الثلاثاء، أكتوبر ٢٦

شهر فات

شهر فات
وايه حصل من شهر فات
ايه حصل !!!!!
كان يوم ميلادها من شهر فات
من شهر فات صرخت حبيبتي من الألم
وخلال ساعات سمعت صوت انسان جديد
مبقتش انا وانتي وخلاص
نور اتخلق في حياتنا والفرح اترسم على ضحكتك
انا مش مصدق يا بشر
وبقيت انا اب لقمر
اما الغريب اني زمان لو كنت اشوف والدين جداد
اضحك عليهم وابتسم
شوف ابني شكله ايه
شوف بنتي ريالتها عسل
وده يقولك عن ذكاوة حضرته قال ايه عشان بيقول كلام اهبل عبيط
وبيقول كمان امبو يا بشر
دلوقتي انا الدور عليا كمان اقول
اضحك وافرح وانبسط لو تبتسم
ولو ةشاور للسما انا فوق اطير لحد السما
وانده ابويا وامي واخواتي كمان
عشان يشوفوا ويفرحوا بنتي بتعوج بؤها
من شهر الحمد لله ربنا رزقني ببنوتي الجميله الأستاذه " هنا" ابنتي العزيزه احساس لحد دلوقتي مش فاهمه انك تشوف كائن صغير عبيط كده ودمه خفيف كده موضوع جديد عليا وعلى امها طبعا وبالتالي احنا محتاسين شويه وما بين نصائح الأهل والبحث على النت في مواقع التربيه والطفوله وخبرات اللي خلفوا قبلينا بنحاول نمشي معاها الف باء اطفال طبعا انا كأب اعتقد ان دوري دلوقتي محدود قوي في مساعده بسيطه لغاده اني اشيلها شويه صغيرين او اجيبلهم حاجه عايزينها لكن المسؤليه معظمها تقريبا على غاده
برغم اني طول عمري عارف خلقها ضيق انما سبحان الله الأم برده تختلف عن اي حد تاني سهر وعياط طول الليل زن لأسباب غير معروفه ومع ذلك غاده صابره على ده كله عادي ربنا يقويها بقى
انا بحمد ربنا على نعمته وبشكر كل اصدقائي واخواتي اللي كانوا دايما بيسألوا عني وعن جميلتي هنا

هناك ٨ تعليقات:

Doba يقول...

ربنا يباركلك فيها وتكونلك من احسن الناس وتفرح بيها وهيه شخصية عظيمة بارة بأمها وأبوها

لو سمحت متقولشى تانى عالاطفال عبيطين دول أذكى البشر واهم مرحلة بيستوعبوا فيها كل شىء من سن يوم لسن الثلاث سنوات

ربنا يباركلك ف اسرتك الغالية ويحفظكم من كل شر

وتقل جيبك بقى يا باشا


الف مبروك يا ايهاب على الغالية "هنا"

هبة

nigro يقول...

إيهاااااااااااااااااب
باباااااا
مبروك مبروك مبروك مبروك مبروك مبروك من هنا ليوم القيامة يا هوبا
يخرب عقلك
أنا فرحانلك بشكل بشع يا هوبا
و الله يابني حسيت كأني أنا اللي خلفت
:')
مش عارف أقولك إيه بجد ولا أباركلك إزاي
ربنا يباركلكم فيها و يجعلها قرة عين ليك و لمامتها و تفرحوا بيها و باللي بعدها - إن شاء الله - فرح السنين كلها
مبرووووووووووووووووووووووووك يا إيهااااااااااااب

الـسـيـدة نـون يقول...

الف مبروك يا هوبة

بوسيلى غادة وهنا كتيييييير لحد ما اشوفهم بنفسي

ربنا يباركلك فيها يارب

سلام
اختك خيخة

Kiara يقول...

الف الف الف مليووووووووووووووون مبروووووووووووك ويارب تكونه ابنه صالحه

ربنا يسعدك انت وغاده يااااااااااارب

A.Fakher يقول...

من بابا وماما والأخوة والأخوات وأونكل فاخر بيهنوا الأستاذ إيهاب بتشريف الليدي هنا ، وبيطلبوا له كل أغاني السبوع الموجودة عندكم

*******

"هنا إيهاب سيد عبد العاطي"
ربنا يخليلك الليدي هنا وأمها يابابا إيهاب ، ويباركلك فيهم يارب ..
خد بالك منهم ، وإن شاء الله ربنا يعينكم علي الحياة اللي احنا فيها ديه ...

ميرام يقول...

ههههههههههه
ربنا يباركلكم فيها
ويجعلها من الذرية الصالحة
(:
القصيدة حلوة
ربنا يجعلل ايامكم كلها هنا
(:
تحيتي

كــركــبــة دمـــاغ ㋡ يقول...

الف مليون عشرطاشر سبعتلاف مليار مبروووووووووووووووووووووووك

تتربى في عزكم ان شاء الله وربنا يحفظها من كل شر وينبتها نبات حسن ياااااارب

وتبقى اجمل بنوته في الدنيا

ربنا يخليهالكم يارب ويفرحكم بيها
وتخلي حياتكم كلها هنا في هنا

كل سنه وانت طيب وبالف خير وصحه وسلامة
وربنا يعود عليك الايام وانت في احسن حال

عيد سعيد عليك وعلى كل حبايبك

(f)

إيمان قنديل يقول...

ربنا يبارك فيها ويقدركم على تربيتها


الف مبروك وكل سنه وانت طيب