي حاجه عن نفسك
لي حد .....ربنا يكرمك يارب



و بعدين يا ايهاب
هوه حفضل اقولكم لأمتى بس
انتو غاوين تضايقو نفسكوا
التعليق اللى مش يعجبك
ارميه فى صفيحة الزباله
اومال عمك بلوجر حاطتها ليه؟؟ ديكور
و ردبالذوق انا شلت التعليق ده من بيتي لانه مش عجبنى و فيه تطاول وبس
حيقولوا عليك ديكتاتور
وماله ديكتاتور فى بيتك و من حقك
اديك نرفزت نفسك و قفلت الباب
يالله معلشي
فيه ناس بيخونها التعبير
و لا تضايق نفسك وروق

سلام

princess dodo يقول...

ازيك ياجميل

موقف مستفز منهم أوووووى
ماكنتش تعاملت بهدوء كده
انا لو مكانك كانت ممكن انتهت فى القسم
انا عصبية اوى مااحبش حد فضولى يتدخل فى اللى ما يخصهوش
طولة بالك تتحسد عليها والله

انا لأنى بحتك بتعامل مع المترو كل يوم
قررت انى ابقا لا اسمع لا أرى لا أتكلم
وبعدين انا لما بركبه
بشيل من دماغى نية انى اقعد دى

حتى لما بيكون فاضى والله
مابقتش بقعد
زى مااكون تأقلمت على كده

صح انك تقوم للى أكبر منك
لكن مش جريمة لما تكون مش واخد بالك
او تعبان
انت كمان ليك حق تقعد ساعتها

.

سلامى ليك ياهوبااا

MAKSOFA يقول...

دايما عامل شغب وشقاوه

م/ الحسيني لزومي يقول...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا

enjy يقول...

ياااااااااااااااااااااربنا على صبرك يا ابنى دة انت صبور قوى بطريقة عجيبة يعنى..... هو انا لو مكانك كنت هقولله انت عايز تعمل فيها فلوطة عشان قمت له ليه يعنى مهو دة الطبيعى وليه انا اللى المفروض اقوم مش انت؟؟ وبعدين كنت بهدلته عشان قال للراجل حيلة ماما وبابا دة قليل الادب يا ابنى ويستاهل البهدلة.... يللا مش مهم المهم مبروك عليك النوبايل الجديد ايوة نوبايل مش موبايل عايز حاجة؟؟

enjy يقول...

هو انا ممكن ارد على دكتور خالد عزب وللا دى تبقى قلة ادب؟؟؟
والنبى ارد معلش يا ايهاب ماشى؟؟
دكتور خالد انت كدة موصلتش وجهة نظرك لانك ببساطة رغيت كتير فى التعليق والعادى انك تاخد الباب وراك ومتعلقش عشان وقت حضرتك خصوصا ان المواضيع الوحشة اللى فيها رغى بتحصل كتير وعادية يعنى فمينفعش تقعد بقى تعلق على كل موضوع وحش عشان دة هيبقى رغى وكلام فاضى وكدة حضرتك ماشى؟؟؟؟

م/ الحسيني لزومي يقول...

شاكر جدا لزيارتك لمدونتي وللثناء علي التذكير بموعد القيد بالجداول وباقي اكثر من شهرين بإذن الله تستطيع عمل البطاقه وسوف اذكرك بين فتره واخري حتي لاتنسي
اطمع في وضع بنر الحملة علي مدونتك حتي يتذكر زوارك موعد التسجيل
اذا رغبت في ذلك ارسل ميلك كي ارسل لك كود البنر
مع خالص تقديري

kareem يقول...

اسف اني حعلق علي البوست بتاع ابنت البواب

بس احب اقول لحضرتك انك غلط انا كنت التقيت بوالده المرحومه من فتره و اعرف ناس تعرفهم كويس فلو سمحت الموضوع مش ناقص كلامك البايخ

kiki يقول...

情趣商品,情趣用品,情趣用品,情趣,情趣,情趣用品,情趣商品,情趣用品,情趣,情趣,情趣用品,情趣商品,情趣用品,情趣,情趣,情趣用品,情趣用品,情趣用品,情趣用品,情趣用品.情趣,情趣,情趣,情趣,視訊聊天室

麻將,台灣彩卷,六合彩開獎號碼,運動彩卷,六合彩,遊戲,線上遊戲,cs online,搓麻將,矽谷麻將,明星三缺一, 橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,電玩快打

情趣用品,情趣,A片,AIO,AV,AV女優,A漫,免費A片,情色,情色貼圖,色情小說,情色文學,色情,寄情竹園小遊戲,色情遊戲,AIO交友愛情館,色情影片,情趣內衣,情趣睡衣,性感睡衣,情趣商品,微風成人,嘟嘟成人網,成人,18成人,成人影城,成人圖片,成人貼圖,成人圖片區,UT聊天室,聊天室,豆豆聊天室 ,哈啦聊天室,尋夢園聊天室,聊天室尋夢園,080苗栗人聊天室,080聊天室,視訊交友網,視訊

借錢,黃金,黃金回收,黃金價格,黃金買賣,當舖

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍