الثلاثاء، ديسمبر ٤

في المترو بشوف كتير


في المترو

مواقف كتير بتمر علينا في اماكن عجيبه
مثلا المترو

يوم الجمعه راجع من مشوار جميل ركبت المترو وقعدت على الكرسي اللي بياخد اتنين ده في طرف العربيه فتحت الموبايل علشان ادور على اسم واحد صاحبي علشان ارن عليه طبعا مش هاكلمه خساره فيكوا الخمسين قرش المهم يعني
فجأه لقيت في راس محشوره بين عيني وبين الموبايل بتاعي واضح انه حد مش بس عايز يبص بصة فضول كده لا ده بيقرأ بتمعن ركزت كويس ورجعت بظهري شويه علشان افهم ايه الشعر اللي دخل في عيني ده لقيتها طفله صغيره عمرها حوالي 10 او 12 سنه تقريبا رفعت عينها في عيني وهي بتضحك قوي الأول حسبتها من الأولاد المعاقين يعني وصعبت عليا جدا بس لما رفعت وشها لقيتها بنت عاديه بتضحك ببراءه وفرحه شديده ومبسوطه قوي بألوان الموبايل وسألتني ايه ده قلتها دي نمر اصحابي ردت بسرعه وسألتني فين الصور ؟

زنقت الراجل اللي عامل نايم جنبي وافسحت ليها مكان وقلتلها اقعدي بس جنبي وفتحت الصور علشان تتفرج عليها وكل صوره تتضحك وتسألني مين ده ايه وايه ده!!؟؟

شافت اصحابي و شافت صورة الفرح اللي عندي وشافت الصور كلها
بس فجأه مامتها ندهت عليها علشان تنزل كان نفسي تقعد كمان وافرجها على النغمات اكيد كانت هتضحك عليهم قوي

مش عارف انا اللي انبسطت بيها اكتر ولا هي اللي فرحت اكتر

بس اللي عرفته انها بعد ما نزلت سابت على وشي ابتسامه جميله قوي



يوم السبت اللي فات الصبح كنت برده بركب المترو بس انا كنت لسه على السلم وسامع صوت الباب بيتقفل انا عارفهم تلات رنات وفي التالته بيكون بيقفل الباب جريت علشان الحق حشرت رجلي بين الضرفتين علشان مش يتقفل لقيت اتنين شباب راكبين جوه واحد جه من اليمين والتاني من الشمال وكل واحد شد الناحيه بتاعته ففتحوا الباب ودخلت ولحقت المترو الغريب انهم مش مع بعض ومش متفقين على انهم يقوموا هم قاموا بدون تفكير علشان يساعدوني من غير ما اطلب مع ان في ناس كتير في الموقف ده بتكبر دماغها شكرتهم ودخلت قعدت
بس برده سابوا جوايا ابتسامه وشكر ليهم

من كام يوم كده في المترو مش فاكر امتى ركبت في العربيه التانيه بعد الساعه 6 بتكون مختلطه انما العربيه الأولى بتفضل للستات بس دخلت وقفت فجأه لمحت شلة بنات وصبيان مع بعض تقريبا في معهد او من الجامعه ركبوا مع بعض في عربية الستات البنات شجعت الصبيان انهم يدخلوا معاهم وطبعا هم ما صدقوا في الزيطه انا اتنرفزت قوي ايه التسيب ده هي موافقه تركب معاهم من حقها لكن تركبهم مع الستات التانيه ليه قلت اكيد حد هينزلهم دلوقتي لكن الغريب محدش فتح بقه بكلمه الكل مكبر دماغه قلت لنفسي انا هاحرق دمي ليه
بس وانا نازل فضلت فاكرهم وقرفان منهم جدا مش علشان راكبين مع بعض لكن علشان بيعملوا الغلط كأنه من حقهم
وكأنهم برغم التعليم معندهومش اي مشكله يخالفوا النظام لمجرد التسليه

كتير بيعدي علينا ناس مش هنقابلهم تاني في حياتنا لكن بيسبوا اثر كبير قوي فينا
ناس بنحترمها قوي ونحبهم
وناس بنحتقرها قوي ونكرههم

اتمنى كل واحد يحاول يسيب عند الناس ذكرى حلوه

هناك ٢٠ تعليقًا:

كاميليا بهاء الدين يقول...

مغامرات شنكوتى فى المترو

فعلاً عندك حق.. ناس كتير بنقابلهم بيسيبوا جوانا بصمة لما نقابلهم اكتر من مرة.. ولو مرة البصمة بتكون فقط على ملامحنا وتزول بعد فترة قصيرة.. سواء بصمة مبهجة او بصمة استياء او اندهاش.. اياً كانت البصمة.

لأننا بشر .. نتأثر كثيراً بكل مايمر أمام اعيننا منه مايخترقنا ومنه مايلمس فقط ملامحنا الخارجية.

وهناك بعض الناس برضو بيسيبوا بصمة من غير مانشوفهم او نكلمهم.. لما يكونوا بيكلمونا بالسطور أعنى ان نقرأ لهم..

وقد قرأت تعليقك ياصديقى على أخر بوست لى.. اول سطرين قولت لنفسى (أخ.. البوست مش عجب شنكونتى.. او ضايقه..) وبعدين لما كملت لاقيتك قايل كلام حلو اوى.. فرحت.. وضحكت كمان على التهديد اللذيذ.

يعنى انت كده سيبت بصمة جوايا .. هاتخلينى كل ماافتكرك ابتسم..
شنكوتى.. لقد غرست بداخلى بسمه جميلة.. ربنا يسعدك يارب

كاميليا

أول تعليق أنا..

عصفور المدينة يقول...

مخالطة الناس تترك مثل هذه الآثار في كل لحظة وما أجمل العبارة التي ختمت بها مشاهداتك

اتمنى كل واحد يحاول يسيب عند الناس ذكرى حلوه

truelove يقول...

بس يا ايهاب انت عملت غلطة وهي انك عطلت المترو يافالح لما الاتنين الجدعان مسكولك الباب ودي حركة بترنفزني قوي وهنا بقى حضرتك ملكش دعوة بتنفخ في نفسك وتعترض يا باشا على الي حصل في العربية بتاعت السيدات ياحلو اوك يالا سلام هو احنا كدنا الى على مزاجنا يبقى صح والي مش على مزاجنا مش تمام يالا سلام يا صديقي

Doba يقول...

الأول بس انا حابة اشكرك على انك حاطط صورة يوسف انا اتخضيت وفرحت لما لقيتها - تقول ايه ام عبيطة بقى

انت ذكرت موقفين على النقيض تماما
يعنى انت دخلت المترو بمساعدة اتنين فتحولك الباب بالعافية وده تصرف خاطىء وغير حضارى بالمرة

والتانيين اللى انت اتضايقت منك عملوا برده تصرف غير لائق بدخولهم عربة السيدات ولكن

ارجع واقول ان كل واحد عارف الصح من الغلط سواء انت او هما وكل واحد هيثاب بعمله

بطلو بقى بلطجة عالمتروهات ايه النصيبة دى

يلا باى
هوبا

Dalia يقول...

جميل اوى البوست ده يا ايهاب .. عارف انا كمان بشوف ناس كده بس فى الترام بتحصل مواقف بسيطه و لذيذه و برضه بتسيب على وشى ابتسامه

ملحوظه روفيعه بس ... دقيقه الموبيل ب 40 قرص مش بنص جنيه :p

shahy يقول...

انت حاطط صورة يوسف في الاول صح ايوة صح
طيب لما قريت كلامك ولقيتك بتقول ان في حد حط دماغة بينك وبين الموبايل انا قلت مش معقول الصدفة الجميلة دي وجة في بالي طبعا انة يوسف ومعرفش اية اللي فرحني
وبكمل ياباشا الكلام لقيتك بتقول بنوتة جالي احباط ومعرفش برضة اية اللي احبطني
بس عموما يعني موضوعك جميل كالعادة

بس احنا عاوزين باقي الاسئلة بتاعة البوست اللي فات

اقولك على حاجة
ابقى نام في المترو وريح نفسك

سلام ياشنكت

Nani يقول...

السلام عليكم
اولا مين يوسف
ثانيا انت فرحت لانهم ساعدوك مؤقتا
لكن افرض ان الباب خرب وده فيه خطورة وتكاليف
ثالثا لو كنت مكانك
انا كنت اعبر عن راي بشوية العيال دول
حريتهم بتنتهي لما تبدء حقوق غيرهم
بس فعلا الواحد بقابل ناس للحظات لكن يبقو معاه على طول
:)

فى القلب يقول...

على فكره يا راجل يا طيب انت

الوااااااد القمر 14 ألى فى الصوره ده أنا عارفه يبقى مييييييين


و فعلاً أنت حساس و جميل جدا و بلاش أكتر فى الكلام أكتر من كده عشان المدام متغرش

تــــ(حـنة)ــــر يقول...

ههههههههههههههه
بجد بحب افرالك قوى
اصلك كل حاجه عندك ليها حوديت و قصصص و حركات كده .... و اسلوب تحفه
على الرغم من ان الكلام عادي و مش بيضحك لكن انا مش عارفه ليه بضحك جامد قوى
يلا تحياتى
تمر حنة

Lemonada يقول...

مترو يا مترو
هو بس في قصص
دة حكاية ملهاش نهاية
وبعدين ماتخدناش في دوكة
صحيح البوست جامد جدا ومعبر وطريقة كلامك ووصفك بتاخدنا لجو المترو والشارع
بس لاء لاء
في بقية البوست الماضي
كدة مايصحش :)

مدونه يلا نفضحهم يقول...

تتشرف اسرة يالانفضحهم
بدعوة سيادتكم لافتتاح مقرها بالاسكندرية
مركز ضحايا
للاستشارات القانونية والتأهيل النفسى

محاضرة بعنوان مبادىء واساسيات حقوق الانسان

وورشه عمل لتقسيم فريق الاسكندرية وذلك يوم الجمعة اوافق 14/12/2007 فى تمام الساعة الواحدة ظهرا

العنوان :- 9ش مسجد الايمان متفرع من شارع اسكندر ابراهيم خلف جزارة الزهيرى - ميامى - الاسكندرية
ت:- 5484897 - 0166885063

Ehab يقول...

كاميليا

احلى تعليق هو اول تعليق للعزيزه كاميليا

ربنا يخليكي وتكتبي حاجات حلوه على طول
نورتيني
وسعيد اني فعلا رسمت ابتسامه في ملامحك
تحياتي

------------------------

عصفور المدينه
ربنا يحفظك
شكرا على تعليقك الجميل
---------------


قلوب حائره

يعني هو انتي وصاحبتك عاملين فيها ناصحين قوي
سايبين الفكره العميقه الهايله بتاعة مساعدة الأخرين وماسكين في الباب اللي اتعطل وبعدين ايه يعني يستنوني شويه

--------------------

اولا الواد يوسف ده سكره
ولازم استفتح بالصوره العسل دي علشان الموضوع يبقى سكر زيه

اما عن رأيك فواضح ان انتي والسوسه التانيه اللي قبلك عاملين فيها ارشميدس وماسكينلي في اني عطلت المترو
وفيها ايه لما يستنوني شويه
دي ارخم حاجه في سواقين المترو لما تكوني عماله تجري علشان تلحقي العربيه وبعدين يقوم قافل الباب في وشك
ما علينا

----------------

داليا
حمد الله على السلامه
اخيرا الورده الكميله رجعت تاني

يا ستي عقبال ما تفضل الأبتسامه على وشك علىطول

ملحوظه تخينه
دقيقة الموبايل ب50قرش في اي سنترال عندنا
المره الجايه هاجي اتكلم من عندكم

---------------------

شاهي

ههههههههههههه
والله كانت تبقى صدفه تجنن
بس الدنيا مش كلها صدف هايله زي اللي في الفلام كده
الدنيا فيها صدف رخمه بس
اما عن النوم في المترو انتي متعرفيش اني ساكن في اخر محطه - المنيب- وبالتالي دايما بنام في المترو لو جاي من مشوار طويل والناس بتصحيني قبل المترو ما يدخل بيا الجراج
عادي يعني انا ممكن ساعات انام وانا واقف

نورتي يا استاذه

------------------------

ناني

بصي يا ستي
يوسف ده اشهر واحد بيبع لب سوبر في ميدان الحجاز اللي في مصر الجديده
بس اللب بتاعة مش حلو متشتريش منه

ثانيا لو المترو خرب يبقى فدايا هو يعني لما قفل الباب عليا المره اللي قبلها كنت انا حد اداني تعويض

ثالثا معاكي حق طبعا حريتي تنتهي عند حدود حياة الأخرين وحرياتهم

نورتيني جدا
اه صحيح يوسف اللي في الصوره يبقى ابن هبه صاحبة مدونه دوبه

سلاااااااااااااااااااااااام

Ehab يقول...

في القلب

ربنا يخليكي يا اوشه
طبعا كل الناس عارفه القمر اللي في الصوره يبقى مين
ده بكره يبقى من كبار ابطال التدوين
ومش بس هنحط صورته لأ كمان هنعمله بطل للقصص اللي هنكتبها

زي ما انتي بطله على قلوب كل الناس اللي يعرفوكي
يا صاحبة اطيب واكبر واجمل قلب في النت كله وسمعني سلام كبير قوييييييييييي

وعموما المدام واثقه فيا
مش كده ولا ايييييه؟؟؟!!!!


-----------------

تمر حنه

الله يخليكي يا جميله على كلامك

وبعدين انا كده فيا حاجه حلوه
كل الناس تقولي يا خلف فيكي حاجه حلوه مش عارف ايه هي

حلوه قوي الريحه بتاعتك دي دى كولونيا ولا افتر شيف

حته من صعيدي في الجامعه الأمريكيه

سلااااااااااااااااام

----------------------


ليموناده

ايوه يا ستي من عيوني الجوز هاكتب باقي البوست حاضر وهاجاوب

سلاااااااااااااااااااااام

ولــــــــــو يقول...

انا بصراحة مع
doba & true love

مش علشان حد ساعدني ف حاجه غلط يبقى عمل حاجه صح
ومش عازود علشان هما قالوا الكفايه

simple girl.. ..simple dream يقول...

احنا احلى حاجة فى بلدنا ناسها
والبوست بتاعك بياكد كلامى
احنا فعلا ناس روحنا حلوة وبشوشين
اما الولاد اللى ركبوا مع البنات فانا متاكدة ان هييجى حد وينزلهم
انا شخصيا لما بلاقى ولد فى عربية البنات بخليه ينزل حتى لو كان 12 سنة
لان الصح صح

šσяšαяαα يقول...

والله مش عارفه ماذا اقول بس عجبتنى اوى الجملة الاخيرة دى

لانى حصل معايا موقف كان واحدة وبنتها مصممه ان مامتها تشيلها وانا كنت قاعدة ولسا جاية اقوم لقيت واحدة نازلة المحطة اللى وقفنا فيها فجيت اتاخر لقيت واحدة قعدت مكان اللى قامت وولا كأنها شايفه اللى واقفه وشايلة دى
فقمتلها وقعدت وكانت فاكرانى هنزل ولما فضلت اقعدت كل شوية تقولى تعالى اقعدى وانا اقولها ياستى عادى والله
فاكرة دلوقت نظرتها ليا وانا واقفة والابتسامة اللى على وشها

انا مش حاسة انى عملت حاجة جامدة اوى بس افتكرت الموقف دا من الجملة اللى كتبتها اننا نخللى الناس تفتكرنا بالخير دايما حتى لو مش يعرفونا

معلش رغيت كتير بس حبيت اشارك بموقف حصلى
بس حكاية فتح الباب دى سورى يعنى مش تمام.. وانا كمان سمعت ان هيبقى فى غرامة مشددة عشرة جنيه بحالهم:)
قال يعنى بيعملوا بالكلام دا:)

ياللا ماعلينا

اتمنالك الاستمتاع بوقتك دايما فى المترو ووسط الزحمة والخنقة اللى بنشوفها:)

تحياتى ليك وكل عام وانتم بخير

Egyptiana Trapped Soul يقول...

العزيز الشنكوتى
احب فى بوستاتك اللمحات الانسانية التى تعرضها... والتى تقول بوضوح ان الانسان هو مجموعة من التصرفات، وان يكون كويس او وحش ده طبقا لتصرفاته

بس انا ملاحظة انك مرتبط اوى بالمترو ... بالنسبة لى المترو كارثة بشرية ولا استطيع تحمله الا بالاجبار... غالبا لازدحامه الدائم وانت تعرف انا انسانه ولدت فوق سحابه وحيدة واعشق الاوكسجين واكره ثانى اوكسيد الكربون مثل رفعت اسماعيل (ما وراء الطبيعة - د احمد خالد توفيق)

احب بس قبل الختام ان اقول... انك دائما تترك فى نفسى ذكرى جميلة بكلماتك التى تعكس روحك النقية

تحياتى لك وكل سنة وانت طيب

Ehab يقول...

ولـــــــــو

هاقولك حاجه واحده
برده ولو
انا خلاص اقتنعت بكلامكم ومش هامسك الباب تاني يا ساتر عليكم

كل سنه وانت طيب
------------------------

simple girl.. ..simple dream ...

ايوه الواحد من وقت للتاني بيحب يشوف الناس الكويسه دي علشان يحس ان الدنيا لسه فيها خير مش زفت قوي يعني

كل سنه وانتي طيبه

----------------

صرصاره

انتي يا بنت يا جدعه
ربنا يجزيكي خير على عملك الجميل ده

وبعدين ترغي هنا براحتك مش تخافي الميكروفون معاكي براحتك
اما حكاية العشره جنيه دي هتخليني ابطل امسك الباب تاني لحسن انا مش ناقص غرامات

كل سنه وانتي طيبه

------------------------

Miss Egyptiana "Trapped Soul"

يعجبني فيكي انك دايما فاهماني
عموما من حق حضرتك طبعا تعيشي في اي سحابه تعجبك بس لو سمحتي متنشريش غسيل بينقط علشان السحابه بتاعتي غرقت امبارح من الغسيل بتاعكم
وقعدت انشف فيها ساعه
ما علينا
انشاء الله الواد الحليوه هيعيشك على احلى سحابه وطبعا هو ده الوحيد اللي هتبقي مستعده تشاركيه الأكسجين وثاني اكسيد الكربون كمان
ويمكن تدوها شوية هيدروجين على الماشي

تحياتي يا ساحره


كل سنه وانتي طيبه

سلااااااااااااااااااااااااااااام

3abdo me7tas يقول...

أولا السلام عليكم
ثانيا انا أول مرة أدخل المدونة بتاعتك بس انا اعرفها من زمان بس مكنتش عايز أدخلها
بصراحة ومن غير زعل كنت بستتقل دمك
من غير زعل يا مان انا بتكلم معاك بصراحة
بس مش عارف ليه دخلتها دلوقتى
ولما قريت البوست ده لقيت ان جواك انسان طيب جدا
صدقنى لما قريت البوست ده افتكرت مواقف كتير اوى انا مريت بيها بنفس النظام ده
كانت بتبقى مواقف جميلة اوى
طيب أقولك حاجه حلوة أوى
انا شغال دلوقتى على خط غبى شوية كله فلاحين معلش على الكلمة دى انا مش قصدى انى اهزأهم ولا حاجه لا هم ناس عاديين فلاحين فى أراضى
المهم احنا كلنا بنركب الأتوبيس او المينى باص ونسافر للبلدان بتاعتهم
أنا طبعا ماسك البلاد دى ولازم اروحها بالمواصلة الوحيدة دى عقبال ما الشركة تتكرم وتجيبلى العربية باذن الله
آخر مرة اللى هى امبارح
راكب والمينى باص ايه علبه سردين وناس تركب ومحدش ينزل ناس تركب ومحدش ينزل مش هقولك انى تقريبا كنت واقف على حد كان قاعد المهم
لقيت ست عجوزة فى سن ال70 او 80 كده ومش قادرة تقف
طيب يا جدعان واحد ابن حلال يقف
طيب واحد ابن حرام يقعد الست دى لا برضه
المهم لقيت الست والله بتقع قلتلها امسكى فى ايدي يا حاجه
تقريبا ما صدقت انى قلتلها كده بس صعبت عليا اوى لان ايديها اللى كنت ماسكها منها كانت مكسورة وكل شوية آه آه آه ايدى وفى الآخر تخيل ايه اللى حصل الست نامت على إيدي
لغاية ما فيه واحدة بنت حلال كانت نازلة قالتلها تعالى يا حاجة اقعدى مكانى بجد انا مش عارف الست دى مبهدلة نفسها فى السفر ليه يمكن كانت رايحة السوق او او او الله اعلم
فى نفس المينى باص برضه لقيت حاجه كبيرة فى السن برضه قاعده جنب الباب كده وواحد رخم شايل شنطة على ضهرة ومش عايز ينزلها وطبعا الشنطة كل شوية فى وش الست والست تقوله الشنطة يا ابنى وهو ولا هنا قمت انا بقى ايه دنى فار بجد قمت شايل الشنطة ورميهاله على راسه كده وقلت له الشنطة يا أستاذ تقريبا شوفت شوية شرار كده طالعين من عنيا بجد انا كنت مع الخنقة بتاعت المينى باص كنت هفرقع
لقيت ناس كويسة اوى وطيبين اوى وصعبو عليا وناس عايزه ولا بلاش ربنا يهديهم
المهم
انا سعيد انى دخلت عندك بعد عناء
خلينا نشوفك
;)

الـسـيـدة نـون يقول...

ازيك يا شنكوتى
انا جيت اهه لحسن تقول عليا خيخة ولا حاجة وانى مابردش الزيارة
حلو اوى موضوع البوست ده
انا كمان بشوف حاجات كتير اوى فى المترو وفعلا كنت بافكر اعمل بوست عن حاجة حصلت فى المترو
وانت شجعتنى انى ابتدى افكر فى البوست ده
تحياتى ليك
وكل سنة وانت طيب
اختك خيخة