الخميس، مايو 14

شرير


البوست ده مساهمه مني في موضوع التحرش الجنسي ووقفتنا ضده

بالتوفيق للجميع

===================================================================

حبيت اجرب اكون شرير

واعيش في قصه من الأساطير

واكون انا الشر الخطير

تنين موافق

ساحر موافق

ان شالله حتى اكون جرير

انا قلت اجرب

واعرف واقرب

ايه المتعه يعني

في انك تكون انسان شرير

ولبست اسود

وجبت خوذه

وسلاحي حامي

وقعدت اخطط

وارسم وادبر

واقول هلاقي

ضحيه حلوه

اقتل واجرب

ملمس دمائها

على كف ايدي

واشوف دموعها

والخوف قاتلها

والكره جوه نظرة عينيها

واللحظه حانت

ورميت شباكي

وجريت عليها

عماله تصرخ

وترفع ايديها

فاكرني فارس

هنقذها يعني

زقيت ايديها

ولويت دراعها

ومسكت سيفي

وغرسته فيها

صرخت وصرخت

والدم ناطر

من بين عروقها

عماله تنزف

تصرخ وتنزف

وانا ايدي دايسه

بعزم ما بي

طلعت سيفي وغرسته تاني

والف مره ادوس بايدي

على نصل سيفي

قطعت راسها

ووقفت بيها

رافعها جنبي

رمز انتصاري

الدم نازل

على كف ايدي

غرق كتافي

وغرق هدومي

ووقفت افكر

انا ليه اذيتها

كان ايه الجنايه

اللي عشانها

فقدت حياتها

مالقتش غير ان الصبيه

كانت ضعيفه

وعرفت اني

وعن جداره

اصبحت واحد

شرير قراري

ومن النهارده

اعتدت دايما

اقف مكاني

ناصب شباكي

واقف منشن

مستني تيجي واحده جديده

استنوا دياما اخبار جناني

وابقى اندهوني

بسفاح اناني



=========================


معرفش ليه ساعات بحس اني ممكن اتعلم ابقى شرير

واحب اجرب ابقى شرير بس يا خساره بتفقس بسرعه

وعجبي

هناك 27 تعليقًا:

Appy يقول...

انت متنفع تكون شرير اللى يحس بالضحيه بالشكل اللى انت كتبته وشعور الشرير ميبقاش شرير
لان الشرير بطبعه مبيحسش

Foxology يقول...

مش هتعرف تبقى شرير حتى لو الغريزة جواك لأنك بكل بساطة سألت نفسك هو انا ليه شرير وعملت فيها كدة ليه ؟؟

تحياتى على البوست الجميلة :)

ساره يقول...

شنكوتي المشهور :)
جيتك من عند أبي

يعني كل الشر اللي فيك وساكت
روح خذلك اثنين بندول وشويه مايه
وتصير عال العال

وصف شرير مميز :)

Nostor Azzuro يقول...

ليه يا عم الشر ده

خليك طيب

ميرام يقول...

(:
عجبتني بجد
على فكرة للشر لذة
اللي بيغلس على غيره بيحس بلذة
الي بيضرب حد بيحس بلذة
وهكذا ...
بس بلاش تبقى شرير
الدنيا مش ناقصة أشرار ..
تحيـــــــاتي

الجواز و سنينه يقول...

هيه الفكره تحفه اصلا
و تخيل طلع احساس الشر حلو برضوا
بس محدش بيقرر انه يبقى شرير
هو بيكون شرير بطبعه مش بيفكر و هو قاعد كده بيشرب شاى و بيقول ما ابقى شرير بقى كنوع من انواع التغيير برضوا
بس تفتكر انت مش شرير علشان بتتمسك بسرعه و لا علشان انت مش بتشرب شاى
هههههههههههههه

mimi يقول...

أنت تتعلم الشر؟؟؟؟؟؟

انت تعلمه لبلد ...

وبعدين أصلا أنت دمك عبارة عن كرات دم حمرا وبيضا شريرة

يا شرييييييييير

mimi يقول...

الناس اللي فوق دول ما يعرفوش الشنكوتي الكبير

الشنكوتي ده شراني بطبعه

kochia يقول...

جميلة اوي الخواطر الشريرة دي
بس دي لواحد لسة عنده بقية ضمير
لكن الاشرار بيتصرفوا كدة من غير تفكير

تحياتي

دعاء مواجهات يقول...

الشنكوتى الشرير ياخبر لالالا
مش ممكن اصدق ولا لو انت حد قولتها

دا انت حتى فى شرك اللى بتقول علية كنت مسالم خالص بالرغم نم العنف الا ان تعبيراتك رقيقة جدا

تحياتى ومودتى

GHARAM يقول...

ياأبني الشر ده له ناسه، لايمكن تكون شرير حتى لو قرفت من كل حاجه حوالياك وحاولت تقلد الناس اللي عاملين بشر وهم في الأصل منبع الشرور والآثام



ربنا يحميك من كل شر ويبعد عنك الآشرار

hamada يقول...

يفتح باب بيت المدونين ذراعيه لكل الموهبين في :
1/ القصة القصيرة
2/ الشعر بشتى أنواعه
3/ الرواية “رواية سنوية سنقوم بنشرها في الجريدة”
4/ المقال الصحفي
إذا وجدت في نفسك القدرة على المشاركة أرجوا التواصل معي على الميل التالي
arabicsabah@yahoo.com
أرجوا إرسال مواضيعكم لأختيار الأفضل لنشره العدد القادم
أرجوا ارفاق الاعمال في ملف ورود
لمزيد من المعلومات بادروا بالاشتراك في الجروب الرسمي للجريدة
http://www.facebook.com/inbox/readmessage.php?t=1069922064069&f=1&e=-12#/group.php?gid=78080770039

كيــــــــــــارا يقول...

بتسال زنبها ايه وعاوز تكون شرير الشرير مش بيفكر ويسال

سمكه واحده يقول...

انا بقي مش عاوزه اكون شريره
انا عاوز الاقي نفسي واد حبيب وبيه
ولا ايه رأيك
اصلا الشر ده بيبقي طبع وكمان ناس معينه مخلوقه كده
والطيبه لها ناسه تحس ان ده وشه بشوش وحلو سبحان الله
وده وشه غم وعكر وغضب ربنا عليه

ولو اي انسان حاول يبقي وحش طبعته وطبته بتطغي عليه ويرجع لاصله

تقبل مروري
كلماتك جميله

hamada يقول...

يفتح باب بيت المدونين ذراعيه لكل الموهبين في :
1/ القصة القصيرة
2/ الشعر بشتى أنواعه
3/ الرواية "رواية سنوية سنقوم بنشرها في الجريدة"
4/ المقال الصحفي
إذا وجدت في نفسك القدرة على المشاركة أرجوا التواصل معي على الميل التالي
arabicsabah@yahoo.com
شروط المسابقة
1/ ..............................
2/ .............................
3/ ..............................
لا يوجد شروط الشرط الوحيد هو العمل الجيد , والعمل المحترم البعيد عن الإسفاف
المقالات أرجوا أن تكون تخص الانسان العربي , تاريخه , عاداته وتقاليده , مقالات إجتماعية وثقافية ....
أرجوا التفاعل معنا في الجروب على العنوان التالي
http://www.facebook.com/group.php?gid=45202724108#/group.php?gid=78080770039

ساره يقول...

بصراحه انت شرير هنا :)

هو انا مش قولتولكوا تقولولي الصراحة يا مغفلين يعني محدش يذوق الكلام عشان يطلع ضحية..... عايز اللي ضربت حبيبها بالجزمة تقول انها ضربته بالجزمة.... و اللي سرق مكياج اخته عشان يلعب بيه برده يقول الحقيقه... ياريت تقدروا ان دي فرصة نبطل نكدب على روحنا فاهمين يا غجر

مرجانة يقول...

المتحرش كسارق الشرف
المتحرش كسفاح النساء
لانه يقتلهم دون نقطة دماء
دون سلاح مرئي
وهل ستة شهور عقابا عادلا؟
وماهي جذور المشكلة ؟
وكيف ينظر الرجال للمرأة
وهل نساء الاخرين يختلفون عن نساء غيرك؟؟؟
وهل هن غنيمة لك؟ وشقيقاتك وقريباتك وامك لسن نساء؟
نحن ارتدينا الى عصر الجاهلية
ورحم الله قاسم امين ونزار قباني
والامام محمد عبده
لابد انهم يبكون على كل ضحية
تحياتي ياباشا

Adam يقول...

ايه يعم ايهاب الكلام الجامد ده

بس انا عاوز اقلك انك باين عليك طيب اوي
اللي يكتب الكلام ده لازم يكون انسان طيب وعمري ماهيبقي شرير

تحياتي

ادم

ملكة بحجابى يقول...

انت شرير؟
انت طيووووب
بس مجرم فى تعبيراتك
ايه ياايهاب ده
ده كنت قربت اصدق انك عملت كدة بجد
وواصف بدقة المشهد
(مشهد اغتصاب )
بس حسيت ان الانسان اللى جواك نطق بانك سألت نفسك أنا ليه عملت كدة .. لحظة ضمير ... مابتجيش لاى حد

دومت .. متألق وصاحب الكلمة

تقبل مرورى
ملكة بحجابى

هندسة وصفية يقول...

:)
طيب انا هاخد كلام ميمي ثقة و اقول انك بتشتغلنا و انت اصلا شرير
بس علي فكرة حلوة
و مش لازم نحصرها في التحرش
ممكن تطبقها علي حاجات كتير اوي

زقطـوطـة يقول...

: )
إيه كمية الدم اللي طرطشت علينا دي بس يا شنكت ؟
حرام عليك بجد
إيه العنف العنيف ده ؟؟؟
ما ينفعش طبعا تكون شرير
بس أنا فهمت وجهة نظرك
اللي يجرب مرة..يعجبه الموضوع..ويموت إحساسه تماماو يستبيح حرمات الآخرين أكيد
إنت كويس ؟
تعالالي فيه تاج علشانك ولازم تمضي بالاستلام : )

حنين القلب يقول...

لا مستحيل تكون شرير

اظن انك انسان عارف الصح من الغلط وان جواك انسان طيب برىء

كلماتك حلوة اوى

تسلم ايدك

smraa alnil يقول...

تصدق بجد خفت لما قريت كلامك
كان احساس بشع وانت نجحت انك توصله
وللاسف زي اللي قبلي قالولك
مش هتعرف تبقي شرير
الشر جوة كل واحد فينا
بس في دوافع بتطلعه

الشنكوتي الكبير يقول...

آبي

ياريت فعلا يكون ثقتي بنفثي زي ثقتك فيا يا ابي
انتي من الناس اللي اكتسبوا احترامي بصوره مذهله وصدقيني هتقولي فلاح مش فلاح اهو هو كده عيله مصيبه انتي

غاده بتسلم عليكي وانا بقولك الف سلامه عليكي خفي بسرعه علشان تنورينا


======================

Foxology

هو ده السؤال عملت فيها كده ليه بس تفتكر يا صديقي ان يكفي الندم علشان متبقاش شرير كتير احنا بنجرح الناس ونظلم الناس ونرجع نقول مش قصدنا او ندمانين لكن هل ده بينفعهم بشيء

تحياتي ليك

===================

ساره

انتي متتخيليش سعيد بوجودك هنا قد ايه وبما انك في السعوديه بقى وانا احب هدايا السعوديه قوي
عايز سوااااااااااك
هههههههه

خلينا نتشهر انا وانتي بقى على قفاهم
ههههههههههههههههه

البندول طلع غالي يا فالحه
نورتيني


==================


نستور ازور
حاضر يا كبير بلاها شر ياريت ابقى طيب فعلا

بس هو ده بمزاجي

=========================

ميرام


اهو انتي دوستي على نقطه هايله يا ميرام ان اكيد اللي بيعمل كده مش بيبقى قرفان وخلاص اكيد فيه لذه من وراء الشر
اكيد بيتمتع بحاجه في شره ده
يا ترى ايه هي ومدى حلاوتها
بس مهما كانت تظل حلاوه مغتصبه لا تصح ولا تحق لنا
ربنا يهدينا جميعا
سعيد بيكي جدا

=======================

الجواز وسنينه

هو يا ستي انا مش بشرب شاي واعتقد فعلا هو ده السبب الحقيقي اني مش عارف ابقى شرير
هههههههههههههه

=====================

ميمي

الله يسامحك
ويسامحني


======================

كوشيا

تفتكري فعلا لسه عنده بقية ضمير
ياريت فعلا وياريتهم ينفعوه

نورتيني وفرحان انها عجبتك

=========================

دعاء مواجهات

استاذتي في فن الكلمات انتي

شهادتك دي كفايه عليا مش هنطق تاني

====================

غرام مكسوفه كباريه

اقول ايه ولا ايه

اقولك انتي من اعز الناس فعلا عندي
بحترمك وبعزك وهعاكسك لما تيجي طبعا زي ما تفقنا
بصي انا حاولت بس ادخل جوه الناس دي واتقمصهم يمكن نعرف سبب شرهم فنتغلب عليه

ابقى انزلي مصر ساعة فرحي علشان هتيجي ان شاء الله الفرح فاهمه ولا لأ

=====================

حماده

بعتلكم يجي ستميت حاجه ومعبرتونيش يعني


===================

كيارا

ازيك يا خياره
والبنت قريبتك عامله ايه قتلتم الأبله ولا لسه

الشرير بيفكر كتييييير

====================

سمكه واحده

نورتيني واسعدتيني بكلماتك
وفكرتين بالحلم القديم
واجيب لي دش مع الموبايل والحته الكوبيه
وانا جبت الموبايل فعلا وركبت الدش بتاع الحمام بدل الدش التاني فاضل بس الحته الكوبيه

نورتيني

========================

ساره

شرير ليه بس
انا شنكوتي مش اكتر

=======================

مرجانه

يا لهوي مالك داخله حامي كده
بس اقولك الموضوع فعلا يستحق الغضب
ربنا يصلح حال المسلمين والمصريين كلهم

عقوبات غير رادعه وتربيه خاطئه
ومجتمع بايظ من الطرفين

======================

آدم

انا سعيد بيك جدا يا ادم شخصيتك عشريه من كتابتك وتعاملك مع المدونين حاسس انك قريب من الناس كلها
سعيد بمعرفتك قوي

=========================


ملكة بحجابي

اعمل فيكي ايه بس بتحرجيني بكلماتك الجميله دي

ربنا يسعد قلبك ويحفظك نورتيني

===========================

هندسه وصفيه

كده برده يا رفيق تصدق فيا العيال ديا
ههههههههههههه

وفعلا هي ممكن تنطبق على حاجات كتير مش بس التحرش لأن في اغتصابات كتير في حياتنا غير الإغتصاب الجنسي

سعيد بيك جدا

====================

زقطوطه

ليه بس يا زقطوطه تاجات تاني
ده انا اتهريت منها زمان
بس حاضر هاجي اشوفه

وان كان الدم طرطش عليكي
هاتيلك كيس رابسو بربع جنيه واستحمي واغسلي الهدوم
انضفوا بقى
هههههههههههههههههه
اوعي تزعلي يا بنت بهزر

=============================

حنين القلب

ربنا يسعد ايامك

متشكر قوي على ثقتك دي
بس انا قلت اخوفهم شويه كده علشان العيال تخاف مني بقى
واعمل عليكم زعيم عصابه في المدونات
ههههه
نورتيني جدا

==========================

سمراء النيل

يااااااااااااااااااااه
حمدا لله على السلامه
اخيرا نورتيني تاني
بطلة السباحه اخبارها ايه دلوقتي
الجواز اخباره ايه والعريس عامل ايه

انا سعيد بمرورك قوي قوي

تحياتي ليكي

سلاااااااااااااااااااااااااااااام

اخوكم ايهاب

mimi يقول...

مسامحاك

روح يابني ...... وتعالي بسرعة

عاشق الليل يقول...

ظريف بس هاد مو شر هاد غباء وبعرف شرير ذكي ماشي يا بطل..

عاشق الليل يقول...

ظريف بس هاد مو شر هاد غباء وبعرف شرير ذكي ماشي يا بطل..