السبت، أغسطس ٩

يافطة نانسي



تحديث
انا لما الولد
نيجرو حبيب قلبي فكرني اننا المفروض نشيل نانسي علشان رمضان قلت اشيلها واحط التعليق ده علشان عجبني قوي
من الولد
كنج تووت
الناس بتمشي في الحياة بتزُك
تسند على الصورة حتى لو بتشُك
مع إن لينا دليل هو السند و الخير
بس إحنا ناس غاويين نعُك
و عجبي
KING TOOOT

على طريق المحور بعد خروج العاملين عندنا في الشركه من شغلهم البعض منهم ساكن في قريه قريبه من المصنع وبينزلوا من فوق المحور عندها لكن لأن المحور طويل جدا وشبه بعضه ابتكروا طريقه علشان يعرفوا بيها مكان نزولهم وهي ايه بقى

يافطة نانسي

اعلان كبير عن داماس بتاع الجواهر ده ونانسي واقفه زي تمثال الحريه تشاور لهم على طريقهم

المهم يعني فجأه وبدون مقدمات اعلان نانسي اتشال الناس بقت هتجنن يعرفوا مكان نزولهم ازاي دلوقتي

وخصوصا لو مروحين بالليل والطريق كحل مش باين له اي معالم

الموضوع اخد كام يوم والناس هتتجنن وكذا مره يغلطوا في مكان نزولهم ومش عارفين يعملوا ايه

بس بعد كام يوم رجعت يافطة نانسي تاني والحمد لله صحيح بشكل تاني لكن برده هي نانسي محدش هيتوه عنها طبعا

فكروني بحال ناس كتير في بلدنا كل واحد ماشي في طريق الدنيا طريق سريع جدا لكن طويل والسكه بقت شبه بعضها كل حاجه زي بعضها الصح شبه الغلط ومفيش حد يدلك على الطريق ومحتاج دايما علامه تنور طريقك فبتلجأ لأي دليل قدامك انشالله نانسي

يافطه لواحده عريانه وبتدلع عادي احنا كمان هنمشي وراها كل واحد فينا حاسس ان طريقه طويل قرر ياخد دليله حد من اللي بيلمعوا دول حرامي كبير سياسي نصاب رقاصه مشهوره او ممثله او مغنيه كلهم بيرقصوا دلوقتي

كله نسي ان القدوه والديل الصح مش عند دول

عند رسولنا الكريم (ص) وفي سنته وكتاب ربنا

الدنيا فعلا بقت شبه المحور كلها مطبات وبلاوي والحكومه حتى لما تقولك هنصلحها ضيقت الدنيا على الناس كتيييير قوي ولما اتفتح في الأخر طلع نص محور اقتطعوا نص الطريق علشان يحطوا فيه عربيات الرادار

هي دي مصر يا عباس

سلااام

هناك ٤٤ تعليقًا:

أبو خالد يقول...

أبني الحبيب /ايهاب
كده تعلم طريقك بنانسي
غض بصرك يا ايهاب حفظك الله
كل عام و حضرتك و الأسرة بخير رمضان كريم

المنسى يقول...

أبو الشناكييييييييييت
عامل إيه
بقى بتمشى ورا نانسى برضو
تعرف
فكرتنى بجحا
لما راح دفن كنز فى الصحراء وعلم لاماكن بالسحابة
هههههههههههههه
هو الطريق فاضى أوى
مفيهوش غير يافطة نانسى

ومالك قلبها دراما كده ليه
يعنى هو الطريق الحاجة الوحيدة إللى غلط عندنا
يووووووووووووه
متعدش

كاميليا بهاء الدين يقول...

هههههههههه

نانسى مطلب قومى

هههههه

لو الدنيا اصبحت محور طويل بلا ملامح .. احنا كمان مش لازم نكون زى السيارات اللى بتجرى بسرعة من غير فرامل

لازم يكون عندنا فرامل
نقف امام كل حاجة ونستفتى قلبنا هل هى صح أم خطأ
ونذهب لأهل المشورة فى حالة لو احترنا
نذهب للأب ،، للأم ،، أخ كبير ،، شيخ الجامع
وقبل كل ده نكون مثقفين دينيا .. قرأنا كتاب الله وتفسيره كاملا، قرأنا ماتركه رسولنا الكريم صلى الله عليه وسلم من احاديث.

يا ايهاب
لو اي حد عايز يبقى صح
هيبقى صح
المهم النية

اعلان نانسى الجديد عن ايه بقى؟؟
هههههههه


دمت بكل الخير
وكل عام وانت بخير
رمضان كريم

تحياتى

Empress appy يقول...

نانسى يا راجل نانسى حرام عليك دي جميله
انت حكود يا هوبه هههههههههه

ل دى مش مصر ده النور بتاع البنانيت هههههههه
علم الطريق بحاجه تانيه لو سمحت ههههههه

Mafrousa يقول...

هههههههه
إزيك؟؟؟ و كل سنة و انت طيب... و رمضان كريم

يافطة نانسي!!!! طيب الحمد لله ...احمد ربنا انها مش يافطة لحد تاني من الحادات اللى مش حلوين

وبعدين إيه التأخر ده؟؟!!!!
امال احنا فى تقدم ليه؟؟؟؟
دلوقتي الحكومة سوف تستعيض عن اليفط الزرقاء بتاعة الطرق بيفط لنانسي و هيفا و غيرهم و غيرهم
الحكومة كل يوم تحط يفط تقولك المكان ده اسمه كدا و المكان العلاني اسمه مش عارف إيه
تاني يوم تلاقى الناس وقعت اليفط و مش عاجبها....وتقولك لايوجد يفط ارشاديه

اهه اليفط ظهرت اهه

ربنا يتولانا برحمته يا ايهاب الواحد مش عارف حيوصل لغاية فين بس؟؟؟!!!

كل سنة و انت طيب و رمضان كريم

Ehab يقول...

ابو خالد يا عسل
ربنا يسعد ايامك بس انا ومش ببص يا جميل على نانسي انت عايز المدام تقطع رقبتي
وانا كمان مش بنزل معاهم عند الحته دي انا بروح من طريق تاني لكن عرفت الموضوع بالصدفه منهم وهم بيحكوا

نورتني يا حبيب قلبي

--------------------

المنسي
الباشا منورني هنا ازيك يا باشمهندس
ربنا يحفظك وبعدين هو في احسن من اختراعات جحا يا واد ده كان راجل دماغ بجد

على رأيك يعني هي جت على الطريق

-----------------------

كاميليا

نانسي مطلب قومي عالمي يا اختي
انتي اللي فهمتيني يا بنتي
هو ده اللي عايز اوصله من القصه كلها
الدنيا بقت من غير ملامح وياترى مين هيكون دليلنا للهدايه

سلاااااااااااااااااااااام
اخوكي ايهاب
=======================

آبي

انتي يا راعية الغنم
ايوه يا اختي نانسي جميله
بس انا مش حقودي يا اختي انا الحمد لله عندي اللي اجمل منها مليون مره
وطبيعي وحياتك مش صناعي زي ناس

--------------------

واحده مفروسه

يالهوي تفتكري صحيح هيغيروا اليفط كلها ويحطوا نانسي وهيفاء
هي دي بقى خريطة الطريق اللي بيقولوا عليها
ههههههههههههههههههههههه

ربنا يسترها بقى من اللي هيحصل
سلاااااااااااااااااااااااااااااااام

كاميليا بهاء الدين يقول...

نسيت اقولك

وحشتنى صورة البروفايل الاولانية

كان لها معنى كبير اوى

كنت بدأت أكتب عليها بوست
بس انت اخفيتها
(وش حزين)


تحياتى

سمر الشافعى يقول...

اللى يمشى ورا نانسى ميتوهش ياايهاب هههههههه

ليك رد على الكومنت بتاعك فى مدونتى بدل مالسه هقعد اكتب تاااااانى وانا ايدى كانت ملسوعه من عشر ايام ههههههه

د/اجدع بنوته يقول...

بس هكذا اصبحت الحياه

كل واحد رابط نفسه بحياته بيافطه

وبدينه بيافطه

وبجنسيته بيافطه

(( صورة عمرو خالد او اى داعيه ))

(( علم مصر ومشربتش م نيلها ))

بقينا ف عصر سريع

محدش عنده وقت يقف ياخد نفسه

ويقول انا فين وده ايه

كل محتاج حلول ربط سريعه

يشوف نانسى .. يعرف ان ده طريق بيتهم

يشوف صورة بيبسى .. يفتكر انه عطشان

تحياتى

nigro يقول...

شناكيتو
إزيك يا غالي
واحشني يا ابو الشناكيت

إيه ده يا هوبه
فلسسوف يا ابني
بتعرف تطلّع من الفسيخ شربات يا ابن الإيه
عارف يا ايهاب العلامات و الإشارات دي كتير بتقابلني و أقعد أفكر في اسقاطها على حياتنا احنا البشر
بس عارف كتير برده كنت باستمتع ببساطتها و سذاجتها الفطرية

أصبت يا إيهاب
---------------------

أضم صوتي لصوت كاميليا في مسألة صورة البروفايل القديمة
كانت
تححححححححححححححفة
كنت أشوفها أحس بإيهاب ( الشنكوتي الكبير )
---------------------


يلا سلام

فاتيما يقول...

إيهاب
ازيك يا شنكوتى
و مالها نانسى ؟؟!!
بذمتك مش ارحم من غيرها ...
طبعاً إنت فلسفت الحكاية و خدتنا لمستوى تانى و هوه الإشارات اللى محتاجينها فى الحياة
عن نفسى بحتاجها جدا مهما كبرت
و كلنا أتصور
بس حالياً بقينا فى زمن أغبر
بيجبرنا نتخبط شوية فى الأول لحد ما نحط لنفسنا يافطة من عندنا و نثبت عليها
عشان كدا بناخد وقت طويييييل
عقبال ما نحدد الإتجاهات زى اخواتنا أكفاء البصر ما بيعملوا لما بيروحوا مكان جديد عليهم ....
تحياتى لفكرتك الجميلة يا شنكوتى
و سعيدة بمقابلتك يوم التبرع

Doba يقول...

فيها ايه يعنى لما يعلموا الطريق بنانسى
هيه نانسى وحشه
دى زى الفل

كل واحد بيستسهل وبيعيش حياته بطريقته وعلى هواه وقلة من البشر الآن من يطبقون كلام الله وسنته عن حق

أمنياتى بأن يزدادو فى المستقبل القريب
تحياتى
هبة

دعاء مواجهات يقول...

إيهابوو باشا

كلامو ف الصح ولفيت لفة وجبت المفيد

كل الأمور بقت متشابهة وكثرت الشبهات فعلا

كلو بقى (سمك لبن تمر هندى)

بس الواحد الصح او الواحدة مش شرط يعنى

هو اللى يعلم طريقة بعلامة لايخطئها احد ويثبــــــــــــــت

عليها الثبـــــــات الثبـــــــات صعب اوى ومهم اوى اوى اوى

اللهم إرزقنا الثبات والهداية جميعا

ياارب اللهم آمين..
_____________-

كلامك اوحالى بحاجة كدة هروح اكتبها قبل ما انساها وهبقى اقولك عليها..

سلااام

3ala asm masr يقول...

هو أحنا لقينا حد عدل نمشى وراه ومامشناش ؟؟؟

AHMED SAMIR يقول...

جامد جدا البوست دة
بس تصدق
الناس دي تستاهل اللي بيجرى لها...تستاهل انهم يشيلوا الاعلان ويتوهوا
لما ناس مش مكلفة نفسها عناء انها تفهم طريقها رايح فين و جاي منين وبيعلموا طريقهم بيافطة
والله حرام
تحياتي

ahmed_k يقول...

هوبه الغالي وحشتنا بوستاتك
متتأخرش تاني
ويا هوبه أنت مش واخد بالك
هما ليه حاطين صورة نانسي علي الطريق
أصل الجو حر الأيام دي فلازما ولامبد من وسيلة ترطيب عالناس اللي زهقانه وطالعه عنيها
ومفيش أحلي من صورة ننووووسه تعمل ترطيب علي الناس في الشارع

عرفت ايه هي النظريه

سلام يا هوووووبه

رندا يقول...

فكرتنى ياهوبة لما كنت فى زيارة لمكان فى المصيف جوزى يقولى اى شارع ندخل منة اقولة الشارع الى فية الانش واقف يقولى لانش اية ياعم هو محدش بيستعملة ولا اية ولا موقفينة لينا يعنى مخصوص هههههههههه
يعنى بدون الانش ممكن نتوة
وطبعا شالوة من مكانة :D
تخيلى بقى بدون نانسى يبقى هنغرق فى بحر الظلامات خلى بالك من بحر الظلمات ياعم طيب تقفل عينك ازى وانت سايق العربية ههههههه

دى بقى على فكرة مقصودة علنى
وانا اقول هى الحوادث كتيرة لية على المحور كدة انا كدة فهمت ههههههههههه
ربنا يستر المرة الجاية لو طحوا صورة اليسا ممكن يجرى اية
بقولك اية ينفع تروح من الطريق الزراعى طيب
ربنا يستر على المحور هيكون اربع محاور بعد كدة وطبعا بعد البوست دة
بوست جميل اوى ممكن يتفهم صح وممكن يتفهم منة.........

انة اعلان لمشروب ههههه
يعنى انت بتعمل اعلان يامعلم
اشارتك خضرة ههههههه

كل الود

رندا

رندا يقول...

قريت حالا الردود

واضم صوتى لكاميليا نيجروا بتغيير الصورة

كنت بحسها فيك اوى

اسمع الكلام وقول حاضر

رندا

بث تجريبي يقول...

السلام عليكم

هى دى نانسى .... وهى دى مصر
بس تصور اللون الاحمر عامل شغل جامد عشان تنور ف الضلمة.


اللى فهمته من كلامك ان زى ما اصحابك واخدين يافطة نانسى حاجة تدلهم على طريقهم
فى ناس فى الحياة واخدة ناس اين كانوا قدوة ليهم
وان الناس دى نسيت اهم قدوة الا وهى الرسول _صلى الله عليه وسلم_

انا من وجهة نظرى الاسباب اللى بتخلى الناس تاخد ناس مش مهم
هما عملوا ايه للبلد اد ما هو مهم مشهورين اد ايه فى البلد
وطبعا مافيش فى البلد دى اشهر من المغنين والممثلين والرقاصين ولاعبية الكورة
من الاسباب دى السطحية والجهل وغياب الوعى الدينى والفراغ والظروف الاقتصادية المنيلة
والسياسة النيلة والكوسة والاحباط.
ومن وجهة نظرى ايضا ان كل المصايب والمشاكل اللى فى البلد عبارة عن حلقات متواصلة ببعض
مش هتقدر تفك دى من دى وكلهم بيدور حوالين الفساد بكل انواعه.

سلاموز .

Unknown يقول...

ههههههههههه
ادي اخرة اللي يمشي ورا نانسي
تاهو وتوهونا معاهم
مش كفايه في التليفزيون ورانا ورانا
احنا معلمين الطريق عندنا بعمرو خالد
راضي كده يا عم

مطلق يقول...

يا عم ايهاب متقلبش علينا المواجع
دي ناس ما فيهاش غلطه مش ذي الحاجات الي بنشوفها عندنا

غير معرف يقول...

تصدق الموضوع كبيييييييير
للاسف الطريق زى مانت قلت طويل وضلمه ومليان بلاوى ومنيل بستين نيله
والحق مش محتاج لانوار زائفه عشان يبان انما الغلط بيتدارى ورا اللمعان واليفط البراقه عشان ميبانش ويجذب الناس زى اللمبه لما تجذب الفراشات واول ميقربوا تحرقهم

بوست حلو اوى

ojg يقول...

وممكن العربيات تنادي بعد كده
نانسي وآخر الشارع نانسي نانسييييي

:))

وهو إحنا بقى عندنا غير النوابغ دول نمشي وراهم ونقلدهم

ربنا يرحمنا

وتحياتي لنانسي
;)

nosha يقول...

مساء الفل يا شنكوتي يا جامد
إيه يا عم الكلام الننساوي ده للدرجة دي وصلت الناس إنهم مش قادرين يميزوا طريقهم اللي بيروحوا وبيجوا فيه كل يوم بس على {ايك بقى مبقتش فارقة خالص أي حاجة مع الحكومة بتاعتنا دي اللي خلت الناس تنسى اسمها وحياتها كلها وقربت تنسى ولادها وأهلها كمان ..... ربنا معانا ويكون في عوننا يارب ولكن اللي بيحصلنا ده بسبب إننا فعلاً نسينا ربنا وآسف جداً طبعاً إني بقول كده بس الناس نسيت إن نبينا محمد صلى الله عليه وسلم قال تركت فيكم ما إن تمسكتم به لن تضلوا بعدي أبدا كتاب الله وسنتي "" صدق رسول الله صلى الله عليه وسلم ..... ربنا يعافينا كلنا ويبعد عنا كل شر وكل سوء

تحياتي ليك يا شنكوتي

رصيف نمره خمســــــه يقول...

هما وراهم الانانسى واليوفط بتاعتها
شالوا داماس
حطوا كوكاكولا

معلمين الطريق بنانسى نيهاهاهاهاها

اصلك فكرتنى بنفسى لما بعلم اى طريق بشجرة(مش نانسى) افرض شالوها هعمل ايه ؟

سلااااام

كراكيب يقول...

هههههههههههههههههه

وفي حتة في الزمالك والله انا معلماها بيافطة لـلمطربة المحترمة المحتشمة هيفاء

معرفش فعلا لو اتشالت انا هعمل ايه

طلع في حتة متعلمة بنانسي

بعد كدة زي مافي ميدان طلعت حرب ومصطفى كامل وكدة هيبقى في ميدان نانسي واليسا وعند ناصية كارول سماحة لو سمحت عند اول كوبري نيكول سابا لو سمحت

هـع

miro el niro kwaniro

Lyssandra يقول...

رمضاااااااااااان كريييم

علي فكرة ممكن اليومين اللي جايين تشيلوا يافطة نانسي وتحطوا بدالها فانوس

يبقي أفضل يعني

مش أحسن من إن كل اللي بيدوروا هاينزلوا فين بيدوروا الأول علي نانسي ؟؟

===============

بوست خفيف

بس صحيح ..
الإعلان الجديد إيه علي رأي كامي ؟؟

ههههههههههههه

=================

تحياتي يا إيهاب ودمت بخير

lyssandra

فارس بلا جواد يقول...

أزيك يا أيهاب
باعتذر عشان الغياب ومتشكر لسؤالك
وبعدين ايه البوست الجميل ده
هههههههههههههههههه
علي رأيك أحنا بقينا في زمن نانسي .. زي ما فيه محطات في المترو لجمال عبد الناصر والسادات لازم يعملوا كمان محطة لنانسي
رغم أن البوست كله كوميديا لكن فيه معني جميل حسيت بيه
تحياتي

مدحت محمد يقول...

هنقول ايه بس

ربنا يهدى

Ehab يقول...

كاميليا
حطيت الصوره تاني انت تأمر يا كبير الدهاشنه هو في حد يقدر يعرض الأوامر الهتلريه

------------------
سمر الشافعي
سلامتك يا دكتوره المهم تكوني بخير

-------------------

د اجدع بنوته

زي ما قلتي كلها بقت يفط حتى لما نحب نعمل حاجه صح بنكسل نعملها ونقوم معلقين يافطه وبكده يبقى عملنا اللي علينا
نورتيني

=================

نيجرو حبيي الغالي ببعتلك اشواقي الحاره
فينك يا واد مختفي ليه واحشني جدا

وبعدين سيبك انت ليك عندي شوية فسيخ في الجون
نورتني يا اجدع اخ

---------------------

فاتيما
القلب الطيب سعيد جدا بمعرفتك وبيوم التبرع
ربنا يسعد ايامك
ومتشكر على كلامك الجميل ده

--------------------

دوبه
ازيك يا هبهوب
لا معاكي حق طبعا هي نانسي حد يختلف عليها دي جامده جداااااااااا

-----------------

دعاء مواجهات

ايه يا واد الكلام الجامد ده انتي شيوعيه يا بنت انتي ولا ايه
شكلك دماغك راكبه صح
هههههههههههههههه
نورتي يا سكر

---------------------


على اسم مصر

يا صباح التفاؤل
ليه بس كده ولااقولك لو ملقناش حد نمشي وراه كويس يبقى احنا اللي لازم نبقى كويسين من نفسنا
والحمد لله عندنا قدوه في رسولنا تكفينا مليون سنه كمان واكتر


سلااااااااااااااااام

------------------------


احمد سمير

ايه النور ده يا باشا
نقطة انهم يستاهلوا دي مش عارف هل هم ملقيوش حاج تانيه ترشدهم وتوجههم ولا فعلا هم اللي كسلوا يدوروا
ياترى هم غلطانين ولا غلبانين

تحياتي

-----------------


احمد غردقه

يا واد يا سوسه انت ترطب ايه بس دي هتدهول الدنيا ههههههههههههه
وبعدين سيبك انت ما حضرتك رقان في الخواجات هناك ولا فارق معاك اللي احنا هنا بنموت لما نشوف صوره في اعلان
سلام يا برنس
---------------------

رندا

ايه النور اللي مزغلل عيني ده ازيك يا استاذه
وبعدين لنش ايه هو انتي بتصيفي فين
ايوه انتي تلاقيكي بتصيفي زيي في احسن حته في مصر
بركة السبع
وسلميلي على جوزه يا اسماعيل بيه

سلام

--------------------

رندا تاني رجعنا الصوره يا فندم انا مقدرش على زعلكم

---------------------

Do not Press F1

ولو اني مش فاهم اسم المدونه بس ماشي

هو ده اللي عايز اقوله محدش بقى عارف هو رايح فين ولا يعمل قدوته مين
لعيب كوره ممثله رقاصه
اي حاجه والسلام تلفت نظره
وربنا يهدي

----------------------


لماضه

اه يا دماغك انتي عمرو خالد كويس برده بس ياريت نمشي وراه في الطريق وفي الحياه كلها
ربنا يسعد ايامك

-------------------


كريم

يا اخي هنقول ايه بس
مفيهومش غلطه ازاي دول كلهم غلطات بس المكياج بيغطي كتير
وبعدين ده كله صناعي يا معلم

--------------------


شيماء

بجد يا شيماء كلمتين ي الجون
الحق مش محتاج تلميع علشان يبان

-------------------

ojg
ههههههههههههههههه

تصدقي فكره جامده قوي
دا انا عايز اسكن في شارع يكون اسمه مارلين مونرو

------------------

نوشه

ازيك يا كبير
هنعمل ايه بس في الناس هم اللي مش مركزين بقى

نورت يا كبير

--------------------

رصيف نمره خمسه
يا بنتي على القل الشجره مستمره فتره طويله
انما يافطة نانسي دي حاجه تمخول

هههههههههههههههههههههه

بس سيبك انتي الفساتن في الأعلان جامد

-----------------

قوس قزح

ربنا يوفقك للخير يارب دايما

تحياتي

--------------------

كراكيب
ياريت بس لو تعرفيلنا فين ناصية باسكال مشعلاني دي علشان دي تلاقيها ناصيه طويله قوي
والواحد يحب يروحها
هههههههههههه

نورتي يا باشا

-------------------

ليساندرا

يا سيدي على الفوانيس
الله اكرم يا ستي
وبعدين انا اللي هاسرق الفانوس لو جابوه

----------------


فارس بلا جواد
شاعرنا الطبيب الهمام
عامل ايه يا باشا
انا مقدر طبيعة انشغالك بسبب شغلك ودراستك
ربنا يوفقك يارب وتبقى اشهر دكتور
وبعدين لو الواحد بقى عملوا محطة مترو لنانسي الناس مش هتركب منها هيفضلوا متنحين فيها
------------------------

محمد مدحت

ربنا يهدي فعلا

نورت يا باشا

سلااااااااااااااااااااااااااااااام

اخوكم ايهاب

Ehab يقول...
أزال المؤلف هذا التعليق.
سمر الشافعى يقول...

ميرسى اوى على سؤالك عنى ياايهاب

Unknown يقول...

حلو البوست دة......بجد انك تيجى فى دماغك الفكرة دى من يافطة نانسى تبقى انت جامد يعنى

دعاء مواجهات يقول...

باشااااااااا

اية ياعم شوفتنى جبت سيرة ((لينيين ولا ستالين ولا ماركس ولا جيفارا ولا كاسترو حتى))) ؟؟؟

شيوعية مين وبلشفية مين بس

نااقص تقوللى نازية؟؟؟؟

اللهم أغزيك ياشوشو قصدى ياهووبا.

دعاء مواجهات يقول...

نسيتنى كنت جاية لية

جاية اقولك هتيجى التوقيع الكتاب ولا لا؟؟؟

وال 3 بوستات الجديدة نزلووا

وعاوزين رايك

بيس

قررت أكون عانس يقول...

ههههههههههه

جميلة اوى

ماشاء الله مااتصورتش ان دى النهاية
كلامك جميل و معبر

الـسـيـدة نـون يقول...

لما كبرت وقدرت أفكر
لقيت الكل ماشى فى سكة واحدة
الكل عارف امتى هيوصل
الكل عارف مين هيتبع
الكل عارف فين هينزل
سكة واحدة مش شرط فين
ولما سالت قالوا
بس إنتى إمشى فى السكة دى
إمشى معانا
ومتناقشيش ومتخالفيش
متحاوليش مش هتوصلى ومش هتقدرى
إحنا قبلك قلنا كل حاجة أحسن
يبقى إنتى متحاوليش تكوني أشطر
ليه تفكري ؟ أو تحاولي؟
أو تحاوري أو تناقشي أو تقرري
ليه هتتعبى عقلك إنتى؟
سبينا إحنا نقوم بكل الشغل أحسن
محنا قلنا كل الكلام
فى الدين قلنا صلاة صيام ..... حلال حرام
وفى السياسة سايسنا ومرينا مرور الكرام
وفى التاريخ والفتاوى والحكاوي وكل شئ
مش هتحتاجى للمزيد
كل شئ حتلاقى منه ماتحبى وتشتهى
إحنا اهلك إحنا ناسك
إحنا هنوريكى خلاصك
مهما تبعدي مش هننساكى أو نسيبك
هتلاقينا فى كل جامع أو على طرف الشوارع
هتلاقينا فى الإذاعة وكل شاشة
أو شريط فى الميكروباص
أو كتاب
أو مجلد
أو كتيب
أو نصيحة فى ربع صفحة فى الجرايد
ولو نطقتى هيجبوكى ويفهموكى
إن الكل ماشى فى سكة واحدة
فبلاش أحسن تحيدى
قلت ليه يا ربى خلتني اكبر وبقيت بفكر
مانا كنت تابعة وكنت عاملة بغبغان عمالة اكرر
وكنت شاطرة لانى حافظة
كنت هادية كنت ماشية جنب حيطة ويا ناس بالآلاف
ليه بفكر؟
ليه بجيب لنفسي وش وميت صداع
ليه بقول كلمات أبيحه زى "مظنش" أو "معتقدش"أو " عايزة ادلة تعمل اقتناع"
ليه محطتش القناع زى مليون واحد والسلام
مكنت أحسن نايمة وسط مجموعة نيام
ليه يا ربى خلتني اصحي
آه يا دنيا
لا الصباح بيجبلى بشرى
ولا الليل بيجيب منام
ولسه برضه يا جماعة مخي عيان بالبلاء
عند الناس اسمه"جدال"
واسمه عندي " إنسانية "

نبض اسكندرية يقول...

ايهاب

ازيك ياباشا

اخبار الصحة اية يا شنكوتى؟

ان شاء الله يكون كلة تمام

كل سنة وانت طيب يا باشا

ورمضان كريم

Lemonada يقول...

شناكيتووووووووووو
ازيك يا بببببببباشا
والله زمان
انا قلت امسي ورامي السلام
يا رب تكون كويس

غير معرف يقول...

هههههههههههه
نانسى بقت مرشدة الشعب...عيب عليكوا سيبوا الست فى حالها و علموا بحاجة تانية هى اليافطة ناقصة..حجج فارغة
بس قولى هى فين بالظبط عشان أعلم بيها أنا كمان :)


كل سنة و أنتا طيب و المدونة حلوة أوى ربنا يوفقك

زُمُرده يقول...

ازييييييييييك يا هابي

اخبارك ايه

كل سنه وانت طيب ولربنا اقرب ولطاعته ادوم

بوستك وراه معنى قوي اووووي
للاسف ناس كتييييير ماشيه تايهه
بتخبط لا عارفه رايحه فين ولا جايه منين
قدوتنا مفقوده وملامحنا مجهوله
والشباب اتخذوا قدوات للاسف ابعد ما يكون عن معنى القدوه

nigro يقول...

أبو الشناكييييييييييييييييت
إزيك يا هوبه
واحشني جامد جامد جامد من هنا لأول امبارح
مش هاشوفك تاني بقى يا إيهاب
أنا سامع أخبار عن افطار جماعي في رمضان و يمكن يوميها أفلّق من الشغل آجي و يا ريت أشوفك يومها
معلش يا إيهاب إني مقصّر في السؤال
بس و الله يا إيهاب انت غلاوتك عندي مش محتاجة كلام

كل سنة و انت طيب يا إيهاب
و وفقك الله و إياي لصيام و قيام شهر رمضان على أكمل وجه

آه صحيح
ابقى اخبط صورة نانسي دي وش دوكو
احنا داخلين على ايام مفترجة و هنتلم بقى شوية

كل سنة و انت طيب يا إيهاب


يلا سلام

همس الاحباب يقول...

سيبك انت من نانسى ولوحتها
كل سنة وانت طيب
ورمضان كريم
والله انا عارف انى مقصر معاك
بس اعذرنى غصب عنى
بس بجد ليك وحشة يا جدع
تحياتى اخى الكريم

KING TOOOT يقول...

الناس بتمشي في الحياة بتزُك
تسند على الصورة حتى لو بتشُك
مع إن لينا دليل هو السند و الخير
بس إحنا ناس غاويين نعُك
و عجبي
KING TOOOT