الثلاثاء، أبريل ١٥

حسن ................ مريم




اليومين دول موسم الولاده الظاهر
احمد حسن صديقي العزيز قوي قوي خلف طفل جميل خالص ربنا يحفظهوله ويباركله فيه وسماه حسن وده على اسم باباه الله يرحمه
وجاري محمد وزوجته كانت زميلتنا في الجامعه خلف برده بنوته قمر واسمها مريم
الف مبروك للأتنين
ومبروك ليا انا كمان علشان كده هابقى عمو ايهاب بقى
والعيال دي طبعا لما تكبر هيقعدوا يقولوا عمو ايهاب جه عمو ايهاب راح وهابقى متصيت قوي
انا بفكر اخطب الواد حسن للبنت مريم من دلوقتي بقى علشان نبقى نسايب في بعضينا
عقبال الناس كلها بقى يخلفوا ويتجوزوا ويبقوا تمام التمام
عقبالنا جميعا
انا مبسوط قوي الخبرين جم مع بعض تقريبا وانا بصراحه مذهول لسه اصل فكرة الأطفال دي بتذهلني جدا يعني ايه حد يخلف
يعني ربنا كرمه بطفل ايوه يعني ايه بقى
يعني هيلاقي حد يقوله يا بابا ويا ماما وكده يعني
طيب ده الموضوع بقى هيبقى مسؤليه
مش احنا واحنا صغيرين كان بابا ده بيعرف كل حاجه في الدنيا وماما دي اشطر واحسن واحلى ست في الدنيا
بس انا لسه مش بقيت بعرف كل حاجه في الدنيا
ومش عارف هي مراتي هتبقى اشطر ست في الطبخ ولا لأ
طيب العيال كده هيتعقدوا بقى
وبعدين هو انا هاربيهم ازاي
يعني ايه اربيهم
اقولهم ده صح وده غلط ازاي
اذا كنت انا لسه بغلط كتير
ومش عارف ابطل وابقى زي بابا كده
طيب ما يمكن باب كان زيي كده وبعدين بعد ما خلف بقى حلو كده نقول يمكن طيب افرض انا مبعرفش اربي مش في ساعات مدرسين بيبقوا مبيعرفوش يشرحوا ممكن برده اطلع اب فاشل ومبعرفش ابقى اب دي وقعه ايه دي بقى
مش عارف, طيب اعمل ايه علشان اتعلم ابقى اب كويس
دوبه دايما تقول كلكم راع وكلكم مسؤل عن رعيته
يعني انا هابقى مسؤل عن رعيتي برده والمسؤليه مش ان انا اشخط فيهم وازعق واضرب العيال وخلاص المسؤليه اكيد حاجه كبيره قوي مش عارف وياترى هابقى قد المسؤليه ولا لأ
اتمنى انجح في الموضوع ده عموما مش هنسبق الأحداث هنستنى لما ابقى اخلف وبعدين اشوف ربنا يستر بقى
وربنا معاكم يا حسن انت ومريم واهلكم يعرفوا ازاي يبقوا بابا سوبر وماما سوبر

سلااااااااااااااااااااام

هناك ٢٦ تعليقًا:

Doba يقول...

مش بالضرورة خالص انك تكون بابا وماما سوبر

المهم انك تعطى افضل ما عندك وتجاهد انك تتلاشى الاشياء السلبية اللى بتزرعها فى اولادك

النقطة ان كل واحد فينا بيبقى عاوز ابنه احسن منه وافضل بمراحل

بس ممكن لانى بحبه اديله كل حاجة وده غلط انا كده بأذيه - فالوسطية فى كل الامور حلوة بس الموضوع محتاج صبر ومرونة عاليين ولازم دايما تكون حاطط فى بالك انك قدوة

احسن زرعك يصلح نبتك

تحياتى
هبة

صحيح

عقبالك انت وغادة عن قريب يارب
والف مليون مبروك لحسن ومريم

ثم تعالى هنا
انت تخطبلهم ليه انت
هما هيتصرفو مع بعض
بس اطلع انت منها

shahy يقول...

ياسيدي اتجوز الاول وبعدين ربك يسهلها

انا كمان خيبة في التربية بس اللي بقدر اعملة اني باتجنب الاخطاء اللي بشوف ان اهلي وقعوا فيها وهما بيربوني واهم حاجة الدكتور قالهالي اني اكبر وداني على الاخر مع اولادي يعني اقعد اسمع كل كبيرة وصغيرة
عاعاعاعاعاعا لية بس فكرتني


لا تقلق في شرايط كاسيت كتير بتوضح كيفية تربية الاولاد بس لو انت شاطر بقى نفذ كلامهم

تحياتي والف مبروك للأبهات والامهات الجدد

كاميليا بهاء الدين يقول...

مش تقلق

أول ما تشيل إبنك او بنتك على ايدك
هاتعرف ازاى تكون بابا
بابا حنين قوى
بيخاف على قطعة منه تمشى على الارض
ويحافظ عليها ويحيمها ويعلمها كل حاجه حلوة
من اول الصلاه وقراءة القرآن وقصص الانبياء
حتى اعلى درجات العلوم

بالود ،، والتفاهم ،، والحوار المتوافق مع السن
والصداقة فى سن معين

هتلاقى نفسك بتعمل حاجات كنت تتمنى باباك يعملها معاك
زى باباك ما عمل معاك اللى جدك مش عمله معاه
ده تعاقب اجيال ،، وكل جيل بيتعلم ويضيف كمان

شعور الابوة ، والامومة ، ارقى انواع المشاعر

مش بيقولوا
احب ابنى يكون احسن منى؟

ربنا يدينا العمر يارب
ونقرآ هنا على صفحاتك
أنك انجبت ولداً او بنتاً
وتصف لنا شعور اللحظات الاولى لمولد الأبوة داخلك.

تحياتى وتقديرى

walaa يقول...

ربنا يكرمك بالزواج يارب ثم الانجاب
عارف يا ايهاب الاطفال دول احلى نعمه فى الوجود
ربنا يدى كل اللى عايز يارب
ومتخفش من تربيتهم اكيدربنا هيوفقك فى تربيتهم وتوكل على الله ربنا يكرمك يارب
تحياتى ولاء

خمسة فضفضة يقول...

السلام عليكم ورحمة الله وبركاته

الف مبروك قدوم حسن ومريم
وعقبال ماتشوفهم في الكوشه

اما موضوع تربية الاطفال ده صحيح هو صعب جدا بس اكيد ممتع جدا ، وماعتقجتش ان في حد مش بيعرف ازاي يبقي بابا او ماما كويس


سلام

روح شرقيه يقول...

باب وماما كانوا زينا
كانوا اطفال وكان ليهم بابا وماما بردوا
بس لما كبروا وبقوا بابا وماما بقوا احلى اتنين فى الدنيا
دى اول مره اقول عن بابا كده ربنا يرحمه
ويرحم كل المسلمين
تعرف اول ما تكون بابا ربنا هيخليك احلى بابا وكمان مراتك هتبقى احلى ماما
بس ديما افتكر بابا وماما ليك كانوا بيعملوا ايه معاك عشان يكونوا احلى بابا وماما عندك
بالحب بتقدر تخلى كل شئ ممكن
ومفيش حب فى الكون كله زى حب الوالدين
اطمن وتوكل على الله وربنا يخليك اجمل واعظم بابا
تحياتى
لاحلى بابا فى المستقبل

Empress appy يقول...

اتجننت يا هوبه بدرى هههههههه انت بتفكر من دلوقتى طيب ربنا معك
مبروك مريم وحسن
واسم البنت قبل الولد تفرقه بقى وانت مالك
عموما عندى ابن اختى عمرة ما قالى يا خالتو ولا طنط لانه عنده سنتين كبيرة يقولى آبى وهى اللى مسمينى كده
ولما يحن قوى يقولى هاتو بس
ربنا يديلك يا ايهاب

عصفور المدينة يقول...

أخي الحبيب أثرت موضوعا هاما جدا على فكرة وهو هل التربية تأتي بالخبرة والتجربة والخطأ ولذلك أحب أنصح أن التربية لابد فيها من التعلم والدراسة والاستفادة من دروس السابقين

Yahia يقول...

بص يا عمي انا مش هنصحك واقولك تعمل ايه بس هشرحلك وهوضحلك حاجة من وجهة نظري وممكن تفيدك، انت عارف اكيد ان الدنيا دي مليانه وجهات نظر ومش لازم تمشي على واحده منهم بس المهم يكون عندك ثقه في ان تعاملك مع ابنك يوصله للصح عشان يكون كويس وبرده في الاخر موضوع التربيه ده موال كبير بس في العاده بيكون في مبادء عامه لازم نزرعها في اولدنا عشان يكونوا كويسين

تحياتي

نسر الشرق يقول...

السلام عليكم
اول زيارة لية
مدونتك مدونة جميلة
انا فى الصف السادس الابدائى

Hypatia يقول...

مبروك المواليد الجداد وربنا ينولك اللى فى بالك يا اونكل ايهاب

:)

موناليزا يقول...

أحييك على طرح هذا الموضوع وفكرتنى بمناقشة تمت بينى وبين واحدة صاحبتى اول ماهى اتجوزت بشهر عملت اختبار حمل ولقيت نفسها مش حامل وعملتها مناحة بقى يابنتى اهدى مفيش وفين وفين لما كلمتها ذى ما انت بتقول كده وقلتلها ياترى انتى قد مسئولية طفل وهتعرفى ازاى تبقى ام وقدوة حسنة وعشان كده بدأت احاول جاهدة بتصليح نفسى حتى اكون قدوة صالحة وخاصة انى بتعامل مع الاطفال كثير
تفكيرك ده باذن الله هيغيرك للاحسن
تقبل مرورى

Abo 7anf يقول...

يسدى سؤالك انت هتشيل المسؤليه ازاى
اكيد كل واحد ساله لنفسه
ويارب يديلك يسيدى
وتقبل مرورى
اه موضوعك جامد

لـــى لــــىِ يقول...

اتجوز انت ومش تفكر فى موضوع تبقى بابا وبابا ازاى

كل شئ بوقته

بس انت هاتكون أب كويس قوى
وهابقى افكرك

ربنا يسعدك ويتم لك على خير

تحياتى

-_- يقول...

اللهم زد و بارك

مدحت محمد يقول...

الف مبروك ليهم
وعقبالك
شد حيلك
انا اعتقد مفيش سعادة فى الدنيا اد سعادة انى الانسان يكون اب
ويقدر يربى عياله
ويحس انه مسئول عن تربيتهم وتوجيههم
مسئولية ليها طعم خاص
تقبل مرورى

الـسـيـدة نـون يقول...

بص يا شنكوتى
مهما فكرت قبل ما تخلف وتقعد تقول لنفسك انا هاعمل واعمل واعمل
اول مابتشوف ابنك قصاد عنيك
الحياة بتختلف تماما
هتلاقى نفسك مرة بابا كويس
ومرة بابا قاسى
ومرة بابا حنين
ومرة بابا بيشخط
ومرة بابا سوبر
ومرة بابا اى كلام
عادى يعنى
المهم انك تحترم اولادك من صغرهم
وتديهم فرصة انهم يعبروا عن نفسهم
علشان يطلعوا نفسهم
مايطلعوش حد تانى او بيقلدوا حد تانى
واوعى انك تهينهم قدام حد
او تهزئهم قدام حد
امال هما عملوا البيوت ليه
علشان تشخط فيهم براحتك بينك وبينهم

ربنا يسعدك يارب يا ايهاب
وتجيب عيال يكونوا احسن ناس فى الدنيا

اختك خيخة

الـسـيـدة نـون يقول...
أزال المؤلف هذا التعليق.
زُمُرده يقول...

ههههههههه
حلوه بابا سوبر وماما سوبر

اولا جميل اوي بوست فرحني وعيشني لحظات جميله بجد وخلاني حسيت فرحتك اوي

كل اب وكل ام في الوقت ده بيقعدوا يفكروا في المستقبل
أمال 9 شهور حمل ليه
علشان تقعد تفكر ازاي تكون اب سوبر وناجح وازاي تربيهم وتسعدهم

بس الفكره انك تبقى متاكد ان مهما زاد علمك ممكن ابنك يضيفلك
وده دورنا لما نبقى اباء وامهات
منعدش اخطاء جيل سابق

مبسوطه ليك
وعقبالك يا هابي

عبده الرايق يقول...

طبعا لازم يكوب بابا سوبر
ومينفعشى ابدا يكون بابا كليوبترا
او بلمونت
لازم سوبر
احسن حاجه انك ناوى تشتغل خاطبه من دلوقتى لحسن ومريم
ربنا يخليهمولك ويحفظهم لوالديهم
ويقولولك عمو ايها هات خمسه جند نجيب حلاوه

غير معرف يقول...

ليك وحشه والله يا صديقى يابو شنكت

مبروك الاول لقب عمو و ربنا يخليلك حسن و مريم

تانى حاجة التربيه دى على قد ما سمعت انها بتكون استعداد و نيه و الباقى على ربنا..يعنى انت يبقى عندك استعداد تربى أولادك كويس و تنوى كده يقوم أول ما يكون عندك أولاد تبتدى تلتزم و تحاول تعلمهم أحسن منك و تخليهم يعيشوا ف مستوى أحسن و تعوض فيهم كل حاجة انت كان نفسك فيها و مخدتهاش و بعدين ربنا بيهديك للسكة الصح.. أكيد ربنا مش حايديك حاجة و يسيبك كده..متقلقش نفسك بدرى..قول يارب و انوى نيه كويسه و ربنا حايقويك

Soooo يقول...

في رأي نفسي ولو اني مش معترف بيه .. بيقولك ان الطفل لما بيتولد وبينشأ في اسره فيها احترام رغبات الاب والام .. بيبقى شايف ان ده هو المثل الاعلى
وبكده بقى يابو الشناكيت انت ممكن تحترم مراتك وهي تحترمك قدامه .. وامنع عنه المصروف ماتقلقش .. هيحترمك برضه
-----
عقبال الناس كلها بقى يخلفوا ويتجوزوا ويبقوا تمام التمام

ركز في ترتيب الجمل الله يكرمك عشان انا كنت هفكر بجديده اروح اخلف الاول وبعدين اتجوز .. ونبقى تمام التمام



سلاموووووووووووووز

نبض اسكندرية يقول...

ازيك يا اوحش شنكوتى فى الدنيا دى كلها

صحفية روشة يقول...

بوست خفيف ولذيذ
بس انا مش بحب حد يسمى حد على اسم ابوه وجده لانها فى الغالب بتبقى اسامى من العصور الحجرية
بس حسن مش وحش
يلا ربنا يطلعنا منها على خير

Ahmed Mubarak يقول...

بص .. انت لاقي بنت الحلال واتجوزها .. انتا على ما تعمل الخطوه ديه هتفكر في بابا باتماتن مش سوبر خالص

تحياتي

مواطن مصرى نايم يقول...

اول زيارة لى بس اللى خلانى ادخل
انى لقيتك متصيت فى البلوجات و تعليقاتك فى كل حتة
و الكل بيحبك
قلت طب ما انا كمان احبك
بوست جميل يا كبير
و ربنا يخلى حسن و مريم
و يقولولك عمو راح و عمو جه
و تكون بعد كده افضل اب
تحياتى ليك