الثلاثاء، أكتوبر ١٤

كان نفسي

كان نفسي

كل واحد فينا عنده حلم بيحلمه
كل واحد نفسه يبقى حاجه فوق
كل واحد نفسه ايده تكون جناح وترفعه
كل واحد نفسه برضه يطير لفوق
وانا برده زيي زيكم
كان نفسي اطير
كان نفسي اعلى للسما
وجناحي يخبط في السحاب
لكن علشان برده انا
كده زيكم
عيل عبيط
مشافتش عيني السور هناك
مشافتش قيد بيشدني
حسيت للحظه بأني عاجز عن الكلام

وفقدت بهجة كل شيء
لكن هاقول شكرا يارب
على نعمتك
انت اللي عالم بالطريق فيه بكره ايه
انا بحمدك واستنجدك
الحمد لك والشكر لك
=====================================

انا طبعا بقول الحمد لله على كل شيء لكن غصب عني بقول خساره
سامحوني يومين كده افوق من الزعل وبعدين ارجع زي الفل انشاء الله

هناك ٢٠ تعليقًا:

Empress appy يقول...

سلامتك من الزعل يا ايهاب
ربنا يفك ضيقتك يا رب وترجع بخير وزى القرد وتنكش فينا

كاميليا بهاء الدين يقول...

باحلم وحلمى كبير
دايما اشوف نفسى باطير

ألمس نجوم .. أمسح غيوم
وكل يوم ..
يكبر ف قلبى حبها
ارجع تانى لأرضها
أمسح دموع خدها .. وأقولها
تانى هاطير أجيبلها
نجمة تونس قلبها

سلامتك يا إيهاب
اوعى تبطل طيران
افرد جناحك وطير واحلم
لسة الحلم ممكن
يمكن الحلم هو الشئ اللى لسة ممكن فى الزمن ده.

صباح جميل عليك

تحياتى لاخى العزيز اوى

مطلق يقول...

ايه خير يا ايهاب طمني عليك
مش ناقصه كئابه كفايه الي الواحد شايفه

Mafrousa يقول...

إيه يا ايهاب؟
فيه إيه؟؟؟
احسن حاجه ربنا عملهالنا الاحلام
لانها هيه اللى بتخفف عنا اي ضيق و زعل
احلم تطير...حتطير
احلم تعيش ...حتعيش
احلم ..بالجنه....
احلم ز..واحلم...و طير
و بالمرة و انت طاير كده عدى على مدونة رندا و مدونتى
و غير البوست ده بكرة و بعدة
علشان الفرح
عاوزين نمدج اللمبات لغاية مدونتك
ممكن؟؟؟

رندا يقول...

ايهاب

لسة فى طائر طليق
لسة فى حلم بعيد
لسة فى حلم جاى من بين السور البعيد
ولسة هتطير وتحلم ببكرة البعيد
قول يارب هو وحدة الكفيل بتحقيق الحلم ويقرب كل بعيد

ايهاب يارب خير مالك فيك اية

يارب يكون خير

ربنا معاك ويحفظك من كل شر

رندا

zahra يقول...

كلنا نفسنا فى حاجات كتير
و هنوصلها بس بالأمل
مش باليأس و الإحباط

انا حره يقول...

مالك بس ياايهاب

بس طالما انك عارف ان كل شيىء ب ايد ربنا ومؤمن بقضائه ف ان شاء الله هتهدى بسرعه وترجعلنا تانى احسن من الاول ان شاء الله

مستنينك

princess يقول...

على فكرة ده فيروس فى الجو
اه والله حكاية الزعل دى:)
عموما ربنا يخرجك من المود ده وان شاء الله احلامك تتحقق ولو فى حاجات متحققتش
يكون ربنا شيالك حاجة احسن
تحياتى

Ma 3lina يقول...

احلم براحتك و ان شاء الله فى يوم الحلم يتحقق

غير معرف يقول...

لا بص بقى ما أنا مش سايبة مذاكرتى و جاية عند حضرتك عشان تدينى كورس فى الزعل
و هو البنى آدم إيه غير إكتئاب ده أحنا حتى من أول ما بنتولد بننزل نوؤوؤ










بص سيبها على الله و من حقك تزعل على حاجة فاتتك ده الطبيعى
بس محدش بياخد كل حاجة يعنى
ان شاء الله ترجع احسن من الاول
و دايما الواحد لازم يخسر كل حاجة عشان يعرف يجيب كل اللى عايزه
روح كدة أتوضى و صلى ركعتين و ابتدى مع نفسك تانى
و إن شاء الله كل شىء يتحققبالإرادة و التفاااااااااااؤل

nona يقول...

كلنا بنحلم و احلام كبيرة و صغيرة وفى منها بيتحقق و في منها نصيبة الحلم بس و دة مش معناة اننا نتاذى و نسمح لحد يوقفنا فى وسط الطري و يخلينا نبطل نحلم و نتخلا عن احلامنا
استمر يا صديقى و القى وراء ظهرك كل شى ممكن يعيق استمرارك او ياذيك خليك دايما طاير فوق فى السماء متافقين

nigro يقول...

واد يا إيهاب يا ابو الشناكيت
مالك يا واد ؟
زعل إيه كفى الله الشر ؟
انت هتقلقني ولا إيه عليك ؟
فوّق بالله عليك كده و فرفش و زجطط و فرفش كده و زجطط
ربنا يفرج همك يا رب
اقولك
أنا بأحب الدعاء ده قوي و لما بأردده باستريح

اللهم صلي على سيدنا محمد صلاةً لا تُعد و لا تُرد و لا يعلم فضلها أحد .. يا رازق الطيور في أوكارها , و الدود في صُم الصخور , و من جحد .. فرّج اللهم الهم .. يا من صفاتك " بسم الله الرحمن الرحيم ( قل هو الله أحد * الله الصمد * لم يلد و لم يولد * و لم يكن له كفواً أحد ) صدق الله العظيم

طمني عليك يا هوبه


يلا سلام

قوس قزح يقول...

ربنا يريح بالك
يظهر دى فرة و ماشية فى المدونات
او ماشية بين الناس كلها

منتاش لوحدك اللى خبط فى السور
فى كتير قبلك و هيكون فى كتير بعدك
المهم انك تتعلم تطير كويس و تكون عارف اخر حدودك ايه
و صدقتنى مع الوقت هتلاقى السور بيبعد و احلامك تقربلك اكتر

ربنا معاك

همس الاحباب يقول...

ايه يا باشا
ربنا يطمنا عليك
مش واخدين على كده منك
يارب يفرج همك ويزيح غمك
وترجع بالسلامة
تحياتى

kochia يقول...

ساعات كتير بنحلم بحاجة نكون عاوزينها اوي
لكن ربنا بيكون لسة مقدرش لينا هذا
كل حاجة عند ربنا بمعاد
واحنا نصبر ونعمل
وربنا يوفقك ان شاء الله
في اللي ربنا يختاره ويحقق لك احلامك ان شاء الله

حزينه يقول...

اللهم فرج كرب كل مؤمن
اللهم اكرم كل مؤمن
لا تحزن فالايام يوم لك ويوم عليك
فاعطى الله حقه ولا تقول اين
اشعر بك
واعلم ان قد سلب منك حلم كنت تهواه
لكن انت لا تعلم ما يعلمه الله
فدائما قل لعله خير



حزينه

ojg يقول...

انت كمان؟؟
هو فيه ايه بس
مالكو يا مدونين مصر؟
ثق بالله
وان شاء الله ربنا لن يضيمك
:)
ربنا يصلح حالي وحالك

رندا يقول...

واد ياهوبة

سيبك من الزعل شوية وتعالى افرح معانا عاملة هيصة فى المدونة عندى هات كل احبابك وهيصوا معانا

مستنياك بكرة عندى مش تتاخر
وهات معاك الجاتوة ولا بلاش خلية عليا احسن مش تيجى خالص ههههههههه

اوى تتاخر

رندا

Ehab يقول...

آبي بتنجاني

متشكرين يا سكره على الكلمتين الحلوين دول

زي القرد يا مصيبه
طيب ماشي راجعلك

-------------------

كامي

عروستنا الحلوه هنا يا خراااااااشي

منوراني يا عروسه والحمد لله الزعل راح بفرحتي بيكي
الف مبروك

------------------

كريم


الله يكرمك ويسعدك متشكر على كلامك يا كيمو وتعيش يا غالي
وبعد الشر عنك من الكئابه
--------------

واحده مفروسه

ايه يا مفروسه بس خلاص فوقت اهو يا باشا وتم تنفيذ التعليمات دمتي لي خير اخت وصديقه

------------------

رندا

لا بالراحه عليا بقى مش قد الكلام ده كله يا باشا

ربنا يسعد ايامك ويحفظك قادر يا كريم
ويسيبولك عربيتك من غير ما يفكوا منها البتاعه

منوراني يا جميل

----------------------

زهرة الياسمين

حاضر يا ستي هدور بالأمل بس ده نوع عدسات يعني ولا ايه

سعيد جدا بكلامك وزيارتك

------------------

انا حره

انتي حره وانا حر ايه يا اخويا الناس الحرانه دي
منوراني يا سكره ومتشكر على لكامك السكر ده ربنا يحفظك منوراني

-------------------

Princess

يا اميرتي الجميله
الفيروس تم اغتياله وتم القضاء عليه تماما الحمد لله بفضل كلامكم الجميل ووقوفكم جنبي ربنا يسعدك يارب

----------------

ما علينا

يا باشا حضرتك منوراني هنا
ده انا لو اعرف انك هتيجي علشان تواسيني كنت حزنت من بدري
هههه
ربنا يسعدك

======================

شهد الكلمات

حلو قوي اسم المدونه بتاعتكم دي والصوره بتاعت سعاد جامده جدا ولو اني صايم ومش عايز اركز فيها

بس ايه اللي هينضضضضموا ده

عامة هابقى ارح اشوف

==================

انا ودماغي


ربنا يكرمك ويسعدك يارب وينجحك في مذاكرتك

بس يعني اهو الواحد يا بنتي كان بيتفك بكلمتين من نفسه يعني مش حاجه والحمد لله بقيت كويس خالص والموضوع بقى عادي جدا ومش مزعلني الحمد لله

ربنا يكرمك يا سكر

-----------------

nona
نونه يا شعنونه
الله يكرمك ومتشكر قوي قوي على كلامك الجميل ده بس هو لما اطير فوق في السما ايه متافقين دي حاجه فوق يعني اصل انا لسه مش طرت قبل كده
هههههههههههههههه

متشكر قوي على كلامك ده نورتيني

-------------------

نيجرو

حبيب قلبي ولا على رأي سوووو حليب هارتي
واد انت عارف انت عسل وبالقشطه كمان انت عارف انا بعزك قد مش هاقولك يعلم ربنا باللي جوانا بقى
بس انت اخ جدع حقيقي ربنا يوفقك يارب وافرح بيك دايما تسلملي يارب

--------------

قوس قزح

يعني الحاله دي منتشره طيب الحمد لله طمنتيني يا بنت يا عسوله انتي ده انا خفت على نفسي خالص
هههههههههههه

بجد بجد متشكر ليكم كلكم على وقفتكم معايا يا جدعان
بحبكم كلكم

------------------------

همس الأحباب

خالد باشا ربنا يحفظك انا بقيت بخير الحمد لله ربنا يبارك فيك ويحفظك نعم الأخ

-----------------

Kochia

كوشيه يا سكره انتي عامله ايه بس الأول انا بقيت بخير الحمد لله وخلاص رضيت الحمد لله طبا بقضاء ربنا وعارف انه زي كل مره بيشيلي الأحسن ليا ويوجهني ليه
اللهم لك الحمد ل
متشكر يا سكره على كلامك ده

-----------------------

حزينه
ليه الأسم الحزين ده كده انا بخير الحمد لله دلوقتي وكويس انتي بقى اوعى تفضلي حزينه عايز الاقيكي لما اروح عندك دلوقتي مش حزينه خالص
ماشي يا سكر

------------------------

ojg

اوج يا مأجئجه عامله ايه انا خلاص خفيت هو في حد تاني زعلان ولا ايه قولوله يعمل زيي ويرمي ورا ضهره ويقدر نعمة اصحابه الحلوين وهو هيبقى كويس

نورتيني يا سكر
--------------------------

رندا





انا جاااااااااااااااااااااااااي


------------------------------


متشكر ليكم كلكم يا جدعان على كلامكم الجميل
ربنا يسعدكم وبعدين الموضوع طبعا زي ما عرفتم كان وظيفه هايله ليا وراحت لحد تاني بس انا مبقتش زعلان لأني اتأكدت اني مش علشان انا مش كفء لكن علشان انا من غير واسطه وده مبيزعلنيش الحمد لله


سلااااااااااااااااااااااااااام
اخوكم ايهاب

Soooo يقول...

يسلم لسانك ياشنكوتي يابن عمو الكبير

حلوه قوي قوي قوي ياد بجد


بص .. مالاخر كده .. الحته دي ان شاء الله انا هاخدها احطها في حاجه باكتبها جديد
هحطها ازاي والموضوع مافيهوش ده ماعرفش
بس انا عايز احطها وخلاص
حلوه قوي بجد ياد


ملحوظه
انا آسف يابو الشناكيت اني عملت سينماتك من غير ما اقولك .. بس والله هي جات كده
حقك علي يا اول صاحب ويا اجدع مدون عرفته في حياتي

ماتزعلش بقى





سلاموووووووووووووز