الأحد، يوليو 1

التاجات جت ....ولا ماجتش



انا اخترت الصوره دي عشان كانت نتيجه اختبار انت شبه مين من القاده مش عارف هم اختارولي كلينتون ليه يمكن عشان هو كمان بيحب مونيكا
التاج ده جالي من الأخت الغاليه داليا الله يسامحها ويديها على قد نيتها واشوفها ظابطه في الجيش كده وتصحى كل يوم من الفجر

قولو امين

انت مين؟

انا ايهاب




في جوايا حاجات كتير مجنونه فضلت حابسها سنين لكن من حوالي بعد ما سبت الدراسه اتجننت واتغيرت وبقيت شنكوتي
مين اكتر 6 اشخاص بتحبهم؟
هبه اختي و مامتي و فاخر صاحبي و عبده اخويا الصغنن واتنين جداد على حياتي مش عايز اقول اسمهم




انت سعيد؟
انا الحمد لله عندي نعم كتير مش عند غيري لكن انا دايما بحب اكون احسن واتقدم واتطور في حياتي عشان كده مش عارف اوصل للسعاده الكامله








لو اجتمعت انت وحسني مبارك في غرفة واحده؟
اكيد هيكون في خمسميت واحد جاهزين يسحلوني من قفايا لو نطقت عشان كده هاقوله ممكن سعادتك تديني حته من العزبه بتاعتك




لو معاك مليون ونص جنيه......تعمل بيهم ايه؟
هاتجوز طبعا وهاشتري فيلا فيها حمام سباحه فظيع وافضل قاعد فيه ليل نهار وافتح مؤسسه للأيتام تعلمهم وتشغلهم وتدربهم على
حرف تفيدهم او كورسات تؤهلهم كويس وبالباقي افتح مشروع للنقل التقيل مع خالي





بتحب مصر؟




ايوه بحب بحب مصر البلد نفسها وكنت زمان بحب المصريين بس للاسف فيه ناس مصريين كتير دلوقتي كرهوني فيها
بتحب البنات؟
بموت فيهم يا ناس من اول الطفله الصغيره اللي عندها سنتين وبتجري عليه في الشارع عايزاني اجيبلها شيكولاته قبل ما اطلع البيت لحد البنت اللذيذه صديقتي واختي








مسلم؟




مسلم طبعا الحمد لله
ليه؟
وانا صغير عشان انا اتولدت كده لكن كل يوم بأحكبر اكتر وافهم اكتر بحمد ربنا انه خلقني مسلم وبدعي اني اكون نعم المسلم





مين اكتر شخصية ما تقدرش تستغنى عنها في حياتك؟وليه؟
ياه كتير هبه وهبه الأتنين اخواتي وفاخر صاحبي وناس كتير تانيه




ايه اكتر موقف محرج اتعرضت ليه في حياتك؟واتصرفت ازاي؟
ايه الأحراج ده بس كان واحد زميلنا عازمني على عصير عشان افطر بيه وانا صايم وجه معايا واحد تاني صاحبي فقلتله هاتله هو
كمان واكتشفت ان هو جاب لناس كتير ولسه هو مفطرش فأنكسفت اني مخدتش بالي منه وهو عمال يفطرنا ويطمن علينا




معرفتش اعمل حاجه غير اني اسيبه يفطر هو وجبت انا العصير للواد التاني





ايه الأمنية اللي بتدعي ربنا دايما انه يحققها لك؟




ادخل الجنه قبل كل حاجه




اني اتجوز واحده احبها وتحبني وتكون جوازه جنان غير تقليديه












بفكر ابعت التاج ده لكام واحد عزاز عندي قوي لكن اللي عمله قبل كده خلاص واللي مكسل ينفض
















هناك 24 تعليقًا:

عصفور المدينة يقول...

بارك الله فيك ورزقك الزوجة الصالحة

NeRmeeN يقول...

هههههه بقى هتجيب للناس عشى ليلى بالون الاصفر ده ...عشان كوباية العصير :ي ده انا قلت هلاقى مصيبة :]

هو ده كده اكتر محرج اتعرضتله :| ده انا على كده بقى مصفحة

يا جماااعة اللى عايز يقرا هو كاتب ايه بالاصفر يعمل عليه شادو بالماوس :ح

وان شاء الله ربنا يرزقك بالزوجة الصالحة و تجيبوا شناكيب صغيرين:)

تحياتى

Miss Egyptiana "Trapped Soul" يقول...

هناك سؤال لفت نظرى فى التاج

هل انت مسلم؟ ليه؟

مفهمتش... لقد قرأت هذا الموضوع عند alien

بس اول مره اشوفه واعتقد انه سؤال شخصى جدا ويجب حزفه من التاج لان الدين حرية شخصية مش حاجة عامة نتكلم فيها مع الآخرين

وبعدين يعنى ايه ليه... ايه الاجابة المتوقعة لسؤال زى ده ... يعنى اقول الله اكبر اعز الله الاسلام، ولا اقول دقت اجراس الكنائس انشادا للرب يسوع؟؟؟!!!!!! ما هو اكيد كلنا على دين الاولين... عشان اتولدنا كده
سؤال ليه ده مفهوم لو الشخص قام بتغيير ديانته مش شخص مولود وعايش كده هو واهلة السابقين والقادمين

معلش طولت شويه يا شنكوتى بس عن جد السؤال مستفز

بمناسبة التاجات ... قرات احدهم عند حفار القبور... واستمتعت بالاسئلة كما استمتعت بالاجوبة... فهكذا يجب ان تكون التاجات... عميقة الفكر، ولها علاقة بعالمنا الافتراضى الذى نعيش فيه... عالم التدوين السحرى

http://bayto4.blogspot.com/2006/09/blog-post.html

اسفه مرة تانية يا عزيزى الشنكوتى وفى انتظار المزيد منك

reri يقول...

زعلانه منك يا شنكوتي
بقي كده ما تسألش عليا وأنا غايبه
ماشي
طيب
بس إيه التاج ده عارف أنا طلعت زي مين من القاده في التاج ده
أينشتين
شفت بقي
يا كلينتون يا بتاع مونيكا
ربنا يوفقك ويحقق لك كل أحلامك

سلامااااااااااااات

الشنكوتي الكبير يقول...

عصفور المدينه
تسلم يا ريس
ربنا يكرمك ويبارك فيك وفي اسرتك
تحياتي وشرفتني
___________
نرمين
متشكر على الدعوه الجميله
بس يعني ليه الفضايح دي لازم تقوليلهم على اللون الأصفر
عموما يا ستي متشكرين نردهالك في التاجات نورتيني
وشرفتيني
وابقي حلي التاج انتي كمان
________________
miss egyptiana
يا جميله انتي ليه بتعتذري عن كلامك انا عجبني رأيك ويا ستي كفايه نورتينا
انا معاكي في نقطة انه سؤال عجيب بس انا فكرت في الموضوع ده قبل حضرتك بسبب اكتر من سؤال شوفتهم في التاجات عارفه لقيت بعد تفكير عميق ان التاجات معظمها مسروقه ومترجمه من تاجات اجنبيه ولأن عندهم الدين حاجه مهمله واللي بيختار دين جديد بيكون ليه اسبابه
انا المره دي اللي طولت عليكي
بس بجد نورتيني وكالعاده تعليقك جميل
____________________
ريري
انا اسف جدا يا ريري وعارف اني مقصر معاكي ومع كل احبابي المدونين بس ظروف قفل النت عندي في الشغل بتخليني قليل لما اعرف افتح النت بالليل من البيت
لكن ليكي عندي حق عرب عشان انا مش سألت عليكي يا عسوله
تحياتي
سلااااااااااااااااااااام

keda-sponser يقول...

خبر عاجل تعلن الصحف المصريه عن ظهور شنكوتي بعد أختفاء لمده أسبوع

أنت فين يا راجل ؟

أنا شايف أن التاج ده حاجه محرجه قوي ... بس حاضر هجاوب عليه بإذن الله

عجبني قوي موقفك و أنت قاعد مع حسني مبارك ... ربنا معاك

سلاااااااااااااااااام

طهقان يقول...

حلو يا شنكوتي


بس

هو في حوازة غير تقليدية!



انا شايف وجوه جديدة
حاسة بابتسامة امل


أنسو

اجندا حمرا يقول...

عزيزي شنكوتي
ازيك؟يارب تكون كويس
ربنا ياسيدي يبعتلك بنت الحلال
عرفني التاج و اجاباتك بيك اكتر و علي فكره انا متفقه مع ميس ايجيبسيانا في موضوع سؤال الدين
في التاجات نحاول اننا نركز في حاجات عن الشخصيه و نحط موضوع الدين علي جنب مش عشان مش مهم بس عشان الدين و العبادات حاجه بين الشخص و ربه و ليها قدسيه خاصه
طولت عليك معلش بس بحب احييك و ادعيلك بالتوفيق ياجميل

الشنكوتي الكبير يقول...

كده سبونسر
تسلم يا غالي على السؤال
لكن في ظروف اليومين دول مانعاني عن التدوين والمدونات حتى التاج ده كان درافت من فتره
عموما تسلم يا صديقي
واتمنى تكون بخير
___________________
طهقان
اعتقد دي اول مره تنورني في المدونه
اما حكاية انسوا التفاؤل والأمل فأنا اوعدك اني خلاص فقدت كل امل الدنيا متلخبطه قوي
نورتني
__________________
اجنده حمراء

وحشتيني قوي يا جميله
معلش غبت عنكوا كتير بس الظروف
عموما انا برده متفق معاكي انتي وميس ايجيبتيانا على رأيكم وانا رديت عليها وقلت ليها التعليل للموضوع ده من وجهة نظري
بس كفاية انك نورتيني يا جميله
بجد وحشني كلامك وكلام كل المدونين اصحابي
تحياتي ليكي
وزي كل مره دائما بتختاري اروع الصور ليكي
سلااااااااااااااااااااااااام

امرأة من عبير الورد يقول...

التاج دا حاجة لذيذة سعات بيجيب اسئلة مش متوقعة ....
عجبتني اجاباتك "الدبلوماسية "سيب نفسك و أنطلق ... أنا كمان زيك بفكر في جوازة مطرقعة...و ساعت الفرح حقلبه مراجيح ؟...

ولــــــــــو يقول...

عجبني ان ردودك كانت طبيعيه وعقلانيه
بس ازاي عندك اختين اسمهم هبه هما توأم ولا ايه
لا بجد مش فهمت بس على العموم ربنا يخليهملك
وعلى فكره انت شخصيه طيبه وسعيد بمعرفتك ان شاء الله ندخل كلنا الجنه

Amr Ahmed يقول...

ايييييييييه يا عم

كل ده هتعمله بمليون ونص

هما مليون ونص يورو ولا ايه

Doba يقول...

بقى كده أول لما اجى الاقى تاج بيتخبط فى وشى

متشكرين يا عم الحاج - وهردهالك انشاء الله

ربنا يرزقك بالزوجة الصالحة يارب
ثم هو انت كده دايما فطس - عاوز عصير ليك ولصحابك كمان - حاجة تطهق

تمنياتى بكل الحب عزيزى ايهاب
هبة

قلوب حائرة يقول...

ايهاب اجابتك لزيزة خالص وربنا يكرمك ويحققلك كل ما تتمناه وشكرا لداليا الجميلة واللي انا بموت فيها انها عرفتنا بايهاب شوية عن الاول تحياتي لك وابقى شرفناي افندم

وينكى يقول...

على فكره انا كمان عملت الاختبار ده وطلعلى صوره الجدع ده
قال ايه انا بحب اكون بؤرة اهتمام
بس انا اكيد مش هاحب مونيكا
على فكره
انا عامله تجمع بلوجرى جامد جدا بمناسبة نجاحى وتخرجى على خير
التفاصيل على مدونتى الصغنونه..اللى من غير فذلكه

الشنكوتي الكبير يقول...

امرأه من عبير الورد
نورتيني يا ارق مدونه
عموما انا كمان بحب التاجات بتخلي الناس تقول حاجات مستخبيه جواها كتير
عموما نورتيني وياريت تحليه انتي كمان عشان تقع منك منك نقطتين عطر
انتي عطرتي المدونه كلها
______________________
ولو
نورتني يا باشا
وشكرا على ردك الطيب
نورتنا
__________________
عمرو احمد
نورت انت وحشتني ووحشتني تعليقاتك عامل ايه اتمنى تكون بخير
_________________
قلوب حائره
ربنا يسعدك مع العسل اللي هاتتجوزيه
وتسلمي على ردك اللذيذ يا جميله
نورتيني يا
رقيقه
__________________
وينكي
فينك من زمان
نورتيني
وادينا طلعنا زي بعض شبه كلينتون
هاحاول اشوف مدونتك عشان التجمع ده
تحياتي
سلاااااااااااااااااااااااام

الشنكوتي الكبير يقول...

دوبه
حمد الله على السلامه يا جميله
وحشتينا
انا عرفت انك مش انبسطتي عشان حاجات كده زعلتك معلش
كان عندي اسئله كتيييييييييير ليكي وكلام وحكايات
مش عارف ابتدي بأيه المهم انك رجعتي بالسلامه
نورتي مصر
فين يا بنتي الهريسه
سلااااااااااااااااااااااااااام

Antony يقول...

حلوة التاجات أوي ،وردودك عليها جميلة ،وبصراحة واضح إن صورة كلينتون لايقة عليك ، خصوصاً بعد ما قلت إنك بتحب البنات علانية كده ، عموماً خد بالك من نفسك بعد كده ، وابقي سلم لي علي ....... كلينتون

مريم يقول...

انا عارفاك طماع وممكن تطلب من مبارك اسكندرية
بدال ما تقول اتف عليه ولا اديله قلمين ان شاللله بلموطى
ماشى يا هوبا

الشنكوتي الكبير يقول...

انتوني
ازيك يا كينج
عامل ايه
انا قولت بحب البنات عشان انا فعلا بحبهم سواء مزز حلوه او حتى الأطفال الصغيرين بموت فيهم كلهم
نورتني يا باشا واتمنى محدش يقفشني زي ما قفشوا كلينتون
______________________

مريم
ازيك يا اسكندرانيه يا قمر عامله ايه وبعدين يعني عايزين اهجص عليكم واقول اني هاضربه عشان اتقفش واروح في داهيه
عايزه تخلصي مني يا سوسه
لعلمك انا قاعد على قلبك لحد ما تعزميني على السمك
سلااااااااااااام

shahy يقول...

اية يابني حكاية التاجات دي
دة انا شفت كمية تاجات يا خبر ابيض
بس التاج بتاعك قصير قوي كدة لية

والا انت طنشط باقي الاسئلة
اعترف وقول الحق

عموما ردودك كانت كلها حلوة

بس انت طلعت لئيم شوية
علشان مجاوب على السؤال بتاع الموقف المحرج باللون الاصفر

عمتنا يا عم الشنكوتي بس على مين عرفت اقراة برضة

سلااااامات

Doba يقول...

ايه هننام فى الدرة ولا ايه
على رأى عبده محتاس - العنكبوت ابتدى يسرى فى المنطقة - حبة مبيد حشرى بقى يابنى ونور المدونة بكتابة جديدة

طلقتين فى الجو ليك يا باشا على البوست الجديد مقدما

مستنية أهو
هبة

Dalia يقول...

ايه ده ؟؟
معقوله انا ماردتش فى البوست ده
انا بحسب نفسي رديت من زمان تصدق ؟

اجاباتك كلها لذيذه اوى يا ايهاب

و فين بوستاتك الجديده ؟؟

يلا بسرعه بقي مستنين اهو

Dalia يقول...

بقي كده يا ايهاب عاوز تشوفنى ظابطه فى الجيش و اصحى الفجر كمان

عاااااااااااااااا

ماشى يا سيدى الله يسامحك
مش كفايه ان انت متأخر على الرد بتاع التاج و كمان بتتكلم
طيب
:@