تحديــــــــــــــثالى الأستاذ خالد عزب بص حضرتك البوست ده عن الحشريين والشخصيات اللي بتدي رايها وتحط مناخيرها فيما لا يعنيها والناس كلها لامتني على طولة بالي مع الشخص ده علشان كده قررت اني مأسكتش لحد حشري بعد كده او يفكر يهين تفكير علشان كده احب اقول لحضرتك مع احترامي ليك يعني
"اطلــــــع بـــــــره"
ايوه بالعربي كده وبالزوق كده متجيش مدونتي تاني لا تقول رأيك ولا تتعب نفسك وتضيع وقتك الثمين عندي لما حضرتك شايف كلامي هايف ورغي من غير داعي بتتعب نفسك وتقراه ليه ثم مين اصلا قال لسعادتك ان ده موقع حكومي تعليمي دي مدونتي الشخصيه بقول فيها اللي يعجبني بس واتكلم عن تجاربي انا بس يعني كل ما فيها يخصني لوحدي انا واصحابي اللي بيهتموا بكلامي انا بقى لا اعرفك ولا عايز اعرفك ولا يشرفني اعرفك من الأخر وبدون تطويل علشان وقتك الثمين اطلع بره ومتجيش هنا تاني
والكلام لأي شخصيه حشريه, اللي يحب ينقدني يتفضل ينقدني لكن اللي يعمل علامه ويحاول يهزأني او يتطاول في الكلام مالوش غير ابو ورده هاستلفه من آبي
في المترو والمحاكمه
تاني حكايات من المترو يا اخواني
المره دي بقى هاحكي موقف حصل و مبقتش فاهم حاجه خالص منه
نبتدي
قعدت في المترو من اول الخط طبعا علشان انا ساكن في المنيب وهي اول الخط والحمد لله عرفت اظبط نفسي اني مقعش في غلطة عربية الستات دي وبقعد في عربية الرجاله على طول
المهم قاعد وفرحان بالموبايل بتاعي علشان عليه شوية برامج جديده والعاب بقى وفرحان بيهم زي اي محدث نعمه عادي يعني – الله يسامحك يا سووو انت اللي نصحتني بالموبايل الثري جي – المهم يعني قاعد بلعب في حالي وماليش دعوه بحد والمترو رايق لسه, وشويه الدنيا بدأت تتزحم وجه واحد وقف قدامي وتقريبا هو واقف فوق مني شويه شويه وهيدوس على دماغي
المهم طبعا انا بصيت لقيته مش راجل كبير ولا حاجه بس هو تقريبا عايز يتفرج على الموبايل ويمكن انا ازهق فياخد الكرسي عملت فيها عبيط طبعا وسبته واقف على رجلي براحته ,
لحد هنا وعادي الموقف بيحصل كتير وانا مشغول في الموبايل حد وقف جنبه وراح حاطط شنطته جنب مني على الرف اللي جنبي مأخدتش في بالي بصراحه ومبصتش هو مين اصلا ,
وبعد شويه الراجل اللي انا مكنتش شايفه ده بدل مكانه مع اخينا الغتيت اللي راكن فوق مني علشان يسند ظهره بصراحه كنت سرحان فمخدتش بالي ان المفروض اني اقومله لأنه فعلا راجل كبير شويه في السن وعادي يعني انا لما بلاقي حد كبير بقومله من نفسي من غير طلب منه او من غيره بس الشاب اللي جنبي فجأه اخدته الحماسه وقام وقعده لحد كده والموقف عادي خالص وانا مش مدي اهتمام هو صحيح سبقني للثواب بس برده هو فضل سايبه واقف قدامه كتير وانا مكنتش واخد بالي المهم بعد ما الراجل قعد شكره على معروفه والتاني يقوله لا يا حاج ده حقك اصلا ومكانك التاني يقوله الله يكرمك يا ابني وبعدين فهمت ان الكلام يقصدوني انا بيه على اساس اني تنح كبير وازاي مقمتش انا للراجل الكبير وان الشاب التاني قام مضطر لما لقى ان انا مفيش مني فايده مبقتش فاهم بصراحه هو ايه الفرق لو قام هو او قمت انا المهم حد قام وبعدين هو كان واقف قدامه هو يعني هو اقرب واحد منه المهم انا طبعا سمعتهم وعملت عبيط , ده يقوله اصل الناس معرفش جرالها ايه وده يقوله معلش يا ابني يمكن تعبان ولا حاجه
سكت وقلت يا واد طنش خااالص
يقوله اصل الزوق ومعرفش ايه وبعدين حسيت الكلام هيبتدوا يلبخوا بس قبل ما اتكلم اتلفتلي الراجل الكبير وقالي "مش يمكن تعبان هو مش انت تعبان برده وراجع من الشغل تعبان"
بصيتله وقلتله" الحمد لله على كل حال"
راحوا باصينلي باستغراب وقالي الراجل الكبير" انت بتشتغل ايه يا ابني "
حسيت في نبرة صوته كده انه عايز يقيمني كده ويعرف انا ايه في البلد دي يعني
رديت بهدووووووء " على باب الله "
ابتسم وقالي "لا بجد بتشتغل ايه؟"
كررتها تاني " على باب الله "
قالي" طيب انت خريج ايه ولا دي كمان على باب الله"
ابتسمت غصب عني وقلتله " على باب الله "
"يا سلام هو كله عندك كده انا عايز اتعرف بيك يا اخي ولا فيها حاجه دي"
"طيب اسمك ايه يا سيدي"
قلتله "واسمي يفيدك في ايه ولا شغلي يفيدك في ايه"
قالي" انا بس عايز اعرفك يمكن اقدر اخدمك بحاجه انت اصلك مش عارفني انا مين"
ان ان ان ان ااااااااااااه تشششششششش
مين حضرتك ؟؟؟
"انا ........" رتبه كده في الجيش مش فاكرها بصراحه , طبعا منظره ميديش على رتبه خالص وبعدين قعد يقولي انه ممكن يفيدني في جيشي وممكن يفيدني في العسكريه بتاعتي في الكليه حبيت افرسه بقى
قلتله انا ماليش جيش واخد اعفاء نهائي, وده حقيقي فعلا راح الظريف اللي واقف وقعده يقولي" اه اصله حيلة بابا وماما الحيله يا سيدي "
بصيتله باستخفاف وسكت معبرتهوش المهم راح سالني" طيب والعسكريه في الكليه"
قلتله لا ولا دي كمان ماليش عسكريه
الراجل حسيت هيضربني وبعدين قالي "ليه بقى "
قلتله" كده انا حاله خاصه على باب الله"
راح قالي "ااااااااه طيب "
مش عارف هو فهم ايه بس المهم انه زهق مني وحس اني مش بتعصب بسهوله ولا هيعرف يغلس عليا رجع سالني طيب هو اسمك ايه بس قلتله" اسمي ايهاب "
قالي "يعني اسمك حلو اهو امال مكسوف تقوله ليه "
همهمت في سري "لا اله الا الله" سمعني وقالي" الله يعني مسلم اهو" قلتله" يا سلام ايه المشكله "
سالني طيب بالنسبه للشغل يعني قلتله من الأخر بشتغل كذا كذا وخريج كذا كذا
تحب تعرف حاجه تانيه
قالي لا شكرا وسلم عليا كأننا اصحاب وسابني ونزل
بصراحه حسيت انهم حاكموني وحققوا معايا كده بأسلوب غريب برغم ان اللي كان واقف قدامنا سخيف وكنت ممكن اهزأه بس الراجل الكبير كان متعمد بصراحه ان كل كلامه يكون في حدود الصح يعني متعرفش تمسك عليه اي اساءه كل كلامه بشياكه كده برغم حشريته وسخافة بعض ملاحظاته الا اني مكانش ممكن ارد عليها باسلوب ناشف
ما علينا سرحت بعد ما نزل يا ترى انا في نظره دلوقتي ايه
تفتكروا انتوا ايه
وهل انا كنت غلطان
ولو حصل معاكم الموقف ده هيكون رد فعلكم ايه
