الخميس، نوفمبر ٢٢

انت تسألين وانا اجيب




مجموعة اسئله سمعتها كتير قوي بين المخطوبين والمحبين ويمكن برده ناس متجوزين ومحدش يسالني يقولي هم مين

تسأل هي : انت نفسك نخلف ولد ولا بنت وعايز كام واحد وهنسميهم ايه
يرد هو عليها : حبيبتي هناك اربع احتمالات
لو خلفنا بنت هتكون نعمه من ربنا اللي يربي بنته صح يبقى ليه الجنه وفي حديث عن النبي (ص) عن فضل تربية البنات والبنت احن شخص على اهلها لما يكبروا وهي صاحبة امها وحبيبة ودلوعة باباها
لو خلفنا ولد يبقى ربنا رزقنا برجل نعتمد عليه ويساعدنا لما نكبر ويشيل مسؤلية اهله
لو خلفنا ولد وبنت يبقى ربنا اكرمنا بنعمه من عنده
لو ربنا اراد ميكونش عندنا اولاد يبقى الحمد لله انه خلاكي ليا بنتي وانا هكون ابنك وهافضل ارعاكي لحد اخر يوم في عمري وانتي ترعيني لحد اخر يوم في عمري

استريحتي يا ستي تسكت قليلا ثم تسأله
حبيبي هو انت ممكن في يوم من الأيام تتجوز عليا واحده تانيه
يرد في هدوء عزيزتي ايه الأفكار دي بس اولا فكرة الزوجه التانيه دي صحيح انها حلال بشرع الله لكن ليها شروط صعبه قوي واللي يخالف الشروط دي او ميقدرش ينفذها يبقى ميحاولش يحط نفسه في الوضع ده اصلا لكن ده بالنسبه للشرع والمجتمع اما انا عن نفسي حبيبتي لا اظن اني ممكن يوم تكون في انسانه تانيه غيرك تحمل اسمي انسانه احكي امامها ادق اسراري انسانه اشتهيها لما اشوفها انسانه اشوف كلمة بحبك في عيونها من غير حتى ما تنطقها انسانه عارفه انا امتى سعيد وامتى حزين ايه بيسعدني وايه بيضايقني انسانه استحملت المشاكل ي كلها معايا وعمرها ما زهقت او ملت مني يعني من الأخر مفيش مجنون بيغلط ويخش القفص مرتين الا اذا كان مجنون فعلا وعلى رأي المثل جوز الأتنين يا قادر يا فاجر

خلاص بقى هديتي كده

حبيبي سؤال كمان معلش
قولي يا مغلباني
هو انت ممكن بعد فتره تزهق مني وتتعود عليا فتحس انك زهقت من حياتنا

يا ساتر على الأفكار السوده
لا يا ستي عارفه الناس اللي بتشوفيهم متجوزين ويقولك اصلنا خلاص زهقنا من بعض واتعودنا على بعض الغريب انهم مش ناس معينه في سن معين علشان الواحد يقول اصل العمر الإفتراضي للزواج هو مثلا كذا سنه لا انما تلاقي ناس بعد سنه واحده جواز يقولك انا زهقت يا عم عايز اخرج مع اصحابي عايز اعيش شويه بقى زهقت من خنقة البيت وتلاقي واحد مثلا بعد عشر سنين بدذأ يقول الكلام ده وواحد تاني بقاله 25 سنه متجوز وبدأ يقول الكلام ده وواحد تاني احفاده بتتنطط حواليه وبدأ يقول الكلام ده وواحد تاني بس قليل شويه احفاده قربوا يتجوزوا وهو عايش مع زوجته اخر انسجام
طيب ايه بقى الفرق بينهم الفرق يا حبيبتي ان كل واحد منهم اتجوز لمجموعه من الأسباب والأمال كان عايزها من الجواز وطبعا بمجرد ان المجموعه دي يتحصل عليها كلها بيزهق ويمل مثلا واحد كل اللي عايزه من الجواز انه يشوف واحده ست ويتكلم معاها ويعاشرها معاشرة الأزواج فطبعا متعه الجنس متعه كبيره لكن بعد مره واتنين وتلاته وعشره وعشرين مره كمان خلاص هو جرب كل حاجه وشاف كل اللي كان عايزه فخلاص بقى البيت سجن والزوجه ممله لأنها خلاص معندهاش جديد تقدمه وواحد تاني بيدور على الأستقرار بعد الصياعه فطبعا بمجرد الخلفه والبيت والمسؤليه وينبسط شويه بإحساس الأستقرار بيلاقي ان الأستقرار مرتبط بيه المسؤليه وهو اصلا مش متعود عليها خلاص بيزهق من الإستقرار والمسؤليه ويقولك يغور الجواز وسنينه واحد تاني بقى بيتجوز علشان مش عايز يحس بالوحده فبيدور على انسانه تشاركه حياته وميحسش انه لوحده ويتيم في الدنيا وطبعا بعد عشره او خمستاشر سنه العيال كبرت ومنهم اللي بقى صاحبه او بنته بقت قريبه منه قوي وسرها معاه فخلاص الزوجه اصبحت مش مهمه قوي لأن في حد تاني بيشاركه الحوار وبيونسه ويمكن ساعات الأولاد بيكونوا لى قدر من التعليم او الثقافه اكبر من امهم بالتالي بيرتاح معاهم اكتر فبيزهق منها وغيره وغيره كل واحد عايز حاجه معينه وبيدور عليها في الزواج وكل ما تكون الحاجه اقوى وادوم كل ما حياتهم تكون عمرها اطول واسعد
اما انا عن نفسي يا حبيبتي اخترتك لأسباب يطول شرحها اسبابي كتير قوي وحتى عندما تنضب اسبابي اللي اخترتك علشانها عملت حسابي واخترتك زوجه ذكيه عقلك دايما بيدور على سعادتنا وافكار تنشطي بيها حياتنا يعني عمري ما هازهق منك ابدا

طيب افرض مثلا اني كنت مش جميله وكان شكلي زي البنات زمايلنا اللي كنت بتتريق على انهم مش حلوين قوي

يا لهوي يا حبيبتي اكيد مكنتش هاتجوزك اصلا ولا هاعبرك
ايه؟؟؟؟؟؟؟؟؟؟؟
خلاص يا ستي بضحك معاكي
اولا يا حبيبتي انا عارف ان عمري ما كنت هاشوفك مش جميله لأني بشوفك بعين الحب مش بعين النقد يعني كل ما فيكي جمال بشوفه لو كان فيه تراب على وشك من الطريق تفتكري هاقول ايه ده دي مش حلوه لأ هاشوف ان التراب اصبح من التبر الذهبي علشان بس اختلط بملامحك يعني جمالك نابع من حبي ليكي مش حبيتك علشان جمالك
ده طبعا غير كل نظرات الحسد في عيون الناس اني اتجوزت قمر زيك

ممكن اطلب حاجه
اطلبي يا ستي
ممكن اقدر اقولك كل حاجه وعمري ما احس اني انكسف اقولك على حاجه وميكونش عندي مشكله اني احكيلك اي موقف مهما كان
يا ستي ما انتي عماله تقولي كل حاجه اهو هو انتي بتسكتي ابدا
ما علينا عامة يعني الصراحه بين الزوجين هي اهم اساس لأي علاقه قويه

سؤال اخير
هو انت ممكن تخوني

.................................
سكت ليه ؟؟!!

تفتكروا هو سكت ليه هنعرف في البوست الجاي
سلااااااااااااااااااااااام

هناك ٢٠ تعليقًا:

عصفور المدينة يقول...

حلو التاج ده
بس فين سؤال السبانخ

كاميليا بهاء الدين يقول...

حلو اوي البوست ده
الراجل ده هايعمر ان شاء الله
باله طويل اوى .. بيرد على كل سؤال بخطبة عصماء
آما نشوف السؤال الاخير ده هايجاوبه ازاى؟؟

لك تحياتى وتقديرى ياشيكوناتى

Soooo يقول...

جااااااااااااامد الحوار ده يابو الشناكيت
فيه شوية كلام يثبتو اي واحده بجد والله


بس قوللي .. هو الحوار ده .. هيتقال مابينهم بعد مثلا خمس سبع عشر سنين؟؟؟

ولا هيبقى الحوار في سكة
الزوجه: انا عمري ماشفت معاك يوم حلو
الزوج : وانا اللي ضيعت صحابي ونفسي عشانك



سلاموووووووووووووووووز

Ehab يقول...

يا عصفور باشا فينك من زمان
اخبارك ايه
نورتني قوي

اما سؤال السبانخ
اعتقد انه اتبدل بالسؤال الملوخيه اللي في الأخر وكده كده هايجوبوا عليه المره الجايه

سلاااااااااااااااااااام

----------------

كاميليا

يا استاذه دلوقتي حضرتك انتي عارف الستات لحوحين قوي في الأسئله يعني هو لو رد على قد السؤال مش هيخلص من طب افرض كذا طب لو حصل كذا
وتلاقي فيه سبعين سؤال في نفس القصه
علشان كده بيريح دماغه ويجاوب على اللي هو عارف انه شاغل بالها فهمتي
اما السؤال الأخير
فكان لازم له بوست لوحده
سلااااااااااااااااااااام

-----------------

sooo

يا واد انت كده برده تظن في اني بثبت الحريم
طيب ان مكنتش اثبت الحريم هثبت مين يعني

نورتني يا باشا
بس اعتقد ان الحوار ده لسه في اول الطريق
انما حوارك انت مش عارف بيكون امتى بالظبط
سلااااااااااااااااااام

shahy يقول...

حوار صريح جدا جدا
كلام مريح جدا جدا

ياواد ياشنكوتي ياعاقل ياابو العقل كلة
ياطولة بالك

بس هو كدة ريحها على الاخر لما نشوف الباقي هايبقى اية

شاطر ياولد استمر

سلام

hoda omran يقول...


لا والله أفدتنا وحاصة انك خبرة
;)
لا بجد الأسئلة جميلة وردودك أجمل
بس هو ممكن يخونها .... مش عارفة بس متهيألى بإجاباته دى لاء مش هيخونها
لكن لو فكر زى معظم الرجالة ... يبقى هيخونها ولا ......؟

Ehab يقول...

shahy

انت خفت متقولشي
وان قلت متخافشي
كلام كلام على على على مسؤليتك

الله يخليكي يا استاذه
ياريت هي تستريح
انتي عارفه الستات دايما بتسأل كتير

هنستمر بدعائكم يا اختاه
سلاااااااااااااااااااام


------------------

همسات

يا بنت فينك من زمان
حلو بوستك الأخير
عارفه هو انا كنت هاكتب الأسئله كلها والردود
بس جيت عند السؤال ده ولقيت ان مينفعش اكتب الرد هنا
عايز بوست لوحده
والرد انشاء الله يكون واقعي
سلاااااااااااااااااام

Lemonada يقول...

اي التشويق دة يا عم شنكوتي
:)
اهو في الانتظار بس ماتتأخرش علينا

Doba يقول...

يعنى جيت لغاية الخيانة ووقفت مطبعا هيثبتها بالكلام زى معمل فى اجابات كل الاسئلة اللى فاتت

على فكرة الستات بتحب تعيد وتزيد فى الأسئلة لان دايما اجبات الرجالة مش اكتر من تثبيت وخلاص

انت عارف لو قال اللى ليه واللى عليه ساعتها بس هتقدر مصداقيته وهتعمل كل اللى عليها لكن طول مهو منيمها فى الدرة كده فاحب اقولك ان الستات طول مهما مرتاحين ان العصفور هيتنيه جوه البيت بيأنتخو

بوست لذيذ ومستنية الاجابة بتاعت السؤال الأخير

تحياتى
هبة

فى القلب يقول...

ههههههههههههههههههههههههههههههههههههههههههههههههههههههههه

جميله أوىىىىىىىىى الأسئله

بتدل على أنصاحبه الاسئله طيبه أوى أوى يا بخت ألى هيتجوزها


والأحلى والأروع الراجل ألى ردعلى الأسئله لأنه حكيم مستوعب يعنى من الأخر يبختها

تــــ(حـنة)ــــر يقول...

بعد السلام
ايه كل الأسئلة دى دا انت طويل البال قوى على فكرة
بعدين احنا مستنين البوست الجاي
سلام

koukawy يقول...

جالوا شلل من كتر الزن

truelove يقول...

جميل قوي يا ايهاب انك لخصت اغلبية الاسئلة الي بتدور في دماغ اي وحدة مخطوبة بس يا ابو الكباتن كان نقصك الحيادية وترد رد رجالي بمعني " انك توضح ياباشا ليه الاسئلة بتيجي في دماغنا وليه بنسائلها مش رد يريح وبس يافند " اظن فاهمني وسلامي ليها .. اه صحيح فين الموضوع الي كنت قلتلك اكتب فيه

مريم يقول...

عارف
احنا بنخاف اوى
البنات يعنى عشان كده بنحب نسأل
والرسول طلب منكو تكفوا عنا الاذى وتستحملوه مننا
يعنى تدلعونا آااااااااااااااخر دلع

اوعى تخون البت يا هوبا

Doba يقول...

انت فين
مختفى ليه كل ده

يارب تكون بخير

Ehab يقول...

ليموناده
يا عزيزتي هو ده الشغل الجامد تشويق وحركات وكده يعني

وادينا مبسوطين انك هتقعدي معانا تستني

----------------------


دوبه
يا ناصحه
اكتمي شويه لحسن البنت تفهم الفوله وتفوق من الوهم والتثبيت
الله يسامحك انا بتاع تثبيت برده
ده انا غلباااااااااان

وبعدين اديكي قلتي اللي بتطمن وتأنتخ هي الجانيه على روحها
يعني الرجاله غلابه

-----------------------

في القلب

اوشه اللذيذه
ربنا يخليكي ويجعل ايامك حلوه

ربنا يبارك فيكي يا صديقتي العزيزه واختي

سلااااااااااااااام


---------------------

تمر حنه

هو الواحد لازم يطول باله عليكم كده هنعمل ايه يعني
بنحبكم وامرنا لله
ربنا يسعدك
نورتيني

----------------------

koukawy

كوكي يا منوراني
سعيد بصداقتك
لا ولا شلل ولا حاجه
هو لازم يتعود
بكره العيال يشلوها برده
واهو حق ناس بتخلصه ناس

سلاااااااااااااام

------------------

قلوب حائره

يا بنتي ده انا حيادي وديموقراطي فظيييييع
قال حيادي قال
هو كده انت بس اللي بيتهيألكم حاجات كده
ما علينا هابقى اشوف موضوع الحياديه ده

سلااااااااااااااااام


---------------------


مريم
يا اسكندرانيه يا مفتريه
عايزين دلع اكتر من كده ايه بس

عموما ربنايسعدك
ويرزقك باللي يدلعك اخر دلع

سلااااااااااااااااااااااااااااام

يا مراكبي يقول...

حلو قوي الموضوع ده .. ده إنت خبرة كبيرة جدا ولسة في العشرينيات من عمرك .. جميل جدا

بس أنا إستنيت البوست القادم علشان أعرف موضوع الخيانة ده ولقيتك بتتكلم في موضوع تاني

ضحكت علينا

Egyptiana Trapped Soul يقول...

جميل اوى البوست ده يا ايهاب... واعتذر بشده على التاخير فى التعليق

اهم حاجة فى اى علاقة بين اثنين هو التواصل والصراحة... انا وحبيبى نعتبره شئ مقدس، واحلى ما فى علاقتنا... والحمد لله الاساس السليم بيجيب دايما نتائج جميلة ويعزز العلاقة بيننا... فمنذ عرفنا بعضنا البعض ونحن نتكلم عن اى شئ يدور فى بالنا مما جعل العلاقة بيننا فى منتهى الشفافية

ربنا يديمها علينا وعلى كل المحبين
بس صحيح هو ليه سكت لما سألت عن الخيانة؟؟؟

Ehab يقول...

يا مراكبي

يا صديقي العزيز تشكر على ردك الجميل
هو انا مش ضحكت عليكم بس هو الواحد بيبقى بحالات كده وتلاقي خمسميت فكره عايز تكتبها

ثم اني عايز انزل التكمله وتكون فكرتها حلوه وتعجبني

صبرا يا شباب

كل سنه وانت طيب
سلاااااااااااااااام

----------------------

Miss Egyptiana "Trapped Soul"

يا ساحره منوره المنطقه كلها
ربنا يسعدك انتي والولد الجميل ده
ويذيدكم شفافيه مع بعض لحد ما تبقوا زي الكوبايه النضيفه
ههههههههههههه
ولا اقولك زي قلب ملاك بجناحين شفاف زي اللي في القصص بتاعتك
انا عارف اني مقصر معاكي في التعليق عندك بس انا بطمن عليكي دايما

الف مبروك وربنا يوفقك متتخيليش انا فرحان ليكي قد ايه
ويا بخته الشخص اللي هياخد انسانه جواها كل المشاعر دي
سلاااااااااااااااااااااااااام

إنســــان يقول...

والله الراجل ده شكلو سهننننننننن وهي شاكة فيه خالص ..
بس بصراحة يا طوووووووول بالو ياخي .. لا وبتسالو حتتجوز غيري ؟؟؟ ويسمع نفس الأسئلة دي متكررة مرتين ؟؟ احسنلو طبعا يتجوز واحدة بس