السبت، يونيو 28

ترى اين ذهبت

جلس يتذكر في هدوء ذكريات الطفوله
العيد الكبير
بهجة لكل طفل في سنه ولكنه ليس اي عيد انه العيد الكبير وابيه يصر على ان يتبع السنه ويذبح في مدخل مسكنهم ويوزعوا اللحم على جيرانهم كي يعتادوا السنه

ولكنه مجبر على ان يذهب اليها
بيتها بعيد جدا وعليه ان يمشي مسافه طويل اخذ يصبر نفسه بالثواب الذي سيأخذه كما اخبرته امه وان الله سيجازيه خير جزاء وقد حدث .
لكنهم هذه المره اعطوه حقيبه كبيره بها بعض الأشياء غير اللحم
ربما كانت الفروه هو لا يعلم ولا يريد ان يعلم كل ما يريده ان ينتهي الأمر ويرجع ليلعب مع الأطفال في سنه


الصيف حار جدا والشمس تقتله والحمل على كتفه يحاول تعديله من كتف لأخر الحقيبه البلاستيكيه تنزلق من يده بفعل العرق والثقل الرهيب بدأ يشعر بالتعب والخوف من الا يستطيع الوصول الى منزلها كانت تسكن في مكان غريب فلا توجد محلات او ناس في الطريق
كان مسرورا ان الوقت صباحا لأن هذا المكان في الليل لابد انه مرعب جدا بعض الكلاب تحوم حوله هو يكره الكلاب كثيرا ويخافها كالموت حاول ان يجري بسرعه قبل ان تقترب لكن الحمل الثقيل يجبره على السير البطيء كان خائفا جدا اخذ يقرأ سورة الفيل الشيخ في المسجد اخبره انها ستبعد عنه الكلاب اذا اخافته وقد نجحت لم تقترب منه الكلاب واصل السير لقد مرت اكثر من نصف ساعه وهو لازال يمشي كان يشعر بضيق شديد ولكنه لم يقدر ان يقول لا ان ابيه شديد جدا معه وقد يضربه بشده اذا اعترض او ابدى حتى عدم موافقته
انتبه الى انه اقترب من الشارع طرق الباب فتحت له لم يكن احدا من ابنائها موجود ادخلته وسلمت عليه واعطاها الكيس شكرته كثيرا كانت فقيره جدا والبيت يدل على حالتها الماديه الصعبه

لم يكن قادر على الرد اخذت تسأله عن حاله ولا يجيب وفجأه انفجر باكيا لم يكن يعرف لما يبكي بالظبط لقد وصل واتم مهمته ولكنه كان قد شبع خوفا وتعبا طوال الطريق
احتضنته واحضرت له في سرعه زجاجة مياه غازيه وكانت بارده جدا ولذيذه شربها في سرعه واعلن عن اضطراره للرحيل حتى لا يقيلق ابوه عليه سألته لما كمان يبكي فلم يجبها واطرق بوجهه
لم تعاود السؤال فقط طبطبت عليه وودعته
اخذ طوال الطريق يفكر انه عندما سيكبر سيعاملها احسن معامله لأنها فعلت معه ذلك
وعندما عاد انبه والديه على التأخير وانه مؤكد كان يلعب في الطريق لم يستطع ان يرد واطرق ساكتا
ودارت الأيام وكبر ولكنه لم يستطع ان يوفي بنذره تجاهها هل تعلمون السبب
لقد اضطرت للهرب من العائله كلها فقد قررت العائله انها بعد موت زوجها اما ان تنتظر الموت او ان تتزوج اخيه حتى لا تضيع ورث الأرض من زوجها على الغرباء
لقد تركت كل شيء وهربت وهو الأن لا يملك لها الا الدعاء بأن يوفقها الله لما فيه الخير لها


جائني تعليقات كثيره اني بعلق عند البنات بس
علشان الناس تستريح انا هاخد اجازه من التدوين والتعليق وكل حاجه لفتره كده استجمع افاكاري واركز شويه
ادعولي سعدت جدا بكل الناس اللي عرفتهم مش هاغيب انشاء الله لكن الله اعلم هاغيب قد ايه

اخوكم ايهاب
تحديث انا رجعت تاني يا رجاله يظهر مبقدرش اعيش بعيد عن الناس اللي بحبهم قوي هنا
متشكر لكل اللي سأل عني وبحبكم كلكم

هناك 19 تعليقًا:

واحدة مفروسة يقول...

يمكن انا مش بعلق عندك كتير
بس انا باجي كتير و بيعجبنى كتير كلامك
صحيح الجو حر و اواحد حاسس انه قرفان و زهقان
بس ياريت مش تتأخر
و اللي بقولك على الملاحظه ديه قولة كلهم اخواتي و عاوزين رأيي فى اللي بيكتبوه
ديه غيره بأه
بلاش تكتب ..بس خليك معانا اقرى و علق و سيبك من الولاد الوحشين اللي بيغيرو منك
ونعالى زورنا عند فرنسا و الرايق
وياريت تدخل معانا لو ليك فى الضحك و الفرفشه
ماهو احنا برضه زهقانين..و بدل ما نجيب درفها قلنا نساعد بعض على الفرفشه
اللينك حتلاقى عندي فى المدونة
سلام و مستنيين تعليقك عندنا فرنسا و الرايق و عصابة الاربعين ضحكة

appy يقول...

لااااااااااا لاااااااا كلا البته ايه الاول القصه اللى تجنن دي
صانيا بنات ايه واولا د ايه سيبك الا هو مش انا مت البنات ما انت مش بتيجي كتير عندي ايه الناي الوحشه دي سيبك منهم

كاميليا يقول...

ازيك يا اخى العزيز

القصة جميلة جدا

كنت فاكرة ان لها بقية

ولكن بطلتها هربت
وها انت تليها هربا

تعليقات بنات ايه بس؟؟

ده كلام؟

عموما
خد اجازة زى ما انت عاوز
بس على وعد بلقاء جديد
قريب .. قريب اوى

لو كل اللى قال انك بتعلق عند بنات بس
يعرف انك نعم الاخ ونعم الصديق لهن جميعا
ودوما ما تنصح ودوما ما تدق اجراس الاستيقاظ
من نوبات اليأس والاستسلام ، لم قال ما قال

جزاك الله خيرا عنا جميعا
وبارك فيك ورضى عنك وارضاك
يارب

تحياتى لاخى العزيز

انا عندى بوست جديد
اوعى تيجى تعلق
D:

تحياتى مرة اخرى
واحترامى لشخصك


اختك
كاميليا

Doba يقول...

مش عارفة اقولك ايه
اقولك منتظرينك
ولا اقولك تعالى بسرعة
ولا اقولك هنفتقد دعابتك وتعليقاتك وسطينا

ارجوك مش تغيب كتير
فى انتظارك
هبة

إنجى يقول...

رايح فين يا حاج؟؟

احنا حانهزر ولا ايه؟؟

لما شنكوتى ياخد اجازة

امال مين بقى اللى حايرد علينا؟؟

مدونات بنات ,, مدونات بنات

محدش له عندنا حاجة

سيبك من الكلام ده

وارجع ومتديش فرصة للقلة المندسة على رأى دوبا تندس فى اللى مالهاش فيه

تعالى بقى علق عندى
هو انا مش بنات ولا ايه؟
هاهاها


تحيتى

بت خيخة وأى كلام يقول...

القصة حلوة
وحاسة انها حقيقية
لان فيه شوية تفاصيل مش موجودة ومش مفهومة لو كانت القصة دى من وحى خيال الكاتب ماكنش الكاتب غفل عنها
وعلشان كدة حاسة انها موقف حقيقى


ايه حكاية انك بتعلق عند بنات ومش بتعلق عند ولاد

طب وافرض
هو التعليق عند البنات بقى شبهة دلوقتى ولا ايه؟

عموما يا ايهاب
خد وقتك وارجعلنا ومتتأخرش علينا

سلام
اختك خيخة


الف شكر علشان عرفت ان سورة الفيل بتمنع الكلاب انها تقرب من الانسان

Soooo يقول...

نعم ياخويا؟؟؟
انت بتهزر ياد؟؟؟

مين اللي قالك الكلام الهبل ده
وهو مالو اصلا تعلق عند بنات ولا تعلق عند ولاد
علق في الحته اللي تعجبك
هو انت بتعلق عشان الناس ولا عشان الفكره والموضوع نفسه

بطل عبط ياد انت
قال هاخد اجازة قال

طب انا دلوقتي شفت فيلم كباريه وناوي اتكلم عنها .. لكن مش هتكلم غير لما تظهر وتبان

قال بيعلق عن بنات قال

اه على فكره
القصه حلوة قوي .. لكن ماستوعبتش هي مين الست دي
مرات عمه يعني ولا جدته ولا ماتقربلوش
معلش اصل اخوك الحر لحس الجمجمه

روق يابو الشناكيت
روووووووق


ربنا يسعدك ويبسطك ويكرمك ويوفقك ويرضيك دنيا وآخره ياصاحبي



سلاموووووووووووز

الشنكوتي الكبير يقول...

واحده مفروسه

انا متشكر جدا جدا جدا على ردك ده
وعجبني قوي الفكره بتاعتكم والمدونه المشتركه الجميله دي
صحيح لسه مش علقت
لكن هاعلق فيها كتير انشاء الله
وكل لما ابقى زعلان هاجي افك عن نفسي عندكم

تسلمي

نورتيني
سلاااااااااااااااااااام

-----------------------

ابي
يا نصابه انا مش باجي كتير عندك
ده انا مفيش مره مش بعلق عندك
ولو مش علقت بيبقى لأن الصفحه تقيله ومش عايزه تفتح الكومنت
عموما انا كبرت دماغي خلاص
والفكره ان انا مش زعلان انهم بيقولوا بيعلق عند البنات هي البنات وحشه يعني
طب دي حاجه عسل ابقى زي نزار قباني بس هو في الشعر وانا في التعليقات

معلق النساء
ايهاب

---------------------

كاميليا

ربنا يسعد ايامك
القصه فعلا حقيقيه بس مش هاقولك جبتها منين

اما عن الهرب هو راحه شويه مش هرب يعني
ثم حضرتك اصل ملكة التزويغ والأجازات التدوينيه يا اونطجيه
ولا ايه

سلاااااااااااااااااام
اخوكي ايهاب

------------------

دوبا

ربنا يسعد ايامك ويحفظك

انشاء الله مفيش افتقاد ولا حاجه خدي اسبرينتين وانتي هتخفي على طول

انا رجعت الحمد لله
-----------------------


انجي

ربنا يسعدك
اذا كان كده ماشي
هنقضيها بنات بقى ههههههههههه
انا هاوريهم القله المنبسه دي

هي قله قناوي ولا قله فخار

هههههههههههههه
نورتيني وجااااااااااااايلك في السريع

سلااااااااااااااااام

==================


بنت خيخه و....كلام

يا بنتي طول عمري اقول خيخه دي دماغ صح
ايوه القصه حقيقيه ايه رايك بجيب من الواقع اهو ولا نجيب محظوظ في زمانه

وبعدين يعني هاعمل ايه ما هي البنات هي اللي بتكتب حلو اعملهم ايه بقى اقاطعهم يعني
وبعدين هو يعني الواد سووو ده اللي بموت فيه بنات راخر ولا ايه
انا راجع يا باشا ومبروك تاني على شغلك بقينا زملاء في نفس المجال
وش بيغمز


اخوكي ايهاب

--------------------------



سوووووووووووووووو

حبيب قلبي الكبير قوي

اهو انتي بالذات اللي كنت مستني تعليقك ده يا كبير
انا مبفرقش بنات من رجاله الحكايه اني بعلق وبتابع اللي بحب اقرأ كتاباته
وبعدين ما انا معاك على طول ولا هم مش واخدين بالهم منك يا ابو الرجاله


اقولك انا كبرت دماغي خلاص مادام صحابي حلوين وكتير كده مش ههمني حد واعلق مطرح ما يعجبني


سلاااااااااااااااااااااااااااااام

enjy يقول...

حلوة جدا القصة دى فكرتنى بكتاب قريته من فترة للاستاذ عبد الوهاب مطاوع اسمه حكايات شارعنا........
ايه بقى دة يعنى اول ماعرفت مدونتك وانت جيت علقت عندى تاخد اجازة؟ينفع كدة يعنى؟
طيب ياسيدى تروح وترجع بالسلامة

مواطن مصرى نايم يقول...

لا يا باشا مكنتش اعرف انك كده
انا كنت بهزر يا راجل
بس الظاهر ان هزارى طلع تقييل
و الله ما كنت اقصد يا باشا
دا انتى حبيبى انا كنت بزاولك بس
انا كده بجد زعلت من نفسى انك فهمت غلط
اوعى تكون زعلان دا كان تعليق هزاااااار والله هزااااااااار
الله بقى يعنى الواحد ميعرفش يهزر معاك
اوعى تكون زعلان يا كبير
بس غالبا انا بحب اهزر
متخدش كلامى بجد اوى الا لما اقولك دا جد
انا بجد مش عارف اقولك ايه
تسيب التدوين فترة عشان تعليق
لا لا
كده ازعل و الله
الحمد لله انك رجعت قبل ما انا كنت اشوف البوست فى الاول و الله ممكن كنت مسحت البلوج بتاعى
كفايه بقى انا تعبت
بس امانة عليك انا عارف انى رزل اوعى تكون زعلان يا بوب
اخوك
eslam

مواطن مصرى نايم يقول...

انا نزلت لك اعتذار فى البلوج عشان تعرف انك غالى عندى
و تعرف انه كان هزار

سمر الشافعى يقول...

الشنكوتى العزيز انا جيت بعد مااليله اتفضت وانت رحت وجيت حمد الله عالسلامه ياسيدى ومتعملهاش تانى وبعدين انت تعلق فالحته اللى تعجبك ياباشا

تحياتى ليك ومتعملهاش تانى وتغيب عننا

فارس بلا جواد يقول...

أزيك يا إيهاب
وحمدالله ع السلامة بعد الغياب الطويل
كل مرة أدخل عندك الاقي البوست القديم ..قلت بقي انت هاجرت وسيبت المدونة
بس قصة جميلة واسلوبك كان حلو جدا
فنان بجد وتسلم ايدك
بالتوفيق دايما

بت خيخة وأى كلام يقول...

ايه
جرى ايه يا شنكوتى

انت مش هترتاح الا لما اعملك مدونة مخصوصة علشان خاطر تعليقاتك بس
مش كدة؟

مش تلم نفسك كدة وتبطل تكتب تعليقات جميلة اوى

وبعد كدة قبل ما تكتب تعليق عندى
ابقى اكتبه على ورقة خارجية
لو طلع كلام جميل
يبقى تحطه عندك بوست
مش تزنقهولى فى صفحة التعليقات عندى
هو انا كل شوية هاعملك بوست مخصوص ولا ايه

الناس كدة تفتكر انى بأجرلك البلوج بتاعى
وإنى بستنفع من وراك


ابوس ايد اللى خلفتك

روح هات تعليقك اللى عندى وحطه عندك بوست


بسم الله ماشاءالله عليك
انت تجنن يا ايهاب
ربنا يحميك يارب

والف شكر على تعليقك
اللى بجد معنديش رد عليه

اختك خيخة

حنين القلب يقول...

البوست حلو اوى
بس فيها ايه تعلق عند بنات ولا رجاله كلنا هنا اخوات
وتاخد اجازة وتبعد ليه علشان الكلام ضايقك يعنى يا سيدى الدنيا دى فيها ناس مش بتبطل كلام مدام انت شايف نفسك مش غلط خلاص ولا يهمك وعلق عند اللى انت عايزهم وبس
سلام يا ايهاب

lyssandra يقول...

الحمد لله علي سلامتك يا إيهاب

فعلا كنت مستغربة غيابك من فترة ومش شفت تعليقاتك عند حد خالص

بس لما جيت فهمت

عموما ماتضايقش نفسك

أظن لو انت بتغلط محدش هايقبل وجودك

وأعتقد من البدايه لو بتغلط او حسيت انك مش صح كنت هاتقف عند حد معين

كامي كلامها صح

انت نعم الاخ والصديق
واللي عاوز يفهم غير كده يشرب من المالح


تحياتي
وبلاش تسمع كلام حد وماتزعلش نفسك

عموما عوداً حميد
ويارب دايما تكون بخير

سلام

علي فكرة

مش هاقول عندي بوست جديد

بس في صوره جديدة علي جنب كده

هاتروح تشوفها ولا إيه النظام ؟؟


سلام

lyssandra

قوس قزح يقول...

يا سيدى الغيران يعمل زيك و يعلق عند البنات بس ( وش مطلع لسانه )

القصة جميلة
بس مفهمتش هى مين ؟؟
و ازاى يكون عندها ارض و فقيرة ؟؟


كويس انك رجعت و سيبتك من كلام الناس

ňįĝŗő يقول...

إيهاب باشا أبو الشناكيت
تصدق و تؤمن بالله انا قعدت أضحك على الملحوظة اللي في الآخر دي
آه و الله
عارف لما تسمع نكتة سخييييييفة قوي للدرجة اللي معاها تلاقي نفسك بتضحك و انت ما تعرفش ليه
يا ايهاب باشا أولاً كده أحب اقولك إني من متابعي تعليقاتك الإرتجالية الخطييييييرة الرهيييييييييبة
و اول ما باشوفلك تعليق يا معلم تلاقيني راشق قدامه عدل و ماتعتعش غير لما أكون مخلصه و متعقد علطول
ما شاء الله و لا قوة إلا بالله
ربنا يكرمك كده و يزيدك كمان و كمان و تعقدنا يا معلم
و بيني بينك يا هوبه أنا بأحس كده إن ييجي تلتين المدونين بنات
و بيكتبوا حلو قوي بصراحة
الواحد بيلاقي نفسه تلقائي الكلام شعشع في دماغه و هووووب التعليق اتكتب يا ريس
بجد يا إيهاب انت ليك بصمة و طعم مختلف و أنا و الله بتعجبني دماغك جداً
بس اللي مش عارفه حتى الآن أنا ليه مش بأعلق عندك دايماً ياستمرار
تخلف عقلي ده ولا إيه يا أبو الشناكيت؟
بس أنا هأتعالج إن شاء الله من العته ده

شوفت يا عم أديني سرحت بعيد عن الحدوتة بس انا مبسوط قوي بصراحة إن التعليق اللي جالك استفزني إني ابعبر شوية عن مكنون دواخل مزانق اللي جوايا

كتير الواحد مننا بتقابله مواقف و بتمر بيه حالات بس الإبداع الحقيقي هو إزاي تقدر تنقل الموقف و تسطره باسلوب جذاب و يشد
و انت في الحته دي ماتتوصاش يا إيهاب
ما شاء الله و لا قوة إلا بالله
أنا مش بأحسد يا عم
أنا بأنق بس

كفاية كده بقى لحسن زماني دوشتك معايا



يلا سلام

ňįĝŗő يقول...
أزال المؤلف هذا التعليق.