كل واحد فينا لما بيحب يعمل مصيبه جديده او ذنب جديد في حياته يقولك على حجه جميله قوي
اصلي عايز اجرب
يا جدعان اجرب دي لما تبقى فكره حلوه وعايز اجرب هتمشي معايا ولا لأ رياضه هوايه مثلا
انما تعالى اتفرج
داخل ديسكو ليه
عايز اجرب ادخل جو الديسكوهات ده وارقص واتفرج
طيب طلبت خمره ليه وانت هناك
اصلي الجو عجبني ولقيتهم كلهم بيشربوا قلت اجرب
طيب مين البنت اللي بترقص معاها دي انت مش بتقول مرتبط
ايوه دي حاجه تانيه بنت فزيعه دمها شربات وروشه كده ومش مكلكعه
قصدك مش محترمه
لا يا جدع دي بنت ناس خالص ورقصنا للصبح وباستني قبل ما امشي وقالتلي دمك سكر
طيب وبعدين
روحت معاها ليه على شقتها وايه اللي هببته ده معاها
كنت عايز اجرب بصراحه اني اعمل كده واروش ومقدرتش احوش نفسي
واحد تاني بقى
رحت فين مع اصحابك
دخلنا القهوه كنت عايز اجرب قعدة القهوه
وبعدين
شربت شيشه او سجاير- حسب اصحابه- كنت عايز اجرب برده شكل الدخان لذيذ قوي
وبعدين
كنت عايز اجرب الحشيش اللي معاهم فجربته برده
وبعدين
ولا قبلين بقالي فتره كده مش قادر استغنى عن المخدرات خالص
واحد حلو بقى غير ده وده
اصحابي فكروا في فكره مجنونه
فقلت اجرب معاهم
فكرة ايه دي
نسرق عربيه ابو واحد فيهم
وبعدين
ولا قبلين طلعت مش بتاعة ابو صاحبهم وانا اتحبست فيها تلات سنين
تحبوا اكمل بقيت التجارب اللي الناس بتعملها من باب التجربه يعني وحاجه جديده
المصيبه ان كل واحد يجرب ذنب معين ولو معجبهوش يقول اصلي استحرمت وتبت عنه مع انه يمكن تاب غصب عنه علشان مش قادر عليه وعلى مصاريفه مثلا
اما لو قدر عليه او عجبه الذنب بقى يرجع يقولك مش قادر ابطل هاعمل ايه يعني اتعودت عليه خلاص مش بأيدي صدقوني اتعودت اخونك اتعودت اشرب مخدرات اتعودت اسرق اتعودت اكدب اتعودت حاجات كتير مش قادر ابطلها وكل ما احب اذود ذنب جديد
اروح اقول بجرب
بس مش على طول صدقوني
ولو عجبني اقول غصب عني اتعودت عليه يا ناس حد يساعدني
ملحوظه تخينه
انا مش بعمل الحاجات دي الحمد لله انا مش متعود ولا حاجه
اروح بقى اجرب حاجه جديده علشان اتعود عليها
سلاااااااااااااااااااااام
ملحوظه تخينه
انا مش بعمل الحاجات دي الحمد لله انا مش متعود ولا حاجه
اروح بقى اجرب حاجه جديده علشان اتعود عليها
سلاااااااااااااااااااااام
هناك ٣٨ تعليقًا:
كل واحد فينا لما بيحب يعمل مصيبه جديده او ذنب جديد في حياته يقولك على حجه جميله قوي
اصلي عايز اجرب
...
الحقيقة هو كدة مش بيجرب
هو كده بيخرررب
حب التجربة ده ليه مش بيكون بنفس المقدار فى الحاجات الحلوة
يعنى لو سمع عن ندوة دينية ليه مش يقول أجرب
لو عرف ان فيه مجموعة شباب بيقوموا بتجميل مبانى الحى بتاعهم بالجهود الذاتية,, ليه مش يشاركهم ويجرب
لو فيه دار أيتام قريبة من بيته,, ليه مش يروح يزورهم ويجرب
وحاجات كتير كتير زى كده
بس مش بيقول يجرب
بيقول لأ مش النهاردة .. انا كسلان
ويعدى يوم ويوم وأيام ولا يفكر يجرب
تحياتى واحترامى
المشكلة مش فى اننا بنجرب
المشكلة اننا مش بنجرب غير المصايب
لكن حد يجرب يجتهد و يذاكر لا
حد يجرب ينزل يدور على شغل لا
حد يجرب يتعلم حاجة جديده تفيده لا
حد يجرب يتعلم لغه او كورسات كمبيوتر يمكن تنفعه لا
هو احنا ليه مش بنجرب حاجة عدله ؟؟
بلاها التجارب اللي تودي في ستين داهية
يعني لوواحد جرب يشرب حشيش وقلبت معاه ادمان يبقي الحالة ايه بقي ؟
مالها التجارب
خليهم يجربو
كل واحد يجرب يطريقته
وفى الآخر كل واحد بيتعلم من نتاج تجاربه وبيخوض مصيره
التحكم فى النفس مش بالساهل والانسان الضعيف اللى مش قادر يسيطر على تصرفاته مش هتقدر تمنعه من انه يأذى نفسه
ربنا يستر
مقولتلناش ناوى تجرب ايه
ها
ها
وش متغاظ لو هتعمل حاجة وحشة
سلام
هبة
حق التجربه مكفول لصاحب البوست فقط هههههههههه
يا ايهاب ما هو ده دور الاصحاب الكويسين يعنى يمنعوا اللى بيغلط واللى بيبدأ فى الغلط يعنى لازم نبقى مع بعض علشان نصلح بعض
الحمد لله انك مجربتهاش
وربنا يحفظك يارب منها
عشان ربنا يكرمك وتوصل الجنة بدون معوقات
بص بقى انا بتفق معاك جدا
انى فى شباب كتير بتعملها على سبيل التجربة وياريت تقف عند الحد ده لا
ده كمان بتزيد جدا
وبتبقى ادمان
ياريت فعلا اللى يجرب حاجة يجرب حاجة مفيدة عارف انها هتنفعه
وهتنفع غيره
مش تضره وتضر غيره
تحياتى ليك على الموضوع الجميل
ايه يا شنكوتي ده
موضوع و لا احلى يا ريت كل الشباب يقروه
انت بجد اتكلمت فى موضوع قوي
تحياتي
عندك حق يا إيهاب
ماهو الشيطان شاطر ولازم يلاقيله حجه كويسه
بتختار موضوعات حلوة أوي للمناقشه
----------------------------------
ملحوظه علي جنب ..
انت ماعرفتش تعلق ليه ؟؟
أول مرة مايكونش عندك دفاع عن حد
ياتري ايه السبب ؟
ابقي عدي تاني أنا نزلت صورة جديده
سلاااااااااااااااااام
lyssandra
يسلام على التجارب
انا قلت ممكن حد يجرب يخترع ولا يكتشف ولا يحفر اسمه فى تاريخ البشريه باى انجاز
مدونه جميله جدا
دمت بكل الخير
عندك حق فعلا
بس في تجارب تودي في داهيه
نفسي انا بقي واحد يجرب يعدل الحال المايل
في البلد
تحياتي
ليست كل التجارب
تنتهي النهايه اللتي يتمناها المرء
تحياتي
السلام عليكم ورحمه الله وبركاته
آخى الكريم
لما أراك لم تشارك معنا فى حملتك إلى الآن ؟
أخي العزيز : هي حملتك هي لغتك ولغتي أذا لم نحافظ عليها نحن ونعمل على نشرها فمن يفعل ذلك ؟؟
أنا لا ادعوا إلى المثالية فى استخدام اللغة والأمر مفصل بالموضوع بالمدونة
وهى ليست دعوا لفرض قيود على كيفية التعبير عن الرأي فلك مطلق الحرية في هذا
أخي الحبيب أن مشاركتك في هذه الحملة سوف يكون احد أسباب نجاحها ونشر لغتك
ندعوا الى الاعتزاز بلغتنا ..أعلم انك تعتز بها ولكنى أدعوك الآن إلى نشر الأمر بين كل من تعرف وكل زوار مدونتك التي تدون بها وكل المنتديات التي تشارك بها
إلا أذا كنت غير مقتنع بالفكرة والحملة فلك مطلق الحرية في هذا واعتذر أذا كنت أطالت عليك
والسلام عليكم
انا اول مره ادخل هنا بس ان شاء الله مش الاخيره لانه بحد البوست عجبني جدا وعجبني الكلام اللي تحت عنوان المدونه انه نتعامل بصراحه اكتر
البوست ده عجبني جدا وفعلا ناس كتير او اكترنا لما نيجي نعمل حاجه كحجه نقول بنجرب
ربنا يهدينا جميعا وكل واحد يحاول يسيطر على نفسه :)
موضوع جميل يا إيهاب
مش لاقي تعليق عليه غير .. إنه الفضول يا عزيزي
نعم الفضول الذي يدفعنا لفعل اشياء نود فقط ان نعرفها ..حتي وإن كنا لن نكررها مرة أخري .. ولكن لكي تكون من باب العلم بالشيئ
بالتوفيق
أسلوبك الدعوي رائع
اللللللللله
وانا و انا و انا
قولولى مين ناوى يجرب عشان ياخدنى معاه
يا عم فكك
صح ايه و غلط ايه
ماهو لازم نجرب عشان نتعلم
نجرب بقى وللا نخرب
المهم نتعلم
بس صحيح
كده ممكن منلحقش نتعلم
ممكن نلاقى نفسنا بنجرب حاجات تخلينا فى خبر كان
خلاص برده نجرب عشان نبقى عبرة لغيرنا
واهو كده يبقى لينا فايدة حتى فى الدنيا على الاقل
قولى بقى ناوى تجرب ايه
عموما
انا معاك
يوجد اشياء مشروعة فى التجربة
بمعنى
احيانا يوجد اشخاص نفسهم يعيشوا تجربة الحب مثلا دة مش عيب المهم يكون نفسة فى الحب الى اخرة مشروع
وفى تجربة اخرى الاحساس بالامومة فى الاول بتكون تجربة على فكرة
يعنى الواحدة بتفضل تسئل نفسها هنفع اكون ام ياترى تجربة الامومة دى هتكون ازاى حتى الاب تجربةانة يكون اب بيفضل يعملها الف حساب الى ان يشعر بالمسؤولية
كل شئ تحت مسمى التجربة المشروعة بتكون كويسة
لكن بقى التجربة الغير مشروعة احيانا الشخص نفسة بيكون ضحية لااهلة
ضحية لاصدقاء السوء
فعلا ضحايا
وضحايا عدم القدوة ودة الاهم تاهت قدوتهم فى دائرة البحث عن المال
لو كل صديق بياخذ بايد صديقة الى الخير يبقى عمرة ماهيجرب غير الخير
وفى شباب كتيرة عارفة كويس ان بعض التجارب اخرها دمار وبيختصروا الامر ومش بيجربوا اصلا
لان تربوا على الصح والغلط
واتربوا على ان فى حلال وفى حرام
تقديرى وسلاماتى
رندا
والله يا شنكوتى هو الشيطان اصله ابن كلب بعيد عنك .. :)
يزن على الدماغ المخرومة من دول ويقوله ما تجرب انت هتخسر ايه .. وبس خلاص جت رجلك يا معلم
وياما فى ادمغه كتير مخرومة بتصدق اى حاجة تتقال قصادها .. والحمد لله عندنا القدوة والمصل الاعلى فى اللمبي واشباهه .. الاخ الى ماسك ازازة البيرة طول الفيلم وسيجارة الحشيش وفى الاخر يبقى غنى ويتجوز الى بيحبها ويا دار ما دخلك بوليس
تحييياتى
حليب هارتي ابو الشناكيت
تصدق يا واد انت دماااااغ بالموضوع ده وبالموضوع اللي فات
بجد بتجيب شوية افكار .. تسلم عليها والله
وبالنسبه لاول تجربة شرب سجاير معايا
هي ابتدت بدري بدري
في اولى اعدادي
في رحلة تبع المدرسه وكنت عايز ابقى راجل
وللاسف
من ساعتها ماشربتها وانا تابع ليها ومش راجل
تعتقد العيب في نوع السجاير؟؟؟
سلامووووووووووز
الغريبة اننا بنحب دايما نجرب الحاجة الغريبة علينا من غير ما نحاول نفهم الاول هى مناسبة لنا ولا لا
و ده مش بس فى الحاجات الوحشة اللى انت قلتها ..لكن الموضوع بيشمل كل كبيرة و صغيرة فى حياتنا .. من اول موضة جديدة فى اللبس و طريقة جديدة فى الرجيم و دوا كحة له تأثير السحر .. لحد نظام دراسى جديد و طريقة ترشيد استهلاك جديدة و حتى طريقة للمرور جديدة
مع ان المفروض ان الواحد يبدا من النقطة اللى انتهى منها غيره .. يعنى 100 جربوا المخدرات و لاقوا انها بتعمل ادمان و منه حالة ضياع تامة و موت فى الاخر يبقى انا نقطة بداتى تكون ان التجربة دى نتايجها فاشلة و مفروض محاولش تجربتها
لكن مفروض نكمل على التجارب الناجحة و بس و نحاول اننا نكون ناجحين زيها
لكن تقول لمين بقى :S
ازيك ياشنكوتى ياكبير ايه ياعم الافكار الجامده دى بص هوا الانسان عشان يتعلم ويكتسب خبرته فالدنيا لازم يجرب ويغلط ويتعلم وميكررش الغلط بس مش اروح ارمى نفسى فالنار واقول بجرب ماهو ربنا عرفوه بالعقل فين الفايده انى اجرب اسرق يمكن مثلا مثلا الاقى السرقه والله مفيده وبنت حلال اقوم اشتغل حرامى
تحياتى ليك
عارف يا ايهاب كل ده سببه ايه
ان الناس بعدت عن ربنا علشان كده مبقاش يخاف لما يعمل حاجه غلط
مش حاطت فى دماغه ان ربنا هيحاسبه
يقول المصطفى تركت فيكم ما ان تمسكتم بيه لن تضلوا بعدى ابدا
والناس تركوا كتاب الله وسنته واتبعو ا
الشهوات وارضاء النفس وعايز يجرب ومش خايف ان فى ربنا مطلع عليه
تحياتى ولاء
والله برافو عليك .. تمام ده اللي بيحصل للأسف ..والمشكلة ان الناس تقريبا بتنسى ازاي تفرق بين الصح والغلط .. الكويس والوحش .. فبتلاقيهم بيلبخوا بقى ! معدتش تفرق
الحمد لله انك ولا احنا متعودين على حاجة .. وربنا يسهل ونجرب كلنا حاجات مفيدة
شكرا يا باشا
صيف سعيد لك وللجميع
والله عندك حق يا ايهاب لان كل شىء فى بدايته تجربه لحد ما يتعود عليه زى ما انت قولت بس الانسان الصح مش يجرب الغلط ويقول نجرب
ولا ترموا بأنفسكم اللى التهلكه
سلام يا ايهاب
والله عندك حق
للاسف فيه مقولة بتقول
الممنوع مرغوب
والانسان بطبعة بيحب يجرب كل شئ جديد
ده غير انه ميال فطريا للانحراف
على اساس حب الشهوات وكده
فبيندفع مع التجربة
وللاسف فعلا بيتعود عليها
لان كل مره بيبقى عايز يجربها بشكل جديد ولون مختلف
حلو البوست ده يا شنكو
ليه الحاجة الحلوة محدش بيجربها؟؟
ده بيحصل فعلا بالحرف
اسأل حد من قرايبى انت بتدخن ليه؟يقولى بجرب بس طيب كويس انت جربت قولى استفدت ايه؟ من التجربة اللى هيستفيد منها العالم بأسره يقولى مفيش طيب يااخينا مبتبطلش ليه اديك جربت يقولى خلاص اتعودت ومقدرش ابطل
دى حاجة تفقع المرارة
الناس تاهت مش عارفه الكويس من الوحش من العادات يلا بقت سلطى رغم وضوح كل حاجة فيهم
انت رايح تجرب طب خدنى معاك هههههه هتجرب ايه
( رصيف نمره خمسه)
تحياتى
متهيألى ان الواحد بيتعلم من تجاربه
وغالبا التجارب دى بتكون حاجة مش ولابد
اصل الواحد هيعرف الصح ازاى اذا كان معرفش الغلط
الانسان الذكى هو اللى يتعلم كمان من اخطاء غيره
يعنى مش لازم الواحد يغلط بنفسه علشان يتعلم
كفاية انى اشوف حد دخل تجربة معينة وكانت نتيجة التجربة زفت عليه وعلى اهله ومنيلة بنيلة
يبقى بلاش اقول اجرب انا كمان
ده هو ده الغباء بعينه
بس خلاص
تحياتى ليك
اختك خيخة
عاوز اجرب أنا كمان
التجارب دي من طباع الجنس البشري
والواحد بيجرب عشان يحصل علي متعة في نهاية التجربة او اكتشاف جديد
لكن المفروض نختار اللي بنجربه
ليه دايما نختار حاجات عاوزين نجربها واحنا عارفين من جوانا انها مش صح او ان نهايتها مش صح
برده بندور علي متعة مؤقتة
وعارفين اننا بعد ما نجربها هنحب نبطلها تاني في يوم لانها مش مفروض كعادة تستمر معانا علي طول
بس الحل ايه ؟
فعلا ملاحظة جميلة جدا
تحياتي
كلامك صح ااخر صححاان
وبحييك علية اوى
وعاوزة اقولك انك نورت مدونتى بشكل مش عاااادى
وكانت مفاجاة اكتر من رائعة بجد
وبخصوص ردك على قصيدة(لست ملاكا)
انا رديت عليك وعرضت عرض؟؟
ومنتظرة ردك؟؟
ولن اتنازل عن زياارات عديدة مقبلة
تحياتى ليك..
ازيك يابرنس
طبعا من حقك تتغر..
انا كان قصدى اكتب بوستات(شعر)
وانت ترد عليها وتتنشر مرة عندى ومرة عندك
علشان حكاية مدونة جديدة هتكون عبئ
ومحتاجة تعب ومش هيكون ليها جمهوور زى جمهورى الحالى وجمهورك طبعا
ابعتلى ع ميلى اللى ف البروفايل
ونظبط الموضوع لو وقتك يسمح..
بيييس
دى جدعنة اجرب حاجة جديدة غلط واستمر فيها بس طالما انا جدع وسبع رجالة فى بعض يبقى المفروض اعمل الحاجة دى من غير كسوف واقول لاى حد وكل حد مش اعملها فى الضلمة....... لو فضلت اعملها فى الضلمة ابقى باتكسف منها وشكلى فى المراية هيبقى وحششششششششششششششششششششششششش
عووووووووووووووووووو انا جيت اتخديت
............................
ايييييييييييييييييية التجارب الجامدة دى
........................
دى تودى القسم علطوووووووووللللللللللللللللل
لا يا باشا
عندهم حق بقى انهم يقولوا ان زباينك بنات بس
دا لانك مش بتزور غيرهم
طب اسأل حتى من بعيد لبعيد
ماشى يا كبيير
و حشتنى بوستاتك و الله
بوست رائع
الله
ينور
التعليق ده تجربة هه
تحياتى
eslam
بجد هاااااااااااااايل يا شنكوتي بوست فظيع فظيع فظيع
ومعاك حق فيه اوي
اسف لو كنت ازعجتك انا اعرف ان زباينك بنات بس
عووووووووووووووووووووو
جاية امسى
إرسال تعليق