الأربعاء، مارس ٢٨

ان تكون حراً

انك تكون حر

 ده اجمل احساس في الدنيا بس دايما كل شيء حلو لازم يكون ليه تمن ندفعه

المشكله بتكون دايما في التمن ده

هل تقدر تدفعه

هل انت اللي هتدفعه ولا في ناس تانيه هتدفع معاك

بيقولوا ان حرية الأنسان تقف عند حدود حرية الأخرين

طيب مين اللي يقدر يحدد فين حرية الأخرين وفين حريتنا

ساعات الحدود دي بتكون قويه وواضحه زي فواصل كوبري اكتوبر وساعات بتكون باهته ومخادعه زي وعود الحكومه

المشكله بقى انك تقضي عمرك كله بتحسس في الضلمه علشان تحدد الحدود دي فين وتعرف حقك ايه وحريتك فين وبعدين تبدأ تحاول تاخدها

بيكون حقك ضاع خلاص وحريتك اتسلبت منك

======================================

 

يا ترى التردد اسبابه ايه

هل في انسان متردد بطبعه وانسان حازم في قراراته دايما

ولا التردد بيجي نتيجة الظروف والموقف اللي انت فيه اعتقد ان الإحتمالين صحيحين

 

 

 

اعتقد ان خلاصة الكلام ده

اولا : اعرف حقك ايه وواجبك ايه

ثانيا : اعرف انت عايز ايه فعلا مش مجرد اثبات مواقف وخلاص

ثالثا : علشان تاخد حقك لازم تكون قوي كفايه بحيث تقدر تاخده وتقدر تحافظ عليه وتقدر تستحمل عواقب الموقف

رابعا : متندمش على القرار اللي هتاخده لأن ما اصابك ما كان ليخطأك وما اخطأك ما كان ليصيبك

خامسا :  ادعولي بقى ربنا يوفقني

 

 

وحشتني الفضفضه بجد واهل التدوين كلهم

هناك ٨ تعليقات:

هيّ يقول...

امبارح بالليل كنت بقرا كتاب اسمه "ملتزم" دى ترجمة حرفيه لاسمه بالانجليزى فمتفتكرش انها بمعنى دقن وجلابيه وكده :))
فى الكتاب..الكاتبة كانت بتبحث عن اصل موضوع التردد..وان معناه الوحيد هو وجود بدائل..ودى فى حد ذاتها حرية كبيرة اوى..حيث ان فيه ناس كتير مش مستوعبة ان عندها اختيارات -ودول مرتاحين ومعندهمش تردد..لكن حياتهم طريق واحد بلا تطلع- ولان فى اتخايرات فالتردد طبيعى...وكأن فى كائن مهول من الأمل بقتله لما بقرر حاجة وانا فاهمة انى بختارها وبرفض الكائن المجهول ده...
يبقى التردد طبيعى للانسان الحر...وانت حر..بحدودك ...بس ركز فىحاجتين:
- حريتك انت بتحددها حسب مقدار صدقك مع نفسك..والحدود من حسن الحظ مش سياسية فنقدر نعدل فيها طول ما احنا ماشيين فى رحلتنا الحياتية...يعنى حدد وانت واعى انك ممكن تغير وتظبط حسب الطريق واللى حتشوفه فيه.
- تردد...وقرر...وافضل اسئل نفسك اذا كان قرارك صح ولا قفل عليك اختيارات تانية...ومسموح لك تندم بعد ما تختبر...ومسموح لك ترجع فى كلامك لو اكتشفت بديل افضل..
الخلاصة: حريتك بلا حدود...بلا حدود...بلا حدود...وضميرك هو الخريطة.

بس بقى :)

Ehab يقول...

رشا الطيبه

كده بقى انا تهت اكتر

فاتيما يقول...

كلامك فكرنى بمقولة
لإحسان عبدالقدوس
بتقول ان مفيش حد فينا حر
حتى الذى يبحث عن الحرية بمعناها الواسع
عبد لمبادئه وأفكاره ...

عموما أى كان الحال
ربنا يوفقك ف القرارات

وألف حمدلله ع السلامة

:)

Ehab يقول...

فاتيما
مش عارف اقولك ايه كلامك صح قوي وكأنك فاهمه كل حرفه بقوله وعارفه القصه كلها من غير ما احكيها
ربنا يبارك في عمرك

سلاااااااااااااااااااام

A.Fakher يقول...

كل واحد لازم يكون حر علشان يكون مسئول عن قراراته ، بس كل حاجة وليها قواعد وأصول ... طول ماأنت شايف أنك بتعمل الأصول وحاجة ماتغضبش ربنا وضميرك مرتاح ، يبقى تتكل عليه وتعمل اللي أنت شايفه في مصلحتك ولازم تكون واثق فيه علشان يهديك للصح ... إنما طول ما الواحد خايف أنه يعمل حاجة أحسن يغلط ، يبقي أعرف أنك لايمكن هاتعمل أي حاجة في حياتك ، ولا يضيع حق وراءه مطالب ، ولا تأتي المطالب بالتمني ... وماتنساش أن الحق لا يؤخذ إل بالقوة وماتستناش حد ييجي ويقولك حقك أهوه ، خده وادعيلي :)
ربنا يوفقك ويسعدك في حياتك

إيمان قنديل يقول...

أنت كمان وحشتني وحشتني حكاياتك


مكسوفه سابقا :-)

Ehab يقول...

A. Fakher
يا برنس احب اقولك ان طعم الحريه حلو قوي
بس انت اكتر واحد فاهم ايه اللي مزعلني
عموما الأيام كفيله بالتغيير الحمد لله اننا واقفين على ارض صلبه دلوقتي
بجد فرق كبير انك تكون على ارض صلبه وتتكلم في حقوقك وانك تكون ضعيف ومتقدرش تتكلم

تحياتي اعز اخ

================

Eman Kandeel
مكسوفه سابقا انتي وحشاني جدا وسامحيني على التقصير في السؤال بس الفتره الللي فاتت كانت معركه بالنسبه لحياتي بس الحمد لله طبعا
المهم انتي اخبارك ايه يارب تكوني بخير

اخوكي ايهاب

العاب يقول...

well done