الأحد، ديسمبر ١٤

تكلم ال .... تلهيك واللي فيها تجيبه فيك

تحديث : معلش يا جماعه كتبت البوست في لحظة ضيق من موضوع شخصي شويه مع واحد قريبي المهم يعني قلت افضفض من غيظي لكن مش قصدي اني ادعي الناس تبقى بالصوره الوحشه دي انا بس حبيت اكتب البوست بصوره ساخره شويه لكن لما تضيف ساخره مع كآبه بيعملوا مزيج منيل اسود فمحدش ياخد على كلامي قوي
===================================



لما يكون عندك مشكله في تصرفاتك او في طباعك
تعمل ايه؟؟

اقولك على حاجه جميله جدا ومشهوره جدا ومنتشره بطريقه فزيعه

دور على ناس عندهم نفس المشكله واتريق عليهم فيها ولو ملقتش حد عنده المشكله دي لبسهاله يعني اتبلى عليه وخليه يصدق انها عنده
مش فاهمين !!!!
خلاص هاديكم مثال:
لو انت مثلا بتخاف من الكلاب يبقى تدور على حد من صحابك بيخاف من الكلاب وتفضل تتريق عليه قدام الناس وتحرجه لأنه جبان وبيخاف من حاجه عبيطه زي الكلب وكده يعني هتبص تلاقي نفسك بعد شويه انت اقتنعت ان الكلب مبيخوفش اصلا وانه حاجه عبيطه
مثال كمان
لو انت انسان كداب ومش عارف تتخلص من صفه معينه دور على حد غيرك من زمايلك في الشله مثلا ولف على كل اصحابك قول عليه ان هو اللي كداب وطلعها عليه سمعه ان هو كداب هتلاقي الناس كلها اقتنعت على طول انه كداب وكأنهم مستنين اللي يقولهم كده الناس بتفرح قوي في مصايب بعض صدقوني
مثال تاني
لو انت ليك حد يعرفك وعايز منك مساعده وانت مش عايز تساعده وبعدين في حد تاني كويس معاه وانت عرفت كده يبقى لازم تركز هجومك على انك تفهمه ان الحد ده مش كويس وانه مش بيساعده ولا حاجه انما هو بيضحك عليه وان انت الوحيد اللي قلبك عليه
امثله كتير ممكن اقولها بس المفروض انكم اذكى من كده وعدى عليكم الموقف كتير اتعلموا بقى الطريقه وافهموها كويس هتلاقوها ناجحه جدا اكتر من اي طريقه تانيه

دور على عيوبك ارميها على الناس هاجمهم بشراسه اعلن في كل مناسبه عن فضلك على الناس كلها واخلاقك العاليه وقيمتك التي لا تقدر بثمن .

اه محدش يقولي ان ده مش من الأخلاق ولا يقولي ان ده غلط لأنه لو غلط امال كل الناس اللي بيعملوه معايا وقدام عيني مع ناس تانيه بيعملوه ليه الا اذا كانوا مجربينه و نفع معاهم جدا؟؟؟!!!!

حسبي الله ونعم الوكيل

هناك ١٧ تعليقًا:

انا حره يقول...

والله مالاقيه كلام اقوله

جيت اسلم بس

البت المشمشية حلوة بس شقية يقول...

تصدق والله كل اللى بتقولو ده صح مية مية كمان

Soooo يقول...

انا قاعد مبتسم دلوقتي

ولو انت قدامي هاخدك بالحضن عالبؤين اللي قلتهم دول


وحشتني يا هوبا




سلامووووووووووز

غير معرف يقول...

تصدق انا عامله زى سو كده ومش فاهمه مبتسمه ليه
الحكايه ملغبطه اوى بس حقيقيه اوى اوى

حسبنا الله ونعم الوكيل

حنين القلب يقول...

صعب اوى ان الناس كلها تتعامل بالطريقه دى
ده احنا كده نبقى فى غابه مش دنيا
ياساتر
وبما انى مش ذكيه فانا عمرى ما عملت كده ولا ناويه اعمل كده ابدا

لما اشوف فيه عيب مش الصقه فى غيرى علشان اخفيه عندى
لا طبعا احاول اصلحه ولو مش عرفت يبقى هستفيد ايه لو طلعت عيوب الناس واتريقت عليهم

تقبل مرورى

princess يقول...

ههههه
مش عارفة اقول ايه بس وجهة نظر برده

حروف يقول...

انا داخلة اقوللك حمدلله علي السلامة فينك بقاللك كتير انا مبسوطة اني لحقت اشوف موضوعك الجديد قبل ما ابطل ادخل عشان الامتحانات موضوع جميل وواقعي

اجمل السلامات لاجمل مدونة

انسانةعادية فى عالم مش عادى يقول...

بصراحة معجبنيش البوست ده مش معنى الناس كلها بتعمل كده انى اعمل زيهم
انا اتعلمت اوجه كل موقف اوجه بالطرق الشرعية والصحيحة حتى لو كانت ليه عواقب وخيمة على حياتى

حاسوباتيه يقول...

هههههههههههههههه وليه كده بس نبتلي على خلق ربنا حرام عليك

الدرويش المرووش يقول...

ليك ألف حق

الموضوع ده عامل زى الوباء المستحكم

ربنا يشفى كل مريض

Empress appy يقول...

اللى اختشوا ماتوا ياايهاب من بدرى
بس على فكره مش كل اللى انت بتقوله صح
فيه غلط فى كلامك
وعموما واضح انه قرصه بس وجعتك

الجنوبى يقول...

يقول الرسول الكريم " لاتكونوا امعة تقولوا اذا احسن الناس احسنا واذا اساءوا اسأنا ولكن وطنوا انفسكم فاذا احسن الناس فاحسنوا واذا اساء الناس فلا تظلموا "


تحياتى

تقبل مرورى

عمرو

Maha Shahen يقول...

بس اللي انت شايفهم دول مش مثال دول مرضى وبيحاولوا يفشو المرض فى كل اللي حواليهم
بمعنى اصح علشان لما نتعدى كلنا ميبقاش فى حد احسن من حد
متضعفش ليهم ولا تاخدهم كمثال للواقع لأننا كل ما بنيأس بنلاقى في ناس جميله ترجع تثبت لينا ان لسه فى خير ولسه فى اخلاق ولسه فى ناس بجد
حصن نفسك بأصحاب بجد مش ناس وخلاص
وخلى اللي يتكلم يتكلم
واللي بينشد امجاده علي الملأ دا لو صادفته احرجه علشان يحرم يعملها
لأنه بكلامه واعلانه هو ساعد مين في يوم بيجرحه واكيد هو عارف دا
كلنا لينا اخطاء اكيد بس مش لازم نجاهر بيها كمان
ربنا يفك كربك وينور دربك
بالتوفيق يا رب

مرجانة يقول...

للاسف صحيح كلامك
تلاقي الناس بتدور على عيوب غيرها تلكلك كتير فيها وبعدين تتحدث عن العيوب كانهم منزهين وياحرام عيوبهم الطيبة والصدق و الصراحة
اضم صوتي لصوتك
حسبي الله ونعم الوكيل
تحياتي

smraa alnil يقول...

هو اللي بتقولوا دة صح

بس لما تخرج اكتر في الحياة

وتشرب زنب لما تقول يا بس

هتلاقي ان في حل ابسط من اللي انت بتقولوا دة

هو صعب شوية بس صدقني بسيط

هو ان انت تقعد مع نفسك

كلمها
حاسبها

شوف هي فيها ايه

جايز تلاقي نفسك انت اللي غلط وللي حواليك هما اللي صح وان عمرك كله كنت فاكر العكس

دخل ايدك جواك كدة وطلع من جوة اوي كل اللي انت مخبيه عن نفسك

يمكن تشوف الامور بطريقة مختلفة

غير معرف يقول...

بص ياهوبة الدنيا دي يا اما فيها والله كلنا بناخد فيها كل ذنبة وذنبة اسخم من التانية بس هنعمل ايه لازم نعشها على راي خالد سليم حبتها ولا محبتهاش هي الدنيا ولازم تنعاش

ahmed_k يقول...

طبعا كون في ناس كتير أقدمت
على الطريقه دي مش معناه أنها نجحت معاهم بالعكس
ممكن يكونوا بيعيدوا التجربه لإلصاق تلك الخصال المذمومه بمن هم أبعد ما يكونوا عنها وليس للشفاء منها,
طبعا الوسيله للتخلص من العادات السيئه بهذه الطريقه غلط
لأ يفضل الواحد بعيوبه أحسن من أنه
يلبسها لغيره ويفضحه بيها .
بتجيب منين الأفكار العجيبه دي يا هوبه ههههههه