الأربعاء، سبتمبر ١٧

انا عايز من ده





انا عايز من ده

"وجعلناكم شعوبا وقبائل لتعارفوا ان اكرمكم عند الله اتقاكم "
اللهم لك الحمد على نعمك التي لا تعد ولا تحصى
فكرت كثيرا في نعمة اصدقائي حولي وبالذات المدونين الذين تعرفت عليهم خلال هذه الفتره التي قضيتها في التدوين ووجدت في كل منهم صفة او صفات احببتها فيهم وتمنيت ان اقتبسها واتعلمها منهم ومن جاور السعيد يسعد فتمنيت الأتي
احمد سووو خفة دمك وجدعنتك والكاريزما التي تتمتع بها
نوران بنت خيخه شجاعتك وصدقك مع نفسك قبل الناس
هبه دوبه حكمتها ونصائحها الغاليه
كاميليا شفافيتها ورومانسيتها
آبي اشراقتها وحبها للحياه ولماضتها
شيماء الجيزى الحيويه الرهيبه التي تملكها
احمد الصباغ لباقته المذهله وقدرته على التنظيم
ابو خالد ابوته الفياضه ونور قلبه اعزه الله
خالد همس الأحباب طيبته وعشريته وجدعنته
نيجرو دخوله القلوب بلا استئذان واخلاقه الجميله وخفة دمه الرائعه
رندا كرمها الحاتمي وطيبتها
لي لي خفة دمها واسلوبها الساحر وشياكتها الجميله
ابن حجر العسقلاني اخلاقه وفنه الجميل
مريم من اسكندريه جدعنتها وتدينها وجرئتها
شاهي امومتها برغم طفولتها والطيبه اللي بتشر منها بصوره تجنن ربنا يحفظها
جاد صراحتها المجنونه
فرنسا هانم جرائتها وعقلها الكبير وقلبها الطيب الصافي
دعاء مواجهات رومانسيه خارقه وايمان ينبض
احمد غردقه رجل بمعنى كلمة رجل كريم وعزيز وشهم ونعم الأخ
سمر الشافعي رقتها وطيبتها
ليساندرا ذكائها الأدبي وروعة فكرها
كنت هنسى قوس قزح سعيها للخير دايما ورسوماتها الجميله
لسه ناس كتير عايز اقول عنهم ومش عايز انسى حد علشان ميزعلش مني لكن انتم كلكم عارفين اني بحبكم كلكم وانا اخترت عينه من الناس اللي بحبهم جدا ولسه في ناس كتير عايز اقولها لكن انا بقى قررت اسيبكم تكملوا انتم كل واحد يقول مين شايف فيه صفه بيحبها ونفسه يتعلمها منه وتبقى فيه
لما فكرت لقيت اننا بنكمل بعض بصداقتنا بنكمل بعض

اما بعيد عن المدونات فأنا لي اصدقاء في حياتي يكملوني واكملهم فطرت معاهم امبارح في البيت وحسيت انهم جزء مني

ده اللي بشوفه فيكم كلكم يا اصحابي اما عن نصفي الأخر وحلم حياتي فكعادتي كلما اردت ان اصف لها شيء يعجبني فيها توقفت الكلمات وعجزت عن النطق واكتفيت بأن ابتسم وادعي لها ان يبارك الله فيها ويحفظها لي

كل سنه وانتم جميعا بخير اغتنموا عشر المغفره وادعوا لي

سلام اخوكم ايهاب

هناك ٢٤ تعليقًا:

princess يقول...

هاى
ربنا لما بيحب حد بيوقع فى سكته ناس كويسة واصدفاء بجد:)اه واللهى
ربنا يكرمك وتحتفظ بصداقة كل الناس اللى بجد يستهلوا
تحياتى

قوس قزح يقول...

انت كمان يا ايهاب انسان جميل
و اكيد كتير منا جواه نفس الاحساس لك
ربنا يسعدك و يملى حياتك باصحاب كويسين و منك قريبين

ربنا يوفقك

ahmed_k يقول...

ده إنت يا إيهاب اللي كلك ذوق وأدب
وقلبك كبير
وعلشان إنت بتحب الناس فبتلاقي اللي يبادلك حبا بحب
ربنا يكتر من أمثالك

فعلا أنت نعم الأخ والصديق
وأقول لنصفك الآخر خللي بالك من هوبه
ده إنسان بكل ما تحمل الكلمه من معنى
ربنا يديم عليك السعاده يا هوبه
ويفرح قلبك زي ما بتتمنى سعادة الآخرين


وعايز أقولك
أنا فخور جدا بمعرفتك وصداقتك يا إيهاب
ربنا يديم علي نعمة أخوتك وصداقتك

ودمت في حفظ الله ورعايته

Empress appy يقول...

ايهاب
انا لمضه
يا نهار طيب ماشى هفوتها علشان النص التانى بتاعك بس وعلشان انا حبتها من غير ما اعرفها
انا بقى بحترمك جدا علشان انت حد كويس
وكل اللى بعرفهم بحبهم وبتعلم منهم كتير ومش هينفع اقعد اعد لانه هخلص البلوج بتاعتك وبتاعتى
كل سنه وانت بخير

رندا يقول...

رندا كرمها الحاتمي وطيبتها

.................

اية دة اسمى موجود ول ياول ههههه
طبعا طبعا كل دة علشان العزومة الموكن الى عملتها ليك ولخطيبتك صح
كرم اخر حاجة يعنى ههههههه

ربنا يخليك ياهوبة بس مش طيبة اوى يعنى هههههههههه
انا شريرة نيهاهانيها
ربنا يكرمك يارب على كلماتك الجميلة انت الى طيب اوى بجد
وربنا يكرمك مع خطيبتك وتتجوزوا بقى
عايزة افرح بيك يامعلم
ها هتورينى الكرم وتعزمنى ولا هنحمرق وتقولى حاجة عوائيلية

ربنا يحفظك يارب ويكرمك اخر كرم
وكل الى قلت اساميهم تحياتى وحبى ليهم فعلا اجمل ناس على طريق الحب
يارب يجمعنا على الخير دايما

ربنا يسعدك

رندا

Soooo يقول...

طب انا عايز شويه من بساطتك وجدعنتك وقبولك وشقاوتك ورومانسيتك وجنانك وعقلك وهدوءك وطيابتك

ينفع ولا هتعز علي الحاجات دي؟؟؟


شنكوتي
باحبك ياد انت والله والعظيم زي ماتكون اخويا واكتر كمان





سلامووووووووووووز

سمر الشافعى يقول...

ايه دا يعنى اجى بعد فتره الغياب دى كلها الاقى الكلام الحلو اوى دا من ورايا

ميرسى اوى ياايهاب

يمكن ربنا مكتبلناش اننا نتقابل بس الحمد لله اننا سايبين عند بعض انطباعات حلوه

وربنا يعلم انك اخ ليا

كل سنه وانت طيب ويارب تكون بتعمل كويس فى رمضان

Doba يقول...

أحبك الله الذى فيه أحببتنا
ربنا يحبب فيك خلقه

تعجز الكلمات عن الوصف مثلما عجزت انت مع نصفك الاخر

جمع الله بينكما على كل كل الخير
فى القريب العاجل

كل سنة وانت طيب
وبإذن الرحمن السنة الجاية أول يوم فى رمضان تكون انت زوجتك الغالية فى بيت واحد وعلى سفرة احدة وتعزمووووووووووونى بلاش بخل

تحياتى يا صديقى الغالى
هبة

ahmed_k يقول...

هوبه الغالي
صاحب الإختفاء الكبير
ليه غيبتك بتطول عننا بالشكل ده

عموما ليك عندي تاج إنما أيييييه
حاجه فلله
ياريت تنورني وتشوفه
منتظر إجابتك عليه بسرعه
قبل ما تنزل بوست العيد هههههه

تحياتي

غير معرف يقول...

ماشاء الله

بجد القلب الطيب..قلب حنين..قلب قريب..قلب كبيـــــــــر

فكرتني ببوست قديييييييييييم عملته في مدونتي القديمة

أد إيه جميل إن الإنسان يعرف قيمة نعمه
من نعم ربنا عليه

ربنا يخليكم لبعض
تحياتي

غير معرف يقول...

الله
على فكرة البوست جميل اوى
و بجد الحمد لله على نعمة الأصدقاء
و مع أنى لسة مكملتش شهرين فى التدوين بس بجد حبيت ناس كتير أوى و حسيت أنى أعرفهم بقالى فترة و لو غابوا بسأل عليهم و أستنا ينزلوا البوستات بتاعتهم
و بجد بجد أنت كنت من أول الناس اللى ادتنى دفعة و حسستنى أنى مش بكلم نفسى فى المدونة بتاعتى
هو طبعا لسة مقدرش أحكم حكم كامل على حد لانى لسة جديدة بس بجد اللى عرفتهم ناس جدعة أوى و حساهم شفافين و تلاقائين و نفسى بجد أعرفهم أكتر من كدة

مرجانة يقول...

الاصدقاء مرآة للانسان , وواجب الاصدقاء الحقيقيون أن يكونوا السند و عندما يتطلب الامر يكونوا وتد لك حتى تقف عند حدك اذا تجاوزت تلك الحدود
جربت أن أحذر صديقة من أن تأمن لصديقة كانت تعتقد انها ملاكا غير ان الموقف قلب ليس فى صالحي وبديت أنني أحاول أن افرق بين الاثنين....عجبي
ومع المواقف يتعلم الانسان فاحيانا الصريح يتحول الى غامض او مجامل
و الصادق " يتلسع "من صدقه فيصير كاذبا منافقا , الحماسي وصاحب المبادىء يشقي فيغير مبادئه و تصير مبادئه مرنة وطبقا لمتطلبات الحياة
لا ادري هل هي الحياة هي التي تغيرنا ام نحن الذين نغير انفسنا؟؟؟؟
ازيك يا شنكوتي
شكرا لتعليقك على مدونتي و قصة على جسر الحب
اخجلتم تواضعنا

Unknown يقول...

اللهم زد هـــــــذا الوجه نورا
واجعله دائـما مأجورا
وبلغه العيد مسرورا
امين يارب العالمين
عيد سعيد

kochia يقول...

كل سنة وانت طيب
وان شاء الله ربنا يديم عليك نعمته وكرمه ومغفرته

تحياتي

shabfa2re يقول...

beeeep beeeep
happy eiiiiiid

nigro يقول...

ابو الشناكييييييييت
إيهاب حبيب قلبي الغالي قوي قوي قوي قوي قوي
كل سنة و انت طيب يا هوبه
كل سنة و نصك التاني طيبة و بخير
كل سنة و كل اللي بتحبهم طيبين
تقبّل الله منا و منكم

إيه يا واد يا إيهاب
يا لهوي يا لهوي يا لهوي
إيه طيبة القلب و المصالحة مع النفس دي
لأ
بس تعرف
و الله ما غريبة عليك
و الله يا إيهاب اللي يشوفك كده حتى و لو ما يعرفكش قبل كده .. هيستريحلك
سيماهم على وجوههم بقى يا عم
ربنا يبارك فيك يا إيهاب

كل سنة و انت بكل سعادة و خير و هنا


يلا سلام

فى القلب يقول...

كل سنه وأنت طيب و الطيب وجميل الروح هومن يرى كل شئ طيب فيمن حوله

أحاط الله حياتك بكل ما هو طيب وذكى النفس مثلك

ahmed_k يقول...

أسأل الله
أن يعطيك أطيب ما في الدنيا محبة الله
وأن يريك أفضل ما في الجنه رؤية الله
وأن يجمعك بأفضل خلقه رسول الله
وأن ينفعك بأنفع الكتب كتاب الله
وكل عام وأنتم بخير
عيد سعيد

Unknown يقول...

واكيد هم كمان شايفين فيك صفات زى الفل وعشان كدة انتوا اصحاب

mohamed ghalia يقول...

كل سنة وحضرتك بخي وكل إلى بتحبهم بخير

غير معرف يقول...

إييييييييييييه ده
أنت فين مش باين خالص ليه كدة
كل ما أدخل ألاقى نفس البوست و أنت حتى مش رادد عليه

انت عندك ظروف و لا إيه

على الله غيابك يكون سببه خير

غير معرف يقول...
أزال المؤلف هذا التعليق.
الـسـيـدة نـون يقول...

الهي يارب تتستر دنيا وأخرة يا شنكوتي


وانا كمان عايزة من ده
عايزة نفضل دايما اخوات واصدقاء ونخاف على بعض بجد
ومحدش فينا يجرح فى التاني
ونحفظ غيبة بعض

احنا مش مجرد شوية مدونين
احنا بقينا اكبر من كدة
احنا بقينا عيلة واحدة


ربنا يخليك يا ايهاب
وصدقني كل الصفات الجميلة اللى انت وصفتنا بيها
دي بعض ما عندك يا شنكوتي

تحياتي ليك
اختك خيخة

mostafa rayan يقول...

ربنا يكرمكو كلكو