الأربعاء، أكتوبر ٨

تاج بس جاااامد




التاج ده جاني من احمد الغردقاوي عارفينه طبعا بس هو حب يدبسني في التاج وانا قعدت افلفص منه لكن على مين الواد صعيدي ودماغه ناشفه قوي المهم يعني مطولش عليكم علشان خاطر هو حبيبي بس ومهددني يقطع رقبتي لو مش جاوبت انا هانزل التاج اهو يا ابو حميد خلي المطاريد ترجع الجبل بقى وبلاش عنف الله يهديك


بدأت تدون من إمتى ؟ ودخلت العالم ده إزاي ؟
ياااااه رجعتوني لأيام زمان يا ولاد بدأت التدوين من اكتر من سنه اهو في الأول طبعا مكنتش فاهم حاجه وفتحت المدونه وبعدين سبتها كتير بس البدايه الحقيقيه لما شفت الصفحه بتاعة كيف تنشا مدونه ومنها ابتديت انطلق واصلا اللي طلع الفكره في دماغي لما شفتهم مستضيفين في برنامج سخيف كده على دريم ناس مدونين وكانت اول مره يقولوا حاجه عدله فقلت اعرف ايه التدوين ده بقى

أيه كان إنطباعك في البدايه ؟
مبهور جدا طبعا وكنت مش عارف اعمل ايه علشان اقدم نفسي للناس دي واتعرف بيهم وياترى رد فعلهم ايه وهل فعلا حد ممكن يعبرني ويجي عندي وبقيت مبهور اكتر بصداقتهم ومعرفتهم ببعض واللي بهرني قوي بقى هو عددهم الكبير واللي كل يوم بيكبر اكتر واكتر ماشاء الله

من أكثر شخص بتهتم بتعليقه على بوستك الجديد ؟
كل الناس بحب تعليقهم وبعدين مش مهم مين اللي يعلق المهم بيعلق يقول ايه كل واحد بيجي يعلق ويقول رأي مفيد بيهمني جدا اما اللي يهمني انهم يقرؤا البويت فدي حاجه تختلف ومش هاقولكم مين علشان انتم هتبلغوا عني

ما هي أهم شيئ تعلمته من عالم التدوين ؟
ان البلد دي لسه فيها عقول كتييييييير قوي نضيفه وصاحيه وعندها استعداد تعمل كتير واني ممكن لو دورت كويس في بلدنا الاقي اصحاب كتير ممتازين افخر بمعرفتي بيهم يعني مش كل الناس محششين ولا حاجه ولا كل الشباب بتريل في الشارع على بناطيل البنات المفتريات الله يهدهم

ما هو أكثر شيئ كرهته في عالم التدوين ؟
الناس اللي بتشتم ده حتى المثليين في الأول قلت اسيبهم في حالهم يغرقوا بعيد عني مش مشكله وبعدين لقيت ان الموضوع بقى شتايم وقلة ادب وتطاول على كل شيء حتى الدين وبكره قوي الناس الجبانه اللي بتشتم بأسماء ناس غيرهم او سعات اسماء مجهوله

هل تشعر أن التدوين له تأثير؟
اه طبعا له تأثير مادام الناس سمعت عننا ومادام الحكومه بعتت رجالتها في الصحافه المهببه يشتمونا ويفهوا الناس اننا ولاد تييييت وبنحاول نزعزع حلوه نزعزع دي – استقرار البلد يبقى احنا اكيد ابتدينا نعمل صوت ويبقى لينا اثر جميل

تهدي التاج ده لمين ؟
مش عارف اهديه لمين بصراحه مش عايز ادبس حد لكن كل اللي يحب التاج ويحس انه هيقول فيه كلمتين مزنوقين في زوره ياخده مني هديه ويبقى يقولي

وسلام بقى يا جرعان بحبكم كلكم ومبسوط قوي اني دخلت التدوين وسط الناس دي القدام منكم اتعلمت منهم وحبوني وحبتهم والناس الجديده بتيجي تتعرف عليا ويقولولي كلام حلو قوي بصراحه بحس اني هنا في جنتي الصغيره الكل بيحبني الحمد لله وانا بحب كل الناس بجد بجد بقى عندي مليون اخ ومليون اخت
كل سنه وانتم طيبين

هناك ١٤ تعليقًا:

Empress appy يقول...

انهم يقرؤا البويت
بويت ايه دى يا ايهاب
انت تقصد بوينت ولا ايه
الله يخربيت نحن الاميه اللى انت طالع منها
هههههههههههههههههههههههههههههههه
اجابتك منطقيه وبعدين ابقى غمى عنيك عن البنات اصل افتن عليك
سلامى للنص الحلو

كـــيــــــــارا يقول...

ههههههههههههههه

طيب ليه زعلان بقي من التاج

ده حتي حلو خالص

وطلع المستخبي

بس فعلا التدوين فيه عقول نضيفه ...

تحياتي

كيارا

سمر الشافعى يقول...

وانت مالك بقى ياسى ايهاب ومال البناطيل ماتخليك فحالك

شكلك كدا عاوز شده حبتين ماينفعش الكلام دا

kochia يقول...

دي احلي حاجة قريتها في تاجك النهاردة
مع انه كله جميل

"ان البلد دي لسه فيها عقول كتييييييير قوي نضيفه وصاحيه وعندها استعداد تعمل كتير واني ممكن لو دورت كويس في بلدنا الاقي اصحاب كتير ممتازين "

عصفور المدينة يقول...

بارك الله فيك وأدام عليك النفع والانتفاع

princess يقول...

انا جيييييييييييييييييت اوعى السريع هههههه
اجايات لذيذة ظريفة:)
هو من ناحية العقول فموجودة والحمد لله بس عايزة اللى ينشلهل من اللى هيا فيه
تحياتى

غير معرف يقول...

ايهاب كل سنة وانت طيب يا أغلى أخ اكتسبته من عالم المدونات وكنز صعب ان الواحد يلاقي زيه تاني كل سنة وانت محبوب واحنا بنبحك وربنا يجمعك بنصك التاني على خير يارب

حنين القلب يقول...

ايه الاجابات الحلوة دى يا ايهاب
فعلا التدوين بيغيير كتير اوى بيحسسك ان فيه ناس نضيفه ومحترمه وبتحبك بدون سبب فى زمن السلام بقى فيه بفلوس

كل سنه وانت طيب متاخرة شويه بس معلش
تقبل مرورى

ahmed_k يقول...

ههههههههههههههههههههههه
خلاص يا بوووووووووووووووووي
طلعنا المطاريد الجبل عند ذئاب الجبل
متخافش يا ولد(بكسر الواو) ههههههه

جميله جدا أجوبتك يا هوبه
وبتدل على إنسان من جواه حاجه تفرح
والحمد لله طمنتني أن الناس مش كلها محششه
ولا بتريل على البناطيل ههههههههههههه
أيه يا هوبه ده إنت لازم تفضي نفسك حبتين وتيجي الغردقه ومتقلقش
حترجع ميه ميه ولا حتأثر البناطيل دي خاااالص واخد بالك معايا هههههههههه
بهزر معاك لأحسن حد يظن ظن وحش
ده إنت مثال الذوق العالي والأخلاق يا هوبه
وحضر نفسك كده حبعتلك تاج تاني
بس حسيبك ترتاح هبااااااااابه


و10/10 يلا متغلاش عليك

سلاااااام يا صاحبي

Ehab يقول...

آآآآآآآآآبي

ازيك يا بنت يا فقريه انتي
منوراني
اقصد البوست يا جاهله وبعدين مش عايز اسيح واقول انا وانتي خريجين نحن الأميه دي دفعه واحده ومش هاقول دفعة سنه كام يا مرضعة قالاوون انتي

ههههههههههههه

وبعدين انا بغمي عيني يا اختي بس هم اللي كتير قوي كده هاعمل حادثه وخبيها في سرك بقى لحسن تقطع رقبتي

-----------------

كيارا

مش عارف مين اللي بيقولك دايما يا خياره هابقى اشوف واقولك المه انا مش زعلان بس انا كسلي شويه وقلت الكلام قبل كده
ربنا يحفظك نورتيني

---------------------

سمر الشافعي
دكتورة كفر الهنادوه عندنا يا مرحبا بيك يا دكتره
وبعدين متغيظينيش لحسن هانزل بوست مخصوص اسمه فلتسقط بناطيل الستات
وطبعا انا قصدي كويس مش اللي في بالكم يا وحشين

سلاااااااااااااااااام

------------------------

كوشيا

وصدقيني وانا كمان اكتر حاجه مفرحاني هي ان الجمله دي حقيقيه واكتشفتها هنا وسط المدونين

سعيد بمرورك

-----------------

عصفور المدينه

لا متقولش انت اخيرا نورتني يا باشا واحشني جدا ازيك يا جميل وعامل ايه
ربنا يوفقك ويحفظك يارب

-----------------------

princess

اوعى السرييييييييع

ربنا يستر ومنتنشلش يا فالحه

سلااااااام

-----------------


قلوب حائره

ربنا يحفظك ويسعد ايامك انتي وابو حميد

كل سنه وانتم بصحه وسعاده

-----------------

حنين القلب

متأخره متأخره ميهمش المهم تتقال
نورتيني ربنا يحفظك ويسعد ايامك

-------------------



احمد باشا يا تاعب قلبي انتي

ايه رايك يا باشا الحمد لله طلعنا براءه اهو ونجحنا كمان
متشكرين يا برنس على الدرجه الحلوه

سلاااااااااااااااااااااااااام

اخوكم ايهاب

الـسـيـدة نـون يقول...

الف شكر ليك يا ايهاب على كلامك الجميل عندى
واسمحلى انا خدت تعليقك وحطيته على المدونة من برة
علشان كل اللى يدخل يقرا كلماتك الجميلة

متحرمش منك يا ابو الشناكيت

سلام
اختك خيخة

nona يقول...

كلامك و اجابتك صريحة و مباشر بس مالك و مال البنات باة
دول حتى هما النص الحلو و انتوا النص الوحش طبعا ههههههههههههههه
سعدت بتعرفى على مدونتك الجميلة و ليا عودة مرة تانية
بس ماليش دعوة انا عايزة من شقة البطيخ الاى الواد بياكل منة دية
هععععععععععععععععععععع

شفـقــة و إحســــان يقول...

مبروك التاج اجاباتك لذيذة

PrInCeSS BeRy يقول...

ازيك وكل سنة وانت طيب يا شنكوتىىىىىى

تاجك دمو خفيف اوى ما شاء الله وجميل انك تدخل التدوين علشان نشوف كلام دمو خفيف من شاعر جميل

تحياتى